मरकुस 14
14
यीशु मारणे री चाल
(मत्ती 26.1-5; लूका 22.1-2; यूहन्ना 11.45-53)
1दुई धयाडी बाद फसह होर अखमीरी रोटी री जाच दूई धयाणी रही थी। प्रधान याजक शास्त्री ऐसा गला लोडे लागे दे थी, की सह धोखे संघे ठग्गी करे केई सावै मारणअ। 2पर त्याह बोलदे लागे, की जाचा री धियाड़ी नांई पर कई लोका में ज्यादा हाला नांई पड़े।
बैतनिय्याहा में यीशु रा सुआगत
(मत्ती 26.6-13; यूहन्ना 12.1-8)
3जेबा सह बैतनिय्याहा में सिमोन कोढ़ी रे घरे रोटी खांदअ वैठअ, तेबा एकी बेटड़ी संगमरमरा रे भांडे में जटामासी रा बहू मेहँगा शोभला इत्र आणी करे आई, होर तेला रअ भांडअ चोड़ी करे तेऊरे मुंडे सारा तेल लेसु। 4पर कोई लोका बोलदे लागे की एउ इत्रा रा सत्यनाश किवै करु? 5किबेकी यह इत्र चीई शआ दीनार में वैची करे गरीबा वै देई सका, होर त्याह तेसा डराउनदे लागे। 6यीशु ये बोलू, तेसा छाडा एसा वै किवै लाउ बोलना? ऐसा माँए संघे रामबड़ा काम करु। 7गरीब सदा तमा संघे सदा रहणे होर तमे जेबरे चाहे तेवरे तक त्याह संघे रामबड़े काम करी सका पर हाऊं तमा संघे सदा नांई रहणअ। 8जोह तेसा करणा, सह तेसा करु तेसा महा गाडने का पहिले मेरे शरीरा में तेल लेसु। 9हाऊं तमा का सच़ बोला की सारे संसारा में जखे कई भी सुसमाचारा रा प्रचार होला, तखे एसा बेटड़ी रे कामा रे बारे में याद करणा।
यहूदा रा धोखा दिणा
(मत्ती 26.14-16; लूका 22.3-6)
10तेबा यहूदा इस्करियोती ज़ो बारह चेले में का एक थी, सह प्रधान याजका सेटा नाठअ कि तेऊए तेऊरअ हाथ ढाकू 11त्याह ऐता शुणी करे बखे खुश होई, होर तेऊबै ढब्वै दीणे करी; सह ऐडे मोके लोढ़अ लागअ कि तेऊ कैहडे सावै ढाकी करे त्याह जेह दिणअ।
चले संघे फसह रा आखिरी भोज़
(मत्ती 26.17-25; लूका 22.7-14; यूहन्ना 13.21-30)
12अखमीरी रोटी री जाचा का पहिली धयाडी, जासू में फसहे रे गाभु का पहिला बलिदान करा, तेबा तेऊरे चेले पुछु, तूह कई चाहन्दा की हामें नाशी करे फसह खाणे री त्यारी करे? 13तेऊ आपणे चेले में का दूई यह बोली करे भेजी, नगरा में नाशा, एक मणश पाणी रे घड़े चकतअ तमा भेटणअ, तमे तेऊ पीछे नाशे; 14होर सह जासू घरे नाहल, तेऊ घरा रे मालीका वै बोले, गुरु बोल्दा की मेरे बेशणे रअ कमरअ कई साहा जासू में महा आपणे चेले संघे फसह खाणा कई साहा? 15तेऊ तमावै एक सजाई दी बडी बाहुड रीहाऊणी, तखे हामा बे त्यारी करे।
16चेले तेऊकी नगरा वै आए, जेड़ा तेऊये त्याह का बोलू, तेहड़ा ही करू; होर फसह त्यार करी। 17जेबरे ब्याल्क होई, तेबा सह बारह चेले संघे आउअ। 18होर जेबरे त्याह रोटी खांदे बैठे, तेबा यीशुये बोलू, हाँऊ तमा कअ सच बोल्दा की तमा मेंज़ा का एक जोह माये संघे रोटी खांदअ लागअ साहा तेऊ हाऊ ढाकण। 19त्याह सवै नराजा होई होर एक-एक करी करे बोलदे लागे, कैह हाऊं सह साहा दअ? 20तेऊये त्याह का बोलू, सह बारह मेंज़ा का एक साहा जोह माए संघे थाली में हाथ पउंदा। 21किबेकी मणशा रअ शोहरू, जेड़ा तेऊरे बारे में लिखू दा साहा, तेड़ा ही हुंणा; पर तेऊ मणशा वै हाय जासू री बजहा संघे सह ढाकणे भज्यालण! जेबा तेऊरा जन्मा नांई होऊ, तेबा, तेऊवै सह राम्बड़ा हूँणा।
प्रभु-भोज़
(मत्ती 26.26-30; लूका 22.14-20; 1 कुरिन्थियों 11.23-25)
22चेले संगे रोटी खांदे बक्ते यीशूये रोटी चुआकी होर आशीष मांगी करे चोड़ी, चेले बै दीनी, होर बोलू, निआ; यह मरी देह साहा। 23तेऊकी तेऊये कटोरे चकी करे धन्यवाद करु, तेऊकी त्याह वै दीनअ; होर त्याहे सभी तेता मेंज़ा का झूटू। 24होर तेऊए त्याह का बोलू, यह वाचा रा सह लोहू साहा दा, ज़ो खासे री तणी बहाउणा। 25हाऊं तमा का सच बोल्दा की दाखा रा यह रस तेसा धयाडी तक कधी नांई झूटणा, जेबरे तक की परमेश्वरा रे राज्य में नऊआ नांई झूठे। 26तेऊकी त्याहे भजन गाई करे जैतूना री जोता वै नाठै।
पतरसा रे इनकारा करने री भविष्यवाणी
27तेबा यीशुये त्याहबे बोलू, तमा सभी ठोकर खाणी किबेकी लिखू दा साहा, महा रखबाली करने आलअ मारण होर भेडा तितर बितर हूँणी। 28पर महा जिऊंदे हूँणे बाद तमा का पहिल गलीला बे नाहंणा। 29पतरसे तेऊबै बोलू की, अगर सबे ठोकर खाले तो खाले, पर महा ठोकर नांई खाणी। 30यीशुये तेऊका बोलू, हाऊं ताकअ सच-सच बोल्दा की आज की एसी राची में मुर्ग रे दूई बारी बाश्णे का पहिले, ता चीण बारी महा जाणने का ताह मुकरना। 31पर तेऊ होर भी ज़ोर देई करे बोलू, जेबा महा ताये संघे मरना भी पड़े, तेबा भी महा ताह जाणणे का कधी भी नांई मुकरणा। ऐड़ा होर भी बोलू।
गतसमनी में प्रार्थना
(मत्ती 26.36-37; लूका 22.39-46)
32तेऊकी त्याह एकी ज़ागहा गतसमनी ना में आए, होर तेऊए आपणे चेले तेऊबै बोलू, जेबरे तक हाऊं प्रार्थना करे तेवरे तक, अखे वैशी रहे। 33होर तेऊ आपु संघे पतरस याकूब होर यूहन्ना आपु संघे नीई; होर सह बखे ब्याकुल हुन्दअ लागअ, 34होर तेऊ त्याह का बोलू मेरा मन बखे दुखी साहा, अखे तक की हाऊं मरने आलअ साहा दअ, तमे अखी रुका, होर जागदे रहा। 35तेऊकी सह थोड़अ ज़ेहअ नाठअ होर धरती पैंदे पड़ी करे प्रार्थना करदअ लागअ की जेबा यह होई सका तो यह घड़ी महाक टाली सके, 36होर बोलू, हे अब्बा, हे पिता, ताकअ सब कुछ होई सकदा; एउ कटोरे महा का पोरी हटा, तेबा भी जेड़ा हाऊं चाहन्दा तेड़ा नांई, पर तूह जेड़ा चाहन्दा तेड़ा लोड़ी होऊ। 37तेऊकी सह आउअ होर त्याह सुतदै भाणी करे पतरसा बे बोलू, हे सिमोन, तूह सूती रहूदअ? तूह एक घड़ी भी जागी नांई सकू? 38जागदे रहा होर प्रार्थना करदे रहा की तमे परीक्षा में ना पड़े। आत्मा तो त्यार साहा दी, पर शरीर कमज़ोर साहा।
39होर सह तेऊकी नाठअ होर भी सह प्रार्थना करी। 40होर तेऊकी एछी करे त्याह सुतदे भाणी, किबेकी त्याह री आछी नीजा संघे भरी दी थी; होर नांई जानदे, की तेऊबै कह उत्तर दिणा। 41तेऊकी चीउणी बारी इच्छी करे बोलू, एवा सूती रहा होर आराम करा, बस सह घड़ी पूजी; भाल़ा मणशा रअ शोहरू पापी रे हाथे ढाकु। 42उठा, च़ाला! भाल़ा, महा ढाकणे आले नेड़ पुजे!
यीशु रा धोखे संघे ढाकणा
(मत्ती 26.47-56; लूका 22.47-53; यूहन्ना 18.3-12)
43सह एड़ा बोलदअ, लागदअ थी तेबा यहूदा ज़ो बारह में का एक थी, आपु संघे प्रधान याजक होर शास्त्री होर प्राचीना री तरफा का एक बखे बड़ी भीड़ आणी करे तेवरी पुउज़अ, त्याहे तलबार होर शोठे, आणी दे थी। 44तेऊ ढाकण बझयाल़ण आल़े त्याहबे यह इशारा दिंना, जासूबे हाऊं मूघी देलअ सह साहा, तेऊ डाकी करे रामबड़े डंगे नीये। 45सह आउअ, होर तेवरी तेऊ नेणे नाशी करे बोलू, हे गुरु! होर तेउबे खासी मूघी दीनी। 46तेबा त्याहे तेऊ पैंदे हाथ पाई करे सह ढाकू। 47त्याह मेंज़ा का जोह तेऊ सेटा खड़े थी, एकीये तलबार खिंची करे महायाजका रे नोकरा पैंदे चलाई, होर तेऊरअ कनेटे काटू। 48यीशु त्याह का बोलू, तमा कैह हाऊं डाकू समझी करे महा डाकणे वै तलबार होर शोठे आणी करे निकतदे? 49हाऊं तअ हर रोज देहुरे में तमा संघे रही करे उपदेशा दिनदअ हुंदा थी, तेवरे हाऊं तमे नांई ढाकू, पर यह तेबा होऊ की पवित्र शास्त्रा री गलअ पूरी होए। 50एता शुणी करे चेले तेऊ छाडी करे ठुरी। 51एक जुयान (मणश) आपणे नंगे शरीरा में चादर डिहाई करे तेऊ पीछे आउअ; होर लोके सह ढाकु। 52पर तेऊये चादर छाडी होर नेगअ ठुरु।
बड़ी सभा रे समाने यीशु
(मत्ती 26.57-68; लूका 22.54,55,63-71; यूहन्ना 18.13,14,19-24)
53तेऊकी त्याहे यीशु बड़े याजका रे समाने नीऊ; होर सारे प्रधान याजक होर बजुर्ग होर शास्त्री तेऊ जेहे कठे करी। 54पतरसे दुरा-दुरा का ही तेऊ पीछे-पीछे महायाजका रे खोले तणी मितर पूजअ, होर सेबका संघे आगि छिपदअ लागअ। 55प्रधान याजक होर सारी महासभा यीशु मारने री तणी तेऊरे बिरोधा में गुआही लोडे लागे थी, पर कोई गुआही नांई भैटी। 56किबेकी बहू सारे तेऊरे बिरोधा में झूठी गुआही दिंदे लागे दे थी, पर त्याह री गुआही एकी जेडी नांई थी। 57तेबा कुछ एक लोके यह झूठी गुआही दीनी की 58हामें यह एड़अ बोलदअ शूणु की महा यह हाथे संघे बनाऊद देहुरअ डोलनअ होर, चीई धयाडी में दूजअ त्यार करणअ, जोह हाथे संघे नांई हुणअ बणुदअ। 59एता पैंदे भी त्याह री गुआही एक जेडी भी नांई निकदी। 60तेबा महायाजके खड़े होई करे यीशु का पुछु, तूह किछे भी नांई बोली? या लोका तेरे बिरोधा में कैह-कैह गुआही दिंदे लागदे? 61पर सह चुपचाप रहू होर किछे नांई बोलू। महायाजके सह भी पुछू, केह तूह तेऊ परम प्रधाना परमेश्वरा रअ शोहरू मसीह आसा? 62यीशु ये बोलू, हा साहा हाऊं, होर तमा मणशा रअ शोहरू सर्वशक्तिमाना रे धुरा फेरे वैठअ दअ, होर सरगा रे बादला संघे इंद हेरनअ। 63तेबा महायाजके आपणे झिकड़े थोची करे बोलू, एवा हामा कैह गुआही री कोई जरूरत नांई आँधी? 64तमा यह निन्दा शूणी। थारी कैह राय? त्याह सभी बोलू की यह दण्डा लाईक साहा दअ। 65तेबा कोई तेऊ पैंदे थूकदे, होर कोई तेऊरे मूहा ढोपी करे बाहन्दे लागे, होर तेऊवै बोलदे लागे की, एबा खोज़ भविष्यवाणी कर होर प्यादे यीशु वै ढाकी करे थप्पड़ बाही।
पतरसा रा इन्कार करना
(मत्ती 26.69-75; लूका 22.56-62; यूहन्ना 18.15-18,25-27)
66जेबरे पतरस ऊंधे खोले में थी, तेबा महायाजका री दासी मेंज़ा का एक तखे आई, 67होर पतरस आगि छिपतअ भाली करे तेऊ कोहरी भाली लागी होर बोल्दी लागी, तूह भी ऐऊ नासरी यीशु संघे थी। 68सह मुकरु होर बोलू, हाऊं नांई जान्दअ होर ना ही समजदअ की तांए कैह लाऊ दा बोलणा। तेहुकी सह बागे डेली नेड़ नाठअ; होर मुर्गअ तेवरे बाठअ। 69सह दासी तेऊ भालिकरे ज़ो तेऊ संघे खड़ी थी, भी त्याह संघे बोल्दी लागी, यह त्याह मेज़ा कैह एक साहा दअ। 70पर सह भी मुकरु। थोड़ी देरी बाद ज़ो तेऊ संघे खड़े थी, त्याहे भी पतरसा बे बोलू, जरुर तूह त्याह में का एक साहा; किबेकी तूह गलीली भी साहा। 71पर सह सगदी खांदअ लागअ, हाऊं तेऊ मणश जासू की तमे गला लाई दी करणी, नांई जान्दअ। 72तेब्री दूजी बारी मुर्ग भी बाठअ। पतरसा सह गल याद आई जोह यीशु ये तेऊबै बोलीदी थी, मुर्ग रे दूई बारी बाश्णे कैह पहिले ताह चीण बारी महा जाडने का मुकरना। सह एसा गला सोची करे लेरदअ लागअ।
Currently Selected:
मरकुस 14: ISJNT
Highlight
Share
Copy
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
