प्रेरितो काम 5

पवित्र आत्मा सी ठोग्लोओ

1हनन्याआ नावाअ एक माहू अने तियाआ कोवाली सफीरा थोडू जागु वेच्यु 2अने आपाआ लाडीई जाणकारी कोईत त्यामेरयू किबी स्वता जागे घेऊन लेधलो अने किबी धन प्रेषिताआ गुडाजागे मेकल्ये. 3यापो पेत्राई कोयु, ओ हनन्या शैतानाला तू आपाआ मोनुमे याआ गोठीपो काहा जागू आप्यी का तू पवित्र आत्माहा ठोग कोयु, जमीन वेसेत जोडणारो धनामेरोते किबी धन स्वता जागे मेकीत लेधलो? 4ते वेसीला आगाडी नाहाकोत ताआज नाहाओती? अने जांहा तू ती वेसाई तेहलाम ते धन नाहाकोत ताआज अधिकार निमिले? तू याविषयी काहा मोन मेहे विचार कोअयु? तू मांहाहा नाहा परमेश्वरोओ ठोग बोलतुल्यो होय. 5हनन्या लेतजा जांहा ओ शब्द होमल्यु, तेहलाम तो निसे पोडीत अने जीव सोडयु ज्या कोडु याविषयी होमल्यु, आखाहा बित वाटहु लागाडीत. 6फासाडी जुवान माहु आविलो तियाहा विसित अने वेटालीत अने बारथे जात तियाहा पुरोज. 7सुमारे तीन तासावाही जे किबी घोडये ओते ते न मालूमे ओतलू तियाआ लाडी जागे आवयी. 8पेत्राई तीही कोयु, कोअलो, नाहाकोत तुमु तुमाआ खेत एवढाम वेचीअलो? तीही कोयु होय, एवडाम. 9तेहलाम पेत्राई तीही कोयु, तुमु बेन प्रभूउ आत्माआ परीक्षा काहा सहमत होय? पाला, ताआ डोहाहा पुरणाआ गुडू दरवाजापरोत आव्ये होय अने ते ताहु पण घेऊन जाय. 10तेहलाम ती तियाआ गुडाजागे आवित निसे पोड्यी अने मोईत गोयी फासाडी जुवान जागे आविलो तीही मोल्या पालीत विसित लेत गोये अने तिया माती आहाने तीही पुरोज. 11योग्य मंडली अने ज्या कोडु ओ होमल्यु तियाहा जाखोज बित वाटेम.

प्रेरितों द्वारा चिन्ह अने चमत्कार

12प्रेषितांद्वारे माहुंमे जास्तीज चिन्ह प्रकट ओवुहू लागीई अने अदभूत काम कोईत ओते, ते आखे सलमोनाच्या देवडीपाही एकटा ओते. 13तीयाम सहभागी उविला कोडाआ धैर्य उवनारा निमिले तेबी मांहे त्याआं प्रशंसा कोईत ओते. 14तियाअ जागापो प्रभूपो विश्वास कोअनारे बुई अने माहु वोदिते ओते. 15परिणाम स्वरूप मांहे आपाआ रोगी-दुख्यांहा घेऊन खाटलापो अने चादरापो गल्लीम हुवाडो लागाडीत याकोअता का पेत्र तियाअ वाटेमारोत जाइअलो तेहलाम तीयामोरोत काही माहापोओ तियाआ सावलू जेबी पोड्यी तेबी हाजो उवे. 16यरुशलेम जागेरोत नगरामारोत आपाआ अने अशुद्ध आत्माआ त्यापोरोत पीडी माहुंहु घेऊन गटा गटावाही आवहू लागीई अने ते आखे हाजो उवनारा ओते.

प्रेरितोंहो बंदीगृह मेहे टाक्या

17फासाडी महायाजक अने तियाआ आरीई आखे हेगांति म्हणजे आखे सदुकी तियाआ विरोद्धामे उभे रोल्या ते आअडित कोईत पाअये ओते 18तिये प्रेषितांहा अटक कोईत लेधलो अने आखाकोता जेलूम टाक्ये. 19परंतु रातीई समयी प्रभूउ स्वर्गदूतोवाही जेलोई बायणो उगाडीत आप्लु, तिये तियाहा बारथे घेऊन गोयेनतर कोयु, 20“जा, मंदिरोम उभे रो, अने याआ नवो जीवनोबोध्दल माहुंहु आखे कोआ” 21जांहा तिये ओ होमल्यु तेहलाम तिये दीही उजाडताज मंदिरोम प्रवेश कोअयु अने संदेश आपुहू लागाडीत, फासाडी जांहा महायाजक अने तियाआ होबती त्याजागे पुग्या तेहलाम तिये यहुदी संघ तेहलूज इस्राएलो डायु याआ मिटीग लेदि फासाडी तिये जेलूम प्रेषितांहा हादाडये. 22परंतु जांहा अधिकारी जेलूम गोये तेहलाम प्रेषित तियाहा तीइही मिल्ये नाहा तिये फासी आविलो ओ वर्तमान आप्लु अने, 23कोयु, आमाहा तुरुंगाचे सुरक्षाआ तालो लागाडल्यी अने बायनापाही सुरक्षा-शिपाई उभे ओते परंतु जांहा आमाहा दरवाजू उगडालू तेहलाम विसमे आमाहा कोडु देखाये नाहा. 24मंदिराआ शिपाया मुख्य याजक इये जांहा ओ होमल्यु तेहलाम ते त्याविषयी चिंता माय पोडये अने विचार कोहू लागाडीत, ओमे नाहाकोत उवे? 25फासाडी कोडु जागे आविलो कोयु, “ज्या माहु तुमामे जेलूम टाक्ये ओते ते मंदिरोम उभे रोत माहुंहु संदेश आपित होय.” 26मंदिराआ सुरक्षा शिपाया मुख्य आपाआ अधिकाऱ्याआरी त्याजागे गोये अने प्रेषितांहा जुलूम न कोअता फासी घेऊन आव्ये काहाके तियाहा भिईलो ओती का मांहे तियाहा (मंदिराआ हिपायांहा) डोणो माआहि कायना. 27ते तियाहा जागे घेऊन आव्ये अने सर्वोच्च यहुदी महा सभा आगाडी उभे कोल्यु अने फासाडी महायाजकांवाही तियाहा फुसीत कोयु, 28आमाहा तुमामे याआ नावामेहे संदेश आपुहू कठीण आज्ञा आप्यू ओतु अने तुमु फासी आखे यरुशलेमाहा आपाआ संदेशावाही पोईत आप्लु होय अने तुमु याआ व्यक्तीई रक्त अपराध आमाहा लेतआवीत होय. 29पेत्र अने दिहरा प्रेषितांनी उत्तर आप्लु, आमाहा महांआ पेक्षा परमेश्वरोओ गोठी कोअयु जोवे. 30तिया येशुहू आगलाआ परमेश्वर ईये फासी जिवंत कोईत उभे कोल्यु होय ज्याहा होमला वधस्तंभपे लोटकावित तुमु माअये ओते. 31तीयाहा प्रमुख तारण कर्ता च्या रुपामे महत्व आपित परमेश्वराने आपाआ हुदिवोल बोहाडील्ये होय याकोअता का इस्राएल च्या माहुंहु बदलीत अने पापापो क्षमा प्रदान कोअयी जायलो. 32याआ आखे गोटीविषयी आमाहा साक्षी होये अने तो पवित्र आत्माआ पण होय जो परमेश्वाराहा तियाहा आप्यू होय जे तियाआ आज्ञाआ पालीत कोअता. 33जाहा तिये ओ होमल्यु तेहलाम ते जास्तीज रागाकोहे अने तियाहा मोयईला प्रयत्न कोल्यु. 34परंतु माहास गमलीएल नावाआ एक परुसी जो धर्म शास्त्री ओतो तो आखे मांहे मानपान आपित ओते, महा सभा मेहे उबु रोला अने आज्ञा आप्यी का तियाहा थोडो वेळो कोअता बारथे कोईत दया. 35फासाडी तो तियाहा कोयु, इस्राएलोओ माहाआ, तुमु याआ मांहाआरी जे किबी कोअता ते उत्वाकोई कोईत होय विचार कोईत को. 36किबी काळाआधी स्वताला वोडो घोषित कोईत थियुदास प्रकट उवे ओते अने सुमारे चारहोव मांहे तियाआ फासाडी पण उवे ओते परंतु तो मारीलो गोल्यो अने तियाआ आखे शिष्याची वेराईत-वेराईत उवी ओती, परिणामी किबी उवे नाहा. 37याआनंतर जनगणनाआ टायमोमें गालील माय रोनारू यहुदा प्रकट ओवयू ओतु, तिये पण किबी माहुंहु तियाआ फासाडी आवूहू आकर्षित कोल्यु ओते तो पण माईत गोल्यो अने तियाआ शिष्याची वेराईत-वेराईत उवी. 38याकोअता याआ वर्तमानविषयी आय तुमामे कोयु होय का याआ मांहुपोरोत अलग रो यांहा ऐहलेच एखुल्योज रोहू दया काहाके तियाआ ए योजना अने होय काम मनुष्यामेरोत होय ताहा खुद समाप्त उवे, 39परंतु जर ओ परमेश्वारापोरोत होय ताहा तुमु थाबाडीहि शकत नाहा तेहलाम ओवुहू सेकोहो का तुमु स्वताला परमेश्वरोओ विरोधाम लोढीत पालीलो तिया सल्लो तिये माग्यू. 40अने प्रेषितांहा जागे हादीत तियाहा फटके माअये अने तियाहा ए आज्ञा आप्यी का येशुउ नावाबारामे काहीही चर्चा कोहू कायना अने तिये जाऊ आप्लु. 41ते प्रेषित याआ गोटीविषयी आनंद कोईत ओतलू का तियाहा तियाआ नावा कोअता अपमान सहन कोअला योग्य महांआ गोये अने यहुदी महा सभामेहे निहित गोये. 42मंदिर अने कोकोमे हर एक तेदीही ए सुवार्ता का येशु ओच ख्रिस्त होय शिक्षण दयायाआ अने संदेश दयायाआ तिये केधीज सोडये नाहा.

Currently Selected:

प्रेरितो काम 5: NOINT

Highlight

Copy