માર્ક 9

1ફાચે ઇસુહુ તીયા ચેલાહાને આને લોકુ ટોલાલે આખ્યો, “આંય તુમનેહે ખેરોજ આખુહુ કા, તુમામેને જે થોડાક ઇહી ઉબલા હાય, તે તામ લોગુ નાય મોય જાવ લોગુ કા પરમેહેરુ રાજ્યાલે સામર્થ સહીત આવતો નાય હિલે.”

ઇસુ રુપ બદલાહે

(માથ. 17:1-13; લુક. 9:28-36)

2સોવ દિહુ ફાચાળી ઇસુહુ પિત્તરુલે, યાકુબુલે આને યોહાનુલ આરી લેદો, આને તોઅ તીયાહાને એક ઉચા ડોગુપે લી ગીયો; તીહી તીયાં આગાળી ઇસુ રુપ પુરી રીતીકી બદલાય ગીયો. 3આને તીયા પોતળે ઓત્તે ચોમકા લાગ્યે, આને ઓત્તે ઉજલે વી ગીયે કા, તોરતી પેર્યો કેલ્લો બી ધોબી તેહકી ઉજલાવી નાહા સેકતો. 4તાંહા મુસા આને એલિયા એ બેન ભવિષ્યવક્તા તીહી દેખાયા; આને તે ઇસુ આરી ગોઠયા કેતલા. 5ઇ હીંને પિત્તરુહુ ઇસુલે આખ્યો, “ઓ ગુરુજી, આમા ઇહી રેવુલો હારો હાય: ઈયા ખાતુર આપુહુ તીન માંડવે બનાવજી; એક તોઅ ખાતુર, એક મુસા ખાતુર, આને એક એલિયા ખાતુર.” 6કાહાકા પિત્તર આને બીજા બેન ચેલા કાબરાય ગેહલા આને નાય જાંઅતલો કા કાય જવાબ દેજી. 7તાંહા એક વાદલો આલો આને તીયાહાપે સાંય કેયી, આને તીયાહા વાદલામેને પરમેહરુલે ગોગતા ઉનાયા, “ઓ માઅ મેરાલો પોયરો હાય; તીયા ઉનાયા.” 8મુસા આને એલિયા ભવિષ્યવક્તા જાતા રીયા, આને તીયાહા ખાલી ઇસુલુજ પોતા આરી હેયો.

9જાહાં ઇસુ આને તીયા તીન ચેલા ડોગુપેને ઉતી રેહેલા, તાંહા તીયાહા તીયાહાને આખ્યો કા, જાવ લોગુ કા આંય, એટલે માંહા પોયરો મોલામેને જીવી નાય ઉઠુ, તામ લોગુ “કેડાલુજ ઇ નાય આખુલુ કા તુમુહુ કાય હેયોહો.” 10ઈયા ખાતુર તીયાહા તીયુ ગોઠીલે યાદ રાખી; આને તે આરી બોહીને એકબીજા આરી ચર્ચા કેરા લાગ્યા, “મોઅલા મેને જીવી ઉઠુલો કાય મતલબ હાય?” 11ફાચે ચેલાં તીયાલે ફુચ્યો, “મુસા નિયમ હિક્વુનારા કાહાલ આખતાહા કા, ખ્રિસ્તુ આવુલો પેલ્લા એલિયા ભવિષ્યવક્તા આવુલો જરુર હાય?” 12-13ઇસુહુ તીયાહાને જવાબ દેદો, “ઇ ખેરોજ હાય કા પરમેહેરુહુ એલિયા ભવિષ્યવક્તાલે પેલ્લા મોક્લુલો વાયદો કેલો આથો કા, તોઅ આવીને બાદોજ હુદારી, પેન એલિયા ભવિષ્યવક્તા પેલ્લોજ આવી ગીયોહો. આને આમા વડીલુહુ તીયા આરી ખારાબ વેહવાર કેયોહો, જેહકી કા ભવિષ્યવક્તાહા પેલ્લા આખલો આથો કા તે તેહકીજ કેરી. પેન માંહા પોયરો એટલે માંઅ વિષયુમ પવિત્રશાસ્ત્રમે ખુબુજ લેખલો હાય, પવિત્રશાસ્ત્ર આખેહે કા આંય ખુબ દુઃખ ઉઠાવેહે, આને લોક માઅ નકાર કેરી.”

પુથ લાગલા પોયરાલે ઇસુ હારો કેહે

(માથ. 17:14-21; લુક. 9:37-43)

14જાહાં ઇસુ આને તીયા તીન ચેલા બીજા ચેલાહી પાહી આલો, તાંહા હેઅયો કા તીયા ચારુવેલે લોકુ મોડી ગોરદી લાગલી હાય, આને મુસા નિયમ હિક્વુનારા તીયાં આરી બોલાચાલ કી રેહલા. 15જેહકીજ બાદા લોકુહુ ઇસુલે હેયો, તાંહા બાદા ખુબુજ નોવાય કેરા લાગ્યા, આને તીયા પાહી જાયને તીયાલે સલામ કેયી. 16ઇસુહુ લોકુ ટોલાલે ફુચ્યો, “તુમુહુ ઈયા આરી કાય બોલચાલ કી રીયાહા?”

17ગોરદીમેને એકાંહા તીયાલે જવાબ દેદો, “ઓ ગુરુજી, આંય માંઅ પોયરાલે, જીયામે એક પુથ હાય, તોઅ તીયાલે ગોગા ખાતુર ઓટકાવેહે, આંય તોઅ પાહી લી આલ્લો. 18જાહાં બી પુથ તીયાપે હુમલો કેહે, તાંહા તોઅ તીયાલે પાગલુ હોચે આસાટી દેહે, આને તોઅ તીયા મુયુમેને ફેબદે કાડેહે, દાત કીકરાવેહે, આને વાતળો વીને આલતો બી નાહા, માયુહુ તોઅ ચેલાહાને પુથ કાડા આખ્યો, પેન તે તીયાલે કાડી નાય સેક્યા.”

19ઇ ઉનાયને ઇસુહુ ચેલાહાને ધમકાવીને આખ્યો કા, “ઓ અવિશ્વાસી લોકુહુ, આંય કોતે લોગુ તુમા આરી રેહે કા તુમુહુ વિશ્વાસ કેરા? આને માને કોતે લોગુ વાટ જોવા પોળી કા તુમુહુ વિશ્વાસ કી સેકા? તીયા પોયરાલે માઅ પાહી લાવા.” 20ઈયા ખાતુર તે પોયરાલે ઇસુ પાહી લી આલા, આને જાહાં પુથુહુ ઇસુલે હેયો, તાંહા તુરુતુજ તીયા પોયરાલે મોઅડયો; આને તોઅ તોરતીપે પોળ્યો, આને મુયુમેને ફેબદે કાડીને ઉંડલા લાગ્યો. 21તાંહા ઇસુહુ પોયરા બાહકાલ ફુચ્યો, “તીયા એ દશા કીદીહીને હાય?” આને તીયાહા આખ્યો, “હાનાપેને, 22ખુબ વારી પુથુહુ તીયાલે આગ આને પાંયુમે ફેકીને નાશ કેરા કોશિશ કેયો; પેન કાદાચ તુ કાય કી સેકો, તા આમાપે દયા કીને આમાપે ઉપકાર કે.” 23ઇસુહુ તીયાલે આખ્યો, “તુલે શક નાય વેરા જોજે કા, આંય એહકી કી સેકતોહો! જો એગુહુ માપે વિશ્વાસ કેહે તા તીયા માટે બાદો વી સેકેહે.” 24પોયરા બાહકાહા તુરુતુજ બોમબ્લીને આખ્યો, “ઓ પ્રભુ, આંય વિશ્વાસ કીહુ; આંય શંકા નાય કીવ્યુ ઈયા ખાતુર તુ માઅ મદદ કે.” 25જાંહા ઇસુહુ હેઅયો કા, આજી બી વાદારે લોકુ ગોરદી તીયાલે હેરા ખાતુર એકઠા વી ગીયા, તાંહા ઇસુહુ પુથુલે ઇ આખીને ધમકાવ્યો, “ઓ પુથ તુ જો ઈયા પોયરાલે મુકો આને બેરો બોનાવોહો આંય તુલ આજ્ઞા દિહુ, ઈયા પોયરામેને નીગી આવ, આને ઈયામ ફાચે કીદીહીજ વિહો માઅ.” 26તાંહા પુથ બોમબ્લીને આને તીયાલે મોઅળીને તીયામેને નીગી આલો; આને પોયરો મોઅલા સારકો પોળી રીયો, ઓત્તેલોગ કા ખુબ લોક આખા લાગ્યા, કા તોઅ મોઅય ગીયોહો. 27પેન ઇસુહુ તીયા આથ તીને તીયાલે ઉઠવ્યો, આને તોઅ હારો વીને ઉબી રી ગીયો. 28જાહાં ઇસુ પોતા ચેલા આરી કોમે એખલો આથો, તાંહા ચેલાહા તીયાલે ફુચ્યો, “આમુહુ પુથુલે કાહા નાહ કાડી સેક્યા?” 29ઇસુહુ તીયાહાને જવાબ દેદો, “ઈયુ જાતિ પુથ પ્રાર્થના વગર કેલ્લીજ ઉપાયુકી બારે નાંહા નીંગી સેકતો.”

પોતા મોતુ વિષયુમે ઇસુ ફાચો ભવિષ્યવાણી કેહે

(માથ. 17:22-23; લુક. 9:43-45)

30ફાચે ઇસુ આને તીયા ચેલા તીયા જાગલે છોડીને, આને ગાલીલ વિસ્તારુમ રાખીને ગીયા, તોઅ નાય ઈચ્છા રાખતલો કા કેડાલે ખબર નાય પોળે કા તોઅ ઇહી હાય. 31કાહાકા તોઅ તીયા ચેલા આરી વાદારે સમય રીને તીયાહાને હિકવા માગતલો કા, “માહરીજ એગુહુ માને એટલે માંહા પોયરાલે દુશ્મનુ આથુમે તેરાવી દી; આને તે માને માંય ટાકી, પેન માઅ મોંરા તીન દિહુ ફાચલા આંય જીવી ઉઠેહે.” 32પેન એ ગોઠ તીયાહાને હોમજાયી નાંહ, આને તે તીયાલે ફુચા ખાતુર બીતલા.

બાદાસે મોડો કેડો

(માથ. 18:1-5; લુક. 9:46-48)

33ફાચે ઇસુ આને તીયા ચેલા કફર-નુહુમ શેહેરુમ આલા, આને કોમે ગીયા, જાહાં તે કોમે આથા ઇસુહુ તીયાહાને ફુચ્યો, “વાટીમે તુમુહુ કેલ્લી ગોઠીપે ચર્ચા કેતલા?” 34તે ઠાકાજ રીયા, કાહાલ કા વાટીમ એક-બીજા આરી ચર્ચા કેલી કા આમાહામેને મોડો કેડો હાય? 35તાંહા ઇસુ બોહી ગીયો આને બારા ચેલાહાને પોતા પાહી હાદીને તીયાહાને આખ્યો, “જો કેડો બી મોડો વેરાં માગતો વેરી, તોઅ પોતાલે બાદા કેતા હાનો આને બાદાંજ સેવક બને.” 36ફાચે ઇસુહુ એક પોયરાલે પોતા પાહી ઉબી રાખ્યો, આને તીયાલે ગલે લાગવીને આને તીયા ચેલાહાને આખ્યો. 37“જો એગુહુ માંહુ માઅ ખાતુર ઈયુ રીતીકી એક પોયરાલે દયા દેખાવેહે તોઅ ખેરોજ માઅ સ્વીકાર કેહે, આને જો એગુહુ માંહુ માન સ્વીકાર કેહે, તોઅ માન નાય પેન, માન મોકલુનારાલ બી સ્વીકાર કેહે.”

જો વિરુધમે નાહા તોઅ આમાવેલ હાય

(લુક. 9:49-50)

38તાંહા યોહાનુહુ ઇસુલે આખ્યો, “ઓ ગુરુજી, આમુહુ એક માંહાલ તોઅ નાવુ તાકતુકી પુથુલે કાડતા હેઅયોહો, આને આમુહુ તીયાલે મોનાય કેરા લાગ્યા, ઈયા ખાતુર કા તોઅ આપુ હોચ્યા ચેલામેને નાય આથો.” 39-40ઇસુહુ તીયાહાને આખ્યો, “જો આમા વિરુધ નાહા તોઅ આમાવેલ હાય, ઈયા ખાતુર જો કેડો બી માઅ નાવુકી ચમત્કાર કેહે, તોઅ માહારીજ માઅ નિંદા નાય કી સેકે, ઈયા લીદે તીયાલે માઅ ઓટકાવાહા. 41જો કેડો એક ગાલાસ પાંય તુમનેહે ઈયા ખાતુર પાજે કા તુમુહુ ખ્રિસ્તુ ચેલા હાય, તા આંય તુમનેહે ખેરોજ આખુહુ કા તોઅ તીયા મેહેનતુ પ્રતિફલ ખેરોજ મીલવી.”

ઠોક્કરુ કારણ બોનુલો

(માથ. 18:6-9; લુક. 17:1-2)

42ઇસુહુ ચેલાહાને આખ્યો, “જો કેડો ઈયા હાના પોયરામેને જો માંપે ભોરોષો કેહે, આને કેડાલે બી વિશ્વાસુમે ઠોક્કર ખાવાવે તા તીયા ખાતુર હારો ઇ હાય કા, એક મોડી કોઅટી પુળ તીયા કોગીમે લટકાવીને આને તીયાલે સમુદ્રમે ટાકી દેવામે આવે. 43જો તોઅ આથ તુ પાપ કેરા ખાતુર ઉપયોગ કેતો વેઅ, તા તીયાલે વાડી ટાક, એક આથ વગર હોરગામે જાવુલો મુશ્કિલ લાગતો વેરી, પેન બેન આથ વિન બી નોરકામ જાવુલો ખુબુજ ખારાબ હાય. 44નોરકામ શરીરુલે ખાનારે કીડે કીદીજ નાહ મોઅતેં, આને આગ કીદીહીજ નાહ ઉલાતી. 45જો તોઅ પાગ તુ પાપ કેરા ખાતુર ઉપયોગ કેતો વેઅ, તા તીયાલે વાડી ટાક, એક પાગ વગર હોરગામે જાવુલો મુશ્કિલ લાગતો વેરી, પેન બેન પાગ વિન બી નોરકામ જાવુલો ખુબુજ ખારાબ હાય. 46નોરકામ શરીરુલે ખાનારે કીડે કીદીજ નાહ મોઅતેં આને આગ કીદીહીજ નાહ ઉલાતી. 47જો તોઅ ડોંઆ તુ પાપ કેરા ખાતુર ઉપયોગ કેતો વેઅ, તા તીયાલે કાડી ટાક, એક ડોંઆકી કાંણીયો વીને પરમેહેરુ રાજ્યામ જાવુલો મુશ્કિલ લાગતો વેરી, પેન બેન ડોંઆ વિન બી નોરકામ જાવુલો ખુબુજ ખારાબ હાય. 48નોરકામ શરીરુલે ખાનારે કીડે કીદીજ નાહ મોઅતેં આને આગ કીદીહીજ નાહ ઉલાતી. 49કાહાકા દરેકુલે આગીકી શુદ્ધ કેતામ આવી, જેહેકી કા ખારાકી એક બલિદાન શુદ્ધ વેહે. 50ખારોં ઉપયોગી હાય, પેન જો ખારા હોવાદ બીગળી જાય તા, તીયાલે કેહેકી ખારોં કેતામ આવે? તુમાહામે ખારા ગુણ વેરા જોજે, કા તુમુહુ એકબીજા આરી શાંતિકી રી સેકા.”

Currently Selected:

માર્ક 9: DUBNT

Highlight

Copy