Wikhikən 21

1Akimte yohtəl kekwseyal X Sesohs apc limesoweləso notəkehkimacihi kwihiw. Tayipiliyəs osopekwəm. Yot elimesoweləsit.

2Mawiyoltowək Simo Piyel, Toma tan liwiso Təkwehs, Nahtaniyel Cehnek Koliletk 'cey, Sepəti nisowokwos, nisokətəkili notəkehkimacihi.

3Simo Piyel 'tiya: Nacinəmesok. 'Tiyawal: Nilon na wiciyewoləpən. Nomaciyapasiniya, tepesoltowək slopək, nit pemitpokak kətama kekw nepatowiyək.

4Kenok ehcehkwak Sesohs sehke pemamkikak; kenok notəkehkimocik skat okəcicihawiwal Osesoswilin.

5Nit tehc Sesohs 'tiya: Wasistək, ktiyeniya kekwse micasik? 'Tasitemawal, Kətama.

6'Tiya: Licowahpehlok ahp inahkatok slopək, kməskəməniyac. Nit tehc cowalpelatit, təkec otalowitepehlawal kesiptəhoket nəmes.

7Nit tehc nət notəkehkimot tan Sesohs kiselmacil 'tiyal Piyeləl: Ksakəmamowa nət. Nit tehc Simo Piyel notəmat 'Sakəmamowal, onasehton otəpskwəns, ipəcəl emesəkew, cowapeləso sopekwok.

8Kətəkik notəkehkimocik həkwahiyək əpəsolkwahmək, ipəcəl skat opihcehkatəmoniya kətakəmikw, tamahal nesatkw wawskwonək, opeci sawpekholawal apiyəl psənpowəl nəmesək.

9Nit tehc kisi natəkiyapasihtit onəmihtoniya skwətlosekətiyəl, nəmestesakwiw ələsin, həpan.

10Sesohs 'tiya: Ckowiphok ankwəc nəmesək tanik təkec neypəheykwik.

11Simo Piyel tepeso okapətiyackwimal apiyəl psənpowəl kci nəmes nkotatkw cel naninsk cel nihi; kesitpən kətama, səkwoskesiw ahp.

12Sesohs 'tiya, Ckowapasikw, spasihpoltikw. Kətama wen nit notəkehkimocik opeci kinapeyiwən opapehciman 'tiyawal, Wen kil? Ipəcəl okəcicihawal 'Sakəmamowal.

13Sesohs pəkəcihe wikwehlal həpanəl omilan, naka nəmese.

14Yot təkec nohowewe elimesoweləsit Sesohs tanihi wetəkehkimacihi ohəkewak kisiwcinəmcesit npowakənək, kisi apicipet.

15Nit tehc kisihpoltihtit Sesohs 'tiyal Simo Piyeləl: Simo, Sona 'kwəssəl, kpiyemikselmi skatək yoktək? 'Tiyal: Aha Nsakəmam, kəcicihton kəmosalən. 'Tiyal: Səmam ntəsihpihsəmək.

16Apc 'tiyal nisewe: Simo, Sona 'kwəssəl, kəselmi? 'Tiyal: Aha, Nsakəmam kəcicihton kəmosalən. 'Tiyal: Ankewonan ntəsihpəmək.

17Nohowewe 'tiyal: Simo, Sona 'kwəssəl, kəselmi? Piyel osikeltəm ipəcəl otihokon nohowewe Kəselmi? 'Tiyal: Nsakəmam, kənəkacicitonəl msiw kekwsal; kəcicihton kəmosalən, Sesohs 'tiyal: Səman ntəsipisəmək.

18Leyo, iyalol, ewasiswiyən, kəspilsihpən kpəmihapən tan eliyolitəhatəmən. Kenok kci wskicinowihayən, ksowiptinesəc, kətəkc kəspiləkw, təliphəlkwc tan skatəc welitəhatəmowən.

19Yot weci itəkəpən onəstohmən tan el ikək npowakən Piyel keti ocikcitəm itəhamat Kelowəsitəl. Kisi itək yot 'tiyal: Nosokowin!

20Piyel kwelpikapowesit onəmiyal nihtəl notəkehkimocil tanəl Sesohs mosalacil, onosokowal, tanil naka welakwihpoltimk esitkwesikpənil opəskonək, itəmopən: Nsakəmam, tan wət nət tan ketowi kinowehləsk?

21Piyel nemihat 'tiyal Sesohsəl: Nsakəmam, kekwseyəc wət skitap əloke?

22Sesohs 'tiyal: Nil əliwolitəhatəman otiyin təkkiw pəkəcihayan, tama kowawcihokon kil? Kil nosokowin nil.

23Nit tehc yot kəlosowakən weci macesisahak wicikitolticik ohəkewak nət notəkehkimot skatəp omecinawən. Sesohs skat 'tiyal, Wipənil skat omecinawən; kenok: Liwolitəhatəman otiyin təkkiw pəkəcihayan, tama kawawcihokon kil?

24Wət nət notəkehkimot tan nespiwolamatək yohtəl kekwsal, okiswikhəmənepənil yohtəl kekwsal, nkəcicihtonen onəspiw olamewakən əlihe.

25Naka ktanakətol kətəkil kekwsal tanil Sesohs kisehtakwpənil; wikhasikəp ehtasiw, ntəlitəhatəmən skitkəmikw celəp skat onəkanəmonəl wikhikənəl tanil ewikhasikilp. Amin.

Currently Selected:

Wikhikən 21: PQM2014

Highlight

Copy