मत्ती 13
13
बेजे बउंण आले रा दृष्टान्त
(मरकुस 4.1-9; लूका 8.4-8)
1तेसी धियाडी यीशु घरा का निखल़ी करे गलिला रै समुन्दरा रे किनारे नाहीं करे बेठअ। 2होर तेऊ सेटा बड़ी भीड़ कट्ठे होई कि सह किस्ती में चढू, होर सारी भीड़ कनारे में खड़ी रही। 3होर तेऊ तयाबे दृष्टान्ता में बहू गला खोजी एक बउणे आल़अ बेजे बउंदअ निखतअ 4बउदे वक्ते कुछ बेजा बाता रे कनारे पडू होर चेलू इच्छी करे चुंघु 5थोडा जेहा बेजा शाफडा री जमीना में पडू ज़खे खासा माटा नांई भेटा सह बेजा छेकअ लागा, किबेकी माटा खासा नांई थी होर धूपा लागी करे सह बेजा झ्लुसू, होर जड़े नांई ढाकणे री बजा का सह शूका। 6पर धयाडे निखल़ने में त्याह जल़ी, होर जड़ा नांई ढाकणे का त्याह शुके। 7कुछ बेजा झाख्ड़े पडू होर झाख्ड़े सह बढ़ी करे जिहारु। 8पर कुछ बेजा रांबडी जमीना में पडू, होर फल़ी करे कोई शअ गुणा, कोई शाठ गुणा, होर कोई तीह गुणा। 9जासके कणेट हो त्याह शुणा।
दृष्टान्ता रा मतलब
(मरकुस 4.10-12; लूका 8.9,10)
10चेले सेटा इच्छी करे तेऊबै बोलू, तूह लोके संघे दृष्टान्ता में किबे गला करा? 11तेऊ उतर दिना, तमाबे स्वर्गा रे राज्य में भेदा री समझ दिनी दी साहा, पर तयाबे नांई। 12किबेकि जासू सेटा साहा, तेऊबै होर दीणा, होर जासू सेटा बहू होला: पर जासू सेटा नांई आंदा, तेतका जोह कुछ तेऊ सेटा साहा, सह भी नीणा। 13हाऊं त्याहबे दृष्टान्ता में शिक्षा दिंदा, कि त्याह हेरदे भी नांई हेरदे होर शुणदे भी नांई शुणदे, होर नांई समझदे। 14त्याहरे बारे में यशायाह री भविष्यवाणी पूरी हूँदा: तमा कणेटा का तअ शुणना, पर समझणा नांई; होर आछी का हेरना, पर तमा नांई हेरना। 15किबेकि याह लोका रा मन मोटा होऊदा, होर जोह कनेटा का ज़ोरे शुणा होर त्याहा आपणी आछी बन्द करी दी; कई एडा ना होहे कि त्याह आछी का हेरे, होर कनेटा का शुणे, होर मना का समझे, होर तेहुकी नाहे, होर हाऊं त्याह ठीक करू।
16पर धन्य साहा थारी आछी, कि त्याह हेरा; होर थारे कणेट कि त्याह शुणा। 17किबेकि हाऊं तमाबे सच बोला कि बहू ज़ेहे भविष्यद्वक्ता होर धर्मी चाहू कि जोह गला तमे हेरा साहा, पर नांई हेरी; होर जोह गला तमे शुणा, पर नांई शुणी।
बेजे बउंण आले री ब्याख्या
(मरकुस 4.13-20; लूका 8.11-15)
18एबा तमे बोलण आले रे दृष्टान्ता रा अर्थ शुणा: 19जोह कोई राज्य रा वचन शुणी करे नांई समझे, तेऊरे मना मे जोह बउदा, तेऊ सह दुष्ट इच्छी करे छड़ीयाउंदा। यह सह साहा, जोह बाता रे कनारे बऊन्दा साहा। 20होर जोह शफ्ड़े वउदा साहा, या त्याह साहा, जोह बचन शुणी करे तेवरी खुशी संघे मना। 21पर आपु में जड़ा नांई डाहंणे री बजा का सह थोड़े धयाडे रअ ही साहा, होर जेबा वचना री बजा का क्लेश होर दुख हूँदा, तेबा तेभरी ठोकर खांदा। 22जोह वेज़ा कांडे में बऊ, यह सह साहा, जोह बचन शुणा, होर एउ संसारा री चिन्ता होर धना रा धोखा वचन दबाऊनदा होर किछे फल नांई इंदअ। 23रांबडी जमीना बे बऊ, यह सह साहा, जोह बचन शुणी करी समझा, होर फल़ आंणा; शअ गूणा, कोई साठ गुणा, होर कोई तीही गूणा।
जंगली बेजे रा दृष्टान्त
24यीशु तयाबे एक होर दृष्टान्त दिना: स्वर्गा रा राज्य तेऊ किसाना बराबर साहा जूणी आपणे खेचे शोभला बेजा बऊ। 25पर जेबा लोका सुतेदे थी, तेबा तेऊरे शत्रु ईछी करे गिहू मेंझे जंगली बेजा बई करे नाठअ। 26जेबा लागदा लागा होर लुडी लागी, तेबा जंगली दाणे रे बूटे भी हेरदे लागे। 27एता में घरा रे नोकरे ईच्छी करे तेऊबै बोलू, हे मालक, कैह तांई आपणे खेचे शोभला बेजा नांई बऊ? तेबा जंगली दाणे रे बूटे कंधा का आउए? 28तेऊ तयाबे बोलू, यह कासु शत्रु रा काम साहा। नोकरे तेऊबै बोलू, कैह तेरी इच्छा साहा, की हामे नाहीं करे त्याह बटोरू? 29तेऊ बोलू नांई, एडा ना हो कि जंगली दाणे रे बूटे बटोरदे वक्ते तमे त्याह संघे गिहू रे डाला भी ना पेचे। 30फसला काटणे तणी दुही कठे बढने देया, होर काटणे वक्ते महा काटणे आले बै बोलणा कि पहिले जंगली दाणे रे बूटे बटोरी करे ज़ाल़ने बै कठे बान्हाँ, होर गिहू मेरे भंडारा में कठे करा।
राई रे दाणे रा दृष्टान्त
(मरकुस 4.30-32; लूका 13.18,19)
31तेऊ तयाबे एक होर दृष्टान्त दिना स्वर्गा रा राज्य राई रे दाणे बराबर साहा, जोह कुंणी मणशे नी करे आपणे खेचे बऊ। 32सह सभी बेजे का होछअ हुँदा पर जेबा बढ़ा तेबा सह सभी शागा का बढ़अ हुँदा; होर एडअ बूटअ हुँदा कि सरगा रे चेलू भी तेऊरी डाली री छाईंटा में बसेरा करी सकता।
खमीरा रा दृष्टान्त
(लूका 13.20,21)
33तेऊ तयाबे एक होर दृष्टान्त दिना: स्वर्गा रा राज्य खमीरा रे बराबर साहा जोह कुंणी बेटड़ी नी करे दस किलो पीठे में मलाऊ होर हुंदे-हुंदे सह सारा खमीर होऊ।
दृष्टान्ता रा प्रयोग
34यीशु या गला दृष्टान्ता में लोका बै बोली, होर बिना दृष्टान्ते सह तयाबे किछे नांई बोलदअ थी, 35कि जोह बचन भविष्यद्वक्ता सगे बोलू, सह पूरा हो: महा दृष्टान्ता बोलणे बे आपणें मुँह खोलणअं महा त्याह गला जोह संसारा री शुरुआता का गोझी रही प्रगट करणी।
जंगली बेजे रै दृष्टान्त री ब्याख्या
36तेबा सह भीड़ा छाडी करे घरा वे आउअ, होर तेऊरे चेले तेऊ सेटा इच्छी करे बोलू, खेचे जंगली दाणे रा दृष्टान्त हामा बै समझा। 37तेऊ उतर दिना, शोभले बेजे बऊंण आल़अ मणशा रे शोहरू साहा। 38खेच संसारा रे लोका साहा, शोभला बेजा राज्य रे शोहरू, होर जंगली बेजा दुष्टा रअ शोहरू। 39जूणी शत्रु सह बणाऊ सह शैतान साहा, कटनी संसारा रा अन्त साहा, होर काटणे आल़अ स्वर्गदूत साहा। 40जुणी जंगली दाणे बटोरा होर जाल़दा तेडा ही संसारा रा अन्ता मेंजे हूँणा। 41हाऊ मणशा रअ शोहरू आपणे स्बर्गा दूता भेज़णे, होर तेऊरे राज्य मेजा का सभी ठोकरा री बजा होर कुकर्म कर्णआले कठे करणे, 42होर त्याह आगि रे कुंडे पाउंणे, ज़खे लेरना होर दांद पिशणा हूँणा। 43तेऊ वक्ते धर्मी आपणे बापू रै राज्य में धयाडी बराबर चमकणे। जासके कणेट हो त्याह शुणा।
गोझीदे खजाने रा दृष्टान्त
44स्वर्गा रा राज्य खेचे गोझीदे धना बराबर साहा, जोह कासु मणशा भेटा होर तेऊ सह गझयाऊ, होर खुशी संघे नाहीं करे आपणा सब कुछ बेचु होर सह खेच लऊ।
अनमोल मोती रा दृष्टान्त
45तेबा सरगा रा राज्य एकी व्यापारी जेड़अ साहा, जोह कासु मणशा भेटा होर गझयाऊ, होर खुशी सगे नाहीं करे आपणा सब कुछ बेचु होर सह खेच लऊ। 46जेबा तेऊ बहुमूल्य मोती भेटअ तेबा तेऊ आपणा सब कुछ बेचु होर सह लऊ।
ज़ाले रा दृष्टान्त
47तेऊकी सरगा रा राज्य तेऊ बड़े ज़ाल़ा बराबर साहा जोह समुद्रा में पाऊ, होर हर तरहा री माछी ढाकी। 48होर जेबा जाल़अ भरु, मछुए जाल़अ कनारे बै खींची आणु, होर वेशी करे शोभली-शोभली माछी भांडे में डाही होर माड़ी-माड़ी फैंकी दीनी। 49संसारा रा अन्ता में एड़ा ही हूँणा। स्वर्गदूता इच्छी करे दुष्ट धर्मी का अलग करने, 50होर दुष्ट लोका आगि रे कुंडे पाउंणे। ज़खे लेरना होर दांद पिशणा हूँणा।
पुराणी होर नई शिक्षा रा दृष्टान्त
51कैह तमे या गला समझी? त्याहे बोलू, उअह। 52तेऊ तयाबे बोलू, एतकी तणी हर एक शास्त्री जोह स्वर्गा रे राज्य में चेलअ बणुदअ साहा, तेऊ जेह घरेलू मणश साहा जोह आपणे भण्डारा का नई होर पुराणी चीजा काढ़ा।
नसरता में यीशु रा अनादर
(मरकुस 6.1-6; लूका 4.16-30)
53जेबा यीशु यह सब कुछ दृष्टान्ता में खोजी छेकू, तेबा तखा का नाठअ। 54होर आपणे नगरा में इच्छी करे त्याह प्रार्थना घरा में एडे उपदेशा दींदअ, लगअ कि त्याह परेशान होई करे वोलदे लागे, एउ या ज्ञान होर सामर्थ्य रे काम कंधा का भेटे? 55कैह यह मिस्त्री रअ शोहरू नांई? होर कैह एउरी आमा रा ना मरियम होर भाई रा ना याकूब, यूसुफ, शिमोन यहूदा नांई? 56होर कैह एउरी सभे बहीणा हामा मेंझे नांई रहंदी? तेहुकी एउ यह सब कंधा का भेटा 57एउ साबे त्याहे तेऊरी बजा का ठोकर खाई, यीशु तयाबे बोलू, भविष्यद्वक्ता रा आपणे देशे होर आपणे घरा छाडी होर कंधे निरादर नांई हुँदा। 58होर तेऊ तखे त्याहरे अबिश्बास री बजा का बहू सामर्थ्या रे काम नांई करी।
Currently Selected:
मत्ती 13: ISJNT
Highlight
Share
Copy
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
