Yuxan 17

Iysanıń duwası

1Iysa bul sózlerdi aytıp bolǵannan soń, kózlerin aspanǵa tigip bılay dedi:

– Áke, waqıt keldi. Ulıń Seni ullılawı ushın, Sen de Ulıńdı ullıla. 2Sebebi Seniń Oǵan bergen adamlarıńnıń hámmesine Ol máńgilik ómir bersin dep, Sen Oǵan pútkil adamzat ústinen biylik berdiń. 3Máńgilik ómir – bul Seni, jalǵız haq Qudaydı hám Sen jibergen Iysa Masiyxtı biliw. 4Seniń Maǵan tapsırǵan isińdi tamamlaǵanım menen, Seni jer júzinde ullıladım. 5Áke, dúnya jaratılmastan burın Seniń menen birge bolǵanımda, Mende bolǵan ullılıq penen házir Meni Ózińniń aldıńda ullıla.

6Seniń Maǵan dúnyadan bergen adamlarıńa Seniń atıńdı tanıttım. Olar Seniki edi, Sen olardı Maǵan berdiń hám olar Seniń sózlerińdi orınladı. 7Seniń Maǵan bergen nárselerińniń hámmesi Sennen ekenin olar endi bilip aldı. 8Óytkeni Maǵan bergen sózlerińdi olarǵa tapsırdım, olar qabıl etti. Olar Meniń Sennen kelgenimdi haqıyqattan bildi hám Meni Seniń jibergenińe isendi. 9Olar ushın sorayman: dúnya ushın emes, Maǵan bergen adamlarıń ushın sorayman. Sebebi olar Seniki. 10Menikiniń hámmesi – Seniki hám Senikiniń hámmesi – Meniki. Men olar arqalı ullılandım. 11Men endi bul dúnyada emespen, biraq olar bul dúnyada. Men Saǵan baratırman, Muxaddes Áke, Maǵan bergen Óz atıńnıń kúshi menen olardı saqla#Yuxn 17:11 Maǵan bergen Óz atıńnıń kúshi menen olardı saqla – Bazı qoljazbalarda: «Óz atıńnıń kúshi menen Maǵan bergenlerińdi saqla»., olar da Biz sıyaqlı bir bolsın. 12Men olar menen birge bolǵanımda, Seniń Maǵan bergen atıńnıń kúshi menen olardı qorǵap saqladım#Yuxn 17:12 Seniń Maǵan bergen atıńnıń kúshi menen olardı qorǵap saqladım – Bazı qoljazbalarda: «…atıńnıń kúshi menen olardı qorǵadım. Maǵan bergenlerińdi saqladım».. Nabıt bolıwǵa tiyisli adamnan basqa olardan hesh biri nabıt bolmadı. Solay etip, Muxaddes Jazıw orınlandı.

13Endi Men Saǵan baratırman. Meniń quwanıshım olarda tolı bolıwı ushın, bul sózlerdi dúnyada bolǵan waqtımda aytıp atırman. 14Men olarǵa Seniń sózińdi tapsırdım, dúnya bolsa olardı jek kórdi. Óytkeni Meniń dúnyaǵa tiyisli bolmaǵanım sıyaqlı, olar da dúnyaǵa tiyisli emes. 15Olardı dúnyadan alıwıńdı emes, shaytannan saqlawıńdı sorayman. 16Meniń dúnyaǵa tiyisli bolmaǵanım sıyaqlı, olar da dúnyaǵa tiyisli emes. 17Olardı haqıyqat penen muxaddes qıl. Seniń sóziń – haqıyqat. 18Seniń Meni dúnyaǵa jibergeniń sıyaqlı, Men de olardı dúnyaǵa jiberdim. 19Olar da haqıyqat penen muxaddes bolıwı ushın, Men Ózimdi olar ushın baǵıshlayman.

20Men tek olar ushın emes, al olardıń sózleri arqalı Maǵan isenetuǵınlar ushın da sorayman: 21olardıń hámmesi bir bolsın. Áke, Meni Seniń jibergenińe dúnya iseniwi ushın, Seniń Mende hám Meniń Sende bolǵanım sıyaqlı, olar da Bizde bolsın. 22Biz bir bolǵanımız sıyaqlı, olar da bir bolıwı ushın, Seniń Maǵan bergen ullılıǵıńdı olarǵa berdim. 23Men olarda, Sen Mendeseń. Meni Seniń jibergenińdi, sonday-aq Seniń Meni súyetuǵınıń sıyaqlı, olardı da súyetuǵınıńdı dúnya biliwi ushın, olar da bir tutas bolsın.

24Áke! Seniń Maǵan bergen adamlarıń Men bolatuǵın jerde Meniń menen birge bolıwın hám Sen Meni dúnya jaratılmastan burın súygenlikten, Seniń Maǵan bergen ullılıǵıńdı olardıń da kóriwin qáleymen.

25Ádil Áke! Dúnya Seni bilmeydi, biraq Men Seni bilemen. Bular da Meni Seniń jibergenińdi biledi. 26Maǵan degen súyispenshiligiń olarda bolıwı ushın hám Men de olarda bolıwım ushın, Seniń atıńdı olarǵa bildirdim hám bildiriwdi dawam etemen.

Currently Selected:

Yuxan 17: QrqMK22

Highlight

Copy