प्रेरितो काम 10

कुरनेलियुसो दर्शन

1कैसरीया ईही कर्नेल नावाआ कोडू एक माहू इटालीक नावाआ टोलीई सुबेदार ओतु. 2तो भक्त ओतु अने आपाआ आखे कोअवालाआरी परमेश्वरोओ बित ओतु अने यहुदी माहुंहु जाअखो दान आपित ओतु अने तियापरोत परमेश्वरोओ प्रार्थना कोईत ओतु. 3तिये तीन दिहाआ तिसऱ्या प्रहराआ आसेपासे दर्शनाआ स्पष्ट रुपात पहीले का परमेश्वरोओ एक स्वर्गदूत तियाआ जागे माय आविलो कोत्लू ओ कर्नेल्या, 4तिये तियाहा गोगीलो पालील्यो अने घाबरील्यो कोयु, ओ प्रभू नाहाकोत होय? तिये तियाहा कोयु, ताआ प्रार्थना अने ताआ दान परमेश्वरा आगाडी पुग्या होय, 5अने ओमे याफा माय मांहु मोकलित शिमोनाहा जो पेत्रस कोअहो जात्लू हादीत ले. 6तो शिमोन सामडाआ धोन्धू कोअणाराआ इही गोवारो होय ज्याआ को समुद्राआ किनाऱ्याजागे ओते. 7जजोयो तिये स्वर्गदूत जिये तियाआ आरी गोठी कोअल्यो तो जातलू गोल्यो तिये बेन सेवक अने जे तियाआ आरी उपस्थित रोत ओते तियाआ कोईत एक भक्तिमान शिपायाहा हादिलो, 8अने तियाहा आखे गोठी कोत याफाला मोक्ल्यीत.

पतरोसो दर्शन

9दिहरा तेदीही चालते-चालते नागरामेरोत पुग्या, दिहरा प्रहराआ जागे पेत्र प्रार्थना कोईलाकाजे कोअलापो सोढयू, 10तियाहा भूक लागीई अने तियाहा योजेक खांहु जोवे ओते, परंतु ते तेहलाम तीयारी कोईत ओते अने तियाआ देहभाव खुच्ये, 11अने तिये पहीले जुग उगाडीत गोये होय, अने एक वोडू ताठ चादरी सारखो चारू केडामेहे लेतकोईत धोरतीही उतरीलो ओते. 12ज्यामेहे पृथ्वीई आखे प्रकारोओ चतुष्पाद अने होरकीज जतु अने जुगोमेरयो सिडे ओते 13तियाहा एक एहेलू एक शब्द होम्लायु, ओ पेत्र उठ, माआ अने खा; 14परंतु पेत्राई कोयु, नाहा प्रभू कदापि नाहा काहाके का आय केधी अपवित्र अने अशुद्ध वस्तू खादु नाहा. 15फासाडी वेले तियाहा ओ शब्द होमला आवयू जे किबी परमेश्वराने शुद्ध ठेरव्यो होय तियाहा अशुद्ध मा कोही. 16तीन वेले ऐहलेच उवे तेहलाम ते लागेज ते पात्र जुगोम विसित गोये.

कुरनेलीयुसो कोओ पतरस

17फासाडी पेत्र आपाआ मोनामे विचार कोईत ओतु काजे दर्शन आय पालीलो ओते ते नाहाकोत असू शकेल तेव्हा जे मांहु कर्नेल्य याहा मोक्ल्यीत ओते, ते शिमोनाआ कोओओ बाअनाआरी आविलो उभे रोल्या, 18अने आयडीत विचरू लागाडीत, नाहाकोत शिमोन पेत्र कोअहो जात्लू तो इहीजा गोवारो कोईत होय? 19पेत्र ताहा तियाअ दर्शना विषयी विचार कोईत ओतु अने आत्मावांहि तियाहा कोयु, पाला तीन मांहु ताहु होदिअलो होय, 20आखरी उठित निसे जा अने किबी शंका न कोअता तियाआ आरी जा काहाके आयुज तियाहा मोक्ल्यीत होय. 21तेहलाम पेत्रा तिया माहुहुं कोयु, पाला ज्याचा होद कोईत होय तो आयुज होय तुमाआ आवीला काहाके होय? 22तिये कोयु, कर्नेल्या सुबेदार जो धोर्मी अने परमेश्वरोओ घाबरीला अने यहुदी जाती माय हरोनाव मांहु होय तिये एका पवित्र स्वर्गदूता पासून ओच निदर्शन आव्ये का माहु ताआपो रोत माहु वचन उजाडीला होय. 23तेहलाम तिये तियाहा विसमे हादीत पावनाहा खावाडीलो कोइल्य दिहरा तेदीही तो तियाआ आरी गोल्यो अने याफामेऱ्ये पायहोआरी तियाआ आरी निहित गोये. 24दिहरा तेदीही ते कैसरीयामे पुग्या अने कर्नेल्य आपाआ कोऱ्याआरी अने प्रिय दोस्तोहा एकठे हादीत तियाआ वात पालीत ओतु. 25जाहा पेत्र विसमे आवीत ओतु, ताहा कर्नेल्य तियाहा भेट आप्यी, अने तियाआ उठ पोडीत तियाहा नमन कोल्यु, 26परंतु पेत्राई उठित तियाहा कोयु, उबु रो, आयबी मांहु होय. 27अने तियाआ आरी गोगीतीज विसमे गोल्यो, अने जाअखो माहुंहु एकठे पालीत, 28तिये कोयु, तुमामे मालूमे होय का दिहरे जाती याहा होबती कोअला अने त्याआरोत जीआ यहुदी याकोअता अधर्मी होय परंतु परमेश्वराने माहु कोयु का कोडला ए मांहाहा अशुद्ध किंवा अपवित्र माणू नाहा. 29याकोअता जांहा माहु हादिलो गोये तेहलाम किबी न गोगेहे निहित आवयू? 30कर्नेल्य लेतजा कोयु, तियाआ टायमोमें आय पुरो चोर दीही उवे आपाआ कोअमे तिसऱ्या वेल प्रार्थना कोईत ओतु तेहलाम पाला, एक धवले कापडो पेईत माहुहू माआ आगाडी उबु रोला 31अने कोहू लाग्यू ओ कर्नेल्य ताआ प्रार्थना होमलित आवयी होय, अने ताआ दान परमेश्वरा आगाडी स्मरण कोअलाआ आवयी होय. 32याकोता कोडला याफाला मोकलित शिमोनाहा जो पेत्र कोअहो जात्लू गोगीलो, तो दर्या किनाराआ जागे तो शिमोन जो सामडाआ धोन्धू कोअत्लू तीयाजागे गोवारो कोईत होय. 33तेह्लाम आय लागेज ताअही मांहे मोक्ल्यीत, अने तू इही आविलो हाजो कोल्यु, अने ओमे आपु परमेश्वरा आगाडी होय काहाके जे किबी परमेश्वराने ताहु कोयु होय होमले.

कुरनेलीयुसो कोओ पतरोसो उपदेश

34तेह्लाम पेत्राई कोयु ओमे माहु निच्छित मालुम होय का परमेश्वर कोडाआ पक्षपात कोईत नाहा, 35नाहा ते हर एक जातीमेहे जो तियाहा बित अने धर्माआ काम कोअत्लू तो तियाहा गोमत्लू. 36जे तिये इस्राएलाआ महापोरोत मोकल्ये ओते येशु ख्रिस्ताच्या त्यापोरत (जो होगापो प्रभू होय) शांतीचा सुवार्ता होम्लाड्यू, 37ते वचन तुमामे मालुम होय योहानाआ बाप्तिस्मे सुवार्ता गालील मायाफसाडी रोत सुरवात ओतगोयु आखा यहुदीया माय फैलावीत गोये 38परमेश्वराने कोडला रीतीवाही येशु नासरीच्या पवित्र आत्माआ अने सामर्थ्यावाही अभिषेक कोअयू सत्कर्मे कोअत्लू अने आखाहा शैतान जे त्रास आप्लु ओते, हाजो कोईत फिर्यु, काहाके परमेश्वर तियाआ आरी ओतु. 39जेते तिया आखे कामोमे साक्षी होय काजे तियाहा यहुदी तियाआ तियाहा अने यरुशलेम माय पण कोल्यु अने तिये तियाहा वधस्तंभपे माअये. 40तियाहा परमेश्वराने तिसऱ्या तेदीही जिवंत कोल्यु अने तियाहा प्रकट उवे एहलो कोल्यु, 41आखे माहुंहु नहाते तियाआ साक्षीदारांहा तियाहा परमेश्वरोओ पालील्यो ज्याहा तिये निवडील्ये ओते अर्थात आमापो जिये तियाआ मोल्यामरोत जिवंत उवलानंतर तियाआ आरी खाले पीइलो, 42अने तिये आमाहा आज्ञा कोअयी का माहुंमे प्रचार को अने साक्ष आपा का ओ तोज होय ज्याहा परमेश्वराने जिवंताआ अने मोईतगोल्यू पावलेल्यांआ न्याय कोअनारा ठेरव्यू होय. 43तियाआ आखे भविष्यवक्ता साक्ष आपत्ले का जो कोडु तियापो विश्वास कोअही तियाहा तियाआ नावापो पापोओ क्षमा जोडीत.

बिगर यहूदी बि पोओ पवित्र आत्मा उतरिलोओ

44पेत्र ए गोठी कोताच ओतु का पवित्र आत्माआ आखे होमलित उतरीलो. 45अने जिये सुंता कोअयी होय एहलो जे विश्वासी पेत्राआरी आव्ये ओते ते आखे चकित उवे का अन्यजाति उपो पण पवित्र आत्माआ दान उंडाल्यो गोल्यो होय. 46काहाके तिये जुदेजुदे भाषा गोगीलावेले होमल्यु अने परमेश्वरोओ गौरव कोअत्लू तेहलाम होमल्यु याकोअता पेत्राई कोयु, 47नाहाकोत कोडु पाई थाबाडीहि शकतो यांहा बाप्तीस्मा नाहा मिले कोईत ज्याहा आमा सारखो पवित्र आत्माआ मिल्यू होय? 48अने तियाहा आज्ञा आप्यी का तियाहा येशु ख्रिस्ताच्या नावामेहे बाप्तिस्मे आप्यू जावा तेहलाम तिये तियाहा विनंती कोअयी का तो तीयाआरी फासी किबी दीही रोअलो.

Currently Selected:

प्रेरितो काम 10: NOINT

Highlight

Copy