Genesi 25

Abrahaʌ̃ba Queturá ume warrarã ununa

1Abrahaʌ̃ra waya quima edasia. Dji wẽrã trʌ̃ra Queturá basía. 2Maʌ̃ Queturába tosia Zimraʌ̃, Jocsaʌ̃, Medaʌ̃, Madiaʌ̃, Isbac, Súa sid̶a. 3Jocsaʌ̃ warrarãra naʌ̃gʌrã basía: Sebá, Dedaʌ̃ sid̶a. Dedaʌ̃neba yõsid̶aa asureorã, letuseorã, leumeorã sid̶a. 4Madiaʌ̃ warrarãra naʌ̃gʌrã basía: Epá, Eper, Hanoc, Abidá, Eldá sid̶a. Jũma maʌ̃gʌrãda Queturád̶eba yõsid̶aa.

5-6Abrahaʌ̃ wad̶i zocai b̶ʌd̶e Queturába tod̶a warrarãa, Agaraba tod̶a warraa bid̶a Abrahaʌ̃ba nebiada diacuasia. Maʌ̃be ãdjirãra Isa b̶ʌmaʌba ʌ̃mãdau odjabariare tʌmʌ wãbigasia. Maʌ̃bebʌrʌ Abrahaʌ̃ba idjia erob̶ʌra jũma Isaa diasia.

Abrahaʌ̃ jaid̶ad̶a

7Abrahaʌ̃ra 175 poa b̶asia. 8Maʌ̃ne bio drõãda quiruda waraga jaid̶asia. 9-10Dji warrarã Isaba, Ismael bid̶a idjira tʌb̶arisid̶aa bẽwãrã joubada uria Macpela abadad̶e Sara tʌb̶ariped̶ad̶ama. Maʌ̃ uriara Mamre ẽjũãneba ʌ̃mãdau odjabariare b̶ʌa. Dji ẽjũãra Abrahaʌ̃ba hitita Zohar warra Eproʌ̃neda nẽdosia.#25:9-10. Genesi capítulo 23. 11Abrahaʌ̃ jaid̶ad̶acarea Ãcõrẽba dji warra Isara bia b̶ʌsia. Isara baido juebada uria caita b̶abadjia. Dji baido juebada uriara Beer-Lajai-Roi abadjid̶aa.#25:11. Beer-Lajai-Roi. Hebreo bed̶ead̶e maʌ̃ trʌ̃ba jara b̶ʌa: “Baido bogadrʌ b̶ʌ Ãcõrẽ zocai b̶ʌ mʌ̃ unubarid̶e.” Genesi 16:13-14.

Ismaeld̶eba yõped̶ad̶arã

12Nama b̶ʌ́ b̶ʌa Ismaeld̶eba yõped̶ad̶ad̶ebemada. Maʌ̃ Ismaelera Abrahaʌ̃ba unusia Agarad̶eba. Agarara Sara nezocawẽrã Egiptod̶ebema basía. 13Ismael warrarã trʌ̃ra naʌ̃gʌrã basía: dji iwinada Nebayo basía. Idjiare Cedar basía. Maʌ̃are Adbeel basía. Maʌ̃are Mibsaʌ̃ basía. 14Maʌ̃are Mismá basía. Maʌ̃are Dumá basía. Maʌ̃are Masá basía. 15Maʌ̃are Hadar basía. Maʌ̃are Temá basía. Maʌ̃are Jetu basía. Maʌ̃are Napi basía. Dji jĩrũarebemara Cedemá basía. 16Maʌ̃gʌrã docera Ismael warrarã basía. Ãdjirãneba puruda doce yõsid̶aa. Ãdjira maʌ̃ puru bororãda b̶easia. Maʌ̃ doce purura ara ãdji trʌ̃da b̶ʌcuasid̶aa. Dji ẽberãrã sid̶a ara maʌ̃ trʌ̃ra eropanesid̶aa.#25:16. Genesi 17:20.

17Ismaelera 137 poa b̶asid̶e jaid̶asia. 18Idji warrarãba birasid̶aa Sur ẽjũãneba ab̶a Havila ẽjũãnaa. Sur ẽjũãra Egipto drua caita b̶ʌa. Havilara Asiria druad̶aa wãbada od̶e b̶ʌa. Ãdji ẽberãrãnebemada jĩga panabadjid̶aa.#25:18. Ãdji ẽberãrãnebemada jĩga panabadjid̶aa. Maʌ̃ bed̶eaba idjab̶a jara b̶ʌa “ãdji ẽberãrã quĩrãpe panesid̶aa” wa “ara ãdji ẽberãrã ume biẽ́ panesid̶aa.” Genesi 16:12.

Isa warrarã toped̶ad̶a

19Nama b̶ʌ́ b̶ʌa Isa warrarãnebemada. Isara Abrahaʌ̃ warra basía. 20Isa cuarenta poa b̶asid̶e idji quima Rebecara edasia. Rebecara Betuel cau basía idjab̶a Labaʌ̃ djabawẽrã basía. Ãdjirãra arameorã basía. Padan-Araʌ̃ druad̶ebemarã basía.

21Isa quima Rebecara warra toca basía. Maʌ̃ carea Isaba Ãcõrẽa iwid̶isia Rebeca b̶iogoamãrẽã. Idjia iwid̶id̶ara Ãcõrẽba bia ũrĩsia. Mãwã Rebecara mĩguisoda b̶iogoa b̶esia. 22Maʌ̃ne warrarãra idji b̶ited̶a djõ panʌ bẽrã idjia crĩchasia: “¿Sãwãẽrã mʌ̃ra jãwã mĩga b̶ʌ?”#25:22. ¿Sãwãẽrã mʌ̃ra jãwã mĩga b̶ʌ? Maʌ̃ra hebreo bed̶ead̶e ebud̶a b̶ʌẽ́a. Ʌ̃cʌrʌmaarã jara b̶ʌa: “Mʌ̃ra jãwã b̶aibʌrʌ, ¿cãrẽ cãrẽã zocai b̶ai?” Dewararãmaarã jara b̶ʌa: “Mʌ̃a ¿cãrẽ cãrẽã naʌ̃ warrara jãwã iwid̶isi?” Maʌ̃ carea Ãcõrẽa iwid̶id̶e wãsia. 23Maʌ̃ne Ãcõrẽba panusia:

Bʌ b̶ited̶a warrada umé djõ panʌ bẽrã bʌra jãwã b̶ʌa. Ãdjid̶eba puruda umé odjad̶ia.

Ab̶aʌda dewarabema cãyãbara mẽsrãara b̶aya. Dji nabemada dji tẽãbema jʌwaed̶a b̶aya.

24Dji toi ewari jũẽsid̶e Rebecaba umé tosia. 25Dji nabemara bio caraid̶a b̶asia. Idjira cara purea b̶asia. Maʌ̃ carea dji trʌ̃ra b̶ʌsid̶aa Esaú.#25:25. Esaúra trʌ̃ jarabadaa Edoʌ̃ idjab̶a Seír. Hebreo bed̶ead̶e Edoʌ̃ trʌ̃ba jara b̶ʌa “purea b̶ʌ.” Seír trʌ̃ba jara b̶ʌa “caraid̶a b̶ʌ.” Edoʌ̃ba biara jara b̶ʌa Esaúd̶eba yõna puruda. Seírba biara jara b̶ʌa Esaúd̶eba yõped̶ad̶arã ẽjũãda. Genesi 36:9. 26Esaú tobʌrʌd̶e dji tẽãbemaba idji jĩrũgarronane jida to b̶aesia. Maʌ̃ carea idjira trʌ̃ b̶ʌsid̶aa Jacobo.#25:26. Jacobo trʌ̃ba jara b̶ʌa “jĩrũgarrona.” Maʌ̃ awara cũrũgabariad̶a abʌrʌ quĩrãca jĩguabaria. Genesi 27:36. Rebeca warra tosid̶e Isara sesenta poa b̶asia.

Esaúba edaida b̶ad̶ara Jacoboa nẽdobued̶a

27Maʌ̃ warrarãra warisid̶aa. Esaúra mẽã wã cawa b̶asia. Baribʌrʌ Jacobora diguid̶a necai b̶abadjia. 28Esaúba animarã beaped̶a dji zezaa cobibadjia. Maʌ̃ bẽrã Isaba Esaúra bio quĩrĩã b̶asia. Maʌ̃ne Rebecaba biara Jacoboda quĩrĩã b̶asia.

29Ewari ab̶a Jacobora ne dju b̶asia. Maʌ̃ne Esaúra mẽã nĩbad̶ada jarra jũẽsia. 30Esaúba jarasia:

–Mʌ̃ djuburia, bʌa lenteja purea dju b̶ʌda mʌ̃́a cobidua. Mʌ̃ra cacua ʌb̶ʌaẽ́ b̶ʌa, ne coẽ́ b̶ʌ bẽrã.–

Lenteja purea b̶ʌ carea Esaúra idjab̶a trʌ̃ b̶ʌsid̶aa “Edoʌ̃.”#25:30. Hebreo bed̶ead̶e Edoʌ̃ trʌ̃ba jara b̶ʌa purea b̶ʌda.

31Maʌ̃ne Jacoboba jarasia:

–Bʌra dji warra iwina bẽrã dadji zezaba erob̶ʌd̶ebemada bʌa waib̶ʌara edaya. Bʌa edaida b̶ʌra za b̶ʌ lentejabari mʌ̃́a nẽdobuedua.–

32Esaúba jarasia:

–Mʌ̃ra jarrababa beubod̶oa. Mʌ̃da beuibʌrʌ, dadji zezad̶e edaida b̶ʌra ¿sãwã edai?–

33Maʌ̃ne Jacoboba jarasia:

–Naãrã wãrãneba jaradua bʌa dadji zezad̶e edaida b̶ʌra mʌ̃́a diaida.–

Ara maʌ̃da Esaúba wãrãneba jarasia. Mãwã dji warra iwinaba edaida b̶ʌra Esaúba Jacoboa nẽdobuesia. 34Maʌ̃bebʌrʌ Jacoboba lentejara paʌ̃ sid̶a Esaúa diasia. Esaúba coped̶a baido do b̶aped̶a wãsia. Mãwã dji warra iwinaba edaida b̶ad̶ara Esaúba igarasia.

Currently Selected:

Genesi 25: emp

Highlight

Copy