Yuxan 16

1– Men bulardı sizlerge azǵırılmawıńız ushın ayttım. 2Sizlerdi májilisxanadan quwıp jiberedi. Hátte, sizlerdi óltirip atırǵan hár bir adam bunıń menen Qudayǵa xızmet etip atırman, dep oylaytuǵın waqıt keledi. 3Bulardı Ákemdi de, Meni de bilmegenlikten isleydi. 4Sol waqıt kelgende bular tuwralı sizlerge aytqanımdı eske túsiriwińiz ushın, sizlerge bildirgen edim. Áwelden sizlerge bulardı aytqan joqpan, sebebi Men sizler menen birge edim.

Muxaddes Ruwxtıń isi

5– Endi bolsa, Meni Jibergenniń janına baratırman. Degen menen, arańızda hesh kim Mennen: «Qayaqqa baratırsań?» – dep sorap atırǵan joq. 6Biraq sizlerge bulardı aytqanım ushın, júregińiz qayǵıǵa toldı. 7Soǵan qaramastan, Men sizlerge haqıyqatın aytaman: Meniń ketkenim sizler ushın jaqsıraq. Eger Men ketpesem, sizlerge Jaqlawshı kelmeydi. Eger ketsem, Onı sizlerge jiberemen. 8Ol kelgende, dúnyaǵa gúnanıń, haqlıqtıń hám húkimniń ne ekenin ashıp beredi. 9Gúna sonnan ibarat: adamlar Maǵan isenbeydi. 10Haqlıq sonnan ibarat: Men Ákemniń janına ketip baratırman hám endi qaytıp Meni kórmeysizler. 11Húkim sonnan ibarat: bul dúnyanıń hákimi húkim etildi.

12Sizlerge jáne de aytatuǵınlarım kóp, biraq házir sizler kótere almaysızlar. 13Biraq Ol, yaǵnıy Haqıyqat Ruwxı kelgende, sizlerdi tolıq haqıyqatqa qaray jeteleydi. Ol Ózliginen sóylemeydi, tek neni esitse, sonı sóyleydi hám keleshekte ne bolatuǵının sizlerge bildiredi. 14Ol Meni ullılaydı. Óytkeni Ol Menikinen alıp, sizlerge bildiredi. 15Ákemde ne bar bolsa, hámmesi Meniki. Sonlıqtan: «Ol Menikinen alıp, sizlerge bildiredi», – degen edim.

16Birazdan soń, sizler Meni artıq kórmeysizler. Jáne birazdan soń, Meni qaytadan kóresizler#Yuxn 16:16 Bazı qoljazbalarda mına sózler de bar: «Sebebi Men Ákemniń aldına baratırman»..

Qayǵıńız quwanıshqa aylanadı

17Sonda shákirtlerdiń geybirewleri bir-birine:

– «Birazdan soń, sizler Meni artıq kórmeysizler, jáne birazdan soń, Meni qaytadan kóresizler» hám «Sebebi Ákeme ketip baratırman», – dep aytıp, Ol bizlerge ne demekshi? 18«Birazdan soń» degeni ne? Ne aytqanına túsinbey atırmız, – dedi.

19Iysa olardıń Ózine bir soraw bermekshi bolǵanın bilip, olarǵa bılay dedi:

– «Birazdan soń, Meni kórmeysizler, jáne birazdan soń, Meni kóresizler», – degenim haqqında bir-birińizden sorap tursızlar ma? 20Sizlerge shının, haqıyqatın aytaman: sizler jılap, aza tutasızlar, al dúnya quwanadı. Sizler qayǵırasızlar, biraq qayǵıńız quwanıshqa aylanadı. 21Hayal bala tuwǵanda azap shegedi, óytkeni onıń waqtı keldi. Biraq balasın tuwǵannan soń, dúnyaǵa adam kelgenlikten quwanıp, shekken azabın umıtıp ketedi. 22Sol sıyaqlı, sizler de házir qayǵırıp atırsızlar. Biraq Men sizlerdi jáne kóremen hám júregińiz quwanıshqa toladı. Bul quwanıshtı sizlerden hesh kim tartıp ala almaydı. 23Sol kúni Mennen hesh nárse soramaysızlar. Sizlerge shının, haqıyqatın aytaman: Meniń atım menen Ákemnen ne sorasańlar da, Ol sizlerge beredi. 24Házirge deyin sizler Meniń atım menen hesh nárse soramadıńlar. Sorańlar, alasızlar, sonda quwanıshıńız tolı boladı.

25Sizlerge bulardı tımsallar menen ayttım. Biraq Men sizlerge tımsallar menen sóylemeytuǵın waqıt keledi, sonda Ákem haqqında sizlerge ashıqtan-ashıq aytaman. 26Sol kúni Meniń atım menen Ákemnen soraysızlar. Sizler ushın Ákemnen Men sorayman, dep atırǵanım joq. 27Ákemniń Ózi sizlerdi súyedi, sebebi sizler Meni súyip, Meniń Ákemnen kelgenime isendińler. 28Men Ákemnen shıǵıp, dúnyaǵa keldim. Endi dúnyanı qaldırıp, Ákeme qaytıp baratırman.

29Shákirtleri Iysaǵa:

– Mine, endi ashıq aytıp tursań, hesh tımsal qollanıp atırǵan joqsań. 30Seniń hámme nárseni, hátte, bizlerdiń endi soramaqshı bolǵanımızdı da biletuǵınıńdı bilemiz. Sonlıqtan Seniń Qudaydan kelgenińe isenemiz, – dedi.

31Iysa olarǵa juwap berip bılay dedi:

– Endi isenesizler me? 32Mine, hámmeńiz úylerińizge tarqap ketip, Meni jalǵız qaldıratuǵın waqtıńız keledi, ol kelip qaldı da. Biraq Men jalǵız emespen, óytkeni Ákem Meniń menen birge.

33Bulardı sizlerge Mende bolıp, tınıshlıq alıwıńız ushın ayttım. Bul dúnyada qıyınshılıq kóresizler, biraq márt bolıńlar, Men dúnyanı jeńdim!

Currently Selected:

Yuxan 16: QrqMK22

Highlight

Copy