Genesi 29

Jacobo idji djabadrõãma jũẽna

1Mãwãnacarea Jacobora nocod̶aa wãsia. Wãne ʌ̃mãdau odjabariarebema ẽberãrã druad̶e jũẽne wãsia. 2Mama baido juebada uria corod̶ada unusia. Maʌ̃ caita ovejada zocãrã panasid̶aa. Maʌ̃ ovejara ãdji djibarirã ũbea panʌ caita awara awara ʌ̃nãũ duanasid̶aa. Djibarirãba maʌ̃ baidora ãdji ovejaa jue diabadjid̶aa. Dji baido juebada uria ʌ̃rʌ̃ mõgara waib̶ʌada cob̶asia. 3Ewariza oveja jũma eneped̶ad̶acarea dji oveja wagabadaba maʌ̃ mõgarara ãyã b̶ʌbadjid̶aa ãdji ovejaa baido jue diad̶i carea. Jue diaped̶ad̶acarea wayacusa mõgarara dji uria ʌ̃rʌ̃ cob̶ʌbadjid̶aa. 4Maʌ̃ne Jacoboba dji oveja wagabadaa iwid̶isia:

–Djabarã, ¿bãrãra sãmabema?–

Ãdjia panusid̶aa:

–Daira Haraʌ̃ purud̶ebemaa.–

5Jacoboba iwid̶isia:

–¿Bãrãba Naco warra Labaʌ̃ra unubadaca?–

Ãdjia panusid̶aa:

–Mãẽ, daiba unubadaa.–

6Jacoboba waya iwid̶isia:

–¿Idjira bia b̶ʌca?–

Ãdjia panusid̶aa:

–Idjira bia b̶ʌa. Acʌdua, jari urua dji cau Raquelda. Idji zeza ovejada pe enebʌrʌa.–

7Maʌ̃ne Jacoboba jarasia:

–Acʌd̶adua, wad̶i ãsa nũmʌ bẽrã animarãra cãĩne eded̶iẽ́ panʌa. Ovejara baido dobigad̶aped̶a waya põãjãrã cobid̶e eded̶adua.–

8Ãdjirãba panusid̶aa:

–Wad̶ibid̶a poya baido dobid̶aẽ́a. Daiba jʌ̃ãbadaa jũmarãba ãdji ovejara enenamãrẽã. Maʌ̃bebʌrʌ mõgara baido juebada uria ʌ̃rʌ̃ cob̶ʌra ãyã b̶ʌbadaa ovejara baido dobigad̶i carea.–

9Jacobo ãdjirã ume bed̶ea b̶ʌd̶e Raquelba idji zeza ovejara pe enesia. Idjira dji oveja wagabari basía. 10Raquel zeza Labaʌ̃ra Jacobo papa Rebeca ume dji djaba basía. Jacoboba Raquel, Labaʌ̃ oveja sid̶a unusid̶e baido juebada uriamaa wãped̶a dji mõgara uria ʌ̃rʌ̃ cob̶ʌra ãyã b̶ʌsia. Ãyã b̶ʌped̶a idji djabadrõã Labaʌ̃ ovejara baido dobigasia. 11Maʌ̃ne Jacobora b̶ʌsrid̶asia idji papa ẽberãrãma jũẽna bẽrã. Maʌ̃ carea Raquel uridarrad̶e isõped̶a jĩãsia. 12Maʌ̃be Jacoboba jarasia:

–Mʌ̃ra bʌ zeza Labaʌ̃ tẽãbeaa. Mʌ̃ papa Rebecara bʌ apipia.–

Ara maʌ̃da Raquelera diguid̶aa pira wãsia idji zeza jarad̶e. 13Labaʌ̃ba maʌ̃ ũrĩped̶a pira wãsia idji djabawẽrã warra Jacobo audiab̶arid̶e. Jacobo b̶ʌmaa wãped̶a ojũẽ edaped̶a uridarrad̶e isõsia. Maʌ̃be diguid̶aa edesia. Diguid̶a jũẽnaped̶a Jacoboba Labaʌ̃a idji sãwãnanebemada jũma nẽbʌrʌsia. 14Maʌ̃ne Labaʌ̃ba Jacoboa jarasia:

–Wãrãda bʌra mʌ̃ ẽberãrãa.–

Mãwãnacarea Jacobora Labaʌ̃ ume jed̶eco ab̶a b̶esia.

Jacoboba Labaʌ̃ caurã edad̶a

15Jed̶eco ab̶a b̶ad̶acarea Labaʌ̃ba Jacoboa jarasia:

–Bʌra mʌ̃ tẽãbeamĩna mʌ̃ itea bari trajaiẽ́ b̶ʌa. Mʌ̃́a jaradua jũmasãwã diaida b̶ʌda bʌ trajubari.–

16Labaʌ̃ba cauda umé erob̶asia. Dji nabema trʌ̃da Lea basía. Raquelera dji tẽãbema basía. 17Leara mãcua quĩrãwãrẽãẽ́ b̶asia.#29:17. Leara mãcua quĩrãwãrẽãẽ́ b̶asia. Hebreo bed̶ead̶e b̶ʌ́ b̶ʌa: “Lea daura ʌb̶ʌaẽ́ b̶asia.” Baribʌrʌ maʌ̃ba jara b̶ʌra ebud̶a b̶ʌẽ́a. Baribʌrʌ Raquelera bio quĩrãwãrẽã b̶asia. 18Maʌ̃ne Jacoboba Raquelda bio quĩrĩã b̶asia. Maʌ̃ carea Labaʌ̃a jarasia:

–Bʌ cau tẽãbema Raquel edai carea mʌ̃ra siete poa bʌ itea bari traja b̶aya.–

19Maʌ̃ne Labaʌ̃ba panusia:

–Biara b̶ʌa mʌ̃ caura bʌ́a diaida dewara ẽberãa diai cãyãbara. Mãẽteara mʌ̃ itea bari traja b̶edua.–

20Ara maʌ̃da Jacobora Raquel edai carea Labaʌ̃ itea siete poa bari trajasia. Jacoboba Raquelera bio quĩrĩã b̶ʌ bẽrã idjimaarã maʌ̃ siete poara dãrãẽ́ basía.

21Siete poa bad̶acarea Jacoboba Labaʌ̃a jarasia:

–Dadjia b̶ʌped̶ad̶a ewarira jũẽna bẽrã bʌ caura diadua mʌ̃ quima bamãrẽã.–

22Ara maʌ̃da Labaʌ̃ba mamabemarãra jũma trʌ̃bigasia dji cau quima edabʌrʌ b̶ʌsrid̶ada oi carea. 23-24Baribʌrʌ diamasi maʌ̃ b̶ʌsrid̶a o panasid̶ad̶e Labaʌ̃ba idji cau nabema Leada Jacoboa diasia. Idjab̶a idji nezocawẽrã Zilpa abadada Leaa diasia nezoca bara b̶amãrẽã. Maʌ̃ne Jacoboba Leada mãwã b̶ʌda adua b̶asia, diamasi nũmʌ bẽrã. Ara maʌ̃da Jacobora Lea ume cãĩsia. 25Nurẽma Jacoboba unusia Leadrʌ idji cʌd̶ad̶e b̶ʌda. Maʌ̃ carea Labaʌ̃maa wãped̶a jarasia:

–¿Cãrẽ cãrẽã bʌa mʌ̃ra jãwã osi? ¿Mʌ̃ra Raquel carea bʌ itea bari trajaẽ́ basica? ¿Cãrẽ cãrẽã mʌ̃ra cũrũgasi?–

26Maʌ̃ne Labaʌ̃ba panusia:

–Nama dai druad̶e dji nabemadrʌ na quima diabadaa. 27Lea edabʌrʌ b̶ʌsrid̶ara domia ab̶a odua. Mãwãnacarea mʌ̃a dewarabema sid̶a diaya baribʌrʌ bʌra wayacusa siete poa idji carea mʌ̃ itea bari trajaida b̶ʌa.–

28Jacoboba bia b̶ʌad̶a asia. Maʌ̃ bẽrã b̶ʌsrid̶ara domia ab̶a osia. Maʌ̃be Labaʌ̃ba idji cau Raquelera Jacoboa diasia dji quima bamãrẽã. 29Labaʌ̃ba idji nezocawẽrã Bilha abadada idji cau Raquelea diasia nezoca bara b̶amãrẽã. 30Ara maʌ̃da Jacobora Raquel ume cãĩsia idjab̶a idjira Lea cãyãbara quĩrĩãra erob̶esia. Maʌ̃be Jacobora wad̶i siete poa bari traja b̶esia Labaʌ̃ itea.

Jacoboba warrarã ununa

31Maʌ̃ne Ãcõrẽba unusia Jacoboba Leara quĩrĩãẽ́ b̶ʌda. Maʌ̃ carea Ãcõrẽba Leaa warrarãda diasia, baribʌrʌ Raquelera warra toca basía. 32Leara b̶iogoa b̶eped̶a umaquĩrã warrada tosia. Maʌ̃ne crĩchasia: “Mʌ̃ mĩga b̶ʌra Ãcõrẽba acʌsia. Id̶ibʌrʌ mʌ̃ quimaba mʌ̃ra biara quĩrĩãya.” Mãwã dji warrara trʌ̃ b̶ʌsia Rubeʌ̃.#29:32. Hebreo bed̶ead̶e Rubeʌ̃ trʌ̃ba jara b̶ʌa: “Acʌdua warrada jãwã quiru.”

33Leara wayacusa b̶iogoa b̶eped̶a umaquĩrã warrada tosia. Maʌ̃ne crĩchasia: “Ãcõrẽba mʌ̃́a naʌ̃ warra sid̶a diasia mʌ̃ quimaba mʌ̃ quĩrĩãẽ́ b̶ʌ ũrĩna bẽrã.” Mãwã dji warrara trʌ̃ b̶ʌsia Simeoʌ̃.#29:33. Hebreo bed̶ead̶e Simeoʌ̃ trʌ̃ba jara b̶ʌa: “Ũrĩna.”

34Wayacusa b̶iogoa b̶eped̶a umaquĩrã warrada tosia. Maʌ̃ne crĩchasia: “Id̶ibʌrʌ mʌ̃ quimara mʌ̃ ume ãbaa b̶aya, mʌ̃a idji warrada ũbea tobʌrʌ bẽrã.” Mãwã dji warrara trʌ̃ b̶ʌsia Levi.#29:34. Hebreo bed̶ead̶e Levi trʌ̃ba jara b̶ʌa: “Ãbaa b̶aida.”

35Wayacusa b̶iogoa b̶eped̶a umaquĩrã warrada tosia. Maʌ̃ne crĩchasia: “Naʌ̃ne mʌ̃a Ãcõrẽa bia bed̶eaya.” Mãwã dji warrara trʌ̃ b̶ʌsia Juda.#29:35. Hebreo bed̶ead̶e Juda trʌ̃ba jara b̶ʌa: “Bia bed̶eaida.”

Maʌ̃are Leara dãrãsia warra toẽ́ b̶ʌda.

Currently Selected:

Genesi 29: emp

Highlight

Copy