लूका 23

पिलातुसो द्वारा येशुहू प्रश्न

(मत्ती 27.1-2,11-14; मरकुस 15.1-5; युहन्ना 18.28-38)

1तोये वेगीई मिटीग उठित तियाहा आगाडी पिलातुसो लेत आव्ये. 2ओ कोत तियापो दोष लागाडीला लागाडीत “आमाहा याहा माहुंहु बहकवतांना, अने कैसराहा को आपलो नाहा नकार कहात्याहा अने आपाआ माह ख्रिस्त, अने राजा कोत्ले ताहा होमल्यु.” 3पिलातुसो वांही येशुहू फ़ुस्ल्याआ, “नाहाकोत तू यहुदीयाहा राजा होय?” तिये तियाहा उत्तर आप्लु, “आपु कोतेहे तेहलूज.” 4तोये पिलातुसो वांही मुख्य याजकाहा अने माहुंहु कोयु, “माहु याआ महांआ माय कोड्लूच दोष देखायू नाहा.” 5पोन ते फाशी दृढ तेणे कोहू लागाडीत, “ओ गालीला पोरोत ईहि पर्यंत, आखेज यहूदिया माय उपदेश कोत माहुंहु भडकावतालु.” 6ओ होमलित पिलातुसो वांही फ़ुस्ल्याआ, “नाहाकोत तो मांहु गालीली होय.” 7अने ओ होमजीत का तो हेरोदाआ रियासत होय, तियाहा हेरोदाहा जागे मोकलित आप्लु काहाके तियाअ दिहे मायतो पण यरुशलेम मेहे ओतु.

येशुहु हेरोदेसो जागे मुकल्या

8हेरोद येशुहू लीत जास्तीज प्रसन्न ओवयू, काहाके तियाहा जाअखो दिहे पोरोत येशुहू पालीलो ओते याआ याकोअता का तियाआ विषयाम होमल्यु ओते, अने तियाआ त्यापोरोत किबी चिन्ह पालीला आशा मेकीत ओतु. 9तोत्याला जाअखो गोठी फुसीत रोला, परंतु तिये तियाहा कोडामे उत्तर आप्लु नाहा. 10मुख्य याजक अने शास्त्री उभे रोत तिये मोनामोरोत दोष लागाडीत रोल्या. 11तेहलाम हेरोदावाही आपाआ शिष्याआरी तिया अपमान कोईत थट्टा उडाळी, अने भडक कापडो कालीत तियाहा पिलातुस जागे मोकलित आप्लु. 12तियाआ तेदीही पिलात अने हेरोद हेगांति बोणीत गोये याआ पहीले ते एक दिहराआ दुश्मन ओते.

पिलातुसो द्वारा येशुहू मृत्यु दण्ड

(मत्ती 27.15-26; मरकुस 15.6-15; युहन्ना 18.39-19.16)

13पिलातुसो वांही मुख्य याजकाहा अने अधिकाऱ्याहा अने माहुंहु हादीत तियाहा कोयु, 14तुमु आव मांहाहा माहुंहु बोहकवनारू ठेरवीत माआ जागे लेत आवल्यो होय, अने पाला, आय तुमाआ आगाडी तियाआ तपासनी कोअयी, पण ज्या गोठी चा दोष तुमु तियापो लागाड्यू होय तियाअ गोठीइ विषया माय आय तियाआ माय कोडलूच दोष पाल्यू नाहा; 15हेरोदावाही पण नाहा, काहाके तिये तियाहा आपाआ जागे मोकलित आप्लु होय अने पाला, तियाआ त्यापोरोत एहलो किबी उवे नाहा का तो मोईतगोल्यू च्या डेगार योग्य ठेरविल्या जाय. 16याआ हेगालीही आय तियाहा माआदे आपुहू लागाडी सोडीत आपोहो. 17पिलात तीवाराआ वेले तियाआ कोअता एक बंदिही सोडुहू लागतो ओतो. 18तेहलाम आखे मिलून आअडू लागाडीत, “याआ काम सेलीत टाक, अने आमा याकोअता बरब्बाहा सोडीत आप.” 19तो कोडला होमला डगलीई कारनोवाही जो नगरामे ओवयू ओतु, अने माईला कारनोवाही नगरामे ओवयू ओतु, अने माईला कारनोवाही जेलूम कोअमे टाक्यू गोल्यो ओतु 20पण पिलातुसो वांही येशुहू सोडिलो इच्छा लेतजा फासी माहुंहु होमजाव्ये, 21परंतु ते आयडीत कोयु, “तियाहा कृसापो सोड्विजी, क्रूस उपो.” 22तिये तिसरीवेले तियाहा कोयु, “काहा, तिये कोठले वाईट कोल्यु होय? माहु तीयाम मोईला शिक्षाआ, काहाके कोड्लीस गोठी देखल्यी नाहा याआ याकोअता योग्य आय तियाहा माआदे खाहू कालीत सोडीत आपोहो.” 23परंतु ते आयडीत-आयडीत फासाडी लागित गोये का तो क्रूस उपो सोडल्या जावा अने त्याआं आअडीलो यशस्वी उवे. 24आखरी पिलातुसो वांही आज्ञा आप्यी तियाआ विनती नुसार कोल्यु जावा. 25तिये तियाअ मांहाहा जो दंगु अने माईला कारनोवाही जेलूम कोअमे मेकल्या गोयू ओतु, अने ज्याहा ते मागित ओते, तियाहा सोडीत आप्लु अने येशुहू तियाआ इच्छा नुसार होफहोपिन आप्लु येशुहू वधस्तभावर सोडव्या जाअलो.

येशुहू क्रूस पोओ सोडाव्ये

(मत्ती 27.32-44; मरकुस 15.21-32; युहन्ना 19.17-19)

26जाहा ते तियाहा लेतजात ओते, तेहलाम तिये शिमोन नावाआ एक कुरेनी जो गावोमेरोत आवीत ओतु, तोईत तियाआ उपो वधस्तंभ पारमेक्यू का तियाहा येशुउ फासाडी-फासाडी लेत आवे. 27लोकांची वोडी गोर्दी तियाआ फासाडी आवयी अने तीयाम जाअखो बोई पण कोयु ज्या तियाआ याकोअता छाती ठोकीत अने शोक कोईत कोयु. 28येशु तियाआ जागे पालीत कोयु ओ यरुशलेमाआ पोरीही, माआ याकोअता रोडा नाहा परंतु आपाआ याकोअता अने आपाआ पोऱ्याहा याकोअता रोडा. 29काहाके पाला, तेदीही आवीत होय तीयाम मांहे कोय धन्य ते वांझ होय अने न ठाल्ली पोडली पोटांआ, अने ते दुध जिये दुध पिवाड्यो नाहा. 30तिया वेले “ते डोगोहो कोहू लोगे का आमा उपो गुगदा, अने टेबाहा कोत आमाहा टापा. 31काहाके ते निलो सांडोओ आरी एहलो कोअता ताहा ते उगालू आरी नाहाकोत कोअही?” 32ते दिहरे बेन माहुहुं पोन जे पाप कोईत ओते तियाआ आरी घात कोइला याकोअता लेत गोये. 33जाहा ते तिया जाग्तली ज्याहा कवटी कोयो ओते तीइही पुग्या, तेहलाम तिये तीइही तियाहा फाशी तियाअ खराब काम पण एकाहा हाजाडी जागे अने दिहीराहा देखाडे जागे वधस्तभावर सोढविलो. 34तेहलाम येशु कोयु, “ओ ओबा याहा क्षमा को, काहाके याहा मालुम नाहा का ओ नाहाकोत कोईत होय.” अने तिये चिठ्या टाकीत तियाआ कापडे वाटीत लेधलो. 35मांहे उभे रोत पालीलो ओते, अने मुख्य याजक पण थट्टा कोईत कोयु ओते तिये दिहराहा वाचाद्योहो, केधी परमेश्वर तिया निवाडल्यु होय ताहा खुदोहो मसीह वासाडीत ले. 36शिपाई पण जागे आवीत अने तियाहा आंब आपित तियाआ थट्टा कोईत कोयो ओते, 37तू यहुदीयाहा राजा होय ताहा, खुदोहो वासाड. 38अने तियाआ जागे एक दोषपत्र पण लागाडले ओते ओ यहुदीयाआ राजा होय.

क्रूस पोओ मन फिरावनारु डाखू

39जे अपराधी तीइही जे टाग्यो ओते, तियाआ मायत्या एकाने तियाआ निंदा कोईत कोयु, “कि तू ख्रिस्त होय ने? ताहा खुदोहो अने आमाहा पण वासाड.” 40याआ याकोअता दिहरा तियाहा बावराईत कोयु, कि तू परमेश्वरोओ पण बित नाहा? तू पण ताहा तोज दंड भोगित होय, 41अने आमाहा ताहा न्याय नुसार दंड भोगित होय, काहाके आपाआ कर्मा कोअता फोल भोगित होय; पण तिये किबी गुन्हू नाहा कोअयु 42तेहलाम तिये कोयु, “ओ येशु जाहा तू आपाआ राज्याम आवजी, ताहा माआ ओर मेकही.” 43तिये तियाहा कोयु, “आय ताहु खोरोज कोत्लू होय का आज तू माआआरी स्वर्ग लोकुमे रोही.”

येशुउ जिव सुडलोओ

(मत्ती 27.45-56; मरकुस 15.33-41; युहन्ना 19.28-30)

44जागे पास दिहरा सुमारास तिसऱ्या सुमारा पर्यंत आखे देश मेहे आंदारो पोडीत गोल्यो, 45अने दिहाआ उजालो गायब ओवयू, अने मंदिराआ पडदु पोरापोरा फटीत गोयू, 46अने येशु वोडा आवाजोमें आयडीत कोयु, ओ ओबा, “आय माआ आत्माआ ताआ आथे सोपतो.” अने ओ गोगीत आपाआ जीव सोडयु. 47सुबेदार जे किबी उवे ते पालहु परमेश्वरोओ गौरव कोल्यु, अने कोयु “निच्छित ओ मांहु धोर्मी ओतु.” 48अने गोर्दी जी ओ पालाहू एकठे जोम्यी ओती, आव ऐहेलो ओवलो पालहु छाती ठोकीत निहित गोयी 49अने तियाआ ओलखीइ, अने जे बोई गालीलोमरोत तियाआ आरी आव्ये ओते, सेटे उबे रोत पालीत कोयु.

अरिमितिया युसूफो द्वारा येशुहू गाडलोओ

(मत्ती 27.57-61; मरकुस 15.42-47; युहन्ना 19.38-42)

50तीइही योसेफ नावाआ महासभेचा एक सदस्य ओतु तो सज्जन अने धोर्मी माहुहू ओतु 51अने तियाआ योजना अने तियाआ आव कानोवाही प्रसन्न नोतू तो यहुदीयाआ नगरामे अरिमतियाचा रोनारू अने परमेश्वरोओ राज्याआ वात पालतारण ओतु. 52तिये पिलातुसो जागे आवीत येशुउ डील माग्ये, 53अने तियाहा उतारीत मखमलाआ सादराम गुढाळीत, अने होमला कबरे माय मेक्ल्ये जी डोगोपो खुईतमेक्ल्यु ओती अने ज्याम केधीज कोडोबी मेक्ल्ये गोये नाहा. 54तो तीयारी कोअला दीही ओतु अने शब्बाथ सुरु उविला ओतु. 55तियाअ बुईही जे तियाआ आरी गालीला मेहे आवल्या कोयु, फासाडी-फासाडी जात तियाअ कबरेहे पालील्यो, अने तियाआ डील केहला प्रकारे मेक्ल्ये गोये होय. 56तेहलाम ते जात सुगन्धित वस्तू अने सुगंदिते तेल तीयार कोल्यु; अने शब्बाथआ तेदीही तिये आज्ञा च्या नुसार विसाक लेदि.

Currently Selected:

लूका 23: NOINT

Highlight

Copy