मरकुस 6
6
नसरता मे यीशु री बेज्जती
(मत्ती 13.53-58; लूका 4.16-30)
1तखा का निख्ली करे सह आपणे देशा वै आउअ, होर तेऊरे चेले भी तेऊ संघे नाठे। 2सब्ता री धियाडी सह प्रार्थना घरा में उपदेशा दीन्दअ लागअ, होर बहू लोका शुणिकरे हेरान होई होर बोलले लागे, एयुमें या गला कन्धा कअ आई? यह कूण जेड़ा ज्ञान साहा ज़ो इऊ वै दीना दा साहा? एड़े सामर्थ्य रै काम यह केई साबे करा? 3कैह यह सह मिस्त्री नांई आंदअ, जोह मरियमा रअ शोहरू, होर याकूब योसेस, यहूदा, होर शिमोना रअ भाई नांई आंदअ? कैह एउरी बहीणा अखे हामा संघे नांई आन्धी? तेबा त्याहे तत्के बारे में ठोकर खाई। 4यीशुये त्याहवै बोलू, भविष्यद्वक्ता रे आपणे देशे , होर आपणे परिबार, होर आपणे घर छाडी करे होर कंदे भी वैजती नांई हुंन्दी। 5सह तखे कोई भी सामर्थ्य रे काम नांई करी सका, थोडे जेहड़े बीमारा पैंदे हाथ डाई करे त्याह ठीक करी। 6होर यीशु त्यारे अबिश्बासा पैंदे बड़ी हेरानी होई, होर सह चौऊ तरफा होर ग्राएं उपदेशा दीनदअ लागअ।
यीशू रे बारहा चेले रा भेजणा
(मत्ती 10.5-15; लूका 9.1-6)
7यीशुये त्याह बारह चेले आपु नेड शादी होर त्या दूई-दुई करी करे भेजदअ लागअ, होर त्याहवै दुष्टात्मा पैंदे अधिकार दीना। 8तेऊ त्याहवै आज्ञा दीनी, बाता हाडणे वै डाहुले रे सिबाये होर किछे नांई नीये; ना तो रोटी, ना झोली, ना परसा में ढवै, 9पर बूट बाना होर दुई-दुई कुरते नांई बाना। 10होर तेऊये त्याह का बोलू, जासू घरे भी नाहले, तखे तेवरे तक रहे, होर नांई नाहणे तणी तेहूरे तखी रहा। 11जासू ग्राए रे लोका तमा नांई मानले होर थारी नांई शुणले, तेबा तेसा जागा छाड़े । होर त्याहरे बिरोधा में गुआही दिणे री तणी तखले माटे भी आपणी टागा का झाड़े। 12तेऊकी त्याहे प्रचार करु की मन फेरा, 13होर ख़ासी दुष्टात्मा काहड़ी होर बहू बीमारा पैंदे तेल लेसी करे त्या ठीक करी।
यूहन्ना बपतिस्मा दीण आले री हत्या
(मत्ती 14.1-2; लूका 9.7-9)
14हेरोदेसे राजा भी तेऊरी चर्चा शुणी, किबेकी तेऊरा ना फैलू, होर तेऊए बोलू, यूहन्ना बपतिस्मा दीण आल़अ मरी करे जिऊंदअ होऊ। तेबा तेऊका याह सामर्था रै काम प्रकट होई। 15होर लोके बोलू, यह भविष्यद्वक्त एलिय्याह साहा। पर कुछ होरे बोलू, भविष्यवाणी करण आले मेंजा का कोई एक साह दअ। 16हेरोदेसे यह शुणी करे बोलू, जासु यूहन्ना रअ मुंड मांये काटणे बझयाल़ू, सह जिऊंदअ होऊ। 17किबेकी हरोदेस आपे ही आपणे भाई फिलिप्पुसा री बेटड़ी हेरोदियासा री बजहा का, जासु संघे तेऊ ब्याह करू, लोका भेजी करे यूहन्ना डाकी करे जेला में पाऊ थी, 18किबेकी यूहन्ना हेरोदेसा बे बोलू, आपणे भाई री बेटड़ी आपू वै डाणी ताहवै यह कानूना रै साबे ठीक नांई आंदा। 19तेबा हेरोदियासा तेऊका बैर डाहदा थी, होर तेऊ मारणा चाहन्दा थी, पर ऐडा नांई होई सका, 20किबेकी हेरोदेसा यूहन्ना एक धर्मी होर पवित्र मर्द जाणी करे तेऊका डरदा थी, होर तेऊ बचाई डाहदा थी , होर तेऊरी गला शुणी करे बड़े लोका भी डरा थी, पर खुशी संघे शुणा थी। 21पर जेबा हेरोदेसा रा जन्मदिन आउआ जेबा हरोदेस आपणे जन्मदीना में आपणें प्रधान, होर सेनापति, होर गलीला रे बड़े लोका वै एक भोज़ ख्याऊ। 22तेबा हेरोदेसा री शोहरी मितरा वे आउई, होर नाचिकरे हेरोदियासा होर तेऊ संघे वैशणा आले खुश करी। तेबा राजे तेसा शोहरी वै बोलू, जोह कुछ तुह माँगली, हाऊं ताहबे देलअ। 23होर तेऊ कसम खाई हाऊं ताहवै आधा राज्य तक ज़ो कुछ तूह मांगली हाऊं ताहवै देलअ। 24तेसे बागे नाशी करे आपणी आमा पूछी, हाऊं कैह मांगु? तेसे बोलू, यूहन्ना बपतिस्मा दिण आल़े री मुंडी। 25सह तेवरी भीतर आई होर राजे सेटा का अर्ज करी की, हाऊं चाहन्दा की तूह एवरी यूहन्ना बपतिस्मा दिण आले री मुंडी एकी थाली में महा वै आण। 26तेबा राजा बखे नराज होऊ, पर आपणी कसमा री बज़हा होर संघे बेठे दै लोका री बज़हा का एसा कसमा टालणा नांई चाहन्दअ। 27तेबा राजा तेवरी एकी सिपही वै हूक्म दिना की तेऊरे मुंडा काटी आणा सह नाठअ तेऊए जेलखाने में तेऊर मुड़ काटू। 28तेऊ, जेलखाने में यूहन्ना रअ मुंड काटू; होर तेसा शोहरी वै थाली में दीनअ, होर तेसा शोहरीये सह आपणी आमा वै दीनअ। 29एता शुणी करे यूहन्ना रे चेले आये, होर तेऊरी लाश नी होर कब्रा में डाही।
प्रेरितों री बापसी होर एकांत वास
(मत्ती 14.13,14; लूका 9.10)
30चेले यीशु सेटा कठे होई करे, जोह कुछ त्याहे करू होर सिखाऊ, सारा तेऊवै खोज़ु। 31तेऊये त्याह कह बोलू, तमे आपू एकी सुनसान जागा नाशिकरे थोड़ा आराम करा। किबेकी खासे लोका इंहदा नांहदा, होर त्याह खाणे रा मोका भी नांई भेटता। 32तेबा त्याह किस्ती में चढ़ी करे, सुनसान जागा वै नाठै।
पांज़ा हजारा मर्दा वै खिलाऊणा
(मत्ती 14.15-21; लूका 9.11-17; यूहन्ना 6.1-14)
33खासे लोके त्याह नांहदे हेरी, होर सभी नगरा कै कठे होई करे हांडी करे त्याहकै पहिले पूजे। 34तेऊ उतरी करे एक बड़ी भीड़ हेरी, होर तेऊ त्याह पेन्दे बड़ी दया होई, किबेकी त्याहबे एड़ी भेड़ा बराबर थी, जासकअ कोहे फुआल नांई, होर सह त्याह वै खासी गला सिखाऊंदअ लागअ। 35जेबा धिहाडअ डूबू, तेबा तेऊरे चेले तेऊ सेटा इच्छी करे बोलदे लागे, यह सुनसान ज़ागा साहा, होर राच हूणे आली साहा। 36याहा भेज़ी करे की एउ चऊ तरफा ग्राऐ नाशिकरे, कुछ खाले। 37यीशु तयाबे बोलू, तमे ही याह बे खाणे बे देया। तयाये तेऊवै बोलू, केह हामा सौ दीनार संघे, यावै रोटी खिलाऊणी? 38तेऊये त्याह कअ बोलू, तमे नाशा होर भाल़ा की तमा जेह केथरी रोटी साहा? त्याह पता करी करे बोलू, पांज रोटी होर दूई माछी भी साहा।
39तेबा तेऊये त्याह वै हूक्म दीना की सभी हरे घाऊ पैंदे घेडी में बश्यागा। 40त्याहे शह-शह होर पाज़ा-पाज़ा री घेड़ी में वैठै। 41तेऊये त्याह पांज रोटी होर दूई माच्छी ढाकी करे, होर सरगा फेरा वै भाली करे धन्यवाद करू, होर रोटी चोड़ी करे चेले वै दीन्दअ लागअ की त्याह लोका वै देये, होर त्याह दूई माछी भी त्याह सभी में बांडी। 42सवै खाई करे रजी। 43होर त्याहये टुकड़े संघे बारह टोकर भरी करे चुआकी, होर कुछ माच्छी भी। 44जूणी रोटी खाई त्याह पांज़ हज़ारा मर्द थी।
यीशु रा पाणी पैंदे हांडणा
(मत्ती 14.22-23; यूहन्ना 6.15-21)
45तेबा यीशुये तेभरी आपणे चेले मजबूर करी की त्या किस्ती में नाही करे तेऊका पहिले पारा फेरा बैतसैदा वै नाशे, जेबरे तणी की सह लोका भेज़ी सका। 46त्याह भेजी करे सह ज़ोता वै प्रार्थना करदअ नाठअ। 47जेबरे व्याल्क होई, तेबा किस्ती झीला में थी, होर सह केलह धरती पैंदे थी। 48जेबा तेऊ हेरू की त्याह डरदे लागे, किबेकी बागुर त्याहरे उलटे फेरा का इंहदी लागी थी, तेबा राचके चहुथे पहरे नई में हांड़ी करे त्याह सेटा वै नाठअ; होर त्याह का जेह निखलणा चाहन्दा थी। 49पर त्याहे सह पाणी पैंदे हाणडदअ हेरू होर समजू की यह भूत साहा, होर त्याहे हाला पाऊ; 50किबेकी सब तेऊ भाल़ी करे घबराई। पर तेऊ तेवरी त्याह संघे गला करी होर बोलू, होसला डाहा, हाऊं साह; कि डरे नांई आंदे ! 51तेबा सह त्याह नेड किस्ती पैंदे आऊअ, तेबा बागुर रुकी। होर त्याह बड़ी हेरानी होई। 52त्याह रोटी रे बारे नांई समज़ी, किबेकी त्याहरे मन सख्त होई थी।
गन्नसरत में बीमार ठीक करणे
(मत्ती 14.34-36)
53त्याह पार उतरी करे गन्नसरता में पूज़े, होर किस्ती धरती रे किनारे लाई। 54जेबा त्याह किस्ती का उतरी, तखले लोके यीशु पछेणु। 55ओरी पोरी रे सभी देशा में ठूरी, होर बीमार मांजे पैंदे चकी करे जखे-जखे समाचार पाऊ की सह तखे-तखे त्याह पज़ेरदे लागे। 56होर ज़खे भी सह नांदा थी, लोका बीमार बाज़ारे डाई करे तेऊका अर्ज करा, सह त्या आपणे झिकड़े रे पूंझ ही छूणे दे, होर ज़ेथरे तेऊ छुहंदा थी, त्या सारे ठीक हुन्दा थी।
Currently Selected:
मरकुस 6: ISJNT
Highlight
Share
Copy
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
