यूहन्ना 6
6
पाजा हज़ारा मर्दा बे रोटी खलाऊणी
(मत्ती 14.13-21; मरकुस 6.30-44; लूका 9.10-17)
1याह गला बाद यीशु गलीला री झीला बे मतलब तिबिरियासा बे किस्ती में चढ़ी करे, री झीला रे पार नाठअ। 2होर एक बड़ी भीड़ तेऊ पीछे लागी किबेकि जोह चिन्ह आले काम सह बमारा पेंदे रिहाऊंदा, सह त्या भालाआ। 3तेबा यीशु पहाडा पेंदे चडी करे आपणे चेले संघे तखे बेठअ। 4यहूदी री फसह रा पर्ब नेड थी। 5जेबा यीशु आपणी आछी चुआकी करे एक बड़ी भीड़ आपु फेरा बे इहंदी हेरी, तेबा फिलिप्पुसा बे बोलू, हाँमा या बे खाणे बे कंधा का रोटी लई आंणी? 6तेऊए यह गल तेऊ परेखणे बे बोली, किबेकि सह आपे ही जाणा, कि कैह करणा। 7फिलिप्पुस तेऊबै उतर दीना, दुई शआ दीनार री रोटी भी खाणे बे देया। तयाबे पुरी नांई हूंणी कि त्याह मेंज़ हर ऐकु बे थोड़ी-थोड़ी ही भेटणी। 8तेऊरे चेले में सिमोन पतरसा रअ भाई अन्द्रियासा बे बोलू, 9अखे एक शोहरू साहा जासू सेटा ज़आ री पांज़ रोटी होर दुई माछी साहा; कि पर एथरे लोका बै त्या कैह साहा? 10यीशु बोलू, लोका बश्यागा। तेसा जाघा बहू घाहा थी, तेबा लोका जासू में मर्दा री गिणती लगभग पांज़ हज़ारा मर्द थी। 11तेबा यीशु ये रोटी चुआकी, होर धन्यबाद करी करे रोटी त्यामें बांडी; होर माछी में त्या जेतरी भी चाहंदा, तेतरी बांडी। 12जेबा खाई करे त्या तृप्त होई तेबा तेऊ आपणे चेले वै बोलू, बची दे टुकड़े बटोरा कि कुछ फेकी नांई लोडी। 13होर त्याह बटोरी, होर ज़आ री पांज़ा रोटी टुकड़े का जोह खाणे आले रही दे थी, बारहा टोकरी भरी 14तेबा जोह चिन्ह आले काम करी करे रिहाऊ तेऊ हेरी करे लोका बोलदे लागे, सह भविष्यद्वक्ता जोह संसारा में ईंहणे आलअ थी, कि जरुर यह साहा। 15यीशु यह जाणी करे कि याह राजा बणाऊण री तणी महा डाकणा चाहंदा, तेऊकी भी केलह पहाडा पैंदा बे नाठअ।
यीशु रा पाणी पैंदे हांडणा
(मत्ती 14.22-33; मरकुस 6.45-52)
16जेबा ब्यालक होई, तेबा तेऊरे चेले झीला रे कनारे नाठे, 17होर किस्ती पैंदे चढी करे झीला रे पार कफरनहूमा बे नाहंदे लागे। तेऊ वक्ते नयारा होऊ, होर यीशु ऐबरे तणी त्याह सेटा बे नांई आउअ। 18आँधी री बजा का झिला का छाली उठती लागी। 19तेबा सह चलदे-चलदे चीण चार मीला रे लगभग निकत, तेबा त्याह यीशु झीला पैंदे हांड़द होर किस्ती फेरा बे ईहंदअ हेरूउ, होर डरी। 20पर तेऊ तयाबे बोलू, हाऊं साह डरा नांई। 21तेबा त्याह तेऊ किस्ती में चडाऊणे बे त्यारअ होई होर तेभरी किस्ती तेसा धरती सेटा पूजी जखा बे चाली दे थी।
लोका रा यीशु लोडनअ
22दूजे धयाडे तेसा भिड़े, जोह झिला रे पार फेरे खड़ी थी, यह कि तखे एकु छाड़ी करे होर कोई होछी किस्ती नांई थी; होर यीशु आपणे चेले संघे तेसा किस्ती में नांई बेठअ, होर सीधी तेऊरे चेले ही बेठे। 23तेबा होर किस्ती तिबिरियासा का तेसा जगहा रे नेड़ आई, जखे त्याह प्रभु रा धन्यवाद करने रे बाद रोटी खाई थी। 24जेवा भीड त्याह हेरी, अखे ना यीशु साहा, होर ना तेऊरे चेले, तेबा भी होछी किस्ती पैंदे नाशी करे यीशु लोडदे कफरनहूम वै नाठे।
यीशु जीबना री रोटी
25झीला पार जेबा सह तयाबे भेटअ तेबा बोलू, हे गुरु, तूह अखे केबरे आऊअ? 26यीशु तयाबे उतर दिना, हाऊं तमाबे सच-सच बोला, कि तमे महा ऐतकी तणी नांई लोडदे कि तमे चिन्ह आले काम हेरी, पर ऐतकी तणी तमे रोटी खाई करे तृप्त होई। 27नाशबान खाणे री तणी मेहनत नांई करा, पर तेऊ खाणे बे जोह कि अनन्त जीबना री तणी रहे, जासु मणशा रअ शोहरू तमाबे देलअ; किबेकि बापू मतलब परमेश्वरा तेऊ पेंदे मोहर लाई दी आसा। 28त्याह तेऊबै बोलू, परमेश्वरा रे कामा करने बे हामा कैह करना? 29यीशु तयाबे उतर दिना, परमेश्वरा रा यह काम साहा कि तमे तेऊ पेंदे , जोह तेऊ भेजुदअ साहा, बुशाह करा। 30तेबा त्याहे तेऊबै बोलू, तेबा तूह कुण जेहअ चिन्ह रिहाऊंदा कि हामें तेऊ हेरी करे तेरा बुशाह करे? तूह कुण ज़ेहा काम रिहाऊंदा। 31महारे दादु-बाबे बूणे मन्ना खाऊ; जेहड़ा लिखू, तेहडा तयाबे खाणे बे स्वर्गा का रोटी दिंनी। 32यीशु तयाबे बोलू, हाँऊ तमाबे सच-सच बोला कि मूसा तमाबे सह रोटी स्वर्गा का नाँई दिंनी, पर मेरअ बापू तमाबे सच्ची रोटी स्वर्गा का दींदा 33किबेकि परमेश्वरा री रोटी सह साहा जोह स्वर्गा का उतरी करे संसारा वे जीबन दींदा। 34तेबा त्याहे तेऊवे बोलू, हे परमेश्वर, ऐसा रोटी हांमा बे सदा दे कर।
35यीशु त्यावे बोलू, जीबना री रोटी हाऊं साहा; जोह महा सेटा ईहंदा सह कधी भोछअ नाँईं हूंणअ, होर जोह महा पेंदे बुशाह करा सह कधी शोखअ नांई रहंणअ। 36पर मांईं तमाबे बोलू, कि तमे हाऊं हेरी भी छेकू तेबा भी बुशाह नांई करदे। 37जोह कुछ बापू माँह बे दींदा सह सारा माँह सेटा ईहंणा, होर जोह कुछ माँह सेटा ईहंणा सह माँह कधी नांई काढना। 38किबेकि हाऊं आपणी इच्छा नांई पर आपणे भेज़ण आले री इच्छा पूरी करने री तणी स्वर्गा का उतरु दअ आसा; 39होर महा भेजणअ आले री इच्छा यह साहा कि जोह कुछ तेऊ महा बे दीना दा साहा, तेता मेंज़ा का किछए नांई खाणा, पर तेता आखिरी धियाड़ भी जिऊंदअ करी दऊ। 40किबेकि मेरे बापू री यह इच्छा साहा कि जोह कोई शोहरू भाले होर बुशाह करे, होर अनन्त जीबन पाए; होर माँह तेसा आखिरी धियाड़ी भी जिऊंदे करी दीणअ। 41ऐतकी तणी यहूदी तेऊ पेंदे कुढ़कढादे लागे, किबेकि तेऊ बोलू, जोह रोटी स्वर्गा का उतरी सह रोटी हाऊं साहा। 42होर त्याहे बोलू, कैह यह यूसुफा रअ शोहरू यीशु नांई, जासके आमा-बापू हामे जाणा? तेबा यह केहड़े साबे बोला कि हाऊं स्वर्गा का उतरु दअ साहा? 43यीशु तयाबे उतर दीना, आपु में नांई कुडकुडा। 44कोहे माँह सेटा इच्छी नांई सकतअ जेबरे तणी बापू, जूणी हाऊं भेजुदअ, तेऊ खींची ना लए; होर महा सह आखिरी धियाडी भी जिऊंदअ चुआकअण। 45भविष्यद्वक्ता रे लिखे में यह लिखुदा साहा त्या सभे परमेश्वरा री तरफा का सिखाई दे हुणे। जोह कोही बापू का शुणु होर सीखुदा साहा, सह महा सेटा ईहंदा 46यह नांई कि कुणी बापू भालुदअ; पर जोह परमेश्वरा री तरफा का साहा, सीधी तेहुए बापू भालुदअ। 47हाऊं तमाबे सच-सच बोला कि जोह कोई बुशाह करा, अनन्त जीबन तेहुरा साहा। 48जीबना री रोटी हाऊं साहा। 49थारे दादु-बाबे बूणे मन्ना खाऊ होर मुए। 50यह सह रोटी साहा कि जोह स्वर्गा का उतरा कि मणशा तेता मेंज़ा का खाए होर मरे। 51जीबना री रोटी जोह स्वर्गा का उतरी, हाऊं साहा। अगर कोई ऐसा रोटी मेंज़ा का खाए, तेबा सदा जिऊंदअ रहंणा; होर जोह रोटी महा संसारा रे जीबना बे दींणी, सह मेरा शरीर साहा।
52एता पेंदे यहूदी यह बोली करे आपूमे झगड़दे लागे, यह मणश केहड़ा हामा बे आपणा शरीर खाणै वे देई सका? 53यीशु तयाबे बोलू, हाऊं तमाबे सच-सच बोला कि जेबरे तणी मणशा रे शोहरू रा शरीर नाँई खाऊ, होर तेऊरा लोहू नांई झुटु, तमामें जीबन नांई आंधा। 54जोह मेरा शरीर खांदा होर मेरा लोहू झुटा, अनन्त जीबन तेहुरा नांई साहा; होर हाऊं तेऊ आखिरी धयाडी भी जिऊंदअ चुआकणा। 55किबेकि मेरा शरीर सच्ची खाणे री चीझ साहा, होर मेरा लोहू सच्ची झूटणे री चीझ साहा। 56जोह मेरा शरीर खांदा होर मेरा लोहू झुटा सह महाई में स्थिर बणी रहंदा, होर हाऊं तेऊमें। 57जेड़ा जिऊंदअ बापू हाऊं भेजुदअ, होर हाऊं बापू री बजा का जिऊंदअ साहा, तेहडा ही सह भी जोह महा खाए, मेरी बजा जिऊंदअ रहंण। 58जोह रोटी सरगा का उतरी सह रोटी यह साहा, तेसा रोटी बराबर जूण महारे दादु बाबे खाई, होर मुएं; जोह ऐसा रोटी खालअ, सह सदा जिऊंदअ रहंण। 59या गला तेऊ कफरनहूम रे एकु प्रार्थना घरा में उपदेशा दींदे वक्ते बोली।
अनन्त जीबना रे बचन
60तेऊरे चेले मज़ा का बहूके यह शूणी करे बोलू, यह पाकी गल साहा ऐसा कुण शूणी सका? 61यीशु आपणे मने यह जाणी करे कि मेरे चेले ऐसा गला री तणी कुढ़कढाउंदा, तेऊ पुछु, कैह ऐसा गला री तमा ठोकर लागा? 62अगर तमे मणशा रे शोहरू जखे नांई सह पहिले थी, तखे उज्हे नाहंदे भाल्लए, तेबा कैह हुंणा? 63आत्मा तअ जीबन दायक साहा, शरीरा का किछे फ़ाईदा; जोह गला मांई तमाबे बोली सह आत्मा साहा, होर जीबन भी साहा। 64पर तमामें कुछ ऐडे साहा जोह बुशाह नांई करदे। किबेकि यीशु पहिले का ही जाणा, जोह बुशाह नांई करदे, त्या कुणा साहा; होर कासु हाऊं ढाकणे बझयालणअ। 65होर तेऊ बोलू, ऐतकी तणी मांई तमाबे बोलू, जेबरे तणी कासु बापू री तरफा का बरदान दिना तेबरे तणी सह महा सेटा इच्छी नांई सकतअ।
पतरसा रा बुशाह
66ऐता पेंदे तेऊरे चेले मज़ा का बहू उलटे फिरी होर तेता बाद तेऊ संघे नांई चली। 67तेबा यीशु त्या बारहा बे बोलू, कैह तमे भी नाहंणा चाहंदा? 68सिमोने होर पतरस तेऊबै उतर दींना, हे प्रभु, हामे जासू सेटा बे नाहं? अनन्त जीबना री गला ताही सेटा ही साहा; 69होर हामे बुशाह नांई करू होर ज़ाणु कि परमेश्वर रा पवित्र मणश तूह साहा। 70यीशु तयाबे उतर दींना, कैह मांई तमे बारहा ही चुनी? तेबा भी तमामें एक शैतान साहा। 71यह तेऊ शिमोन इस्करियोत रे शोरुह यहूदा रे बारे में बोलू, जोह बारहा में एक थी, तेऊ डाकणे बे थी।
Currently Selected:
यूहन्ना 6: ISJNT
Highlight
Share
Copy
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
