मत्ती 23
23
शास्त्री होर फरीसी का साबधान
(मरकुस 12.38-39; लूका 11.43-46; 20.45,46)
1तेबा यीशु भीड़ा बे होर आपणे चेले बे बोलू, 2शास्त्री होर फरीसी मूसा री गद्दी में बेठे दे आसा; 3एतकी तणी हाऊं जोह कुछ तमाबे बोल्लअ तेता करे होर मने, पर त्या साही काम नांई करे; किबेकि त्या बोला तअ साहा पर करदे नांई। 4त्या एक एडे गरके बोझा बे जासू चुआकणा मुशिकल साहा, बान्हीं करे त्या मणशा री कान्हां डाहंदा; पर आपु तेता आपणी गुठी संघे भी सकीयाउणा भी नांई चाहंदे। 5त्या आपणे सारे काम लोका रिहाउंणे बे करा: त्या आपणे छाबु चऊड़े करा होर आपणे झिकड़े री कोर बढ़ाउंदा। 6धामा में बड़ी-बड़ी होर शोभली ज़ागहा, होर प्रार्थना घरा में मुख्य-मुख्य आसना, 7बजारे नमस्कार, होर लोका रा गुरु शूणना त्याहा सभी का प्यारा लागा। 8पर तमे गुरु नांई बणे, किबेकि थारअ एक ही गुरु साहा, होर तमे सभे भाई साहा। 9धरती में कासी बे आपणं बापू नांई बोले, किबेकि थारअ एक ही स्वर्गीय बापू साहा, जोह स्वर्गे साहा। 10होर मालक भी नांई बणे किबेकि थारअ एक ही मालक साहा, मतलब मसीह। 11जोह तमा का बडअ हो, सह थारअ सेबक बणे। 12जोह कोई आपणे आपा बे बडअ मनलअ, सह होछअ हूँणअं होर जोह कोई आपणे आपा बे होछअ मनलअ, सह बडअ हूँणअं।
शास्त्री होर फरीसी रे पाखण्डा रा अधिकार
(मरकुस 12.40; लूका 11.39-42,44,52; 20.47)
13हे कपटी शास्त्रीयो होर फरीसीयों तमा पैंदे हाय! तमे मणशा बै स्वर्गा रे राज्य रअ दुआर बन्द करा, नाह तअ आपु ही तेऊमें नाहदे होर नाह तेऊमें नाहणे आले नाहणे दिंदे। 14हे कपटी शास्त्रियो होर फरीसियो तमा पैंदे हाय! तमे बिधबा रै घरा खांदा, होर रिहाउंणे री तणी बड़ी देर तणी प्रार्थना करदे रहंदा एतकी तणी तमा ज्यादा दण्ड भेटण। 15हे कपटी शास्त्रीयो होर फरीसीयो तमा पैंदे हाय! तमे एकु मणशा आपणे मता में आणने री तणी सारी जमीन होर सरग एक करा, होर जेबा सह मता में इहंदा तेबा तेऊ आपु का दूगणा नारकीय बणाउंदा।
16हे काणे गुरुओ, तमे पैंदे हाय! जोह बोला कि अगर कोई देहुरे री कसम खाए तेबा किछे नांई, पर जेबा कोई देहुरे रे सुने री कसम खाए तेबा तेताका जरूर फसणअं। 17हे मूर्खो होर काणेयों, कुंण बडअ साहा; सुना या सह देहुरे जासू में सुना पवित्र हुंदा? 18तेहुकी बोला कि अगर कोई बेदी री कसम खाए तेबा किछे नांई पर जोह भेंट तेता में साहा, अगर कोई तेतकी कसम खाए तेबा जरूर फसणअं। 19हे काणेओ, कुंण बडअ साहा; भेंट या बेदी जासू का भेंट पवित्र हुंदा? 20एतकी तणी जोह बेदी री कसम खांदा, सह तेतकी होर जोह कुछ तेता में साहा, तेतकी भी जोह कुछ तेता में साहा, तेतकी भी कसम खांदा। 21जोह देहुरे री कसम खांदा, सह तेऊरी होर तेऊमें रहंण आले री भी कसम खांदा। 22जोह स्वर्गा री कसम खांदा, सह परमेश्वर रे सिंहासन री होर तेता में बेशण आले री भी कसम खांदा।
23हे कपटी शास्त्रीयो होर फरीसीयो! तमा पैंदे हाय! तमे पोदीने, होर सोंफ, होर जीरे रा दसमा अंश जोह दिंदा, पर तमे व्यवस्था री गम्भीर गला मतलब न्याय, होर दया, होर बुशाह छाडू; लोडी, कि याह भी करदे रहंदा पर याह भी नांई छाड़दे। 24हे काणे गुरुओ, तमा मच्छरा तेता का छाना, पर ऊंटा तेता में का निगल़ा। 25हे कपटी शास्त्रीयो होर फरीसीयो तमा पैंदे हाय! तमे कटोरे होर थाल़ी बागा का मांजा पर त्या मितरा त्या लुट सगीट होर बुरी आदते संघा भरी दे साहा। 26हे काणे फरीसी, पहिले कटोरे होर थाल़ी मितरा का मांज़ा कि त्याह बागा का भी शुद्ध हो।
27हे कपटी शास्त्रीयो होर फरीसीयो तमा पैंदे हाय! तमे अशुद्ध कब्रा रे बराबर साहा जोह पैंदा का भी शोभली हेरा, पर मितरा मुडदे रै हाडके होर सभी तरहा री मलिनता का भरी दे साहा। 28एसी रीति का तमे भी उझे का मणशा धर्मी हेरा, पर मितरा रे कपट होर कुकर्मा का भरी दे आसा।
शास्त्री होर फरीसी पैंदे दण्डा री भविष्यवाणी
(लूका 11.47-51)
29हे कपटी शास्त्रीयो होर फरीसीयो तमा पैंदे हाय! तमे भविष्यद्वक्ता री कब्रा दण्ड सुआरा होर धर्मी री कब्रा बणाउंदा, 30होर बोला, अगर हामे आपणे बाबा दादू री धियाड़ी में हुंदे तेबा भविष्यद्वक्ता री हत्या में त्याह रे सांझी नांई हुँदे। 31एतका तअ तमा आपु पैंदे आपे ही गुआही दिंदा कि तमे भविष्यद्वक्ता रे हत्या करने आले री संतान साहा। 32पर तमे आपणे बाबा दादू रे पापा रअ घडअ पूरी तरह भरा। 33हे जरिले सर्पा, होर करैता रे शोहरूओ, तमे नरका रे दण्डा का केहडे बचणे? 34एतकी तणी हेरा, हाऊं तमा सेटा भविष्यद्वक्ता होर शास्त्री होर बुद्धिमाना भेजू; होर तमा त्याह मेंज़ा का कुछ मारी पाउंणे होर क्रुसा में चढ़ाउंणे, होर कुछ आपणे प्रार्थना घरा में कोड़े बाहंणे होर एकु नगरा का दूजे नगरा बे त्यारा पीछा करदे रहंणा। 35जासू का धर्मी हाबिल का लई करे बिरिक्याह रे शोहरू जकर्याह तणी, जूण तमे देहुरे होर बेदी रे मन्झे मारू, जेतरे धर्मी रा लोहू धरती में बहाउ सह सबे थारे मुड़े पडना। 36हाऊं तमाबे सच बोला, या गला एउ वक्ता रे लोका पैंदे इहंणी।
यरूशलेमा बै बिलाप
(लूका 13.34-35)
37हे यरूशलेम, हे यरूशलेम! तुह भविष्यद्वक्ता मारी पाउंदा, होर जोह ताह सेटा भेजी दे, त्या पैंदे पथराब करा। केतरी ही बारी मांई चाहू जेड़े मुर्गी आपणे होछे चेलू फयाखा थोंई कठे करा, तेड़ा ही हाऊं भी तेरे बालका कठे करू, पर तमे नांई चाहू। 38हेरा, थारअ घर तमाबे उजाड़ छाड़ा। 39किबेकि हाऊं तमाबे बोला कि एब्रा का तेबरे तणी नांई बोलले, धन्य साहा सह, जोह प्रभु रे ना का इहंदा तेबरे तणी तमे महा भी कधी नांई हेरणअं।
Currently Selected:
मत्ती 23: ISJNT
Highlight
Share
Copy
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
