लूका 5
5
पहिलअ चेलअ शादण
(मत्ती 4.18-22; 1.16-20)
1जेबा खासे लोका परमेश्वरा रे बचन शुणने री तणी तेऊ पीछे हाणडदे लागे दे थी, होर सह गन्नेसरता रे सारी री झिला रे किनारे खडअ थी, तेबा एडा होऊ। 2कि झीला रे किनारे दुई किस्ती लागी दी हेरी, होर माछी मारन आले जाले धोऊदे लागे दे थी, 3त्याह किस्ती मेंजा कअ एकी पैंदे वैशी करे, जोह सिमोना री थी, तेबा यीशु त्याहक बिनती करी की धरती रे किनारे कअ थोडे जेह तक चाला तेबा यीशु किस्ती पैंदे वैशी करे उपदेशा दींनदअ लागअ। 4जेबरे तेऊ गल्ला करी छेकी तेबा सिमोने बोलू बीचे जेह किस्ती नीह, होर माछी ढाकणे वै आपणे जाले फेंक। 5सिमोने तेऊवै बोलू, हे स्वामी, हामे सारी राच मेहनत करी होर किछे नांई ढाकु, तेबा तेरे बोलणे का हाऊं जाल पाऊदा। 6जेबा त्याह ऐडा करू, तेबा त्याहय वखे बहु माछी ढाकी, होर त्याह रे जाले चुटदे लागे। 7तेबा त्याह आपणे साथी जोह दूजी किस्ती में थी, त्याह वै इशारा करू कि माहरी सहायता करे, होर त्याह इछी करे दुहे किश्ती अखे तणी भरी कि त्याह डुबदी लगी। 8ऐता भाल़ी करे सिमोने पतरस सह यीशु रे पइरे पडू होर बोलू, हे “प्रभु! महा सेटा कअ नाशअ, किबेकी हाऊं पापी मणश साहा।” 9किवकी ऐतरी माछी ढाकणे कअ हाऊं होर मेरे सघी हेरान होई, 10होर तेहड़े ही जब्दी रअ शोहरू याकूब होर यूहन्ना भी, जोह सिमोना रे सांझीदार थी, हेरान होई। तेबा यीशु शामोना वै बोलू, नांई डरे; ऐवरा पोरी ताह मणश ज़िउदे ढाकणे। 11होर त्याह किस्ती धरती रे किनारे वै आणी होर सभे कुछ-छाडी करे तेऊ पीछे नाठे।
कोढी मणश रामबड करणअ
(मत्ती 8.1-4; मरकुस 1.40-45)
12जेबा सह कासु नगरे थी तखे एक कोढ़ी मणश आऊअ; होर सह यीशु हेरी करे सह ऊटे होई करे प्रार्थना करी की, हे परमेश्वर, अगर तुह चाहे तो हाऊं शुद्ध होई सका। 13तेऊये हाथअ बड़ाई करे सह छुउ होर बोलू, हाऊं चहादा कि तुह राम्बडअ हो। होर सह कोढ़ी तेवरी ठीक होऊ। 14तेबा तेऊवै बोलू, कासी का नांई बोले पर नाशी करे आपणे याजका वै रीहाय, होर आपणे शुद्ध हूणे रे बारे में जोह मूसा बलिदान डाहूदा साहा तेता चढा कि तेता पैंदे गुआही हो। 15पर तेत्की गल्ला होर भी फेल्दी रही, होर भीड़ा पैंदे भीड़ तेता शुणदी होर आपणी बिमारी वै ठीक हुणे री तणी कठे हूँदी लगी। 16पर सह अंगी नाशी करे बूणे प्रार्थना करदे लागअ।
द्रागा रे मरीज ठीक करणे
(मत्ती 9.1-8; मरकुस 2.1-12)
17ऐकसा धयाडी ऐडा होऊ की सलाह दिहंणे आले, फरीसी होर तखे होरा लोका भी तखे बेठे दे थी, जोह गलीला होर यहूदिया रे हर एकी ग्रा का होर यरूशलेमा का आऊद थी, होर राम्ब्ड़े करने वे परमेश्वरा री सामर्थ्य तेऊ संघे थी। 18तेऊ वक्ते कई लोका एकी मन्शा जासु लकबे री बीमारी थी, मांजे पैंदे आणू, होर त्या तेऊ मितर निणे री वाता भाले होर तेऊ यीशु जेह निणे वे स्कीमा बणाउदे लागे थी। 19पर जेबा बड़ी भिड़ा री वज़हा का तेऊ मितर नांई नीई सके तेबा त्याय छापरे नाशी करे छापर पेचु, होर मांज तेसी उन्दे पाऊ होर मांजे संघे सह यीशु रे मु़ंहा जैह पजेरू। 20तेऊ त्यारा बुशाह हेरी करे त्यावे बोलू, हे मणशा तेरे पाप माफ होई। 21तेबा शास्त्री होर फरीसी आपु मे गल्ला लागे, यह कुण साहा जोह परमेश्वरा री निन्दा करदा? परमेश्वरा छाड़ी करे होर कुण पाप माफ करी सका? 22यीशु त्याहरे मना री गलअ जाणी करे, त्याका बोलू, तमे आपणे मने क़ह सोचना लाउदा? 23सच क़ह साहा? क़ेह यह बोलणा की तेरे पाप माफ होई या यह की उठ अखा का नाश? 24पर ऐतकी तणी कि तमे जाणे कि मणशा रै शोहरू धरती पेंदे पाप माफ करणे रा अधिकार साहा। तेऊ लकबे रै मरीजा बै बोलू, हाऊं ताहवे बोला, उठ आपणे मांजे चुआकी करे आपणे घरा वे नाश। 25सह तेबरी तेऊ जेह उठू, होर जासू पैंदे सह बश्यागुदअ थी तेता चुआकी करे, परमेश्वरा री बड़ाई करदअ आपणे घरा वे नाठअ। 26तेबा सबे हेरान होई होर परमेश्वरा री बड़ाई करदे लागे होर बखे डरी करे बोल़दे लागे, आज हामे बखे नोखी गल हेरी।
लेबी शादण
(मत्ती 9.9-13; मरकुस 2.13-17)
27ऐता बाद सह वागे नाठअ होर लेबी ना रअ एक चुंगी लउण आल़अ चुंगी घरा रे दुआर ज़ेह बैठदअ हेरू, होर तेऊवे बोलू, महा पीछे इच्छ। 28तेबा सह सबे साह छाड़ी करे उठू, होर तेऊ पीछे नाठअ। 29तेबा लेबी सह आपणे घरा बे नीऊ, होर एकी बडे धामा रा इतजाम करु, तखे चुंगी लउण आले संगे होरा लोका रोटी खांदे बेठेदे थी। 30एता हेरी करे फरीसी होर त्यारे शास्त्री यीशु रे चेले बे बोलदे लागे, तमे चुंगी लउण आले होर पापी सगे किबे खांदा पिदा? 31यीशुये तयाबे उतर दीना, बईद रामड़े मणशा ठीक करदे नांई ईनद पर बीमरा बे जरूरी हुंदा। 32हाऊं धर्मी बे नांई पर पापी मणशा रे मन फिराव री तणी त्या शादद आदअ।
ब्रता रा प्रश्ण
(मत्ती 9.14-17; मरकुस 2.23-28)
33त्याये त्याका बोलू, यूहन्ना रे चेले बराबर ब्रत डाहदा होर प्रार्थना करदा, होर फरीसी रे चेले भी, पर तेरे चेले खांदा पिन्दा। 34यीशु ये त्याह का बोलू, क़ेह तमे बराती का जेबरे तणी लाडअ त्याह संघे रहे, ब्रत करी सका? 35पर त्याह धयाडे ईहणे, त्यामें लाडअ अंगी कर्णअ, तेबा त्याह धयाडे त्याह ब्रत करणे। 36तेऊये एक होर दृष्टान्त भी त्याव खोजु , कोहे मन्श नउये झिकड़े री शाटी करे पूराणी शाती नांई लाउअद, नांई तअ नंउय थोछ़ा होर सह पैबंद पुराने संघे मेल नाई खानदअ 37होर कई लोका नया दाखरस पुराणे भानड़े में नांई भरदे, नांई नया दाखरस नए भांडे फाल्ली करे बागे नाहणा होर भांडअ भी खराब हूँणअ। 38पर नया दाखरस नये भांडे में भरू लोड़ी 39कोई मन्श पुराणा दाखरस झूटी करे नया झुटना नांई चहानदे, किबेकी त्या बोला पुराणा ही ठीक साहा।
Currently Selected:
लूका 5: ISJNT
Highlight
Share
Copy
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
