ปะทมมะกาน 25
25
เซือซายคองอับราฮัมกับละกวยตะไม
1เจอฮาไนอับราฮัมก็เอดละกวยแอน ละกวยอันตูไนละมึฮเคทูรา 2เจออะไลก็เบินกอนมะนืยซะเอยนาะ กอนกอ์นคองอะไลละมึฮปาย ซิมราน โยกซาน เมดาน มีเดียน อิซบาก เจอก็ซูอา 3เจอโยกซานอะกีเบินกอนกอ์นละมึฮเซ-บากับเดดาน เดดานเบินกอนกอ์นละมึฮอัซซูริม เลทูซิม เจอก็เลอุมมิม 4กอนกอ์นคองมีเดียนละมึฮเอพา เอเพอ ฮาโนก อาบีดา เจอก็เอลดาอา กวยจุมไนมังก็ปันกอนเจาคองเคทูรา
5-6นึงซวงนาก็อันนังตุนกะเจด อับราฮัมก็เอดโกรกรูอะซะเอยเนว ออ์นกอนคองละกวยเกยะคองอัน เจอก็ออ์นอะไลดิปัอะอัอดยาฮมะนางลอฮ ตัอออ์นอะไลอัอดมะนืยนังกับอิซอัก เจอฮาไนบัดอับราฮัมกะเจดเจอ มูนม็างคองอันกูเนวก็อันตรุฮปันคองอิซอักมะนาะ
อับราฮัมกะเจด
7-8เจออับราฮัมก็เบินอาญุญืนอะเลอ อาญุอันก็เบิน 175 ปี อันจังกะเจด เจออันก็กะเจดปัอะตะปูนอะยาะอะจวยฮคองอัน 9เจอกอนปะลูอะคองอัน ทังอิซอักกับอิซมาเอล ก็เอดซบคองอันอะปัอะอะดอะนึงทำมักเป-ลา นึงซวนนาก็เกยปันคองเอโพรน กอนคองโซฮา นาก็ปันกวยฮิดไทอะกี ซวนอะไนอัอดละแต็ดกับกะแตะคองมัมเร 10ปันซวนนาก็อับราฮัมเกยจัองเอดนึงกวยฮิดไท เจอซบคองอับราฮัมก็อะดอะมะนืยกับซบคองซารานึงทำอะกีออยะ 11อับราฮัมกะเจดเจอ พูซางก็อวยพอนออ์นอิซอักแอน เจออิซอักก็อัอดแจะ "อันซางพูนาก็เบินซีวิดอัอดตะลอดพูนาก็โฮมอังกอะ"#ปะทมมะกาน 16:14 อะกี
เซือซายคองอิซมาเอล
12เจอฮาไนซีปันละมึฮเซือซายคองอิซมาเอล กอนคองอับราฮัมนาก็อันเบินกับฮากากวยอียิบ นาก็ปันทาดรับไซคองซาราอะกี 13อะไนออยะละมึฮกอนกอ์นคองอิซมาเอล เวาตามลำดับนาก็อะไลกัอด กอนแก็ลคองอิซมาเอลละมึฮเนบาโยด ทัดปัอะก็เบินเค-ดา อัดบีเอล มิบซำ 14มิซมา ดูมา มัซซา 15ฮาดัด เท-มา เยทู นาพิด เจอก็เคเดมา 16ญิอะไนปันละมึฮกอนปะลูอะคองอิซมาเอล เจออะไลก็อัอดปันตะกูนอะลาะตะกูนอะกี วีลอะลาะวีลอะกี อะไลเบินปันเจาปันนายคองกวย 12 เพา 17เจออิซมาเอลก็อัอดจนเบินอาญุตัอะ 137 ปี เจออันก็กะเจด กะเจดปัอะตะปูนอะยาะอะจวยฮคองอัน 18เจอจุมกอนเจาคองอิซมาเอลอะไลก็อะไซอัอดกดตีเมืองฮาวิลา จนตัอะเมืองซู นาก็อัอดยาฮมะนางลอฮคองปะเทดอียิบ ปัอะยาฮเมืองอัซซีเรีย อะไลอะไซอัอดยาฮมะนางลอฮ ตุนอัอดมะนืยกับกอนเจาคองอิซอัก
เอซาวกับยาโคบกัอด
19เจอฮาไนซีลับเวาเรืองอิซอักแอน 20อิซอักเบินอาญุ 40 ปี ตีอันเอดเรเบคาปันละกวยอะกี เรเบคาอะไนปันกอนคองเบทูเอล ปันแซมคองลาบัน อะไลตัอะตีเมืองปัดดานอารัม 21อิซอักกับเรเบคาเอดนังนึดูนเจอ ฮักตัอเบินกอน ปันอัมเปะกะแดง อิซอักเลิดอะทิดทานแซกนึงเยโฮวา เจอเยโฮวาก็ตอบคำอะทิดทานคองอัน เจอพะดีเรเบคาก็อัมปอะกอน 22เจอกอนนึงปุงคองเรเบคาอะกีก็ละเจาอะเลอ ซำนาวละเตะละแต็นนังนึ จนอันกึดปาย "ตะนาะจังปันวิดอังกิ? ค็านปันวิดอังกิกึซีตาะวิลลาะอัอด?" เรเบคาเลิดอะบลัฮเยโฮวา
23เจอเยโฮวาก็เวาปาย "กอนนาก็อัอดนึงปุงไมซีปันบาลซนซาด บาลซนซาดอะไนซีอัอดละตาฮ ซีตัอละกลับนังนึตังแตกัอด เจอตูมะนาะ ซีเก็งกูอตูมะนาะ ตูอายซีปันพูนาก็รับไซตูแซม"
24ตัอะกำนดซีเบินกอนเจอ เรเบคาเลิดเบินพาแพด 25กอนอันนาก็ลอฮญวงอะกี กะเซา เจอก็เบินซีซกอับอะเลอ เบินซีซกตัวเต็นตอ์คองอัน อะไลเลิดอะโรละมึฮอันปาย เอซาว เอซาวอะไนเบินคูอมมายปาย ซีซกอับ 26เจอกอนคองอันนาก็ลอฮอันตูนอะกี อะเตอันกอ์บอะดอะกันดัอลอะเยิงคองตูอาย อะไลเลิดอะดอะละมึฮคองอันปาย ยาโคบ ยาโคบอะไนเบินคูอมมายปาย ตีกันดัอลอะเยิงอะดอะ#25:26 นึงพะซาฮีบรูยาโคบอะไนอีกือคำนาก็เบินคูอมมายปาย โกง ก็ปะนัน นึงซวงนาก็อะไลเบินกอนอะกี อิซอักก็เบินอาญุ 60 ปีเจอ
เอซาวตายะซิดนาก็อันปันกอนแก็ล
27-28บัดอะไลปูดเจอ เอซาวตูอายอะกีปันปรีาน ม็ากอันจูอยะอัมแป็น เจออัมปูอเลิดอะยอ์ะตูอายอับกูอตูแซม พอะเบินจีาตีานตูอายอะกี ยาโคบตูแซมพัดปันกวยนาก็ตัอม็ากตะบอ์ะ ปันกวยม็ากอัอดนึงดง เจออัมเปะอันเลิดอะยอ์ะตูแซม
29เบินมูจะไง เอซาวตัอะตีอันจูอยะอัมแป็น เจออันก็อะรีางจีาดอ์ยอะเลอ ยาโคบพัดกำลังตาะจีา เอซาวเลิดแซกจีานึงยาโคบ 30เอซาวเวาปาย "ออ์นกึจีานึง ละจีนกลองจะตองนาก็กะเซาเซาอะกี กึนีอะรีางจนซีกะเจดเจอ" อะไลเลิดอะโรเอซาวอะกีปาย เอโดม เอโดมอะไนเบินคูอมมายปาย กะเซา
31เจอยาโคบตอบเอซาวปาย "ค็านไมอีจีาละจีนกลองจะตองคองกึอะไน ออ์นไมตายะซิดนาก็ไมปันกอนแก็ลออ์นกึวาย"
32เอซาวเลิดตอบปาย "กึอะรีางจนซีกะเจดเจอ ค็านกะเจด ซิดนาก็ปันกอนแก็ลอะกีซีเบินปะโยดอันเตริว?"
33เจอยาโคบก็เวาปาย "ออ์นไมซาบานวาย" เจอเอซาวก็ซาบาน ตายะออ์นแซมอันจิ ซิดนาก็ปันอายแก็ลอะกี
34ยาโคบเลิดออฮละจีนกลองจะตองอะกี ออ์นอายอันจีา เจออันก็ออ์นทังคะนมป็างกับเนวงูอยะเต เอซาวเลิดจีาจนปะไซ เจอก็ยวลปัอะ อังกิออยะ เอซาวพะมาดซิดคองอันนาก็อันปันกอนแก็ลอะกี อันตุนเปงตุนซะน็างไง
Currently Selected:
ปะทมมะกาน 25: Bru Bible
Highlight
Share
Copy
Want to have your highlights saved across all your devices? Sign up or sign in
- Ethnos360
