लूका 17

चेतावनी

(मत्ती 18.6-7,21-22; मरकुस 9.42)

1फासाडी येशु आपाआ शिष्यांआ कोयु, “ओवुहू नाहा शकत का अडखळण नाहा उवे; परंतु हाय तियाअ मांहुंपो ज्या कारनोवाही ते आवत्ले. 2जो आव हनामोरोत पोरोत कोडा एकाहा अडखळण लाविले होय तियाआ याकोअता ओच हाजो होय का, कोअटी तेलो तियाआ गोलाम बांधीत तियाहा समुद्राम टाकीलो. 3सावध रो; केधी ताआ पाही अपराध कोअही ताहा तियाहा होमाजळ, अने पस्तावू कोऐ ताहा तियाहा क्षमा को. 4केधी दीही भरात तो सात अपराध कोअही अने हेगांति वेले ताआ जागे फासी आवीत कोअही, आय पस्ताव्यु होय; ताहा तियाहा क्षमा को.”

तुमाआ विश्वास केतु वोडू होय?

5तेहलाम प्रेषिताई प्रभूहु कोयु, “आमाआ विश्वास वोडाव.” 6प्रभूऊ कोयु, केधी तुमामे मोहरी दाना आरी पण विश्वास होय ताहा, तुमु आव तुतीई सोडोहो कोआ का मुलामोरोत उपटीत समुद्राम लागित जा, ताहा ते तुमाआ होमल्यु ओते.

उत्तम सेवक

7तुमामेय एहेलू कोडू होय, ज्याचा दास ओल जुपत्लु अने मेडांहा सारत्लू, अने जांहा तो खेतामेरोत आवयू, ताहा तियाहा कोआ, वेगु आवीत रोटू कोअला बोह? 8अने ओ कोहू नाहा, माआ रोटू तीयार को, अने तोपोरोत आय खाय पीय तोपोरोत कोमोर बाधित माआ सेवा को; याआ फासाडी तू पण खात पित कोईत ले? 9नाहाकोत तो तियाअ सेवकाआ उपकाराआ मानीही का तिये तोज काम कोल्यु ज्याआ आज्ञा आप्यी गोयी ओती? 10आव रीतीवाही तुमुभी आखे कामोहो कोईत टाका ज्याआ आज्ञा तुमामे आप्यी गोयी ओती; तेहलाम कोआ, आमाहा खाली दास होय; जे आमाहा कोअला जोवे ओते आमाहा फक्त तोज कोल्यु होय.

एक कोड़ीई आभार

11एहलो उवे का ते यरुशलेम जागे जात ओयताहा शमरोनाम गालीला मायरोत जात ओतु 12कोडला होमला गावून प्रवेश कोइलाआ टायमोमें दहा कुष्ठ माद्वाड्यो मिल्ये. 13तेहलाम सेठुज उभे रोत उचो शब्दाम कोयु, ओ येशु, “ओ स्वामी आमापो दया को.” 14तिये तियाहा कोयु, जा, अने माह याजकाहा देखाव. अने जाता-जाता ते शुद्ध उवे. 15तेहलाम तियामेहे एकओ पालीत आय हाजू ओवयू होय उचो शब्दा माय परमेश्वरोओ गौरव कोईत फासी आवयू; 16अने येशु च्या गुडापो उबडू पोडीत तियाआ आभार महांआ; अने तो सामरी ओतु. 17याकोयईत येशु कोयु, “नाहाकोत दहा शुद्ध उवे नाहा, फासाडी ते नऊ का होय? 18कि याआ दिहरापोरोत फाशी कोडूच निघाल्यू नाहा जो परमेश्वरोओ गौरव कोअही?” 19तेहलाम तिये तियाहा कोयु, “उठित निहित जा; ताआ विश्वास ताहु हाजो कोल्यु होय.”

परमेश्वरो राज्यो प्रगट ओवलोओ

(मत्ती 24.23-28,37-41)

20तेहलाम परुश्यांहि तियाहा फ़ुस्ल्याआ का परमेश्वरोओ राज्य कोयो आवे, ताहा तिये तियाहा उत्तर आप्लु, “परमेश्वरोओ राज्य दृश्य रुपात आवीत नाहा.” 21अने मांहे ओ नाहा कोअही, “पाला, इही होय, नहाते तीइही होय; काहाके पाला, परमेश्वरोओ राज्य तुमाआ माय होय.” 22फासाडी तिये शिष्यांनी तियाहा कोयु, “तो दीही आवे, ज्याम तुमु माअहा पोऱ्याच्या दिहोमे एक दिह्याहा पाल्हू इच्छिता, अने नाहा पाल्हू सेकेहे.” 23मांहे तुमामे कोय, पाला तीइही होय नहाते, पाला तीही होय परंतु तुमु निहित जाऊ नाहा अने तियाआ फासाडी जाऊ नाहा. 24काहाके जीही विग जुगाहा होमला जागेरोत निहित दिहरा सेटे सोमकीनारी, तेह्लुज माअहा पोऱ्या पण आपाआ दिहोम प्रकट उवे. 25पोन पहीले आवश्यक होय का तो जाअखो दु:ख वीसही अने तियाअ कालोओ मांहे तियाहा तुच्छ माने. 26जेहलो नोहाआ दिहोम उवे ओते, तेहलूज माअहा पोऱ्याच्या दिहोमेभी उवे. 27ज्या दिहे पर्यंत नोहा जहाजोमे सोढयू नाहा, तियाअ दिहे पर्यंत मांहे खायलो पीत ओते, अने ते वेहवाल कोईत ओते तेहलाम पाई पोअयोजोर आविलो तियाअ आखाहा नष्ट कोल्यु. 28अने जेहलो लोट च्या दिहोम उवे ओते अने मांहे खायलो पीत ओते, लेआलो आपही कोईत साडे लागाडीत ओते को बांधित ओते; 29पोन तिया तेदीही लोट सदोम मायरोत निघाल्यू, तियाअ तेदीही आग अने गंधक जुगोमोरत पोड्यी अने आखाहा नष्ट कोईत आप्लु. 30माअहा पोऱ्याच्या आविलाआ तेदीही पण ऐहलेच उवे. 31तिया तेदीही जो कोअलापो होय अने तियाआ एकहरको कोअमे होय तो तियाहा घेण्यासाठी जाऊ कायना; अने ऐहलेच जे खेतोमे ओये ते फासी जाऊ कायना. 32तिया लोटाआ लाडीही स्मरण मेका. 33तिया जो कोडु आपाआ जीव वाचाआडयो पालत्लू तो तियाहा वासाड़े, अने जो कोडु तियाहा वासाड़े तो तियाहा जिवंत मेके. 34आय तुमामे कोत्लू, तियाअ राती बेन मांहु एकाच खाटलापो होय; एक लेदो जाइअलो अने दिहरू सोडीत आप्यू जाइअलो. 35बेन बोई एक आरी जात्यावर दोईत होय, एक लेदिओलो जाइअलो अने दिहरी सोडीत आप्या जाइअलो. 36बेन जोओ खेतोम होय एक विसात जाय अने दिहरू रोतजाय. 37ओ होमलित तिये तियाहा फ़ुस्ल्याआ, “ओ प्रभू ओ का उवे,” तिये तियाहा कोयु, “जीही प्रेत होय तीइही गरुड जोमुहू.”

Currently Selected:

लूका 17: NOINT

Highlight

Copy