Luka 24

Jesu yakhal kih peemuutt

Mat 28:1-10; Mar 16:1-8; Yoh 20:1-10

1Byitt-byitt p'ar puus wu'shee mhi shaptarr, bhi shwarab ni mwopp dum phi kihshirr Jesu kihh mwoor'teghez w'u mwopp dhakk seh. 2Bhi mwopp dum kad baa mwopp byirring elleng w'u phi kihshirr ni lhi'baa. 3Dhangg kaarooh mwopp dhel dhighin kihshirr ni, bhi mwopp kad kumm Daah Jesu nhighin maah. 4Kaarooh mwopp kaah yeeh shut kaah bii mihhseh, dheeh mwopp kad a m'ee gurum mwopp vel kihh dyarrang nhighin kuss sh'i shut kihh looh w'u mellep pyaah sakk-sakk. 5Khighiy shwat mwopp pwetd, bhi mwopp kwarram kaah ruh yill. Gurum w'u vel mhizeh ni mwopp nang phi shwarab ni mwopp le, “A p'ee mihyeh bhi wunn phi lyap gwooh kihh seen naar mwooh mihmwarrap ayeh? 6Ai baah nyi nihghinse dyi mou; baa yakhal kihh seen. Wu kakkder bii w'u deh satt wunn, bhi nyi kudyi kihshag kihh wunn Galili le, 7‘Nyi a ching tihh mwopp pihh L'aa khi Gurum sarr mhi-shigbis mwopp, mwopp pwas nyi kih sheepmuutt, dhangg nyi p'ee waa yakhal dyi kihh seen kih puus wu'kunn.’ ”#Mat 16:21; 17:22,23; 20:18,19; Mar 8:31; 9:31; 10:33,34; Luk 9:22; 18:31-33 8Bhi shwarab ni mwopp kakkder pwoo w'u deh Jesu satt runn seh ser'seh.

9Kaarooh shwarab ni mwopp tong phi kihshirr ni mwopp baja, bhi mwopp yakshiiy bii mihhseh weett zheppkamm w'u kaghapaad baa'kihmeh seh, kihh kakhar gurum w'u mwopp dheeh dang mwopp weett. 10Gyet a Maryamu Magdalin, kihh Yuwana, kihh Maryamu w'u a nhikhin khi Yakub, kihh pakk m'ee shwarab w'u dang mwopp dyi, a mwopp yakshiiy bii mihhse zhepp'lop khi Jesu ni mwopp. 11Dhangg baah zhepp'lop ni mwopp pihhzeenn bii w'u shwarab ni mwopp satt runn seh mou, p'ee bii w'u shwarab ni mwopp yakshiiy seh dheeh mwopp a kaa pwoo wu'buu se kyekk. 12Weett kihhsheh, bhi Bitrus shass yakhal, y'aa shu'shu dum phi kihshirr ni. Kaarooh dum kurum bhonggpee diy dhighin kihshirr ni, bhi naah a zaall fwaat linen w'u deh mwopp wum Jesu kihh nyi kyekk kihh l'e kihshag m'ee koghob. Bii mihhseh aa'phi nyi pwetd, bhi waa'baa.

Jesu dyingg shin gurum vel kih arr Emmawus

Mar 16:12,13

13P'ar mihhseh ni bhi m'ee mhi-dumdang Jesu mwopp vel kihh dum Emmawus, w'u a m'ee kwangyill w'u zh'ong khinyi kihh Urshalima a kaa kilomita kaghapaad baa'kihmeh se. 14Mwopp kaah laa'pwoo kihh shag kaah bii w'u taah seh. 15Kaarooh mwopp kaah l'aa orr nyi, mwopp kaah shwanshiiy bii mihhseh kihh shag, bhi Jesu sh'i kaah niy ji y'aa mwopp arr mwaan, bhi mwopp sokihkyeen kihh mwaan dangshag, 16dhangg Naan byir'yit mwopp tapp mwopp naah nyi man.

17Bhi Jesu nang phi mwopp le, “Wunn phi shwan a shiiy mihyeh kihhsheh pwetd arr mwaan dangshag?” Bhi mwopp ba dyarrang dhighin wadphitukhup. 18Bhi kihmeh dhighin mwopp, w'u shumm nyi a Kilyobas, nang phi nyi le, “A wu'gha kyekk a mhizeb Urshalima w'u baah ghi man bii w'u mwopp sh'in nhighin dhighin t'eer mihhse aa'?”

19Bhi Jesu nang phi mwopp le, “A mee'mihyeh mwopp?”

Bhi mwopp lapp nyi le, “A pwookaah Jesu Gu-Nazaret e'h. Deh nyi a gu'wanggshiiy w'u bhall-bhall dhighin kamm khinyi, kihh dhakk'shin khinyi zag. Naan man yakhal zhepp gurum weett zag mwopp man a kihhsheh. 20Prist wu'nan kihh mhi-kihkyeen keemu mwopp pihh nyi sarr dyeell tihh mwopp shandyeell muutt diy nyi, bhi mwopp pwas nyi kih sheepmuutt. 21Dhangg deh wu'munn mu kihh le'pan mu le a nyi p'ee bham Isra'ila, dhangg munn a dhighin t'eer wu'kunn se shinn phi'wu mwopp sh'in bii mihhseh ni diy.

22“Dhangg ghi naah, baah bii mihhseh a kihhsheh kyekk mou, pakk shwarab w'u mwopp kihshag kihh munn mwopp pihh aa'pwoo munn pwetd. Mwopp mya dwam phi kihshirr ni byitt-byitt, 23dhangg mwopp kad kumm Jesu ni maah. Bhi mwopp baja dyangg munn le runn naah m'ee wanggriin mhi m'ee mhi'lop khi Naan nw'aa, bhi nw'aa satt runn le Jesu ni gw'ar kihh seen e'h. 24Bhi pakk gurum keemu zag mwopp dum phi kihshirr ni, bhi mwopp dum kad bii ni mwoorr a kihhsheh kaarooh shwarab ni mwopp yakshiiy seh, dhangg mwopp naah Daah Jesu ni sh'i kaah niy mou.”

25Bhi Jesu satt mwopp le, “Kai, wunn a mwenn pwetd. Baah phitukhup wu kihh klakk pihhzeenn kapp bii w'u gyet Mhi-wanggshiiy mwopp satt mou! 26Kan wu man rooh deh nyi a ching tihh Kristi ni shwaazheell bii mihhse mwopp weett dhangg kihh dhel dhighin tihghindhess keeniy maah?” 27Bhi Jesu yakshiiy bii w'u Ran'Wubhangg satt kaah niy mwopp, phi'wu shee diy W'aar mhi Musa dum putt r'an khi kakhar Mhi-wanggshiiy mwopp weett.

28Kaarooh mwopp wull kuss kihh kwangyill w'u gurum mihhseh ni mwopp kihh dum diy, bhi Jesu wu'nyi sh'in kaarooh nyi p'ee dum dhidhel se. 29Dhangg gurum mihhseh ni mwopp dy'iin sh'i nyi pwetd mwopp le, “Ghi teer luh muh; baa kan'sihkhin kihh t'ang sh'in; puus dheeh a arr r'u.” Bhi Jesu dum p'ee teer luh mwopp.

30Kaarooh Jesu tong p'ee so soh kihshag kihh mwopp, bhi m'ang gihkhill gutt, pihh plangg Naan, bhi trep pihh mwopp. 31Bhi yit mwopp wangg, mwopp naah nyi man, bhi yakhal wonn dyiiz nhighin kihyit mwopp. 32Bhi mwopp satt shag le, “Kan a kihhsheh shi dyinn mu kad phitukhup mu kihh sowus diy, kaarooh dyinn nyi laa'pwoo kihh munn kih arr seh, yakhal kihh yakshiiy pwoo khi Naan munn s'ang?” 33A nyi seh, bhi mwopp shikhir yakhal dyi abet, mwopp baduam Urshalima. Mwopp dum kad kakhar zhepp'lop khi Jesu w'u kaghapaad baa'kihmeh seh mwopp kaah k'ang kihshag, kihhsheh kihh kakhar mwooh dang mwopp. 34Mwopp kaah l'aa orr yaghal kih peemuutt khi Jesu le, “Nyi a zeenn e'h wunn'!, Daah Jesu yakhal kih peemuutt, harr dyingg shin Siman e'h!” 35Bhi mwooh vel mhizeh mwopp yakshiiy bii w'u dyinn taah kad runn kih arr seh, kihh rooh dyinn mwopp naah Jesu man kaarooh nyi trep gihkhill gutt seh.

Jesu dyingg shin mhi-dumdang niy

Mat 28:16-20; Mar 16:14-18; Yoh 20:19-23

36Kaarooh mwopp kudyi kaah yakshiiy bii mihhseh, bhi Jesu sh'i kaah niy rug dharr naar mwopp, bhi satt mwopp le, “Tongkakhamm dhen kihshag kihh wunn!” 37Bhi bhaann chaat bwut mwopp, yakhal lukhut t'u mwopp pwetd, mwopp kihh ryeeh le runn phi naah a m'ee daazhiiy. 38Dhanggbhi Jesu satt mwopp le, “A mihyeh l'e bhi lukhut t'u wunn, yakhal wu kihh takhar bii mihhse dhighin phitukhup wu ayeh? 39Wu naah sarr nah mwopp kihh shiiy nah mwopp zag; a a'n sh'i kaah nah. Wu bwum a'n tihh wu man diy; a m'ee daazhiiy wu'rangg kihh kwed kihh lwaa kihh yess kaa wu naah a'n kihh nyi se?” 40Kaarooh satt kihhsheh, bhi dyingg sarr niy kihh shiiy niy mwopp naah.

41Dhangg kaarooh harr mwasseh baah mwopp pihhzeenn mou lhiwaa rettyit kihh aa'pwoo, bhi nang phi mwopp le, “Wunn kihh mee'bii nihghinse p'ee s'o aa'?” 42Bhi mwopp pihh reb bott sherep w'u wu'wus nyi, 43bhi lapp so kihyit mwopp weett.

44Bhi satt mwopp le, “A mihhse a bii w'u deh ih satt wunn, bhi ih kudyi kihshag kihh wunn ih le; dhen a ching tihh kapp bii w'u mwopp ran kaah nah dhighin W'aar mhi Musa, kihh R'an khi Mhi-wanggshiiy mwopp, kihh rooh dhighin KoogNaan zag gam.”

45Bhi wangg en mwopp tihh mwopp mak manshiiy Ran'Wubhangg diy. 46Bhi satt mwopp le, “A mihhse a bii w'u rih-ran dhighin Ran'Wubhangg le Kristi ni p'ee shwaazheell, dhangg waa yakhal kih peemuutt kih puus wu'kunn. 47Bhi mwopp p'ee kihh satt pwooNaan mhi tu'wapp p'ee fwah khi shigbis dhighin shumm nyi Seghen'gurum w'u dhighin yill ni weett. Wu shee satt pwooNaan ni a Urshalima. 48A wunn sh'i kaah wuh wu naah bii mihhse mwopp kihh yit wu. 49Wu naah, a'n p'ee lop gwooh Daa bwakhatbhelepp nyi wunn seh lhisam wunn; wu to`ng dhighin khishikhitt Urshalima harr tihh Naan pihh maa'pee keeniy diy wunn dhangg.”

Jesu baa'kaa dum kih dhengNaan

50Kaarooh Jesu lang'arr kihh zheppkamm keeniy ni mwopp lhipwat Urshalima harr mwopp dum wull kuss kihh Betani, bhi eep sarr niy phikihtihngg le'wurett diy mwopp. 51Kaarooh nyi kaah le'wurett mwopp, bhi yet mwopp, bhi Naan m'ang nyi lhi'kaa dum kih dhengNaan. 52Bhi zheppkamm ni mwopp soyill nyi, dhangg mwopp wakba Urshalima sh'i rettyit w'u maa'satt. 53Mwopp kihh dum kang kihfur LuhNaan chitt p'ee kwoob Naan.

Currently Selected:

Luka 24: Chakfem

Highlight

Copy