लूका 1
1
शुरुआत
1बहू लोका त्याह गला जोह हामे संघे बीती, इतिहासा में लिखण वै हाथ लाऊ। 2जेड़ा की त्याह पहिले ओरी या गला हेरन आलअ होर बचना रअ सेबक, त्या गला हामा सेटा पजेरी। 3तेबा हे श्रीमान थियुफिलुस की महा भी यह ठीक पता साहा की सारी गला रा हाल पहिले ओरी ठीक सीखाई दी आसा त्या री तणी पहिले ओरी लिखू, 4की तूह यह जाणा की त्याह गला जासू की ताए शिक्षा पाई दी साहा, त्याह गला केहडी अटल साहा।
यूहन्ना रे जन्मा री घोषणा
5यहूदिया रे राजा हेरोदेसा रे वक्ते अबिय्याह रे दला में जकर्याह ना रा एक याजक थी, होर तेऊरी लाडी हारून रे वंशा री, थी तेसका ना इलीशिबा थी। 6दूहे परमेश्वरा जेह धर्मी थी, होर परमेश्वरा री सारी आज्ञा होर विधियों पेंदे निर्दोष चलन आली थी। 7त्याह रे कोई भी शोहरू नांई थी, किबकी इलीशिबा बांझ थी, होर त्याह दुहे बुढले थी। 8जेबरे सह आपणे समूहा री बारी में परमेश्वरा जेह याजका रा काम क़रा थी, 9तेबा याजका रे साबे तेऊरे ना री चिठ्ठी काडी, प्रभु रे देहुरे नांई करी धुप जाले! 10धूपा ज़ाल़णे रे वक्ते सबे लोका बागे खहड़ी करे प्रार्थना करदे लागदे थी। 11तेऊ वक्ते परमेश्वरा रअ एक स्वर्गदूत धूपा री बेदी सेटा खडूदअ तेऊ हेरु। 12जकर्याह हेरी करे बखे डरु होर तेऊ बखे डर पड़ी। 13पर स्वर्गदूते तेऊवे बोलू, हे जकर्याह, नांई डरे, किबकी तेरी प्रार्थना शुणीदी साहा; होर तेरी बेटड़ी इलीशिबा का तावे एक शोहरू पैदा हुणअ तेऊरा ना यूहन्ना डाहे । 14ता बखे खुशी हुणी होर बहु लोका तेऊरे पैदा हुणे का खुश हुणे, 15किबकी सह परमेश्वरा ज़ेह महान हुणअ; होर तेऊ दाखरस होर मदिरा कधी नांई झूटणा; होर आपणी आम्मा रे पेटा का ही पवित्र आत्मा का भरुदअ हुणअ; 16होर इस्राएलियो मेजा का बहु परमेश्वरा फेरा वे फिरेउणे। 17सह एलिय्याह री आत्मा होर सामर्थ्य मेज़ा का होई करे तेऊ ज़ेह-ज़ेह हाडणा कि पितेरे रा मन बाल बच्चे फेरा बे फिरे; होर आज्ञा नांई मानण आले धर्मी री समझा रे सावे आणे, होर परमेश्वरा रे राज्य बे एक बड़ी प्रजा तयार करे।
18जकर्याह स्वर्गदूता वे बोलू, ऐता हाउ केड़े फेरे जाणु? किबेकी हाँउ बुढल़अ होऊ; होर मेरी बेटड़ी भी बुढल़ी होई 19स्वर्गदूते तेऊवे उतर दिना, हाँउ जिब्राइल साहा, जोह परमेश्वरा ज़ेह खड़अ रहंदा; होर हाँउ ताभे गल़ा खोज़दअ होर ताभे ऐउ सुसमाचारा खोज़दअ भेज़ुदअ। 20हेर ज़धू तणी या गला पूरी नांई होली तेसा धयाडी तणी तुह चुप रहण होर ताह बोली नांई सकणा, किबकी तांई मेरी गल़ा जोह आपणे वक्ता में पूरी हुणी, नांई बुशाह करू। 21लोका जकर्याह बागे निख्ल्दे हेरे रही होर हेरान होई कि तेऊ देहुरे में एतरी देर किवे लागी। 22जेवा सह बागे आउअ, त्यावे बोली ना सकू; त्या समझी कि तेऊ देहुरे दर्शन पाई; होर तेऊए त्या इशारे संघे समझाई, होर चुप रहू। 23जेवा तेऊरी सेवा रे धयाडे पुरे होई, तेऊकी सह आपणे घरा वे नाठअ। 24त्याह धयाडी वाद तेऊरी बेटड़ी इलीशिबा गर्भवती होई; होर तेसा पांज़ा महीने तणी ऐडा बोली करे की हाहू सुईदी नांई आनधी आपु कअ घझयाई ढाहू। 25की लोका संघे मेरा अपमान दूर करने बे परमेश्वरा या धियाड़ी हाउ सुईदी होई।
यीशु रे जन्मा री शुणाई
26छहे महीने में परमेश्वरा री तरफा का जिब्राइल स्वर्गदूत, गलीला रे नासरत ना रे नगरा में आउअ। 27एकी कुआरी शोहरी सेटा भेजू। जासकी मांगणी यूसुफा ना रे दाऊदा रे घरा रे एकी शोहरू संघे होई दी थी, तेसा कुआरी शोहरी रा ना मरियम थी। 28होर स्वर्गदुते मीतर ईछी करे तेसा सेटा बोलू; आंनद होर जय तेरी हो, जासू पेंदे परमेश्वरा रा अनुग्रह साहा, परमेश्वर तांई संघे साहा। 29सह तेसा गला शुणी बखे डरी होर सोचती लागी यह कासु गला रा अभिवादन होला? 30स्वर्गदूते तेसा वै बोलू, हे मरियम डरे नांई आनधी किबेकि परमेश्वरा रा अनुग्रह ता पेंदे होऊ दा साहा। 31हेर तूह सुईदी हुणी, होर तेरे एक शोहरू हुणअ तूह तेऊरा ना यीशु डाहे। 32सह महान हुणअ, होर परमप्रधान रअ शोहरू हुणअ होर परमेश्वर दऊदा राजे रा सिंहासन तेऊ शोहरू वै दीणा 33होर तेऊ याकूबा रे घराने में सदा राज करना, होर तेऊरा राजा रा राज्य रा अन्त कधि भी नांई हुणा। 34मरियमे स्वर्ग दूता वै बोलू, यह कैडा हुणा हाऊं आपणे मर्दा नांई जांणदी। 35स्वर्गदूते तेसा वै उतर दीना, पवित्र आत्मा ताह में ईंहंण होर परमप्रधान री सामर्थ्य छाए ताह प्रेंदे इणी तेबा सह पवित्र जोह हुणे आल़अ साहा। परमेश्वरा रअ शोहरू हुणअ। 36होर हेर तेरी रीश्तेदार इलीशिबा रे बुढली वारी शोहरू हुणे आल़अ साहा जासु वै बांझ, बोला, यह तेसकअ छह महीनअ साहा दअ। 37किबेकि परमेश्वरा बे कोई भी गल नांई हुणे आली नांई आन्धी। 38मरियमे स्वर्गदूता वै बोलू हेर हाऊं परमेश्वरा री दासी साहा महा मे तेरे वचना जेहा लोडी होऊ, तेबा स्वर्गदूत तेसा सेटा का ठूरु।
मरियमा रा इलीशिवा सेटा वै इहणा
39त्याह धियाड़ी मरियम तेवरी पहाड़ी देशा में यहूदा रे एकी नगरा वै नाठी। 40तखे होर जकर्याह रे घरे नांही करी तेसा इलीशिबा वै नमस्ते करी 41जेड़े ही इलीशिबा मरियमा रे नमस्ते शुणी, शोहरू तेसरे पेटे उछल़ू होर इलीशिबा पवित्र आत्मा संघे भरी। 42तेसा जोरे बोलु, तूह सभी बेटड़ी में धन्य साहा होर जासु शोहरू वै ताह जन्म दीणा, सह भी धन्य साहा। 43पर यह वडा अनुग्रह महा वै कंधा का होउ कि मेरे परमेश्वरा री आमा महा सेटा वै आई। 44किवकी तेरे नमस्ते जेड़े मेरे कनेटे शुणी, मेरे पेटे शोहरू ख़ुशी होई करे उछलू। 45धन्य साहा सह जासू बुशाह करू, कि जोह गला परमेश्वरा री तरफा का तेसा बे खोजी दी त्या पूरी हुणी।
मरियम रा स्तुति गान
46तेबा मरियमे बोलू, मेरा प्राण परमेश्वरा री स्तुति करे, 47होर मेरी आत्मा मेरे उद्धारकर्ता आले परमेश्वरा का खुश साहा 48किवकी तेऊ आपणी दासी रे दुखा पेंदे दया करी दी साहा। तेबा हेरा ऐवरा पहोरी सभी युगा-युगा रे लोका महावै धन्य बोलणा; 49किवेकी तेऊ शक्तिशाली महा वै बड़े-बड़े काम करी दे साहा तेऊरा ना पवित्र साहा, 50होर तेऊरी दया त्याह पेंदे साहा, जोह तेऊका डरा, पीढ़ी-पीढ़ी तणी बणी रहंदा। 51तेऊये आपणे हाथा री शक्ति रिहाई होर जोह आपणे मना वै बडे समझदार थी, त्या तितर बितर करी। 52तेऊये बलवान त्यारी रे सिंहासना का नैहट शोटी; होर गरीब उज़े चूआकी। 53तेऊये भोछे बे शोबली चीजा संघे रजेरी, होर सेठ खाली हाथे संघे काहड़ी। 54तेऊये आपणे सेबक इस्राएल सम्भालू आपणी तेसा दया याद करे, 55जोह अब्राहम होर तेऊरे वंशा पेंदे सदा रहणी, जेड़ा तेऊये हमारे बाव दादू कैह बोलू। 56मरियम लगभग चीई महीने तेसा संघे रही करे आपणे घरा वै नाठी।
यूहन्ना बपतिस्मा दीण आल रा जन्म
57तेबा इलीशिबा रे सुईंणे रे धियाड़े पूरे होई, होर तेसा एकी शोहरू वै जन्म दीना। 58तेसके पड़ोसी होर कुटुम्बीय यह शूणी करे की प्रभु तेसा पेंदे बड़ी दया करी दी साहा तेसा संघे खुशी मनाई, 59होर एड़ा होऊ की आठी धयाडी त्या बालका रा खतना करदे आउये होर तेऊरा ना तेऊरे वावा रे ना पेंदे जकर्याह डाहदे लागे। 60एता पेंदे तेऊरी आमा बोलू, नांई; एऊरा ना यूहन्ना डाहणा। 61त्याहे तेसा वै बोलू, तेरे खानदानी में कासी रा ना यह नांई आंदा! 62तेबा त्याहे ईशार संघे तेऊर बापू का पुछू की तूह कैह ना डाहणा चाहन्दा? 63तेऊये लिखणे री पट्टी मागी करे लिखू एयुरा ना यूहन्ना साहा दा, होर सभी बडी हैरानी होई। 64तेबा तेऊर मुंह होर जीभ तेवरी खूली; होर सह बोल्दअ लागअ होर परमेश्वरा धन्यवाद करदअ लागअ। 65तेऊरे नेड़ तेड़ रहण आले डरी; होर यह सभी गल्ला री चर्चा यहूदिया रे सारी पहाडी देशा में फैली, 66होर सभी शुणन आले आपणे मना में न्याय करी कर बोलू, यह शोहरू केहड़अ हुणा? किबेकि परमेश्वरा रअ हाथ तेऊ संघे थी।
जकर्याह रा स्तुति गान
67त्याह रे बापू जकर्याह पवित्र आत्मा संघे भरू, होर भविष्यवाणी करदअ लागअ। 68प्रभु इस्राएल रे परमेश्वर धन्य हो, किबेकि तेऊये आपणे लोका फेरा वै हेरू होर छुटकारा दीना, 69होर आपणे सेबका दाऊदा रे घरे नाही करे हमारी तणी एक उद्धारा रअ एक शींग काडू। 70जेड़ा तेऊये आपणे पवित्र भविष्यद्वक्त ज़ो संसारा रे शुरू होरी हुँदै आऊदे, बोलू थी 71मतलब माहरे शत्रु का, होर माह रे सारे दुश्मणा रे हाथा का हमारा उद्धार होउ, 72की माह रे बाबा दादा पेंदे दया करी करे आपणी पवित्र वाचा री कसम याद करे, 73होर सह कसम ज़ो तेऊये माहरे बाबा अब्राहम संघे खाई दी थी, 74की तेऊ हामा वै याद दीणा की हामा आपणे शत्रु रे हाथ का बचाऊणे, जेबा हामे तेऊरी स्तुति करले। 75तेऊरे सामने पबित्र होर धार्मिकता संघे पूरी उम्र भर निडर होई करे तेऊरी सेवा करदे रहे। 76होर तूह हे बालका, परमप्रधान रअ भविष्यद्वक्त हुणअ, किबेकि तूह परमेश्वरा री बाता बडाउणे री तणी तेऊ ज़ैह-ज़ैंह हांडण, 77की तेऊरे लोका वै उद्धार रा ज्ञान दे ज़ो त्याह रे पापा रे माफ हुणे बाद भेटणा। 78यह माहरे परमेश्वरा री एसा प्रेमे सघा बडी दया हुणी; तेबा उपरा कअ हामा पेंदे दोत्का प्रयाषा निखलणा, 79की नियारा होर मौऊता री छईंटा में वैशण आले वे ज्योति दे, होर माह री जाघा कुशल बाता में सीधी चले । 80होर सह बालक बढ़दअ होर आत्मा में पाकअ हुन्दअ रहू होर इस्राएला में प्रकट हुणे री तणी बूणे रहू।
Currently Selected:
लूका 1: ISJNT
Highlight
Share
Copy
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
