लूका 15

टाकाला मेंडाआ दृष्टांत

(मत्ती 18.12-14)

1ओमे जांहा जकातदार अने पापी आखे येशुउ ऐकावयास त्याजागे आवीत ओते. 2तेहलाम परुसी अने यहुदी धर्म शास्त्री बडबड कोईत कोयु, “ओ माहहू ताहा पापी महुअ स्वागत कोईत होय अने तियापो रोटू कोईत होय” 3यापो येशु तियाहा ओ दृष्टान्त होमलावल्यो, 4सोमजा तुमामेरयू कोडाही होव मेंढे होय अने त्यामेरोत एक अटकालू ताहा नाहाकोत तो नव्याण्णव मेंढे जंगलूम सोडीत ते टाकाली फासाडी जाइअलो जोपोरोत ते जोडनारू नाहा? 5फासाडी ते मेंढो तियाहा जोडत्लो तेहलाम तियाहा आनंदावाही तियाहा आपाआ खांदापो विसित लेहो, 6अने जांहा तो कोआ फासी जात्लू तेहलाम आपाआ दोस्ताहा अने जागऱ्याहा जागे हादीत तियाहा कोत्लू, माआरी आनंद को काहाके माआ टाकाईत रोल्ये मेंढो जोडल्यो होय. 7आय तुमामे कोयु होय ह्याप्रमाणे कदोएक मोन बोदलीणाराआ पापी याकोअता, तियाअ नव्याण्णव नीतिमान माहूपेक्षा, ज्याहा बदलाविलाआ गरज ओतली नाहा होर्गाम आनंद कोअयु जाइअलो.

टाकाला सिक्काआ दृष्टांत

8काहाके सोमजा कोडु बुई होय जिआरी दहा सांदीई सिक्के होय अने तीई एक सिक्का टाकाइतलो ताहा नाहाकोत ती दिवू लागाडी कोअमे जीवताहा बाईत रोही अने लक्ष आपित होदित रोही जोपोरोत ते जोडित नाहा? 9अने जांहा तीही ते जोडे तेहलाम ती आपाआ दोस्ताहा अने जागऱ्याहा जागे हादीत कोअही, माआरी आनंद को काहाके माआ शिक्का जो टाकाईतगोल्यू ओतु तो जोड्यू होय. 10आय तुमामे कोत्लू का ह्याप्रमाणे एक मोन बदलावणाऱ्या पापि कोअता पण परमेश्वरोओ स्वर्गदूत हजर त्याजागे आनंद कोअयु जाइअलो.

उजाड्या सुआआ दृष्टांत

11फासाडी येशु कोयु, “होमला माहांआ बेन पोऱ्ये ओते” 12हानू पोऱ्यामूळे आपाआ बाह्हाहा कोयु, “जी धनदौलत माआ वाटांम होय ती धनदौलत माहु आपित आप,” तेहलाम बाह्हू आपाआ बेनु पोऱ्याहा धन वाटीत आप्यी. 13ओमेजा जाखो वेल उवी नाहाओती, का हानू पोऱ्यामूळे आपाआ धन लेदि अने सेटे तियाहा जाहू निघाल्यू, अने त्याजागे मज्याकोली कोईत आपाआ आखे धनदवलत वेरित टाक्यी. 14जांहा तियाआ आखे धनदौलत सेलाई ओती तोयोज तियाअ तियाहा भिवाडनारू दुष्काळ पोडीत ओतु तेहलाम तो ओडसोणीम रोहू लाग्यू. 15याकोअता तो तियाअ तियाहा कोडा माअहाही जात मोजरी कोहू लाग्यू तिये तियाहा आपाआ खेतुम हूवरे सरीलाकाजे मोकलित आप्लु. 16त्याजागे तिये विचार कोअयु का तियाहा हेंग्यू खॉआलाकाजे जोडीत, जे हूवरे खायलो ओते परंतु कोडु तियाहा एक हेंग्यू पण आप्यी नाहा. 17फासाडी तियाहा जांहा तो शुद्धीपो आवयू तेहलाम बोलतुल्यो, माआ बाह्हारी एहलो केते मोजऱ्यो होय तियापो खात पण उगरेहे अने आय इंही फुकल्यो मोईत होय. 18ओमे आय ईहिरोत माआ बाह्हाही जालो अने तियाहा कोयु, “ओबा आय होर्गाहा परमेश्वर अने ताआ बद्दल पाप कोल्यु होय” 19ओमे आगाडी आयताआ पोऱ्या कोओला योग्य नाहा माहु आपाआ मोजऱ्यो होमजीत मेकीत ले.

उजाड्यु सुउ वापस आवयु

20तेहलाम तो उठित आपाआ बाह्हाही निघाल्यू ओमे तो किबी अंतर सेटए ओतु, तेहलाम तियाआ बाह्हू तियाहा पालील्यो, अने तियाआ बाह्हाहा तियापो जाखो दया आवयी तेहलाम तो गुगदीत जात तिये आपाआ गोलाम गोलु कालीत तियाआ मुक्कु लेधलो. 21“पोऱ्यामूळे आपाआ बाह्हाहा कोयु, ओबा, आयताआ नजरोवाही अने होर्ग्याआ विरूध पाप कोल्यु होय आय ओमे तुमाआ पोऱ्या कोओला योग्य नाहा” 22परंतु बाह्हू आपाआ सेवकोहो कोयु, वेगु हाजो कापडे लेतआव अने याहा ते काला तियाआ आथोमेहे अंगठी अने गुडामे चप्पल काला 23मातीत एहेलू जनावरे घेऊन वाडा तियाहा खात आपु आनंद कोहू. 24काहाके जो माआ पोऱ्या मोल्यु ओतु, ओमे जेहलो जिवंत ओवयू होय, ओ टाकायू ओतु पण ओमे तो जोड्यू होय, तेहलाम ते आनंद कोहू लागाडीत.

वोडा बेटाह्हाआ शिकायत

25ओमे तिया वोडू पोऱ्या खेतुम ओतु, जांहा आवयू अने कोओ जवळ पुगीतगोयू तेहलाम तिये गाण्या नाचीलाआ आवाज होम्लालू. 26तिये आपाआ होमला सेवक हादीत फ़ुस्ल्याआ ओ आखे नाहाकोत जातले होय? 27सेवक तियाहा कोयु, ताआ पाही आवयू होय अने ताआ बाह्हू हाजूहोय अने हाजो पालीत एक मातीत जनावरे वाड्यू होय. 28वोडू पाही जास्तीज रागवूहु तो विसमे जातेच ने ओतू तेहलाम तिया बाह्हू बारथे आवयू अने तियाहा होमजाद्योहो. 29पोन तिये बाह्हाहा उत्तर आप्लु, पाला, आय सालनेसाल ताआ सेवा कोईत आवयू होय आयताआ कोडनीबि आज्ञाहा विरोध कोअयु नाहा परंतु तुमु माहु एक जना बुकडू वरे आप्लु नाहा का आय आपाआ दोस्ताआरी आनंद कोहू. 30पोन जाहा ताआ ओ पोऱ्या आवयू जीआ वेश्यामेहे आपाआ आखे धन खोबाल्ये, त्यांकोअता तू वोडू मातीत जनावरे मारीलो. 31बाह्हू तियाहा कोयु, माआ पोऱ्या, तू कायमो माआ जागे होय अने जे किबी मा आहने होय ते आखे ताआज होय. 32पोन आमाहा खुश उवूंहू जोवे अने तीवर मोनावीलू कोईओलो ताआ ओ पाही जो मोल्यु ओतु ओमे फासी जिवंत ओवयू होय ओ अटकालू ओतु ओमे जोड्यू होय.

Currently Selected:

लूका 15: NOINT

Highlight

Copy