लूका 7
7
एकी सूवैदारा रा बिशवास
(मत्ती 8.5-13)
1जेबा तेऊये या सारी गला लोका बे खोजी तेबा यीशु कफरनहूम नगरा में आऊअ 2तखे एक सुबेदारा रअ एक प्यारअ कामा करण आल़अ नोकर थी सह मरी चालूदअ थी। 3तेऊ यीशु री चर्चा शुणी करे यहूदी रे कई बडे प्राचीनों यीशु सेटा बे यह बिनती लई करे भेजी कि इच्छी करे मेरे नोकरा ठीक करे। 4त्याह यीशु सेटा वै आउये, होर तेऊका वडी बिनती करी त्याहे बोलू, “सह एता लाईक साहा कि तुह तेऊवै एडा करे, 5किवकी सह महारी जाति का प्रेम डाहदा, होर तेऊये ही हमारअ प्रार्थना घर बनऊदअ साहा।” 6यीशु त्याह संघे नाठअ, पर जेबा सह घरा का दूर नांई थी, तेबा सुबेदारे आपणे कई दोस्त बोल्दे भेजी की, “हे प्रभु दुःख नांई चुआके, किबेकि हाऊं एता लायक हाउ नांई आन्धअ कि तुह मेरे छता थंईं इच्छे। 7एउ सावै हाऊं आपणे आपा वै एता बराबर भी नांईं समझु कि ताह सेटा वै इछे, पर आज्ञा ही दे मेरअ सेबक राम्बड़अ हुणअ। 8हाऊं आपु भी पराधीन साहा, होर सिपही मेरे हाथे साहा; होर जेबा हाउ एकी वै बोले, नाश, तेबा सह नाहदा; होर दूजे वै बोलू, इच्छ, तेबा सह इंहदा; होर आपणे कासी भी नोकरा वै, बोलू एडा कर तेबा सह करदा।” 9एता शुणी करे यीशु हेरान होऊ होर तेऊका मुह फ्रेई करे भीडा फेरा वै भाहलू जोह तेऊ पीछे इन्दी लगीदी, बोलू, हाऊं तमा कअ बोला कि माईये इस्राएला देशा में भी एडा बुशाह नांई पाऊ 10होर भेजी दे लोका घरे इच्छी करे नोकर रामब्डअ भाहलू।
विधवा रे शोहरू वै जीबन दान
11थोड़ी धियाड़ी बाद सह नाईन ना रे एकी नगरा वै नाठअ। तेऊरे चेले होर बडी भीड़ तेऊ संघे नाहधी लागी दी थी। 12जेबा यीशु एकी नगरे पूजअ, तेबा लोका एकी मुर्दे निंदे लागेदे थी, जोह तेऊरी माँ रअ एक शोहरू थी, होर सह विधवा थी, होर नगरा रे सवै लोका तेऊ संघे थी। 13तेऊ हेरी करे परमेश्वरा दया आई, होर यीशु ये बोलू नांई लेरे 14तेबा यीशु नेड़ नांही करे शफ छुहु, होर चुआकण आले रुकी। तेबा यीशु ये बोलू, हे जुआना! हाऊं ताबे बोला की खड उठ। 15तेबा सह मुड़द खडअ होऊ होर बोलदअ लागअ यीशु ये सह तेऊरी आमा वै दीनअ। 16एता हेरी करे बहु लोका डरी, होर त्याह परमेश्वरा री बड़ाई करदे लागे, त्याहे बोलू हामा सेटा एक भविष्यद्वक्ता आउअ, होर परमेश्वरा आपणे लोका पैंदे दया करी। 17होर यीशु री या गला सारी यहूदी रे ओरी पहोरी रे सारे देशा में फैली।
यूहन्ना वप्तिस्मा दिण आले रअ प्रश्न
(मत्ती 11.2-19)
18होर यूहन्ना वै तेऊरे चेले याह गल्ला रा समाचार दिना। 19तेबा यूहन्ना आपणे चेले में दूई चेले शादी, होर बोलू तमे प्रभु सेटा नाशा, होर पूछे की ईहंण आल़ तुहे साहा की हामें कासु होरी हेरदे रहे? 20त्याह तेऊ सेटा नांही करे बोलू, यूहन्ना बपतिस्मा दीण आले हामें ताहा सेटा भेजी की ईण आले तुह साहा की यह हामें होरी भाले रहे 21होर एखा बेटड़ी भी जोह दुष्टात्मा का छूडाइदी थी , त्याह सवै ठीक करी, होर बहू काणे वै आछी दीनी 22होर यीशु त्याहवै बोलू, जोह तमे हेरू होर शुणु, नांही करे यूहन्ना वै बोला, की काणे हेरदे लागे, होर लेगड़े हाडदे लागे होर कोढ़ी ठीक होई, टऊणे शुणा, मुड़दे जिऊंदे करी, होर कंगाला बे सुसमाचार शुणाउंदा 23धन्य साहा त्याह जोह मेंरे बारे में ठोकर नांई खाले 24जेबा यूहन्ना रे भेजी दे लोका ठुरी तेबा यीशु यूहन्ना रे बारे में बोलदअ लागअ तमे बूणे कैह हेरू, की बागरी संघे हीलदअ सरकण्डे? 25तेबा तमे कीजी हेरदे नाठे, कैह नरम झिकड़े बान्हीं दे मणशा बे? हेरा, जूणी बडीया झिकड़े बानीदे साहा, त्याह राज महला मे रहंदा। 26तेबा किबे नाठे दे? कैह कासु भविष्यद्वक्ता हेरदे? हाऊं तमे वै बोला की तमे भविष्यवाणी करने आले का भी बडअ मणशा हेरदे नाठे। 27यह सह साहा ज़ासरे बारह मे लिखुदा साहा, महा ताह जहे दूत भेजने जासु तेरी बात सीधी करनी। 28हाऊं तमाबे सच बोला कि जोह बेटड़ी का होऊद आसा, त्याह मेज़ा का यूहन्ना कअ बडअ कोहे नांई साहा, पर जोह परमेश्वरा रै राज्य होछे का होछअ साहा सह तेऊका भी वडअ साहा। 29होर सभी आम लोका शुणी करे होर चुंगी निण आले भी यूहन्ना रे बपतिस्मा लई करे परमेश्वर सचअ मानु। 30पर फरीसी व्यवस्थापक होर राजे तेऊका बपतिस्मा नांई लई करे परमेश्वरा री गलाअ आपणे मना में नाई मनी। 31हाउ एउ जुगा रे लोका री तुलना कासु का देऊ? 32त्या शोहरू रे सामान साहा जोह बजारे बेठेदे होर एकी दूजे वै बोलदे लागे, हामें तमावै बशुरी बाजी, होर तमे नांई नाची होर हामे दुःखा में थी तमे नांई लेरी। 33किबेकि यूहन्ना बपतिस्मा दिण आल़अ नाह रोटी खदअ नाह दाखरस झूटदअ होर तमे बोला तेऊमें दुष्टात्मा साहा। 34मणशा रअ शोहरू खांदअ झूटतअ आओ होर तमे बोलू हर पेटू होर पियक्कड़ मणश चुंगी निण आले रे होर पापी रे दोस्त बणु। 35पर ज्ञान आपनी सभी सन्ताना संगे सच्चा डाहंदा।
फरीसी रे घरे पापी बेटड़ी वै माफी
36तेऊकी एकी फरिसीये यीशु ज़ेह का बिनती करी कि यीशु तेऊरे घरे रोटी खाए, तेऊकी यीशु फरीसी रे घरे रोटी खांदअ नाठअ। 37तेऊ नगरा री एक पापी बेटड़ी यह सोची करे की यीशु फरीसी रे घरे रोटी खांदअ बैठअ तेसा संगमरमर रे भाडे में इत्र आणु। 38होर यीशु रे पीछे खड़ी होई करे लेरदी लगी, होर तेऊरी जाघा आपणे आरशु संघे शगी होर आपणी जटा संघे साफ करी होर यीशु री जंघाा वै मुगी दिनी होर महगा तेल इत्र लेसु 39एता हेरी करे फरीसी जासुये यीशु आपणे घरे वै शादू दअ थी, आपणे मना में सोचतअ लागअ, की जेबा भविष्यद्वक्ता हुन्द तेबा यह जान्दअ की यह बेटड़ी जोह एऊ छुन्दी लागीदी यह कुण साहा किबेकि सह एक पापी वैटडी। 40यीशु ये एतके उतरा में बोलू, हे शिमोन महा तेबा कुछ बोलना, तेऊए बोलू, हे गुरु बोलअ। 41तेबा यीशु बोलू कासु सेठा रे दुई कर्जदार थी, एक पांच सो दीनार होर दूजे पजाह दीनार दीणे बै थी, 42जेबा त्याह सेटा दीणे वै किछे नांई रहु तेबा त्याहे दुही रा कर्ज माफ करू तेबा त्याह दुही में कासु खासा प्रेम डहणा 43शिमोने उतर दिना, मेरी समझा में ज़ासरा खासा कर्ज माफ करू तेऊका खासा प्रेम करणा यीशु बोलू, “तेरा बिचार ठीक साहा।” 44होर यीशु तेसा बेटड़ी फेरे हेरू, होर शिमोने वै बोलू तुह एसा बेटड़ी हेरा? हाऊं तेरे घरे आउअ ताई मेरी जंघाा धोउणे वै पांणी नाई दिना पर एसा बेटड़ी आपणे आशु संघे मेरी जाघा शगी होर आपणी जटा संघे साफ करी। 45ताई मेंरी इज्जत नांई करी जेबारा ओरी आई ऐसा मेरी जाघा नांई छाडी। 46ताई मेरे मूडे तेल नांई लेसु पर ऐसा मेंरी जाघा इत्र लेसु 47तेबा हाऊं तमा का बोला कि एसाका जोह बहू पाप थी, माफ होऊ किबेकी ऐसा ज्यादा प्रेम करू पर ज़ासरे थोडा माफ होऊ सह प्रेम भी थोडा करदे। 48होर यीशु तेसा बेटड़ी वै बोलू नाश तेरे पाप माफ होई। 49तेबा जोह लोका यीशु संघे रोटी खांदे वैठे दे थी, त्याहे आपणे मना में सोचदे लागे यह कुण साहा जोह पाप माफ करदा? 50पर यीशु तेसा वैटडी वै बोलू नाश तेरे, बुशाहे तुह बचाई, शांति संघे नाह।
Currently Selected:
लूका 7: ISJNT
Highlight
Share
Copy
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
