युहन्ना 18

बगीचा मेहे येशुहु तोअया

(मत्ती 26.47-56; मरकुस 14.43-50; लूका 22.47-53)

1येशु ते गोठ्यु कोईत आपाआ चेले आरी किद्रोंन खाडीई पार गोये तीही एक मोलू ओतु तीयाम ओतो अने तियाआ चेले गोये. 2तियाहा तोईत आपणारो यहूदा पण ती जागू मालुम ओती, काहाके येशु आपाआ शिष्यांवाही आरी तीइही जात ओतु. 3जाहा यहूदा, शिपायाआ एक पलटणला अने मुख्य याजक परुसी त्यापोरोत लोगीही घेऊन, फणस अने मशाल अने हथियार लेत तीइही आव्ये. 4तेहलाम येशु, तिया आखे गोठीकोता जी तियापो आविलो ओती होमजीत, निघाल्यू अने तियाहा कोयु, “कोडाआ होदित होय?” 5तिये तियाहा उत्तर आप्लु, “येशु नासरेथला.” येशु तियाहा कोयु, “आय होय” तियाहा तोईत आपणारो यहूदा पण तियाआ आरी उबु ओतु. 6तो एहलो कोतेहे, “आय होय,” तो फासाडी होरकावीत धरतीपो पोडीत गोये 7तेहलाम तियाआ फासी तियाहा फ़ुस्ल्याआ, “तुमु कोडाआ होदित होय” ते कोयु, “येशु नासरेथला.” 8येशुनी उत्तर आप्लु, “आयताहा तुमामे कोत आप्लु का आयुज होय, जर माहु होदित होय ताहा याहा जाऊ दया.” 9ओ याकोअता उवे का ते वचन पुरो ओवो जे तिये कोयु ओते ज्याहा तुयें माहु आप्लु त्यामेरोत मिती एकाहभी नाहा आरवात्गोल्यो. 10तेहलाम शिमोन पेत्राई तलवार, जी तियाआ जागे ओती, आपक्यी अने महायाजकाआ दासोपो लाडीत तिया हुदु कान वाडीत टाक्यू तियाअ सेवकोओ नाव मल्ख ओते. 11तेहलाम येशु पेत्राहा कोयु, “आपाआ तलवार म्यानोम मेका जो कटोरा बाह्हू कोइत माहु आप्यू होय, नाहाकोत आय तियाहा नाहा पीईअलो?”

हन्ना सामने येशु

12तेहलाम शिपाई अने सरदार अने यहुदीयाआ पलटणती येशुहू तोईत बांधीत लेधलो, 13अने पहीले तियाहा हन्नाही लेत गोये, काहाके तियाअ तो वोऱ्ही महायाजक कैफाआ होवरुहुहू ओतु. 14ओ तोज कैफा ओतु, जिये यहुदीयाहा मसलत आप्यी ओती का आमा मांहो कोअता होमला एक जोआ मरण हाजू होय.

पतरस येशुहू उलखुहू इन्कार कोअयु

(मत्ती 26.69-70; मरकुस 14.66-68; लूका 22.55-57)

15शिमोन पेत्र अने एक दिहरू शिष्य पण येशुउ फासाडी गोये ओ शिष्य महायाजकाआ ओलखीइ ओतु, याकोअता तो येशुआरी प्रमुख याजकाआ खोलीमे गोल्यो, 16पोन पेत्र बारथे बाअणाम उबु रोला तेहलाम तो दिहरू शिष्य जो महायाजकाआ ओलखीइ ओतु, बारथे निघाल्यू अने द्वारपालिकेला कोत पेत्राहा ओमे माय लेत आवयू. 17तिया दासीने जी द्वारपालीका ओती, पेत्राहा तेकोहे, “कि तू पण आव मांहाहा चेलामरोत ताहा नाहा ने?” तो कोयु, “आय नाहा होय.” 18दास अने पलटण हेलावांहि कोल्ये पेटाडीत उभे शेक लेत ओते, अने पेत्रस पण तियाआ आरी उबु शेक लेत ओतु.

महायाजको सामने येशु

(मत्ती 26.59-66; मरकुस 14.55-64; लूका 22.66-71)

19तेहलाम महायाजकाने येशुहू तियाआ चेलाआ विषयी अने तियाआ शिक्षण विषयी पूछताछ कोअयी. 20येशुनी तियाहा उत्तर आप्लु, “आय जगो आगाडी उघडी गोठी कोअयी; मिती सभास्थानात अने मंदिरोम जीही आखे यहुदी एकठे उवनारा ओते नेहमी शिक्षण कोईत अने एखलाम किबी नाहा कोयु.” 21तू माहु काहा फुसीत होय? होमलिनाराहा विचार का आय तियाहा नाहाकोत कोयु पाला, तियाहा मालुम होय का मिती नाहाकोत-नाहाकोत कोयु. 22तिये जांहा ओ कोयु, ताहा शिपाई यामरोत एकाने जो जागे उबु ओतु, येशुहू थापाडे देत कोयु, “कि तू महायाजकाहा एहलो प्रकारे उत्तर आपोहो?” 23येशुनी तियाहा उत्तर आप्लु, “जर आय वाईट गोगल्यू, ताहा तियाअ वाइटाआ साक्ष आप; पण जर हाजो कोअयु, ताहा माहु काहा देत होय?” 24हन्नानी तियाहा बाधाल्युज कैफा महायाजकाआरी मोकलित आप्लु.

पतरस येशुहू उलखुहू ईजी इन्कार कोअयू

(मत्ती 26.71-75; मरकुस 14.69-72; लूका 22.58-62)

25शिमोन पेत्रस उभे रोत शेक लेत ओते तेहलाम तिये तियाहा कोयु, “कि तू पण तियाअ चेलामरोत ताहा नाहा?” तो नाकारीत कोयु, “आय नाहा होय” 26महायाजकाआ सेवकोम रोत एक, जो तियाआ परिवार मायरोत ओतु ज्याचा कान पेत्राई वाडीत टाक्ये ओते कोयु, “कि आय ताहु तियाआ आरी मोलाम नाहा पाल्लये?” 27पेत्रस नि फासी नकार कोअयु, अने लागेज कुकडू आअड्यू.

येशुहू पिलातुसो सामने लेतावया

(मत्ती 27.1-2,11-31; मरकुस 15.1-20; लूका 23.1-25)

28तेहलाम ते येशुहू कैफा जागेरोत कचेरीम घेऊन गोये, अने वेगीई ची वेल ओती पण ते कचेरी आरी नाहा गोये काहाके अशुद्ध उवे कोईत पण वल्हाडनाआ खानारू कोहू सेकेहे. 29तेहलाम पिलात तियाआ जागे बारथे निहित आवयू अने कोयु, “तुमु आव मांहुंपो कोडला गोठीई आरोप लागाडीत होय?” 30तिये तियाहा उत्तर आप्लु, “जर तो दुष्कर्मी नाहा ओतलू ताहा आमाहा तियाहा ताआ आथोमेहे नाहा होपित कोल्यु ओते.” 31पिलात तियाहा कोयु, “तुमुज याहा घेऊन जात आपाआ रितीनुसार तिया न्याय ठरवील्यु.” यहुदी तियाहा कोयु, “आमाहा योग्यता नाहा का कोडाआ जीव लेही.” 32ऐ याकोअता उवे का येशुउ ती गोठी पुरो ओवो का जी तियाहा ओ संकेत आपलो वेले कोल्यी ओती का तिया जीव केहलु जानारू. 33तेहलाम पिलात फासी कचहरी गोल्यो, अने येशुहू हादीत तियाहा फ़ुस्ल्याआ, “काहाके यहुदीयाआ राजा होय?” 34येशुनी उत्तर आप्लु, “नाहाकोत तू ए गोठी आपाआ त्यापोरोत कोयु होय का दिहरावाही माआ विषयी ताहु ओ कोयु होय?” 35पिलाताही उत्तर आप्लु, “नाहाकोत आय यहुदी होय? ताआज जातीवाही अने मुख्य याजकावाही माहु ताहु झाझ्या आथे होपित कोल्यु होय, तुयें नाहाकोत कोल्यु होय?” 36येशुनी उत्तर आप्लु, माआ राज्य आव जगोआ नाहा; जर वोडू देश आव जगाआ ओतु, ताहा माआ शिपायाआ लोढाई कोअते का आय यहुदीयाहा आथे होपित नसते ओवयू; पण माआ देश इही नाहा. 37पिलात तियाहा कोयु, “ताहा नाहाकोत तू राजा होय?” येशुनी उत्तर आप्लु, “तू कोत्लू का आय राजा होय आय आव होआता जोल्मो लेदो अने याकोअता जगात आवयू होय का वाटेए साक्ष आपुहू जो कोडु खराआ होय तो माआ शब्द मानत्लू.” 38पिलात तियाहा कोयु, “खोरो कि होय?” ओ कोत तो फासी यहुदीयाही निहित गोल्यो अने तियाहा कोयु, आयताहा त्यापोरोत केधी दोष नाहा लेत.

येशु के बरब्बा

39पोन तुमाआ ए रीतीरिवाज होय का आय वल्हांडनमे आय तुमा कोअता एक माअहुहू सोडीत आपोहो आखरी कि तुमामे मालुम होय का आय तुमा कोअता यहुदीयाचा राजाहा सोडीत आपुहू? 40तेहलाम तिये फासी आयडीत कोयु, “याहा नाहा, पण आमा कोअता बरब्बाहा सोडीत आपा” अने बरब्बा बांड ओतु.

Currently Selected:

युहन्ना 18: NOINT

Highlight

Copy