Elshiler 1

Iysanıń aspanǵa alınıwı

1-2Húrmetli Teofil!

Men birinshi kitabımda Iysanıń islegen isleri hám úyretiwge kiriskeninen baslap, Ózi tańlaǵan elshilerine Muxaddes Ruwx arqalı buyrıqlar bergennen soń, aspanǵa alınǵan kúnine deyin bolǵan waqıyalardıń hámmesin jazǵan edim. 3Ol azap shegip ólgennen keyin, kóp isenimli dáliller menen elshilerge Óziniń qayta tirilgenin kórsetti. Qırıq kún dawamında olarǵa kórinip, Qudaydıń Patshalıǵına baylanıslı nárseler haqqında ayttı. 4Olar menen birge bolǵanda mına buyrıqtı berdi:

– Erusalimnen ketip qalmańlar. Al ózlerińiz Mennen esitken Ákemniń wádesiniń orınlanıwın kútińler. 5Sebebi Yaqıya suw menen shomıldırǵan edi, biraq sizler kóp kún ótpey Muxaddes Ruwx penen shomıldırılasızlar.

6Elshiler birge jıynalǵanda, Iysadan bılay dep soradı:

– Iyem, Izrailǵa patshalıqtı házir qaytarıp berejaqsań ba?

7Iysa olarǵa:

– Ákeniń Óz biyligi menen belgilep qoyǵan waqıt-máhállerin biliw sizlerge berilmegen. 8Biraq sizlerge Muxaddes Ruwx túskende kúsh-quwat alasızlar hám Erusalimde, pútkil Yahudiyada, Samariyada, hátte, dúnyanıń shetine deyin Meniń gúwalarım bolasızlar, – dedi.

9Iysa usılardı aytıp bolıp, olardıń kóz aldında aspanǵa alındı. Onı bir bult qaplap, olardıń názerinen uzaqlastırdı.

10Iysa kóterilip baratırǵanda, olar kózlerin aspanǵa tigip turǵan edi. Birden olardıń qasında aq kiyimli eki adam payda bolıp:

11– Háy, galilalılar, nege aspanǵa qarap tursızlar? Sizlerden aspanǵa alınǵan bul Iysanıń qalay kóterilgenin kórgenińizdey, Ol anıq solay qaytıp keledi, – dedi.

Matiyastıń Yahudanıń ornına saylanıwı

12Bunnan soń, elshiler Záytún tawı dep atalǵan tawdan Erusalimge qaytıp keldi. Bul taw Erusalimge jaqın bolıp, bir shaqırımday#1:12 Bir shaqırımday – sózbe-sóz: bir Shabbat kúnlik jol. Yahudiylerdiń diniy dástúri boyınsha, Shabbat kúni basıp ótiwge ruxsat etilgen aralıq. jerde jaylasqan edi. 13Qalaǵa kirip, ózleri bolıp atırǵan úydiń joqarǵı qabatına kóterildi. Olar: Petr, Yuxan, Yaqıp, Andrey, Filip, Tomas, Bartolomey, Matta, Alpeydiń ulı Yaqıp, watansúyer Shimon hám Yaqıp ulı Yahuda edi. 14Bulardıń hámmesi hayal-qızlar, Iysanıń anası Máriyam hám Onıń tuwısqanları menen birlikte úzliksiz duwa etetuǵın edi.

15Sol kúnlerdiń birinde jıynalǵan bir júz jigirmaǵa shamalas iseniwshilerdiń arasınan Petr ornınan turıp bılay dedi:

16– Tuwısqanlarım! Iysanı uslap alǵanlarǵa jolbasshılıq etken Yahuda haqqında Muxaddes Ruwxtıń Dawıt arqalı áwelden bildirgen Muxaddes Jazıwı orınlanıwı kerek edi. 17Yahuda da bizlerdiń birimiz bolıp, usı xızmetten úlesin alǵan edi.

18Bul adam óz qılmısınıń haqısına bir egislik jer satıp aldı. Ol sol jerde et betinen jıǵılıp, qarnı jarıldı hám barlıq ishekleri aqtarıldı. 19Bul waqıya Erusalim turǵınlarınıń hámmesine málim boldı. Sonlıqtan sol egislik jer olardıń tilinde «Xakeldama» dep atalıp, bul atama «Qan jeri» degen mánisti ańlatadı.

20Óytkeni Zaburda:

«Onıń mákanı qańırap qalsın,

Shatırlarında jasawshı bolmasın»#1:20 Zab 68:26..

Jáne de:

«Onıń isleytuǵın wazıypasın basqa birew iyelesin»#1:20 Zab 108:8., – dep jazılǵan.

21-22Sonlıqtan onıń ornın iyeleytuǵın adam Iyemiz Iysa bizler menen birge bolǵanda, yaǵnıy Yaqıyanıń suwǵa shomıldırıwınan#1:21-22 Suwǵa shomıldırıw – grek tilinde «baptizo». Bul rásim adamlardıń Qudaydıń aldında táwbe etip, taza ómirdi baslawınıń nıshanı. baslap, Iysanıń aspanǵa alınǵan kúnine deyin, bárqulla bizlerdiń aramızda bolǵan adamlardıń biri bolıwı kerek. Ol Iysanıń qayta tirilgenine bizler menen birge gúwa bolıwı tiyis.

23Solay etip, eki adam: laqabı Yustus bolǵan Barsabba dep atalatuǵın Yusup hám Matiyas usınıldı. 24-25Sońınan olar bılay dep duwa etti:

– O, Iyemiz, Sen hár bir adamnıń kewlin bileseń. Usı eki adamnıń qaysısın elshilik xızmetine tańlaǵanıńdı bizlerge kórset. Al Yahuda bul xızmetti taslap, ózine ılayıqlı jerge ketti.

26Olar ekewine shek taslaǵanda, shek Matiyasqa tústi. Solay etip, ol on bir elshiniń qatarına qosıldı.

Currently Selected:

Elshiler 1: QrqMK22

Highlight

Copy