Luka 3

Shomıldırıwshı Yaqıyanıń wazı

(Mat 3:1-12; Mrk 1:1-8; Yuxn 1:19-28)

1Rim imperatorı Tiberiustıń húkimdarlıǵınıń on besinshi jılında Yahudiya úlkesinde Pontiy Pilat hákimlik qıldı. Galilanı Hirod, Itureya hám Traxonit úlkelerin onıń inisi Filip, Abilena úlkesin Lisaniyas basqardı. 2Al Xanna menen Kayafa bas ruwxaniy edi. Sonda shól dalada jasap atırǵan Zexariyanıń ulı Yaqıyaǵa Qudaydıń sózi tústi. 3Yaqıya Iordan átirapındaǵı barlıq úlkelerdi aralap, adamlarǵa gúnalarınıń keshiriliwi ushın táwbege keliwdi hám suwǵa shomıldırılıwdı#3:3 Suwǵa shomıldırıw – grek tilinde «baptizo». Bul rásim adamlardıń Qudaydıń aldında táwbe etip, taza ómirdi baslawınıń nıshanı. járiyalap júrdi. 4Bul Iyshaya payǵambardıń kitabında jazılǵan mına sózlerge tuwrı keledi:

«Shól dalada baqırǵan bir dawıs esitiledi:

Iyemizge jol tayarlańlar,

Onıń júretuǵın jolların dúzetińler!

5Barlıq oypatlıqlar toltırılsın,

Taw-tóbeler páske shóksin,

Qıysıq jollar dúzetilsin,

Budır jerler tegislensin.

6Sonda pútkil adamzat Qudaydıń qutqaratuǵının kóredi»#3:4-6 Iysh 40:3-5..

7Yaqıya shomıldırılıwǵa kelgen alamanǵa bılay dedi:

– Háy, uwlı jılanlardıń tuqımları! Keleshektegi qáhárli jazadan qutılıwdı sizlerge kim úyretti? 8Eger sizler táwbe etken bolsańlar, buǵan ılayıq jemis berińler! Jáne: «Ata tegimiz Ibrayım ata-ǵo», – dep ishlerińizden oylamańlar. Sizlerge aytatuǵınım: Quday Ibrayımǵa mına taslardan da urpaq jasap bere aladı. 9Tereklerdiń tamırında házirdiń ózinde-aq balta jatır. Jaqsı miywe bermeytuǵın hár bir terek shabılıp, otqa taslanadı.

10Sonda xalıq onnan:

– Olay bolsa, bizler ne islewimiz kerek? – dep soradı.

11Yaqıya olarǵa:

– Kimniń eki kiyimi bolsa, birewin kiyimi joqqa bersin. Kimniń awqatı bolsa, ol da solay islesin, – dep juwap berdi.

12Salıqshılar da shomıldırılıw ushın kelip, Yaqıyadan:

– Ustaz, bizler ne islewimiz kerek? – dep soradı.

13Yaqıya olarǵa:

– Belgilengeninen artıq talap etpeńler, – dedi.

14Áskerler de onnan:

– Al bizler ne islewimiz kerek? – dep soradı.

Yaqıya olarǵa:

– Hesh kimdi tonamańlar, hesh kimge jala jappańlar, óz is haqıńızǵa qanaat etińler, – dedi.

15Úmit etip kútip turǵan xalıqtıń hámmesi Yaqıya tuwralı ishlerinen:

– Bul Masiyx emes pe eken? – dep oyladı.

16Yaqıya hámmesine juwap berip:

– Men sizlerdi suw menen shomıldıraman, biraq mennen keyin qúdiretli Birew kiyatır. Men Onıń ayaq kiyiminiń bawın sheshiwge de ılayıqlı emespen. Ol sizlerdi Muxaddes Ruwx hám ot penen shomıldıradı. 17Onıń jabası qolında. Ol Óz qırmanın tazalap, biydayın ǵállexanasına jıynaydı, al sabanın sónbes otqa jandıradı, – dedi.

18Yaqıya xalıqqa basqa da kóp eskertiwler berip, Xosh Xabardı járiyalap júrdi. 19Úlke húkimdarı Hirod óz inisiniń hayalı Hirodiyaǵa úylengenligi sebepli hám basqa da barlıq jaman isleri ushın, Yaqıya tárepinen áshkara etilgen edi. 20Hirod Yaqıyanı qamatıp taslap, óziniń burınǵı islegen jamanlıqlarına jáne bir jamanlıq qostı.

Iysanıń shomıldırılıwı

(Mat 3:13-17; Mrk 1:9-11)

21Pútkil xalıq shomıldırılǵanda, Iysa da shomıldırıldı. Ol duwa etkende aspan ashılıp, 22Muxaddes Ruwx kepter pishininde Onıń ústine tústi. Sonda aspannan:

– Sen – Meniń súyikli Ulımsań, Men Saǵan ırzaman!#3:22 Zab 2:7; Iysh 42:1. – degen saza esitildi.

Iysanıń shejiresi

(Mat 1:1-17)

23Iysa Óz xızmetin baslaǵanda otızlar shamasında edi. Adamlar Onı Yusuptiń ulı sıpatında tanıytuǵın edi. Al Yusup Eliy ulı, 24Eliy Mattat ulı, Mattat Lebiy ulı, Lebiy Malkiy ulı, Malkiy Yannay ulı, Yannay Yusup ulı, 25Yusup Mattatiya ulı, Mattatiya Amos ulı, Amos Naxum ulı, Naxum Hesliy ulı, Hesliy Naggay ulı, Naggay 26Maxat ulı, Maxat Mattatiya ulı, Mattatiya Shimey ulı, Shimey Yusex ulı, Yusex Yuda ulı, 27Yuda Yuxanan ulı, Yuxanan Resha ulı, Resha Zerubbabel ulı, Zerubbabel Shealtiel ulı, Shealtiel Neriy ulı, 28Neriy Malkiy ulı, Malkiy Addiy ulı, Addiy Qosam ulı, Qosam Elmadam ulı, Elmadam Er ulı, 29Er Eshua ulı, Eshua Eliezer ulı, Eliezer Iorım ulı, Iorım Mattat ulı, Mattat Lebiy ulı, 30Lebiy Shimon ulı, Shimon Yahuda ulı, Yahuda Yusup ulı, Yusup Ionam ulı, Ionam Elyakim ulı, 31Elyakim Melea ulı, Melea Menna ulı, Menna Mattata ulı, Mattata Natan ulı, Natan Dawıt ulı, 32Dawıt Ishay ulı, Ishay Obid ulı, Obid Boaz ulı, Boaz Sala ulı, Sala Naxshon ulı, 33Naxshon Amminadab ulı, Amminadab Ram ulı, Ram Xesron ulı, Xesron Peres ulı, Peres Yahuda ulı, 34Yahuda Yaqıp ulı, Yaqıp Ísaq ulı, Ísaq Ibrayım ulı, Ibrayım Terax ulı, Terax Naxor ulı, 35Naxor Serug ulı, Serug Reu ulı, Reu Peleg ulı, Peleg Eber ulı, Eber Sala ulı, 36Sala Kenan ulı, Kenan Arpaxshad ulı, Arpaxshad Sam ulı, Sam Nux ulı, Nux Lamex ulı, 37Lamex Metushelax ulı, Metushelax Enox ulı, Enox Ered ulı, Ered Mahalalel ulı, Mahalalel Kenan ulı, 38Kenan Enosh ulı, Enosh Shet ulı, Shet Adam-ata ulı, al Adam-ata Quday ulı.

Currently Selected:

Luka 3: QrqMK22

Highlight

Copy