Genesi 27
27
Isaba idji warrarã bia jara b̶ʌd̶a
1Isara drõãda b̶ʌ bẽrã dauba unuca basía. Ewari ab̶a idji warra nabema Esaúda trʌ̃ped̶a jarasia:
–¡Warra!–
Esaúba panusia:
–¿Cãrẽ, zeza?–
2Maʌ̃ne Isaba jarasia:
–Acʌdua, warra, mʌ̃ra drõãda b̶ʌa. Mʌ̃ beui ewarira adua b̶ʌa. 3Maʌ̃ carea mʌ̃ djuburia bʌ enedrʌmada cha sid̶a edaped̶a mẽã wãdua. 4Ne beasira mʌ̃ itea djudua mʌ̃a awua cobari quĩrãca. Maʌ̃da cobisira mʌ̃a bʌra bia jara b̶ʌya mʌ̃ beui naẽna.–
5Isara idji warra Esaú ume bed̶ea b̶ʌda Rebecaba ũrĩ b̶asia. Maʌ̃be Esaúra mẽã wãsia dji zezaa cobi carea. 6Esaú wãnacarea Rebecaba idji warra Jacoboa jarasia:
–Warra, mʌ̃a ũrĩsia bʌ zezara bʌ djaba Esaú ume bed̶ea b̶ʌda. Bʌ zezaba Esaúa nãwã jarasia: 7“Mẽã ne bead̶e wãped̶a mʌ̃ itea djudua. Maʌ̃ djicora coped̶a mʌ̃ beui naẽna bʌda Ãcõrẽ quĩrãpita bia jara b̶ʌya.”
8Jãʌ̃be, warra, mʌ̃a jarabʌrʌda odua. 9Dadji animarã b̶eamaa wãped̶a chiwatu zaque boreguea panʌda umé enedua. Maʌ̃be mʌ̃ra bʌ zeza itea ne djuya idjia awua cobari quĩrãca. 10Maʌ̃da bʌa bʌ zezamaa edeya idjia comãrẽã. Mãwã idji beui naẽna bʌdrʌ bia jara b̶ʌya.–
11Maʌ̃ne Jacoboba dji papa Rebecaa jarasia:
–Mʌ̃ djaba Esaúra caraid̶a b̶ʌa, maʌ̃ne mʌ̃ra cara neẽ́ b̶ʌa. 12Mʌ̃ zezaba mʌ̃da tãibʌrʌ, cawaya mʌ̃a idjira cũrũga b̶ʌda. Maʌ̃da cawasira idjia mʌ̃ra bia jara b̶ʌẽ́a, ãtebʌrʌ biẽ́ jara b̶ʌya.–
13Maʌ̃ne dji papaba panusia:
–Mãwã biẽ́ jara b̶ʌsira mʌ̃maabʌrʌ zeya. Warra, odua mʌ̃a jara b̶ʌ quĩrãca. Chiwatu zaquera isabe jʌrʌd̶e wãdua.–
14Ara maʌ̃da Jacobora wãped̶a chiwatu zaquera enesia idji papamaa. Eneped̶a idji papaba djicoda osia Jacobo zezaba awua cobari quĩrãca. 15Maʌ̃be dji warra nabema Esaúba jʌ̃bari dji biara b̶ʌda Rebecaba enesia. Esaúba maʌ̃ jʌ̃barira ãdji ded̶e erob̶asia. Maʌ̃da Rebecaba Jacoboa jʌ̃bisia. 16Maʌ̃ awara Jacobora cara neẽ́ b̶ʌ bẽrã Rebecaba chiwatu zaque eda idji jʌwad̶e, ʌ̃rʌ̃mʌsid̶e bid̶a caracuasia. Mãwã osia dji zezaba Esaúdrʌ crĩchamãrẽã. 17Maʌ̃be djico warra djud̶ada paʌ̃ sid̶a idji warra Jacoboa diasia dji zezamaa edemãrẽã.
18Idji zezamaa wãped̶a Jacoboba jarasia:
–¡Zeza!–
Isaba panusia:
–¿Cãrẽ, warra? Bʌra ¿caida mãwã b̶ʌ?–
19Maʌ̃ne Jacoboba idji zezaa jarasia:
–Mʌ̃ra bʌ warra nabema Esaúa. Mʌ̃a osia bʌa jarad̶a quĩrãca. Ʌ̃ta chũmeped̶a ne codua. Maʌ̃be mʌ̃ra bia jara b̶ʌdua.–
20Isaba dji warraa iwid̶isia:
–Mʌ̃ warra, ¿sãwã jãcua isabe ne beasi?–
Jacoboba panusia:
–Bʌ ume b̶ʌ Ãcõrẽba mʌ̃́a unubisia.–
21Maʌ̃ne Isaba jarasia:
–Warra, mʌ̃ caita zedua. Mʌ̃́a idu tãbidua bʌra wãrãda mʌ̃ warra Esaú cawaya.–
22Ara maʌ̃da Jacobora dji zezaba tãmãrẽã caita wãsia. Maʌ̃ne Isaba jarasia:
–Bʌ bed̶eara Jacobo bed̶eaca b̶ʌa, baribʌrʌ bʌ jʌwara Esaú jʌwaca b̶ʌa.–
23-24Isaba Jacobora cawaẽ́ basía idji jʌwara Esaú jʌwa quĩrãca caraid̶a b̶ʌ bẽrã. Isaba Jacobo bia jara b̶ʌbʌrʌd̶e wayacusa iwid̶isia:
–¿Bʌra wãrãda mʌ̃ warra Esaúca?–
Jacoboba panusia:
–Mãẽ, zeza. Mʌ̃ra Esaúa.–
25Maʌ̃ne dji zezaba jarasia:
–Warra, bʌa ne bead̶ara diadua mʌ̃a coi carea. Maʌ̃be mʌ̃a bʌra bia jara b̶ʌya.–
Ara maʌ̃da Jacoboba diasia. Diad̶acarea Isaba cosia. Mãwã b̶ʌd̶e Jacoboba uva b̶a sid̶a diasia. Maʌ̃gʌ sid̶a Isaba dosia. 26Maʌ̃bebʌrʌ Isaba jarasia:
–Jãʌ̃be warra, mʌ̃ caita chũmeped̶a mʌ̃ uridarrad̶e isõdua.–
27Ara maʌ̃da Jacobora caita chũmeped̶a isõsia. Maʌ̃ne Jacoboba jʌ̃ b̶asia Esaúba jʌ̃barida. Isaba maʌ̃ra ʌ̃ped̶a crĩchasia wãrãda Esaúda idji ume b̶ʌda. Maʌ̃ bẽrã idjia Jacobodrʌ nãwã bia jara b̶ʌsia.
Mʌ̃ warrara tũãpa b̶ʌa Ãcõrẽba bia zaubi b̶ʌ ẽjũã quĩrãca.
28Mʌ̃a quĩrĩã b̶ʌa Ãcõrẽba bʌ itea bajãneba cue zebi b̶aida bʌa ubʌrʌra bia zaumãrẽã.
Mãwã bʌ trigora ad̶uba zauya. Bʌ uva sid̶a bia zauya.
29Mʌ̃a quĩrĩã b̶ʌa puruda zocãrã bʌ jʌwaed̶a b̶ead̶ida, druazabemada bʌ quĩrãpita wayaad̶eba chĩrãborod̶e cob̶ead̶ida.
Mʌ̃a quĩrĩã b̶ʌa bʌra bʌ djabarã boro baida, bʌ papa warrarãda bʌ quĩrãpita chĩrãborod̶e cob̶ead̶ida.
Mʌ̃a quĩrĩã b̶ʌa bʌ biẽ́ jarabʌdara biẽ́ b̶ead̶ida idjab̶a bʌ bia jarabʌdara bia b̶ead̶ida.
30Isaba mãwã bia jara b̶ʌd̶acarea Jacobora idji zeza ume b̶ad̶ada ẽdrʌsia. Ara ẽdrʌbʌrʌd̶e idji djaba Esaúra mẽã wã b̶ad̶ada jũẽsia. 31Idjia bid̶a djicoda warra osia. Maʌ̃da dji zezamaa edeped̶a jarasia:
–Zeza, mʌ̃ra ne beasia. Ʌ̃ta chũmeped̶a codua. Maʌ̃be mʌ̃ra bia jara b̶ʌdua.–
32Maʌ̃ne Isaba Esaúa jarasia:
–Bʌra ¿caida mãwã b̶ʌ?–
Esaúba panusia:
–Mʌ̃ra bʌ warra iwina Esaúa.–
33Isaba maʌ̃ ũrĩbʌrʌd̶e dauperaped̶a ure nũmesia. Maʌ̃ne jarasia:
–Mãẽteara ¿caida bʌ na ze b̶asi? Idjia bead̶ara mʌ̃́a diasia. Maʌ̃da mʌ̃a jũma cosia bʌ zei naẽna. Mʌ̃a idjira bia jara b̶ʌsia. Maʌ̃ bẽrã idjidrʌ bia b̶aya.–
34Esaúba dji zeza bed̶ea ũrĩsid̶e ab̶ed̶a bio sopuasia. Maʌ̃ne jĩã b̶ʌba jĩgua jarasia:
–¡Zeza, mʌ̃ sid̶a bia jara b̶ʌdua!–
35Maʌ̃ne dji zezaba panusia:
–Bʌ djababa mʌ̃ra cũrũgad̶e ze b̶asia. Mãwã mʌ̃a bʌ bia jara b̶ʌi bad̶ara idjiabʌrʌ edasia.–
36Maʌ̃ne Esaúba jarasia:
–¡Bãrãba jãʌ̃ cũrũgabari Jacobora arid̶e trʌ̃ b̶ʌsid̶aa!#27:36. Hebreo bed̶ead̶e Jacobo trʌ̃ra cũrũgabariad̶a abʌrʌ quĩrãca jĩguabaria. Genesi 25:26. ¡Idjia mʌ̃ra b̶arima umé cũrũgabʌrʌa! Mʌ̃a warra iwinaba edaida b̶ad̶ara idjia edasia. Jãʌ̃be id̶i bʌa mʌ̃ bia jara b̶ʌi bad̶ara idjia jãrĩsia.–
Maʌ̃ne Esaúba wayacusa iwid̶isia:
–¿Bʌa mʌ̃ sid̶a poya bia jara b̶ʌẽ́ca?–
37Isaba panusia:
–Mʌ̃a Jacobora bʌ boroda b̶ʌsia. Bʌ ẽberãrãra, bʌd̶eba yõbʌda sid̶a idji jʌwaed̶a b̶ʌsia. Idjab̶a mʌ̃a jara b̶ʌsia idji trigora uva sid̶a ad̶uba zaumãrẽã. Maʌ̃ba, warra, mʌ̃a bʌ́a ¿cãrẽda poya diai?–
38Maʌ̃ne Esaúba dji zezaa b̶ia iwid̶isia:
–Zeza, bʌa ¿ab̶abe idjidrʌ poya bia jara b̶ʌica? ¡Ay, zeza, mʌ̃ sid̶a bia jara b̶ʌdua!–
Mãwã jara b̶ʌd̶e Esaúra bio jĩã nũmasia.
39Mãwã b̶ʌd̶e dji zeza Isaba jarasia:
Bʌra ẽjũã biad̶ebemada, cue zebarimabemada jĩga b̶aya.
40Bʌra dewara ẽberãrã ume djõ b̶aya, idjab̶a bʌ djaba jʌwaed̶a b̶aya.
Baribʌrʌ bʌa ĩjã o ama b̶ebʌrʌd̶e idji jʌwaed̶a b̶ad̶ada ẽdrʌya.#27:40. Dãrãbʌrʌd̶e Esaú puru Edoʌ̃ba Jacobo puru Israelera igarasia. 1 Reye 11:14-25; 2 Reye 8:20.
Rebecaba Jacoboa mĩrũ wãduad̶a ad̶a
41Ãdji zeza Isaba Jacoboda bia jara b̶ʌd̶a bẽrã Esaúba Jacobora bio quĩrãma b̶esia. Maʌ̃ carea nãwã crĩchasia: “Mʌ̃ zeza beud̶acarea mʌ̃a sopua ewarida wagaya. Maʌ̃bebʌrʌ mʌ̃ djaba Jacobora beaya.”
42Esaúba oi crĩcha b̶ʌra dji papa Rebecaba cawasia. Maʌ̃ carea idji warra tẽãbema Jacobora trʌ̃ped̶a jarasia:
–Ũrĩdua, bʌa od̶a carea bʌ djaba Esaúba bʌra bea quĩrĩã b̶ʌa. 43-45Idjia bʌda beaibʌrʌ, idji sid̶a bead̶ida panʌa. Mãwãra mʌ̃a ab̶ari ewarid̶e bãrã umena aduaya. Maʌ̃ carea, warra, mʌ̃a jarabʌrʌda ĩjã odua. Isabe Haraʌ̃ purud̶aa mĩrũ wãdua mʌ̃ djaba Labaʌ̃maa. Jãma idji ume dãrã b̶adua ab̶a bʌ djaba quĩrũbi jõbʌrʌd̶aa. Bʌa od̶ada idjia quĩrãdoasira mʌ̃a bʌ́a bed̶eada diabueya waya zemãrẽã.–
46Jacobo wãi naẽna Rebecaba dji quima Isaa jarasia:
–Mʌ̃ra sẽ b̶ʌa Esaú quima hititarã carea. Jacobo bid̶a naʌ̃ druad̶ebema hitita wẽrãda edaibʌrʌ, biara b̶ʌa mʌ̃ra beuida.–
Currently Selected:
Genesi 27: emp
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
