मत्ती 27
27
पिलातुसा रे सामने यीशु
(मरकुस 15.1; लूका 23.1,2; यूहन्ना 18.28-32)
1जेबा दोत होई तेबा सब बडे प्रधान याजक होर प्राचीन यीशु मारी पाउंणे री स्कीम करी। 2त्याहे सह बांन्हूँ होर नी करे पिलातुस राज्यपाला रे हाथे दिनअं।
यहूदा इस्करियोती री आत्महत्या
(प्रेरित 1.18,19)
3जेबा यीशु री घाता करने आले सह ढाकणे बझयाल़ण आले यहूदा हेरू कि सह दोषी ठहराऊ तेबा सह पछताऊ होर तीह चाँदी रे सिक्के बडे प्रधान याजक होर प्राचीना सेटा बे बापिस फेरी आणी 4होर बोलू, मांई निर्दोष हत्या री तणी ढाकणे बे बझयाल़ी करे पाप करू। त्याहे बोलू, हामा कैह? तुह ही ज़ाण। 5तेबा तेऊ सिक्के देहुरे में शोटी करे नाठअ, होर आपणे आपु बे फाँसी दिंनी।
6प्रधान याजक त्या सिक्के नी करे बोलू, या भण्डारा में डाहणे व्यवस्था रे साबे ठीक नांई, किबेकि सह लोहू री कीमत साहा। 7पर त्याहे सम्मति करी करे त्याह सिक्के रअ परदेसी आटणे बे खमारा रअ खेच लउ। 8एउ बजा कअ सह आज भी तेऊबै लोहू रअ खेच बोला। 9तेबा जोह बचन यिर्मयाह भविष्यद्वक्ता बोलू, सह पूरा होऊ, त्याहे चांदी रे तीह सिक्के मागी सह कीमत इस्राएला रे बन्श तेऊ अमूल्य मणशा बे डाही दी थी; 10होर जेहडी परमेश्वरे महा बे आज्ञा दिंनी, तेहडे ही त्या खमारा रे खेचा री कीमती में दिना।
पिलातुसा रे प्रश्ण
(मरकुस 15.2-5; लूका 23.3-5; यूहन्ना 18.33-38)
11जेबा यीशु हकिमा सेटा खडअ थी, होर तेबा राज्यपाले तेऊका पुछू, कैह तूह यहूदी रअ राजा साहा? यीशु उतर दिंना, तांई आपे ही लाईदी। 12जेबा प्रधान याजक होर पुरनिए तेऊबै दोषा लाऊदे लगे, तेऊ किछे उतर नांई दिंना। 13एता में पिलातुसे तेऊवे बोलू, कैह तूह शुणा कि या तेरे विरोधा में केतरी गुआही दिंदे लागेदे? 14पर यीशुये तेऊरी एकु भी गला रा उतर नांई दिंना, अखे तणी कि राज्यपाल भी हैरान होऊ।
मृत्तु-दण्डा री आज्ञा
(मरकुस 15.6-15; लूका 23.13-25; यूहन्ना 18.39-40; 19.16)
15राज्यपाला री यह रीति थी, कि तेऊ जाचा में लोका री तणी कासु एकु बन्दी जासू त्या चाहंदा थी, छाड़ा थी। 16तेऊ वक्ते त्याहे तखे त्या मेंजा का बरअब्बा ना रअ एक मनुदअ कैदी थी। 17जेबा त्या कठे होई, तेबा पिलातुसे तयाबे बोलू, तमे कासु चाहंदा कि हाऊं थारी तणी छाडू? बरअब्बा, या यीशु जासूबे मसीह बोला? 18किबेकि सह जाणा, कि त्याहे सह जल़णा री बजा का ढाकुदअ साहा।
19जेबा सह न्याय री गद्दी में बेठदअ थी, तेबा तेऊरी बेटड़ी तेऊबै बोलू, तूह तेऊ धर्मी रे मामले में हाथ नांई पाए, किबेकि मांई आज सुपने में तेऊरी बजा का बहू दुःख चुआकू। 20बडे प्रधान याजक होर प्राचीनों लोका भड़काई कि त्या बरअब्बा माँगे, होर यीशु रा नाश कराए। 21राज्यपाले त्याका पुछु, याह दुई का कासु चाहंदा कि हाऊं थारी तणी छाडू? त्याहे बोलू, बरअब्बा। 22पिलातुसे त्याहा का पुछु, तेबा यीशु, जासूबे मसीह बोला, कैह करू? सभी तेऊबै बोलू, यह क्रुसा में चडाऊ लोडी! 23राज्यपाले बोलू, किबे, तेऊ कैह बुराई करी दी? पर त्याहे होर भी जोरे करे बोलदे लागे, यह क्रुसा में चढाऊ लोडी। 24जेबा पिलातुसे हेरू कि किछे नांई बणी पर तेऊरे बिरोधा मे हुल्लड़ बढ़दा लागा, तेबा तेऊ पाणी आणी करे भिड़ा रे सामने आपणे हाथ धोई होर बोलू, हाऊं एउ धर्मी रे लोहू का निर्दोष साहा; तमे ही जाणा। 25सभी लोके उतर दिंना, एउरा लोहू हामा पैंदे होर महारे शोहरू पैंदे हो! 26एता पैंदे तेऊ बरअब्बा त्यारी तणी छाडू, होर यीशु बे कोड़े लाई करे संभालु कि क्रुसा पैंदे चढ़ाए।
सिपाही यीशु री बेइजती करी
(मरकुस 15.16-20; यूहन्ना 19.2,3)
27तेबा राज्यपाला रे सिपाही यीशु किले में नी करे सबे फऊजी तेऊरे चहु फेरे कठे करी, 28होर तेऊरे झिकड़े खोली करे तेऊबै लाला रांगा रअ चोगअ पनेऊं, 29होर कांडे रअ मुकट गुंधी करे तेऊरे मुंड़े डाहू, होर तेऊरे धुरे हाथे सरकण्डअ दिनअं होर तेऊ जेह ठुंगरु बेशी करे तेऊरे ठठे करदे लागे होर बोलू, हे यहूदी रे राजा, नमस्ते! 30होर तेऊमें थूकू; होर सह सरकण्डअ लाई करे तेऊरे मुड़े बाहंदे लागे। 31जेबरे त्याह तेऊरा ठठा करी मुके, तेबा सह चोगअ तेऊका उतारी करे भी तेऊरे झिकड़े पहनेंई, होर क्रुसा में चढ़ाउंणे बे निऊं।
यीशु क्रुसा में चढ़ाउंणअं
(मरकुस 15.21-32; लूका 23.26-43; यूहन्ना 19.17-27)
32बागे नाहंदे त्या शिमोना ना रअ एक कुरेनी मणश भेटअ। त्याहे सह थोगे ढाकु कि तेऊरे क्रुसा चुआकी करे निह। 33तेऊ जागहा नाई गुलगुता यानि खोपड़ी री जागा बोला। 34त्या पित्त मिल़ाउदा दाखरस तेऊवे जुेटणे वे दीना, पर तेऊ परेखी करी झूटणे री नांई सोची। 35तेबा त्याहे सह क्रुसा पैंदे चड़ाऊ होर चीटियाँ पाई करी तेऊरे झिकड़े वांडी, 36होर तखे वैशी करी तेऊरा पहरा दिंदे लागे। 37होर तेऊरा दोषपत्र तेऊरे मुड़ा पैंदे लाऊ, कि यह यहूदियों रअ राजा यीशु साहा। 38तेबा तेऊ दुई चोर एक धुरा फेरे होर एक बांईं फेरे, क्रुसा पैंदे चढ़ाई। 39इहंणे नाहंणे आले मुंड हिलाई-हिलाई करे तेऊरी निंदा करी, 40होर यह बोलदे लागे थी, देहुरे ढोलण आलअ होर ची धियाड़ी में बणाउण आले, आपणे आपु तअ बचा! अगर तुह परमेश्वरा रअ शोहरू साहा, तेबा क्रुसा का उतर। 41एसी रीति का बडे प्रधान याजक भी शास्त्री होर प्राचीनों संघे ठठा करी करे बोला थी, 42एउ होरा बचाई, होर आपणे आपु बे नांई बचाई सकतअ। यह तअ इस्राएल रअ राजा साहा। एबा क्रुसा का उतर तेबा हाम तहा पैंदे बुशाह करे। 43तेऊ परमेश्वरा में बुशाह डाउदा आसा ; अगर यह एउ चाहंदा, तेबा एउ एबा छुडाउलअ, किबेकि एउ बोलू, कि हाऊं परमेश्वरा रअ शोहरू साहा। 44एउ साबे डाकू भी जोह क्रुसा में चढाई थी, तेउरी निंदा करदे लागे थी।
यीशु रै प्राण शोटणे
(मरकुस 15.33-41; लूका 23.44-49; यूहन्ना 19.28-30)
45दोपहरा का ओरी चिउणे पहरे तणी तेऊ देशा में नयारा होऊ। 46चिउंणे पहरा रे नेड यीशुये बडे शब्दा में पुकारी करे बोलू, एली, एली, लमा शबक्तनी? मतलब हे मेरे परमेश्वर, हे मेरे परमेश्वर, तांइ हांऊ किबे छाडू? 47जोह तखे खड़े थी, त्या मेज़ा का कई यह शुणी करे बोलू, यह तअ एलिय्याह पुकारा। 48त्या मेंज़ा का एक तेभरी ठुरु, होर स्पंज नी करे सिरके में डबोउ, होर सरकण्डे पैंदे डाही करे तेऊबै चूसाऊ। 49होरे बोलू, रुका, हेरा एलिय्याह एउ बचाउंदअ ईहंदा या नांई। 50तेबा यीशु भी बडे शब्दा में जोरे करे प्राण छाड़ी। 51होर हेरा, देहुरे रा परदा उपरा का जील तणी दुई टुकड़े होई, होर धरती डोली होर चटाना टकराई, 52होर कब्रा खुली, होर बहु सारे शव पवित्र लोका रे बहू शफ जिऊंदे होई, 53होर तेऊरे जिऊदे हूँणे बाद त्या कब्रा मेंज़ा का निखल़ी करे पवित्र नगरा में नाठे होर बहू त्या हेरी। 54तेबा सुबेदार होर जोह तेऊ संघे यीशु रा पहरे दिंदा, ज़ाजरी होर जोह कुछ होऊ, तेऊ हेरी करे बहू डरी होर बोलू, सची यह मणश परमेश्वर रअ शोहरू थी! 55तखे बहू बेटड़ी जोह गलीला का यीशु री सेवा करदे तेऊ संघे आई, दुरा का यह हेरदी लागी दी। 56त्यामें मरियम मगदलेनी, होर याकूब होर योससा री आमा मरियम, होर जब्दी रे शोहरू री आमा थी।
यीशु कब्रा मे डाहू
(मरकुस 15.42-47; लूका 23.50-56; यूहन्ना 19.38-42)
57जेबा ब्याल्क होई तेबा यूसुफ ना अरिमितिया रअ एक सेठ मणश, जोह आपु ही यीशु रअ चेलअ थी, आउअ। 58तेऊ पिलातुसा सेटा नाहीं करे यीशु रअ शव माँगु। एता में पिलातुसे दींणे री आज्ञा दिंनी। 59यूसुफे शव मागु होर सह शोभली चादरी में पल़ेटू। 60होर सह आपणी नऊई कब्रा में डाहू, जोह तेऊ शाफड़ा में कोती दी थी, होर कब्रा रे दुआरा सेटा एक बढ़अ पाथर बदल़ी करे नाठअ। 61मरियम मगदलेनी होर दूजी मरियम तखे कब्रा रे सामने बेठी दी थी।
कब्रा में पहरा
62दूजी धियाड़ जोह वश्यागा री धयाड थी, प्रधान याजक होर फरीसीये पिलातुसा सेटा कठे होई करे बोलू, 63हे मालक, हामा याद साहा कि तेऊ भरमाऊण आले जेबा सह जिऊंदअ थी, बोलू, महा चीई धियाड़ी बाद भी जिऊंदे हूँणा। 64आज्ञा दे कि चीई धियाड़ी तणी कब्रा री रखबाली करे , एडा नांई होए कि तेऊरे चेले तेऊ इच्छी करे चोरी निएँ होर लोका बे बोले, सह मुएँदे का जिऊंदअ होऊ। तेबा पिछला धोखा पहिले का भी बुरा हूँणा। 65पिलातुसे तयाबे बोलू, तमा सेटा पहरे आले साहा। नाहाँ, आपणी समझा रे साबे रखबाली करा। 66तेबा त्या पहरी संघे नी करे नाठे, होर पाथरा में मोहर लाई करे कब्रा री रखबाली करी।
Currently Selected:
मत्ती 27: ISJNT
Highlight
Share
Copy
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
