ปะทมมะกาน 23
23
ซารากะเจด
1ซาราก็อัอดจนตัอะอาญุ 127 ปี 2เจอซาราก็กะเจดอัอดนึงเมืองคีริยาดอารบา นาก็อัอดนึงกะแตะคานาอัน เมืองคีริยาดอารบาอะไน เบินแอนมูละมึฮปาย เมืองเฮโบรน บัดซารากะเจดเจอ อับราฮัมก็ไวทุก เญียมอันจมละกวยคองอันอะเลอ
3นึงจุมคองอับราฮัมอะไน อะไลตัอเบินดอนปีงนาก็ปันซิดปันซวนคองอะไลเบิม อับราฮัมเลิดปัอะเวานึงจุมกวยฮิดไทปาย 4"อังกอะปันกวยกะนอฮ ตัอมีนปันกวยตีไน ฮักอังกอะก็ตัอะอะไซอัอดนึงอัมไป จะนูออังกอะซีแซกจัองกะแตะนึงอัมไปนืยะ ปูอซีเบินตาะดอนปีงออ์นกับกวยคองอังกอะ เพืออังกอะซีเบินตุบกวยคองอังกอะนาก็กะเจดอะไน"
5ซังอังกิกวยฮิดไทอะกีก็เวาปาย 6"นีายเอย มะเฮะซีเวาอังกิเดอจะนูอ ไมก็ปันกวยนาก็มะเฮะเคารบนับทืออะเลอ มะเฮะตุนทือปายไมปันกวยกะนอฮ มะเฮะทือปายไมก็ปันกวยมูวีลกับมะเฮะ เจอนึงดอนปีงคองมะเฮะอะกี ไมเรือฮเอดโลด ตัอปายทำตัอปายกะแตะ ไมม็ากบอนลาะไมก็เรือฮเอดโลด ตัอเบินมะเลอเวาวิลลาะดัก"
7เจอฮาไนอับราฮัมก็ตะยึงเคารบกวยฮิดไทกูนาะนาก็อัอดตีกี 8เจออันก็เวาปาย "เออะ ค็านอัมไปพอไจอีออ์นอังกอะลึอะเลอ อังกอะอีเวาอังกิ ออ์นอัมไปปัอะเวานึงเอโพรน นาก็ปันกอนคองโซฮาอะกีนึง 9อังกอะอีแซกจัองกะแตะซวนนาก็เบินทำมักเป-ลาอัอดมะนืยนึงซวนอะกี อันอีตายะซำลาะอังกอะก็ซีจัอง อังกอะอีออ์นอัมไปด็างนำกูนาะ ปายอังกอะจัองนึงอันอับเบียะซำลาะ อังกอะอีเบินกะแตะอะกี ปันซิดคองอังกอะเบิม เจออังกอะก็อีอะดอะตาะออ์นปันดอนปีงคองมะเฮะ"
10นึงซวงนาก็อับราฮัมเวาอะกี เอโพรนก็อัอดมะนืยตีกีเต อันเลิดเวานึงอับราฮัม เจอก็ออ์นกวยเทากวยปะแกอัอดนำเต ออ์นอะไลซังนำกูนาะ เอโพรนเวาปาย 11"โอย อังกอะก็จักซีเวาวิลลาะ นีายเอย ตัอจัองก็ไท ทำนาก็บอนซวนอะกี อังกอะซีญกออ์นไมเลย ซีออ์นกวยเทากวยปะแกด็างนำเต ปายอังกอะเต็มไจออ์นไมลึอะเลอ ออ์นไมเอดซบละกวยคองไมอะปัอะอะดอะโลด"
12เจออับราฮัมก็เคารบจุมกวยฮิดไทนาก็อัอดตีกีแอน 13เจอก็เวานึงเอโพรน ออ์นกูนาะตะมึงนำปาย "มีนยู ไมซีออ์นอังกอะซัง ๆ ฮักอังกอะอีแซกจัองนึงไม เพือซีออ์นอันปันกำมะซิดคองอังกอะเบิม ไมตายะออ์นอังกอะจิปันอันเตริว? เพืออังกอะซีเบินตาะดอนปีงคองมะเฮะ"
14เอโพรนเลิดเวาปาย 15"เออะ นีายเอย ค็านไมอีเบินก็เอด ฮักละกีาอันซีปันปราะ 400 เซเคน#23:15 ปราะ1เซเคนอันตัง16กรัม อะไน400เซเคนก็ปันปราะ6กิโล4คีด อะไลซีแต็ดเอด ซำไนซีตัอปันอันเตริวดักซำรับไมกับอังกอะ ออ์นไมเอดละกวยคองไมอะปัอะอะดอะโลด นึงทำบอนกะแตะอะกี"
16เจออับราฮัมก็ตกลงกับเอโพรน อันก็แต็ดปราะออ์นเอโพรน 400 เซเคน ตามละกีานาก็เอโพรนเวาอะดอะ ออ์นกวยเทากวยปะแกด็างนำอะกีออยะ แต็ดตามนำน็ากนาก็อะไลเกยตายะ 17เจออะไลก็โอนกะแตะซวนคองเอโพรน นาก็อัอดแต็ดกับกะแตะคองมัมเรอะกี เจอทำกับแก็ลอะลูองนาก็อัอดแทวกี อะไลก็โอนออ์นปันซิดคองอับราฮัมจนญิ 18อะไลโอนออ์นนังนึ ตอมัดกวยเทากวยปะแกนาก็อัอดมะนืยตีกี ออ์นอะไลด็างนำกูนาะ
19โอนเจออับราฮัมก็เอดซบคองละกวยอัน อะปัอะอะดอะนึงทำนาก็อัอดนึงซวนอะกี ตาะตามรีดนาก็อะไลเกยตาะ ทำมักเป-ลาอะกี อัอดยาฮมะนางลอฮคองกะแตะนาก็ปันคองมัมเร อัอดนึงกะแตะคานาอัน กะแตะแทวไนเบินแอนมูละมึฮปาย เฮโบรน 20ปันอังกิออยะ อับราฮัมจังเบินกะแตะตีไน ซวนกับทำนาก็อัอดมะนืยตีกี กวยฮิดไทก็โอนออ์นปันกำมะซิดคองอับราฮัม เพือซีออ์นอันตาะดอนปีงคองอัน
Currently Selected:
ปะทมมะกาน 23: Bru Bible
Highlight
Share
Copy
Want to have your highlights saved across all your devices? Sign up or sign in
- Ethnos360
