Mark 5

Iysanıń jin urǵan adamǵa shıpa beriwi

(Mat 8:28-34; Luk 8:26-39)

1Olar kóldiń arǵı jaǵasındaǵı gerasalılardıń úlkesine keldi. 2Iysa qayıqtan túsiwden-aq, Onıń qarsı aldınan qábirlerdiń arası menen kiyatırǵan jawız ruwxqa shalınǵan adam shıqtı. 3Bul adam qábirler arasında jasap júrgen bolıp, onı hesh kim shınjır menen de baylap qoya almaǵan edi. 4Neshe ret shınjırlasa da, kisenlese de, ol hár qashan shınjırlardı úzip, kisenlerdi sındırıp taslaytuǵın edi. Onı boysındırıwǵa hesh kimniń kúshi jetpeytuǵın edi. 5Ol kúni-túni qábirler arasında hám tawdıń eteklerinde baqırıp júrip, ózin taslar menen jaraqatlaytuǵın edi.

6Uzaqtan Iysanı kórgen ol juwırıp keldi de, ayaǵına jıǵılıp:

7– Quday Taalanıń Ulı – Iysa! Meniń menen ne jumısıń bar? Quday ushın ótinemen, meni qıynama! – dep qattı baqırdı.

8Óytkeni Iysa: «Háy, jawız ruwx, bul adamnan shıǵıp ket!» – degen edi.

9Sonda Iysa onnan:

– Atıń kim? – dep soradı.

Ol:

– Meniń atım Úlken topar, sebebi bizler kóppiz, – dedi 10hám ózlerin bul jerden basqa jaqqa jibermewin ótinip, Oǵan qattı jalındı.

11Sol jerdegi tawdıń eteginde úlken shoshqa padası jayılıp júrgen edi. 12Jawız ruwxlar Iysaǵa jalınıp:

– Bizlerdi sol shoshqalarǵa jiber, olarǵa kireyik, – dedi.

13Iysa olarǵa ruxsat etti. Sonda jawız ruwxlar sol adamnan shıǵıp, shoshqalarǵa kirdi hám eki mıńǵa shamalas shoshqa padası juwırısıp, tik jardan kólge tústi de, suwǵa batıp ketti.

14Shoshqa baǵıwshılar qashıp ketip, qala hám awıllarǵa bardı da, bolǵan waqıyanı aytıp berdi. Adamlar ne bolǵanın kóriw ushın keldi. 15Olar Iysanıń qasına barıp, burın úlken jin toparı urǵan adamnıń aqıl-esi kirip, kiyinip otırǵanın kórgende qorqıp qalıstı. 16Bolǵan waqıyanı kórgenler jin urǵan adamǵa hám shoshqalarǵa ne bolǵanın olarǵa aytıp berdi.

17Sonda adamlar Iysadan olardıń úlkesinen ketiwin ótine basladı.

18Iysa qayıqqa mingende, jinnen azat bolǵan adam Oǵan:

– Seniń menen birge barayın, – dep jalındı.

19Biraq Iysa oǵan ruxsat etpey:

– Úyińe, jaqınlarıńnıń qasına qayt, Iyemizdiń saǵan ne islegenin hám Onıń saǵan qanday miyrim-shápáát kórsetkenin olarǵa aytıp ber, – dedi.

20Ol adam sol jerden ketip, Iysanıń oǵan ne islegenin Dekapoliske barıp járiyalay basladı. Esitkenlerdiń hámmesi tań qalıstı.

Tirilgen qız hám shıpa tapqan hayal

(Mat 9:18-26; Luk 8:40-56)

21Iysa qayıq penen jáne arǵı jaǵaǵa ótkende, átirapına kóp adam jıynaldı. Ol jaǵada turǵanda, 22Yair atlı májilisxana basshılarınıń biri keldi. Ol Iysanı kórip, ayaǵına jıǵıldı da:

23– Kishkene qızım ólim tóseginde jatır. Sen kelip, onıń ústine qolıńdı qoy, ol shıpa tawıp, tiri qalsın! – dep qattı jalındı.

24Iysa onıń menen birge ketti. Izine kóp xalıq erip, tıǵılıstırıp júrdi.

25Sol jerde on eki jıldan beri qan ketip awırıp júrgen bir hayal bar edi. 26Ol talay shıpakerlerden kóp azap shekken edi hám pútkil mal-múlkin sarplaǵan bolsa da hesh shıpa tappay, awhalı burınǵısınan beter bolǵan edi. 27Hayal Iysa haqqında esitip, adamlardıń arası menen Onıń artına jaqınlap kelip, Onıń kiyimine qolın tiygizdi. 28Óytkeni ol ishinen: «Onıń kiyimine ǵana qolımdı tiygizsem, shıpa tabaman», – degen edi.

29Sol waqıtta-aq hayaldıń qan ketiwi toqtadı hám ol denesiniń shıpa tapqanın sezdi. 30Sonda Iysa Ózinen kúsh shıqqanın dárriw bilip, xalıqqa burıldı da:

– Meniń kiyimime kim qolın tiygizdi? – dep soradı.

31Shákirtleri Oǵan:

– Xalıqtıń Seni tıǵılıstırıp kiyatırǵanın kórip turıp, nege: «Meniń kiyimime kim qol tiygizdi», – dep soraysań? – dedi.

32Biraq Iysa bunı kim islegenin kóriw ushın, átirapına qaray basladı. 33Sonda ózine ne bolǵanın bilgen hayal qorqıp hám qaltırap, Onıń aldına keldi de, ayaǵına jıǵılıp, bar haqıyqattı aytıp berdi. 34Iysa oǵan:

– Qızım! Isenimiń seni qutqardı. Tınıshlıq penen bara ber, endi dártińnen azap shekpeyseń, – dedi.

35Ol ele usılardı aytıp turǵanda, májilisxana basshısınıń úyinen adamlar kelip:

– Qızıńız óldi. Endi nege Ustazdıń tınıshın alıp tursız? – dedi.

36Biraq Iysa bul sózlerdi esitse de, májilisxana basshısına:

– Qorqpa, tek isen, – dedi.

37Iysa Ózine Petr, Yaqıp hám onıń inisi Yuxannan basqa hesh kimniń eriwine ruxsat etpedi. 38Olar májilisxana basshısınıń úyine kelgende, dawıs shıǵarıp qattı jılap atırǵan adamlardı kórdi. 39Iysa ishke kirip:

– Nege qayǵırıp, jılap tursızlar? Qız ólgen joq, tek uyıqlap atır, – dedi.

40Olar Iysanıń ústinen kúldi. Biraq Ol hámmeni shıǵarıp jiberip, Ózi menen birge qızdıń ata-anasın hám shákirtlerin alıp, qız jatırǵan bólmege kirdi. 41Qızdıń qolınan uslap, oǵan:

– Talita kumi! – dedi. Bul: «Qızım, saǵan aytaman, túrgel», – degendi bildiredi.

42Qız dárriw ornınan turıp, júre basladı, onıń jası on ekide edi. Bunı kórgenler qattı tań qalıstı. 43Iysa olarǵa bul haqqında hesh kimge aytpawdı qatań buyırıp, qızǵa awqat beriwdi tapsırdı.

Currently Selected:

Mark 5: QrqMK22

Highlight

Copy