यूहन्ना 11
11
लाजरा री मउत
1मरियम होर तेऊरी बहीण मार्था रे ग्राएँ बैतनिय्याह लाजर ना रअ एक मणश बीमार थी। 2यह सह मरियम, जूणी परमेश्वरा पैंदे महगा इत्र तेल लेसी करे तेऊरी ज़ाँघा आपणी ज़टा संघे धोई दी थी, ऐसी रअ भाई लाजर बीमार थी, 3पर तेऊरी बहीणे तेऊबै बोलू, हे परमेश्वर, हेर, जासू संघे तूह प्रेम डाहंदा, सह बीमार साहा। 4यह शूणी करे यीशु बोलू, यह बमारी मउती री नाई; पर परमेश्वरा री महिमा री तणी साहा, कि तेऊरे साबे परमेश्वरा रे शोहरू री महिमा हो।
5यीशु मार्था होर तेऊरी बहीण होर लाजरे संघे प्रेम डाहंदा थी। 6तेहुकी भी जेबा तेऊ शूणू कि सह बीमार साहा, तेबा जासू जागा में सह थी, तखे दुई धियाड़ी होर रहू। 7ऐता बाद तेऊ चेले बे बोलू, ईछा, हामे भी यहूदी बे चला। 8चेले तेऊबै बोलू, हे गुरु, ऐबर यहूदी ताह पैंदे पथराब करणा चाहंदा, होर कैह तूह भी तखी बे नाहंदा? 9यीशु तयाबे उतर दिना केह धियाड़ी रे बारा घन्टे नांई हुँन्दे? जेबा कोई धियाड़ी हांडे ठोकर नाँई खांदअ किबेकी ईऊ संसारा रा प्रियशा हेरदा। 10पर जेबा कोई राची हांडे तेबा ठोकर खांदा, किबेकि तेऊमें प्रियाशा नाई आंधा। 11तेऊ या गला बोली, होर तेता बाद तयाबे बोलदअ लागअ, माहरअ मित्र लाजर सुतदअ, पर हाऊं तेऊ बझयाऊंदअ नाहूँ। 12तेबा चेले तेऊबै बोलू, हे परमेश्वर, अगर सह सूतअ, तेबा सह ठीक हूँणअं। 13यीशु तेऊरी मउती रे बारे में बोलू, पर त्याहे समझू कि तेऊ निंजा में सूतणे रे बारे में बोलू। 14तेबा यीशु तयाबे साफ-साफ बोलू, “लाजर मुअं; 15होर हाऊं थारी बजा का खुशी साहा कि हाऊं तखे, जासू का तमे बुशाह करा। पर ऐबा इच्छा, हामा तेऊ सेटा बे नाहंणा।” 16तेबा थोमा जासु बे दिदुमुस बोला, आपणे संगी चेले बोलू, “इच्छा, हामें भी तेऊ संघे मरदे चाला।”
यीशु पुनरुत्थान होर जीबन
17तखे पूजणे में यीशु यह पता लागा कि लाजर कब्रा में डाही करे चार धियाड़ होई। 18बैतनिय्याह यरूशलेम का नेड कोई दुई मीला री दुरी में थी। 19बहू यहूदी मार्था होर मरियमा सेटा बे त्यारे भाई मरने री शांति दींणे री तणी आउए दे थी। 20जेबा मार्था यीशु रे ईहंणे रा समाचार शुणु तेबा तेऊ संघे मिलदी नाठी, पर मरियमे घरे बेशी रही। 21मार्था यीशु बे बोलू, “हे प्रभु! अगर तूह अखे हुँदअ तेबा मेरअ भाई कधी नांई मरदअ। 22होर ऐबा भी जाणा कि जोह कुछ तूह परमेश्वरा का माँगा, परमेश्वरा ताहब दींणा।”
23यीशु तेसाबे बोलू, तेरअ भाई भी जिऊंदअ हूँणअ। 24मार्था तेऊबै बोलू, हाऊं जाणा कि आखिरी धियाड़ी में भी जन्म लउंणे रे वक्ते सह पुनरुत्थान हूँणअ। 25यीशु तेसाबे बोलू, पुनरुत्थान होर जीबन हाऊं ही साहा; जो महा पैंदे बुशाह करले सह मरने वाद भी जिऊंदअ रहण 26जोह कोई महा पेंदे बुशाह करा, सह अनन्तकाला तणी जिऊंदअ रहण। कैह तूह ऐसा गला में बुशाह करा? 27तेसे तेऊबै बोलू, “हां प्रभु! हाऊं बुशाह करा कि परमेश्वरा रअ शोहरू मसीह जोह संसारा में ईहंणे आलअ, सह तूहे ही साहा।”
यीशु लेरु
28यह बोली करे सह नाठी, होर आपणी बहीणे मरियमे बे चुपचार शादी होर बोलू, गुरु अखी साहा होर ताह शादा। 29यह शूणदे ही सह तेभरी उठी करे तेऊ सेटा बे आई। 30यीशु ऐबरे गराऐं पुजू थी, पर तेसी जागा में, ज़खे मार्था भेटी थी। 31तेबा जोह यहूदी तेऊ संघे घरे, होर तेसाबे शांति दींदे लागअ दअ थी, यह हेरी करे कि मरियमे तेभरी उठी करे बाग़े नाठी यह समझी करे कि सह कब्रा पेंदे लेरदी नाहंदा, तेबा तेऊ पीछे नाठी।
32जेबा मरियमे तखे पूजी ज़खे यीशु थी, तेबा तेऊ हेर्दे ही तेऊरी जाघा में पड़ी होर बोलू, हे परमेश्वर, अगर तूह अखे हुंदअ तेबा मेरअ भाई भी नांई मरदअ। 33तेबा यीशु तेसा होर यहूदी जोह तेऊ संघे आउए दे लोका लेरदे हेरी करे, यीशु रा मन बहु परेशान होऊ बहु दुखी होऊ, 34होर बोलू, तमे सह कई डाहुदअ? त्याह तेऊबै बोलू, हे परमेश्वर, हाँड़ी करे हेर। 35यीशु लेरु। 36तेबा यहूदी बोलदे लागे, हेरा, सह तेऊ संघे केतरा प्रेम डाहंदा थी।
37पर त्यामें थोड़े बोलू, कैह जूणी काणे बे रिहाऊ यह भी करी सका कि यह मणश नांई मरे?
लाजर जिऊंदअ करणअं
38यीशु मना में बहू नराझ होई करे कब्रा सेटा बे आउअ। सह एक डूआर (जुहलअ), होर तेऊ पेंदे एक पाथर डाहुदअ थी। 39यीशु बोलू, पाथरा काहडा। तेऊ मुएँदे री बहीणे मार्था तेऊबै बोलदी लागी, हे परमेश्वर, तेऊका ऐबा बास भी लागी, किबेकी तेऊ मरी ऐबा चार धियाड़ी होई। 40यीशु तेसाबे बोलू, कैह मांई ताहब बोलू, कि अगर तूह बुशाह करली, तेबा ताह परमेश्वरा री महिमा हेरनी।
41तेबा त्याह सह पाथर हटाऊ। यीशु आछी चुआकी करे बोलू, हे बापू, हाऊं तेरा धन्यवाद करा कि तांई मेरी शूणी। 42हाऊं जाणा कि तूह सदा मेरी शूणा, पर जोह भीड़ होरी-पोरी खड़ी दी थी, त्यारी बजा का मांई यह बोलू, जासू का त्या बुशाह करे कि तांई हाऊं भेजुदअ आसा।
43यह बोली करे तेऊ ज़ोरे संघे पुकारू, हे लाजर, निखल! 44जोह मुंअं दअ थी, सह कफना का हाथ जाघा बानी दे बागे निकतअ, होर तेऊर मुंह अंगोछे संघे लपेटूदअ थी। यीशु त्याहब बोलू, ऐऊ खोला होर नाहंणे देआ।
यीशु रे बिरुद षड्यन्त्र
(मत्ती 26.1-5; मरकुस 14.1,2; लूका 22.1,2)
45तेबा जोह यहूदी मरियमा सेटा आउए दे थी, होर तेऊरा यह काम हेरु थी, त्यामें बहू कै तेऊ पेंदे बुशाह करू। 46पर त्यामें ऐखा फरीसी सेटा नाहीं करे यीशु रे कामा रा समाचार दिना। 47ऐता में प्रधान याजक होर फरीसी महासभा शादी, होर बोलू, हामें कैह करे? यह मणश तअ बहू चिन्ह रिहाऊंदा। 48अगर हामे तेऊ ऐडे ही छाडे, तेबा सभी तेऊरा बुशाह ईहंणा, होर रोमी इच्छी करे महारी जागा होर जाति दुही पेंदे अधिकार करना।
49तेबा याह में का एक काइफा ना रअ एकु मणशे जोह तेऊ वक्ता रअ महायाजक थी, तेऊ बोलू, तमे किछे भी नाँई ज़ाणदे; 50होर नाहं यह समझदे कि तमाबे यह भलअ साहा कि महारे लोका री तणी एक मणश मरे, होर सारी जाति नष्ट होए। 51यह गलअ तेऊ आपणी तरफा का बोली, पर तेसा साला रे महायाजक होई करे भविष्यवाणी करी, कि यीशु तेसा जाति री तणी मरनअं; 52होर नाहं सीधी तेसा जाति री तणी, पर ऐतकी तणी भी कि परमेश्वरा री तितर-बितर संतान एक करे। 53पर तेसी धियाड़ी का तेऊ मारने री स्कीमा बणाऊंदे लागे।
54एतकी तणी यीशु तेऊ वक्ता का यहूदी में प्रकट होई करे नांई फिरू, पर तखा का बूणा रे नेडा रे देशा रे इफ्राईमे ना रे एकु नगरा बे नाठअ; होर आपणे चेले संघे तखी रहंदअ लागअ।
55यहूदी री फसहा री जाच नेड थी, होर बहू लोका फसहा री जाचा का पहिले देहता का यरूशलेमा बे नाठे कि आपणे आपा बे शुद्ध करे। 56होर यीशु लोडदे लागे होर देहुरे में खड़े होई करे आपु में बोलदे लागे, तमे कैह सोचा? कैह सह जाचा बे नाँई ईहंणअं? 57प्रधान याजक होर फरीसी यह आदेश दिना दा थी, कि अगर कोई भी यह जाणा कि यीशु कई साहा तेबा खोज़े, कि तेऊ ढाकी सके।
Currently Selected:
यूहन्ना 11: ISJNT
Highlight
Share
Copy
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
