Luka 17
17
Keshirim, isenim hám xızmet
(Mat 18:6-7, 21-22; Mrk 9:42)
1Iysa Óz shákirtlerine jáne bılay dedi:
– Adamlardı gúnaǵa azǵırıwshı nárselerdiń keliwi sózsiz. Biraq olar kim arqalı kelse, sol adam hásiret shegedi! 2Ol adamnıń mına kishkenelerdiń birewin azǵırǵanınan góre, moynına digirman tası baylanıp, teńizge taslanǵanı oǵan jaqsıraq bolar edi. 3Abaylı bolıńlar! Eger tuwısqanıń saǵan qarsı gúna islese, oǵan eskertiw jasa. Eger gúnasın moyınlasa, onı keshir. 4Eger ol saǵan qarsı bir kúnniń ishinde jeti ret gúna islese, jeti ret te saǵan kelip: «Gúnamdı moyınlayman» dese, onı keshir.
5Sonda elshiler Iyemizge:
– Isenimimizdi arttır, – dedi.
6Iyemiz bılay dedi:
– Eger isenimińiz qıshqıl tuqımınday ǵana bolsa da, bul tut aǵashına: «Tamırıń menen qoparılıp, teńizge otırǵızıl», – deseńler, ol sózińizdi tıńlaydı.
7Arańızda qaysı birińiz jer aydap yamasa mal baǵıp júrgen xızmetshińiz daladan qaytqanda, oǵan: «Tez kelip, dasturxanǵa otır», – deysiz? 8Kerisinshe, oǵan: «Meniń keshki awqatımdı tayarla, belińdi buwıp, iship-jep bolǵanımsha, maǵan xızmet et. Sońınan óziń iship-jeyseń», – dep aytpaysız ba? 9Buyırǵanın orınlaǵanı ushın xızmetshisine minnetdarshılıq bildirer me eken? 10Sol sıyaqlı sizler de ózlerińizge buyırılǵannıń hámmesin orınlaǵannan soń: «Bizler arzımaytuǵın qullarmız, tek wazıypamızdı ǵana orınladıq», – deńler.
Teri keselligine shalınǵan on adam
11Iysa Erusalimge baratırıp, Samariya hám Galila úlkeleri arasındaǵı shegara jerler arqalı júrdi. 12Ol bir awılǵa kirip kiyatırǵanda teri keselligine shalınǵan on adam gezlesti. Olar uzaqta turıp, 13qattı dawıslap:
– Ustazımız Iysa, bizlerge rehim et! – dedi.
14Iysa olardı kórip:
– Barıp, ózlerińizdi ruwxaniylerge kórsetińler, – dedi.
Olar ketip baratırǵanda teri keselliginen jazılıp ketti. 15Olardıń ishindegi birewi óziniń shıpa tapqanın kórip, bálent dawıs penen Qudaydı alǵıslap, qaytıp keldi de, 16Iysanıń ayaǵına jıǵılıp, Oǵan minnetdarshılıq bildirdi. Bul adam samariyalı edi. 17Sonda Iysa:
– Shıpa tapqan on adam emes pe edi? Qalǵan toǵızı qayaqta? 18Qudayǵa alǵıs aytıw ushın, mına shet elliden basqa hesh kim qaytıp kelmedi me? – dedi.
19Soń oǵan:
– Ornıńnan tur da, kete ber, isenimiń seni qutqardı, – dedi.
Qudaydıń Patshalıǵınıń keliwi
(Mat 24:23-28, 37-41)
20Pariseyler Qudaydıń Patshalıǵınıń qashan keletuǵının soraǵanda, Iysa olarǵa bılay dep juwap berdi:
– Qudaydıń Patshalıǵı kózge kórinip kelmeydi. 21«Mine, bul jerde» yamasa «Áne, ana jerde» dep te aytpaydı. Sebebi Qudaydıń Patshalıǵı sizlerdiń arańızda, – dedi.
22Soń Iysa shákirtlerine bılay dedi:
– Adam Ulınıń kúnleriniń birin bolsa da kóriwdi ańsaytuǵın waqıtlarıńız keledi. Biraq, kóre almaysızlar. 23Sizlerge: «Áne, Ol ana jerde» yamasa «Mine, Ol bul jerde» dese, barmańlar, olardıń izlerine ermeńler. 24Óytkeni shaqmaq shaǵıp, aspandı bir shetinen ekinshi shetine deyin jarqıratıp jibergendey, Adam Ulı da Óz kúninde solay payda boladı. 25Biraq dáslep Ol kóp azap shegip, bul áwlad tárepinen qabıllanbawı tiyis.
26Nuxtıń zamanında qalay bolǵan bolsa, Adam Ulınıń kúnlerinde de solay boladı. 27Nux kemege mingen kúnge deyin adamlar iship-jedi, úylendi, turmısqa shıqtı. Sońınan topan suwı basıp, hámmeni nabıt qıldı#17:27 Jar 6:5–7:1.. 28Luttıń zamanında da sonday boldı: adamlar iship-jedi, sawda-satıq isledi, egin ekti, jay saldı. 29Biraq, Lut Sodom qalasınan shıqqan kúni aspannan ot hám kúkirt jawıp, hámmeni nabıt qıldı#17:28-29 Jar 19:1-29.. 30Adam Ulı payda bolatuǵın kúni de tap sonday boladı.
31Sol kúni tamnıń tóbesinde bolǵan adamnıń zatları úyinde qalsa, olardı alıw ushın tómenge túspesin. Kim de kim atızda bolsa, izine qaytpasın. 32Luttıń hayalın#17:32 Jar 19:23-26. eske túsirińler! 33Kim de kim óz janın saqlamaqshı bolsa, onı nabıt qıladı, al kim de kim óz janın nabıt qılsa, onı saqlaydı. 34Sizlerge aytatuǵınım: sol túni bir tósekte jatırǵan eki adamnıń birewi alınadı, ekinshisi qaldırıladı. 35Birge digirman tartqan eki hayaldıń birewi alınadı, ekinshisi qaldırıladı. [36#Luk 17:36 Bazı qoljazbalarda 36-ayat ta bar: «Eki adam atızda bolsa, birewi alınıp, ekinshisi qaldırıladı».]
37Sonda shákirtleri Iysadan:
– Iyem, bul waqıyalar qay jerde boladı, – dep soradı.
Iysa olarǵa:
– Ólik qay jerde bolsa, quzǵınlar da sol jerge jıynaladı, – dedi.
Currently Selected:
Luka 17: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
