ꓟ˗ꓗꓴ ꓟꓮꓴ ꓢꓮꓴ 10
10
ꓬꓥ ꓟꓲ ꓬꓥ ꓡꓥ ꓮ ꓪꓳ ꓖꓥ
1ꓧꓮꓴ ꓟꓮꓲ ꓬꓥ ꓕꓳ ꓡꓳ ꓡꓪꓲ꓾ ꓬꓴ˗ꓓ ꓟꓶꓥ ꓗꓬꓳ ꓰ ꓬꓳ˗ꓓꓠ ꓡꓥ ꓧꓰ ꓒꓳ ꓫꓴꓔ ꓰ ꓙꓰ ꓰ ꓥꓴꓔ ꓟꓴ꓾ ꓐꓬꓴ ꓣ ꓙꓴꓟ ꓣ ꓪꓲ ꓬꓥ ꓚꓥ ꓫꓴꓔ ꓓꓴꓟ ꓡꓰ ꓟꓶꓥ ꓗꓳ ꓰ ꓬꓠ ꓟꓮꓲ꓾ ꓬꓥ ꓰ ꓡꓲ ꓰ ꓣ ꓙꓴꓥ ꓜ ꓬꓥ ꓟꓳ ꓡꓰ ꓓꓴꓟ ꓠꓬꓳ ꓟꓳ ꓐꓲ ꓰ꓿ 2ꓧꓮꓴ ꓘꓴꓠ ꓒ˗ꓣꓲ˗ꓫꓰ ꓑꓰ ꓙꓰ ꓡꓰ ꓡꓪꓲ꓾ ꓬꓥ ꓡꓰ ꓚꓟ ꓪꓴ ꓴ ꓚꓥ꓾ ꓐꓬꓴ ꓖꓶ ꓬꓴꓟ ꓢꓶꓥ ꓰ ꓬꓥ ꓟꓲ ꓡꓰ ꓓꓴ ꓑꓬꓟ ꓡꓰ ꓖꓰ ꓡꓰ ꓡꓴ꓾ ꓖ ꓡꓪꓲ꓾ ꓬꓥ ꓡꓰ ꓟꓲ ꓗꓳ ꓰ꓿ 3ꓬꓥ ꓖꓶ꓾ ꓟꓳ˗ꓫꓲ ꓠꓴꓥ ꓟꓳ ꓡꓰ ꓘ ꓢꓴ ꓖ ꓔꓮꓲ ꓔꓳ ꓰ ꓡꓴ꓾ ꓖ ꓡꓪꓲ ꓰ꓾ ꓔꓴ ꓰ꓿ 4ꓬꓥ ꓟꓳ ꓖꓶ꓾ ꓡꓳ ꓗꓥ ꓟꓮꓴ ꓢꓮꓴ ꓗ ꓔꓳ ꓡꓪꓲ꓾ ꓬꓥ ꓡꓰ ꓡꓳ ꓗꓥ ꓑꓬꓟ ꓣ꓾ ꓖ꓾ ꓟꓳ˗ꓫꓲ ꓮ ꓘꓥ ꓐꓲ ꓔꓳ ꓐꓰ꓾ ꓖ ꓗꓳ ꓰ꓿ 5ꓬꓰ˗ꓢꓴ ꓖꓶ꓾ ꓠꓴꓥ ꓟꓳ ꓲ ꓟꓲꓔ ꓕꓠ ꓰ ꓬꓠ ꓟꓮꓲ ꓫꓲ ꓓꓥ ꓠꓴꓥ ꓟꓳ ꓟ ꓔꓴ ꓬꓥ ꓗ ꓔꓳ ꓐꓲ ꓐꓰ꓿ 6ꓥꓴꓔ ꓗꓳ ꓡꓥ ꓮ ꓠꓟ ꓟꓮꓴ ꓧꓶ ꓟꓲ ꓧꓶ ꓘꓴꓠ ꓟꓮꓲ ꓬꓴ ꓖꓰ ꓜꓳ ꓰ ꓟꓲ ꓪꓰ ꓜꓳ ꓠꓲꓗ ꓡꓰ ꓗ˗ꓣꓮꓲ ꓗ˗ꓢꓥ ꓒꓠ ꓔꓳ ꓐꓰ꓿ 7ꓧꓮꓴ ꓬꓠ ꓟꓮꓲ ꓬꓴ ꓖꓰ ꓜꓳ ꓖꓶ ꓲ ꓠꓴ ꓲ ꓪ ꓡꓰ ꓑꓬꓟ ꓔꓳ ꓡꓪꓲ꓾ ꓬꓥ ꓠꓲꓗ ꓖꓶ ꓣ ꓖꓴꓥ ꓣ ꓫꓳ ꓜ ꓓꓴꓔ ꓐ ꓗꓳ ꓣ꓿ 8ꓧꓮꓴ ꓟꓴ ꓬꓥ ꓠꓲꓗ ꓖꓶ ꓲ ꓬꓴ ꓥꓴꓔ ꓔꓳ ꓮ ꓗꓳ ꓮ ꓥꓴꓔ꓾ ꓣ ꓖꓴꓥ ꓣ ꓫꓳ ꓜ ꓥꓴꓔ ꓔꓳ ꓐꓰ꓿ 9ꓧꓮꓴ ꓟꓴ ꓡꓪꓲ꓾ ꓗ˗ꓣꓮꓲ ꓗ˗ꓢꓥ ꓞꓳ ꓔꓳ ꓰ ꓡꓰ꓾ ꓐꓬꓴ ꓖꓶ ꓮ ꓖꓰ ꓡꓳ ꓗꓥ꓾ ꓖ ꓰ꓿ 10ꓬꓴꓟ ꓘꓮꓴ ꓫꓴꓔ ꓠꓲ ꓔꓳ ꓗꓳ ꓡꓰ꓾ ꓡ ꓖꓬꓳ ꓑꓰ ꓫꓲ ꓘꓬꓳ ꓬꓥ ꓡꓰ ꓓꓴꓟ ꓟꓲ ꓗꓳ ꓰ꓿ 11ꓧꓮꓴ ꓘꓴꓠ ꓬꓥ ꓖꓶ ꓬꓴꓟ ꓢꓶꓥ ꓰ ꓬꓥ ꓟꓲ ꓡꓰ ꓡꓳ ꓗꓥ ꓑꓬꓟ ꓡꓪꓲ꓾ ꓟꓲ ꓪꓰ ꓖꓳ ꓬꓴ ꓡꓰ ꓧꓥ ꓬꓴ ꓢꓴ꓾ ꓳ ꓥꓴꓔ ꓗꓳ ꓡꓥ꓾ ꓬꓥ ꓟꓲ ꓡꓰ ꓡꓰ ꓫꓴꓔ ꓢꓴ ꓥꓴꓔ ꓔꓳ ꓡꓰ꓿ 12ꓟꓲ ꓪꓰ ꓜꓳ ꓡꓰ ꓬꓴꓟ ꓢꓶꓥ ꓬꓥ ꓡꓥ ꓡꓰ ꓡꓳ ꓗꓥ ꓑꓬꓟ ꓡꓪꓲ꓾ ꓬꓴ ꓖꓰ ꓖꓳ ꓬꓴ ꓚꓥ ꓓꓴꓟ ꓡꓳ ꓡꓰ ꓖꓶ꓾ ꓬꓴ ꓖꓰ ꓡꓴ ꓰ ꓮ ꓟꓴ ꓗꓴꓔ ꓔꓳ ꓡꓰ꓾ ꓖ ꓔꓮꓲ ꓰ꓿
ꓬꓰ˗ꓢꓴ ꓖꓶ ꓙꓳ ꓫꓥ ꓪꓲ ꓡꓰ ꓫꓶʼꓟꓠ ꓐꓲ ꓰ
13ꓬꓥ ꓟꓳ ꓙꓳ ꓫꓥ ꓪꓲ ꓡꓰ ꓢꓳꓑ ꓐꓲ ꓫꓥ ꓖ꓾ ꓖ ꓡꓪꓲ꓾ ꓬꓰ˗ꓢꓴ ꓚꓥ ꓫꓪꓲ ꓡꓰ ꓗꓳ ꓰ꓿ ꓡ ꓖꓬꓳ ꓑꓰ ꓬꓴ ꓖꓶ ꓬꓥ ꓟꓳ ꓡꓰ ꓔꓠ ꓑꓬꓟ ꓗꓳ ꓰ꓿ 14ꓬꓰ˗ꓢꓴ ꓧꓮꓴ ꓡꓰ ꓟꓬꓥ ꓙꓥ꓾ ꓪꓴ ꓠꓲꓗ ꓬꓳ ꓡꓪꓲ꓾ ꓙꓳ ꓫꓥ ꓪꓲ ꓡꓰ ꓥ ꓚꓥ ꓡꓰ ꓠꓥ ꓗꓰ꓾ ꓬꓥ ꓟꓳ ꓡꓰ ꓘ ꓡꓥ ꓜꓶꓥ ꓗꓳ꓿ ꓘ ꓢꓴ ꓟꓴ ꓖ ꓡꓰ ꓗ˗ꓣꓮꓲ ꓗ˗ꓢꓥ ꓟꓶꓥ ꓓꓠ ꓖꓶ꓾ ꓧꓮꓴ ꓢꓴ ꓰ ꓐꓥ ꓰ ꓟꓶꓥ ꓓꓠ ꓥꓴꓔ ꓔꓳ ꓡꓰ꓿ 15ꓠꓴꓥ ꓟꓳ ꓡꓰ ꓥꓳ ꓔꓰꓥ ꓔꓰꓥ ꓔꓮꓲ ꓗꓬꓳ ꓡꓰ꓾ ꓳ ꓥꓴꓔ ꓗꓳ ꓡꓥ꓾ ꓗ˗ꓣꓮꓲ ꓗ˗ꓢꓥ ꓰ ꓟꓶꓥ ꓓꓠ ꓡꓰ ꓙꓳ ꓫꓥ ꓢꓴ ꓮ ꓡꓳꓟ ꓬꓴ ꓢꓴ ꓖꓶ꓾ ꓧꓮꓴ ꓟ ꓖꓰ ꓖꓰ ꓪ ꓮ ꓪꓳ ꓪꓥ ꓣ ꓥꓴꓔ ꓡꓰ꓾ ꓖ ꓡꓪꓲ꓾ ꓬꓥ ꓟꓳ ꓡꓰ ꓔꓮꓲ ꓰ꓿ 16ꓧꓮꓴ ꓘꓴꓠ ꓬꓥ ꓬꓥ ꓟꓳ ꓡꓰ ꓐꓴꓠ ꓬꓴ ꓡꓪꓲ꓾ ꓬꓥ ꓟꓳ ꓰ ꓕꓳ ꓟ ꓡꓳ ꓗꓰ ꓔꓳ ꓴ ꓚꓥ ꓫꓶʼꓟꓠ ꓐꓲ ꓰ꓿
ꓲ ꓢꓴꓔ ꓪꓳ ꓰ ꓬꓴ ꓖꓰ ꓜꓳ ꓣ ꓬꓴ ꓬꓰ˗ꓢꓴ ꓚꓥ ꓡꓰ ꓰ
17ꓘꓬꓳ ꓟ ꓓꓴꓟ ꓰ ꓡꓳ ꓡꓰ꓾ ꓐꓬꓴ ꓣ ꓬꓴ ꓬꓥ ꓚꓥ ꓓꓲꓠ ꓙꓰ ꓡꓰ ꓡꓪꓲ꓾ ꓬꓥ ꓧꓶ ꓟ ꓘꓲ ꓒꓴꓔ ꓕꓴ ꓴ ꓚꓥ꓾ ꓖꓰ ꓓꓲꓗ ꓰ ꓢ ꓣ ꓰ꓾ ꓮ ꓕꓴꓟ ꓮ ꓐꓬꓴ ꓰ ꓮ ꓢꓗ ꓪꓳ ꓬꓴ ꓫꓳ꓾ ꓥꓳ ꓧꓮꓲ ꓙꓴꓥ ꓗꓴꓔ ꓣ ꓡꓴ꓾ ꓖ ꓡꓪꓲ꓾ ꓬꓥ ꓡꓰ ꓟꓲ ꓰ꓿ 18ꓬꓰ˗ꓢꓴ ꓖꓶ꓾ ꓥꓳ ꓡꓰ ꓧꓮꓲ ꓟꓴ ꓖꓰ ꓓꓲꓗ ꓰ ꓖ ꓡꓰ ꓡ꓾ ꓗ˗ꓣꓮꓲ ꓗ˗ꓢꓥ ꓟꓮꓲ ꓖꓳ ꓔꓴ ꓖꓰ ꓓꓲꓗ ꓰ ꓳ ꓡꓰ ꓮ ꓠꓲ꓿ 19ꓙꓰꓑ ꓰ ꓔ ꓣ ꓟ꓾ ꓐꓬꓴ ꓘ ꓢꓔ꓾ ꓢꓴ ꓟꓲ ꓘ ꓡꓴ꓾ ꓘ ꓘꓮꓴ꓾ ꓮ ꓔꓰꓥ ꓰ ꓢꓗ ꓢꓰ ꓘ ꓘꓟ꓾ ꓟꓳ ꓜꓳ ꓟꓑ ꓜꓳ ꓘ ꓘꓴꓔ꓾ ꓠꓥ ꓠꓴ ꓰ ꓠꓥ ꓪ ꓡꓰ ꓘꓴꓥ ꓖ ꓮ꓾ ꓖ ꓰ ꓓꓥ ꓡꓰ ꓠꓥ ꓢꓰ ꓔꓳ ꓡꓰ ꓡꓴ꓾ ꓖ ꓡꓪꓲ꓾ ꓬꓥ ꓡꓰ ꓔꓮꓲ ꓰ꓿ 20ꓧꓮꓴ ꓬꓴ ꓖꓶ꓾ ꓢ ꓣ ꓰ꓾ ꓧꓮꓴ ꓡꓴꓥ ꓡꓥ ꓡꓰ ꓲ ꓣꓟ ꓑꓬꓔ ꓟꓮꓲ ꓥꓳ ꓛꓥ ꓐꓰ꓾ ꓖ ꓡꓪꓲ꓾ ꓬꓰ˗ꓢꓴ ꓡꓰ ꓔꓮꓲ ꓰ꓿ 21ꓬꓰ˗ꓢꓴ ꓖꓶ ꓬꓥ ꓡꓰ ꓐꓬꓴ ꓪꓴ ꓴ ꓚꓥ ꓬꓥ ꓡꓰ ꓚꓲꓔ ꓡꓪꓲ꓾ ꓠꓥ ꓣ ꓘꓬꓳ ꓣ ꓮ ꓫꓲ꓾ ꓠꓥ ꓡꓳ ꓮ꓾ ꓪꓳ ꓟ ꓪꓳ ꓡꓰ ꓴꓥ ꓑꓬꓟ ꓡꓪꓲ꓾ ꓟꓬꓴꓥ ꓐꓥ ꓡꓰ ꓖꓟ ꓐꓲ ꓮ꓾ ꓧꓮꓴ ꓙꓥ ꓫꓰ ꓟꓮꓴ ꓘꓴꓥ ꓕꓳ ꓟ ꓠꓥ ꓲ ꓢꓴꓔ ꓪꓳ ꓣ꓾ ꓥ ꓕꓥ ꓟ ꓡꓰ ꓛꓥ ꓮ꓾ ꓖ ꓡꓪꓲ꓾ ꓬꓥ ꓡꓰ ꓔꓮꓲ ꓰ꓿ 22ꓬꓥ ꓬꓴ꓾ ꓧꓮꓴ ꓢꓴ ꓖ ꓰ ꓬꓠ ꓟꓮꓲ ꓟꓬꓳ ꓓꓳꓥ ꓢꓴꓟ ꓐꓬꓴ ꓡꓪꓲ꓾ ꓟꓲꓔ ꓬꓳꓠ ꓡꓰ ꓰ ꓡꓳ ꓐꓬꓴ ꓐꓰ꓾ ꓘ ꓢꓴ ꓟꓴ ꓖ ꓡꓰ꓾ ꓬꓥ ꓢꓴꓔ ꓖꓠ ꓟꓬꓳ ꓟꓬꓳ ꓪꓳ ꓢꓴ ꓥꓴꓔ ꓔꓳ ꓡꓰ꓿
ꓲ ꓢꓴꓔ ꓪꓳ ꓐꓥ ꓖꓶ ꓗ˗ꓣꓮꓲ ꓗ˗ꓢꓥ ꓟꓶꓥ ꓓꓠ ꓟ ꓪꓥ ꓣ ꓪꓲ ꓔꓳ ꓣ
23ꓧꓮꓴ ꓢꓴ ꓟꓴ ꓬꓰ˗ꓢꓴ ꓖꓶ ꓐꓬꓴ ꓪꓴ ꓡꓪꓲ꓾ ꓬꓥ ꓰ ꓡ ꓖꓬꓳ ꓑꓰ ꓡꓰ꓾ ꓲ ꓢꓴꓔ ꓪꓳ ꓐꓥ ꓖꓶ꓾ ꓗ˗ꓣꓮꓲ ꓗ˗ꓢꓥ ꓟꓶꓥ ꓓꓠ ꓟ ꓖꓬꓮꓲ ꓪꓥ ꓪꓲ ꓔꓳ ꓣ ꓠꓴꓥ꓾ ꓖ ꓰ꓿ 24ꓡ ꓖꓬꓳ ꓑꓰ ꓬꓴ ꓖꓶ꓾ ꓬꓥ ꓰ ꓓꓥ ꓬꓠ ꓟꓮꓲ ꓟꓮꓴ ꓧ ꓠꓲ ꓗꓳ ꓰ꓾ ꓧꓮꓴ ꓟꓴ ꓡꓪꓲ꓾ ꓬꓰ˗ꓢꓴ ꓖꓶ꓾ ꓥ ꓜꓳ ꓑꓰ ꓰ꓾ ꓲ ꓢꓴꓔ ꓡꓰ ꓡꓴꓟ ꓐꓥ ꓖꓶ ꓗ˗ꓣꓮꓲ ꓗ˗ꓢꓥ ꓟꓶꓥ ꓓꓠ ꓟ ꓪꓥ ꓣ ꓖꓬꓮꓲ ꓪꓲ ꓔꓳ ꓣ ꓠꓴꓥ꓿ 25ꓪꓳ ꓢꓴ ꓖꓶ꓾ ꓗ˗ꓣꓮꓲ ꓗ˗ꓢꓥ ꓟꓶꓥ ꓓꓠ ꓪꓥ ꓣ ꓕꓳ ꓟ ꓖꓳ ꓡ ꓴ ꓖꓶ꓾ ꓮꓑ ꓠꓳ ꓓꓳꓥ ꓡꓴꓔ ꓣ ꓙꓰ ꓡꓪꓲꓽ ꓔꓳ ꓣ꓾ ꓖ ꓡꓪꓲ꓾ ꓬꓥ ꓟꓳ ꓡꓰ ꓔꓮꓲ ꓰ꓿ 26ꓬꓥ ꓟꓳ ꓬꓴ ꓣʼꓓꓴꓽ ꓡꓮꓲꓽ ꓡꓪꓲ ꓟꓮꓴ ꓐꓬꓴ ꓴ ꓚꓥ꓾ ꓧꓮꓴ ꓢꓴ ꓡꓰ ꓖꓶ꓾ ꓳ ꓬꓴ ꓘꓲ ꓬꓴ ꓰ ꓙꓥ ꓪꓳ ꓙꓰ ꓣ ꓡꓴ꓾ ꓖ ꓡꓪꓲ꓾ ꓬꓥ ꓡꓰ ꓔꓮꓲ ꓗꓳ ꓰ꓿ 27ꓬꓰ˗ꓢꓴ ꓖꓶ ꓬꓥ ꓟꓳ ꓡꓰ ꓐꓬꓴ ꓪꓴ ꓡꓪꓲ꓾ ꓧꓮꓴ ꓮ ꓟꓴ ꓡꓰ ꓐꓬꓴ ꓮ ꓪꓳ ꓗꓴꓔ ꓗꓳ ꓡꓥ꓾ ꓗ˗ꓣꓮꓲ ꓗ˗ꓢꓥ ꓮ ꓪꓳ ꓗꓴꓔ ꓰ ꓮ ꓙꓳ꓾ ꓘ ꓢꓴ ꓟꓴ ꓖ ꓡꓰ꓾ ꓗ˗ꓣꓮꓲ ꓗ˗ꓢꓥ ꓖꓶ ꓐꓠ ꓫꓳ ꓡꓰ ꓪꓳ ꓗꓴꓔ ꓡꓰ꓿ 28ꓧꓮꓴ ꓘꓴꓠ ꓑꓰ˗ꓔꓣꓴ ꓖꓶ꓾ ꓥ ꓟꓳ ꓜꓰ ꓐꓠ ꓫꓳ ꓡꓰ ꓑꓬꓟ ꓔꓳ ꓡꓪꓲ꓾ ꓠꓥ ꓚꓥ ꓡꓰ ꓛꓥ ꓐꓰ꓾ ꓖ ꓡꓪꓲ꓾ ꓬꓥ ꓡꓰ ꓔꓮꓴ ꓔꓮꓲ ꓰ꓿ 29ꓬꓰ˗ꓢꓴ ꓖꓶ꓾ ꓥꓳ ꓠꓴꓥ ꓟꓳ ꓡꓰ ꓔꓰꓥ ꓔꓰꓥ ꓔꓮꓲ ꓗꓬꓳ ꓗꓳ ꓡꓰ꓾ ꓥ ꓰ ꓟ ꓔꓴ ꓰ ꓗ ꓐꓴ ꓓꓥ ꓡꓴ ꓟ ꓔꓴ ꓬꓴꓟ ꓢꓶꓥ ꓰ ꓬꓴꓟ꓾ ꓬꓳ꓾ ꓬꓥ ꓖꓴ꓾ ꓬꓥ ꓟꓥ꓾ ꓲ ꓠꓴ ꓲ ꓪ꓾ ꓬꓥ ꓫꓴ ꓬꓥ ꓜꓳ ꓑꓰ ꓡꓰ ꓑꓬꓟ ꓔꓳ ꓢꓴ ꓳ ꓥꓴꓔ ꓗꓳ ꓡꓥ꓾ 30ꓜꓶꓥ ꓣꓲ ꓧꓪꓲ ꓣ꓾ ꓫꓲ ꓑꓬꓔ ꓟ ꓬꓴꓟ꓾ ꓬꓳ꓾ ꓬꓥ ꓖꓴ꓾ ꓬꓥ ꓟꓥ꓾ ꓲ ꓠꓴ꓾ ꓬꓥ ꓫꓴ ꓬꓥ ꓜꓳ ꓑꓰ ꓡꓰ ꓐꓴꓥ ꓫꓳ ꓮ ꓪꓳ ꓬꓴ ꓣ ꓮ ꓠꓲ꓾ ꓕꓥ ꓠꓴꓥ ꓑꓬꓔ ꓟ ꓮ ꓐꓬꓴ ꓮ ꓕꓴꓟ ꓰ ꓮ ꓢꓗ ꓪꓳ ꓬꓴ ꓣ ꓥꓴꓔ ꓡꓰ꓿ 31ꓥꓴꓔ ꓗꓳ ꓡꓥ ꓧꓶ ꓐꓥ ꓟꓬꓳ ꓟꓬꓳ ꓕꓥ ꓖꓬꓳ ꓣ꓾ ꓕꓥ ꓖꓬꓳ ꓐꓥ ꓬꓴ ꓖꓶ꓾ ꓧꓶ ꓐ ꓗꓳ ꓣ꓿
ꓬꓰ˗ꓢꓴ ꓡꓰ ꓣꓳꓲ ꓣꓲꓑ ꓗꓴꓔ ꓡꓪꓲ ꓢꓔ ꓑꓬꓟ ꓗꓳ ꓡꓥ ꓓꓴꓟ ꓔꓳ ꓡꓳ ꓣ
32ꓧꓮꓴ ꓘꓴꓠ ꓬꓰ˗ꓣꓴ˗ꓢ˗ꓡꓰꓟ ꓫꓴꓔ ꓓꓳ ꓡꓳ ꓣ꓾ ꓬꓥ ꓟꓳ ꓘꓬꓳ ꓟ ꓰ ꓡꓳ ꓠꓲ ꓡꓰ꓾ ꓬꓰ˗ꓢꓴ ꓖꓶ ꓬꓥ ꓟꓳ ꓰ ꓧꓶ ꓟ ꓰ ꓡꓳ ꓠꓲ ꓡꓰ꓾ ꓬꓥ ꓟꓳ ꓬꓴ ꓖꓶ ꓟꓮꓴ ꓐꓬꓴ ꓗꓳ ꓰ꓾ ꓕꓥ ꓛꓥ ꓠꓲ ꓰ ꓐꓥ ꓡꓰ ꓖꓬꓴ ꓠꓠ ꓠꓲ ꓮ ꓗꓳ꓿ ꓧꓮꓴ ꓘꓴꓠ ꓡ ꓖꓬꓳ ꓣ ꓞꓰ ꓲ ꓬꓴ ꓡꓰ ꓬꓥ ꓓꓴꓟ ꓪꓴꓔ ꓬꓴ ꓡꓪꓲ꓾ ꓬꓥ ꓚꓥ ꓓꓴꓔ ꓡꓳ ꓣ ꓮ ꓟꓴ ꓘꓬꓳ ꓬꓥ ꓟꓳ ꓡꓰ ꓔꓮꓲ ꓰ ꓖꓶ꓾ 33ꓪꓴ ꓗꓰ꓾ ꓲ ꓠꓴꓥ ꓬꓰ˗ꓣꓴ˗ꓢ˗ꓡꓰꓟ ꓫꓴꓔ ꓓꓳ ꓡꓳ ꓠꓲ ꓡꓰ꓾ ꓧꓮꓴ˗ꓐꓬꓴ˗ꓬꓥ˗ꓜꓳ ꓖꓶ꓾ ꓘꓶꓠ ꓙꓳꓥ ꓮ ꓖꓲ ꓑꓰ ꓰ ꓟꓮꓴ ꓢꓮꓴ ꓗ ꓢ ꓣ ꓑꓰ ꓡꓳꓼ ꓟ ꓮꓑ ꓑꓬꓟ ꓣ꓾ ꓬꓥ ꓟꓳ ꓬꓥ ꓡꓰ ꓢꓔ ꓑꓬꓟ ꓣ ꓘꓬꓳ ꓓꓳ ꓓꓠ ꓡꓪꓲ꓾ ꓖꓳ ꓔꓴ ꓮ ꓟꓬꓴ ꓡꓳꓼ ꓫꓴꓔ ꓮꓑ ꓑꓬꓟ ꓐ ꓗꓳ ꓣ꓿ 34ꓬꓥ ꓟꓳ ꓖꓶ ꓬꓥ ꓡꓰ ꓣꓳꓲ ꓣꓲꓑ ꓗꓴꓔ ꓡꓪꓲ꓾ ꓢꓳ ꓗꓠ ꓐꓬꓰ ꓖꓬꓴꓠ ꓡꓰ ꓰ꓾ ꓬꓥ ꓡꓰ ꓠꓴ ꓡꓪꓲ꓾ ꓢꓔ ꓑꓬꓟ ꓐ ꓗꓳ ꓣ꓿ ꓢꓴꓟ ꓠꓲ ꓕꓥ ꓡꓰ ꓬꓥ ꓓꓴꓟ ꓓꓪꓲ ꓔꓳ ꓡꓳ ꓐ ꓣ꓾ ꓖ ꓰ꓿
ꓬ˗ꓗꓴ ꓰ ꓬꓳ˗ꓧꓠ ꓖꓶ ꓮ ꓣꓳꓥ ꓮ ꓬ ꓓꓴꓥ ꓗꓳ ꓰ
35ꓧꓮꓴ ꓘꓴꓠ ꓜꓰ˗ꓐꓰ˗ꓓꓲ ꓬꓥ ꓜꓳ ꓬ˗ꓗꓴ ꓰ ꓬꓳ˗ꓧꓠ ꓖꓶ ꓬꓥ ꓚꓥ ꓫꓴꓔ ꓧꓪꓲ ꓰ ꓡꓪꓲ꓾ ꓢ ꓣ ꓰ꓾ ꓥ ꓠꓲꓗ ꓓꓴꓥ ꓟ ꓓꓴꓥ ꓠꓥ ꓥ ꓠꓲꓗ ꓡꓰ ꓐꓲ ꓣ꓾ ꓥ ꓠꓲꓗ ꓳ ꓡꓰ꓾ ꓖ ꓡꓪꓲ꓾ ꓬꓥ ꓡꓰ ꓔꓮꓲ ꓗꓳ ꓰ꓿ 36ꓬꓥ ꓖꓶ꓾ ꓥꓳ ꓠꓴꓥ ꓠꓲꓗ ꓟ ꓔꓴ ꓧꓮꓲ ꓗꓴꓔ ꓣ ꓳ ꓮ ꓗꓳ ꓡꓴ꓾ ꓖ ꓡꓪꓲ꓾ ꓬꓥ ꓠꓲꓗ ꓡꓰ ꓟꓲ ꓰ꓿ 37ꓬꓥ ꓠꓲꓗ ꓖꓶ꓾ ꓠꓥ ꓰ ꓒꓴꓥ ꓪꓴꓑ ꓟ ꓠꓥ ꓰ ꓡꓳꓼ ꓬꓳꓺ ꓫꓴꓔ ꓣ ꓬꓴ꓾ ꓠꓥ ꓰ ꓡꓳꓼ ꓑꓮꓲꓺ ꓫꓴꓔ ꓣ ꓬꓴ꓾ ꓪꓳ ꓜꓴꓥ ꓔꓳ ꓣ ꓮ ꓘꓥ ꓥ ꓠꓲꓗ ꓡꓰ ꓐꓲ ꓡ꓾ ꓖ ꓡꓪꓲ꓾ ꓬꓥ ꓡꓰ ꓔꓮꓲ ꓗꓳ ꓰ꓿ 38ꓬꓰ˗ꓢꓴ ꓖꓶ꓾ ꓠꓴꓥ ꓠꓲꓗ ꓧꓮꓲ ꓓꓴꓥ ꓰ ꓡꓰ ꓠꓴꓥ ꓠꓲꓗ ꓮ ꓢꓰ ꓗꓳ꓿ ꓥꓳ ꓫꓴ ꓰ ꓖꓳꓟ ꓡꓰ ꓠꓴꓥ ꓠꓲꓗ ꓪꓳ ꓫꓴ ꓗꓳ ꓣ ꓡꓴ꓿ ꓥꓳ ꓘꓟ ꓬꓴ ꓰ ꓪꓲ ꓠꓳꓑ ꓡꓰ ꓠꓴꓥ ꓠꓲꓗ ꓪꓳ ꓘꓟ ꓗꓳ ꓣ ꓡꓴ꓾ ꓖ ꓡꓪꓲ꓾ ꓬꓥ ꓠꓲꓗ ꓡꓰ ꓔꓮꓲ ꓰ꓿ 39ꓬꓥ ꓠꓲꓗ ꓖꓶ꓾ ꓥ ꓠꓲꓗ ꓪꓳ ꓗꓴꓔ ꓣ꓾ ꓖ ꓗꓳ ꓰ꓿ ꓬꓰ˗ꓢꓴ ꓖꓶ꓾ ꓥꓳ ꓫꓴ ꓰ ꓖꓳꓟ ꓡꓰ ꓠꓴꓥ ꓠꓲꓗ ꓡꓰ ꓫꓴ ꓣ ꓥꓴꓔ ꓔꓳ ꓮ ꓗꓳ꓿ ꓥꓳ ꓘꓟ ꓬꓴ ꓰ ꓪꓲ ꓠꓳꓑ ꓡꓰ ꓡꓰ ꓠꓴꓥ ꓠꓲꓗ ꓘꓟ ꓬꓴ ꓣ ꓥꓴꓔ ꓔꓳ ꓡꓰ꓿ 40ꓥꓴꓔ ꓗꓳ ꓡꓥ ꓥ ꓰ ꓡꓳ ꓬꓳ ꓡꓳ ꓑꓮꓲ ꓫꓴꓔ ꓪꓳ ꓜꓴꓥ ꓔꓳ ꓣ ꓮ ꓘꓥ ꓥꓳ ꓮ ꓪꓳ ꓐꓲ꓾ ꓧꓮꓴ ꓖꓶ ꓡ ꓙꓥ ꓔꓳ ꓐꓲ ꓰ ꓐꓥ ꓰ ꓟ ꓔꓴ ꓜ ꓥꓴꓔ ꓡꓰ꓾ ꓖ ꓡꓪꓲ꓾ ꓬꓥ ꓠꓲꓗ ꓡꓰ ꓔꓮꓲ ꓰ꓿ 41ꓮ ꓘꓪꓲ ꓖꓳ ꓔꓴ ꓡ ꓖꓬꓳ ꓣ ꓞꓰ ꓬꓴ ꓧꓮꓴ ꓓꓥ ꓡꓰ ꓪꓳ ꓖꓬꓳ ꓙꓥ꓾ ꓬꓥ ꓟꓳ ꓬ˗ꓗꓴ ꓰ ꓬꓳ˗ꓧꓠ ꓡꓰ ꓠꓲꓗ ꓬꓳ ꓗꓳ ꓰ꓿ 42ꓧꓮꓴ ꓟꓴ ꓬꓰ˗ꓢꓴ ꓬꓥ ꓟꓳ ꓡꓰ ꓪꓴꓔ ꓬꓴ ꓡꓪꓲ꓾ ꓖꓳ ꓔꓴ ꓮ ꓟꓬꓴ ꓡꓰ ꓴꓑ ꓣ ꓮ ꓘꓥ ꓪꓳ ꓬꓴ ꓐꓥ ꓖꓶ꓾ ꓬꓥ ꓟꓳ ꓰ ꓮ ꓕꓳ ꓟ ꓣꓰꓥ ꓠꓲ ꓡꓰ ꓰ꓾ ꓒꓴꓥ ꓪꓴꓑ ꓰ ꓓꓴꓔ ꓐꓥ ꓖꓶ ꓬꓥ ꓟꓳ ꓮ ꓕꓳ ꓟ ꓴꓑ ꓠꓲ ꓰ ꓡꓰ꓾ ꓠꓴꓥ ꓟꓳ ꓢꓰ ꓠꓲ ꓮ ꓗꓳ꓿ 43ꓠꓴꓥ ꓟꓳ ꓚꓥ ꓗꓴꓟ ꓖꓶ ꓧꓮꓴ ꓓꓳꓥ ꓮ ꓥꓴꓔ꓾ ꓠꓴꓥ ꓟꓳ ꓕꓳ ꓙꓰ ꓗꓳ ꓠꓮꓴ ꓢꓴ ꓳ ꓥꓴꓔ ꓗꓳ ꓡꓥ꓾ ꓠꓴꓥ ꓟꓳ ꓰ ꓓꓪꓲ ꓠꓥ ꓙꓳ ꓫꓥ ꓓꓴꓔ ꓫꓥ ꓖ꓿ 44ꓠꓴꓥ ꓟꓳ ꓚꓥ ꓟ ꓴ ꓡꓴꓟ ꓓꓴꓔ ꓠꓮꓴ ꓢꓴ ꓳ ꓥꓴꓔ ꓗꓳ ꓡꓥ꓾ ꓡꓴꓥ ꓡꓥ ꓐꓥ ꓰ ꓙꓴꓠ ꓓꓴꓔ ꓫꓥ ꓖ꓿ 45ꓘ ꓢꓴ ꓟꓴ ꓖ ꓡꓰ꓾ ꓧꓮꓴ˗ꓐꓬꓴ˗ꓬꓥ˗ꓜꓳ ꓡꓥ ꓖꓶ ꓓꓪꓲ ꓠꓥ ꓙꓳ ꓫꓥ ꓡꓰ ꓙꓴꓠ ꓜꓳ ꓣ ꓙꓰ ꓡꓰ ꓰ ꓮ ꓥꓴꓔ꓾ ꓓꓪꓲ ꓠꓥ ꓙꓳ ꓫꓥ ꓰ ꓮ ꓟꓴ ꓡꓰ ꓜꓪꓲ ꓐꓲ ꓣ ꓰ꓾ ꓐꓬꓴ ꓟꓬꓳ ꓟꓬꓳ ꓰ ꓟ ꓔꓴ ꓬꓥ ꓮ ꓢꓗ ꓡꓰ ꓖꓴꓥ ꓟʼꓡꓮꓲ ꓮ ꓒꓮꓴ ꓗꓴꓔ ꓐꓲ ꓣ ꓖ ꓡꓪꓲ ꓙꓰ ꓡꓰ ꓰ꓾ ꓖ ꓡꓪꓲ ꓔꓮꓲ ꓰ꓿
ꓐ˗ꓔꓰ˗ꓟꓰ ꓡꓰ ꓡꓳ ꓖꓰ ꓐꓲ ꓰ
46ꓧꓮꓴ ꓘꓴꓠ ꓬꓥ ꓟꓳ ꓖꓶ ꓬꓰ˗ꓣꓲ˗ꓘꓳ ꓪ ꓫꓴꓔ ꓙꓰ ꓗꓳ ꓰ꓾ ꓬꓰ˗ꓢꓴ ꓖꓶ ꓬꓥ ꓰ ꓡ ꓖꓬꓳ ꓑꓰ ꓰ ꓐꓬꓴ ꓣ ꓙꓴꓟ ꓣ ꓪꓲ ꓟꓳ ꓰ ꓣ ꓧ ꓬꓰ˗ꓣꓲ˗ꓘꓳ ꓟꓮꓲ ꓕꓳ ꓡꓳ ꓗꓳ ꓡꓰ꓾ ꓔꓰ˗ꓟꓰ ꓬꓥ ꓜꓳ ꓐ˗ꓔꓰ˗ꓟꓰ ꓟꓲꓥ ꓰ ꓟꓬꓳ ꓙꓲꓔ ꓡꓪꓲ꓾ ꓓꓴꓥ ꓜꓳ ꓰ ꓢꓴ ꓣ ꓬꓴ ꓧꓮꓴ ꓘꓬꓳ ꓬꓟ ꓟ ꓜꓴꓥ ꓔꓳ ꓰ꓿ 47ꓠ˗ꓜꓰ˗ꓣꓰꓔ ꓪ ꓬꓰ˗ꓢꓴ ꓥꓴꓔ ꓡꓰ ꓬꓥ ꓪꓳ ꓖꓬꓳ ꓙꓥ꓾ ꓓ˗ꓪꓲ ꓬꓥ ꓜꓳ ꓬꓰ˗ꓢꓴ ꓰ꓾ ꓥꓳ ꓡꓰ ꓫꓳ ꓖꓬꓳ ꓡꓼ ꓳꓺ꓾ ꓖ ꓡꓪꓲ ꓑꓴꓗ ꓓꓴꓥ ꓰ꓿ 48ꓐꓬꓴ ꓟꓬꓳ ꓟꓬꓳ ꓪ ꓬꓥ ꓢꓲꓟ ꓜ ꓠꓲ ꓐꓬꓴ ꓫꓥ ꓖ꓾ ꓬꓥ ꓡꓰ ꓙꓰꓔ ꓗꓳ ꓰ꓾ ꓬꓥ ꓬꓴ꓾ ꓓ˗ꓪꓲ ꓬꓥ ꓜꓳ ꓰ꓾ ꓥꓳ ꓡꓰ ꓫꓳ ꓖꓬꓳ ꓬꓴ ꓡꓼ ꓳꓺ꓾ ꓖ ꓡꓪꓲ꓾ ꓙꓰ ꓑꓴꓗ ꓕꓠ ꓰ꓿ 49ꓬꓰ˗ꓢꓴ ꓖꓶ ꓬꓑ ꓔꓳ ꓴ ꓚꓥ꓾ ꓬꓥ ꓡꓰ ꓪꓴꓔ ꓡꓳ ꓗꓰ꓾ ꓖ ꓰ꓿ ꓧꓮꓴ ꓟꓴ ꓡꓪꓲ꓾ ꓬꓥ ꓟꓳ ꓧꓮꓴ ꓟꓬꓳ ꓙꓲꓔ ꓢꓴ ꓡꓰ ꓪꓴꓔ ꓡꓰ ꓰ꓾ ꓥꓪꓲ ꓥꓳꓠ ꓫꓥ ꓖ꓾ ꓔꓳ ꓮ꓾ ꓬꓥ ꓠꓥ ꓡꓰ ꓪꓴꓔ ꓔꓳ ꓣ꓾ ꓖ ꓗꓳ ꓰ꓿ 50ꓬꓥ ꓖꓶ꓾ ꓬꓥ ꓰ ꓟꓰ ꓐꓴ ꓘꓬꓴꓔ ꓑꓬꓟ ꓔꓳ ꓡꓰ ꓰ꓾ ꓔꓳ ꓡꓪꓲ꓾ ꓬꓰ˗ꓢꓴ ꓕꓥ ꓫꓴꓔ ꓧꓪꓲ ꓰ ꓡꓳ ꓰ꓿ 51ꓧꓮꓴ ꓘꓴꓠ ꓬꓰ˗ꓢꓴ ꓬꓥ ꓡꓰ꓾ ꓥꓳ ꓠꓥ ꓡꓰ ꓧꓮꓲ ꓗꓴꓔ ꓐꓲ ꓣ꓾ ꓠꓥ ꓳ ꓡꓰ ꓡꓴ꓾ ꓖ ꓔꓮꓲ ꓰ꓿ ꓟꓬꓳ ꓙꓲꓔ ꓢꓴ ꓖꓶ꓾ ꓣ˗ꓐꓴ˗ꓠꓮꓲ ꓰ꓾ ꓥ ꓟꓬꓳ ꓟꓬꓥ ꓫꓥ ꓖ ꓳ꓾ ꓖ ꓡꓪꓲ꓾ ꓬꓥ ꓡꓰ ꓔꓮꓲ ꓰ꓿ 52ꓬꓰ˗ꓢꓴ ꓖꓶ꓾ ꓢꓳ ꓰ ꓡꓳ ꓮ꓾ ꓠꓥ ꓰ ꓡꓴꓟ ꓙꓲꓥ ꓰ ꓖꓶ ꓠꓥ ꓡꓰ ꓡꓳ ꓖꓰ ꓐꓲ ꓐꓰ꓾ ꓖ ꓡꓪꓲ꓾ ꓬꓥ ꓡꓰ ꓔꓮꓲ ꓰ꓿ ꓧꓮꓴ ꓬꓴ ꓖꓶ ꓧꓮꓴ ꓘꓴꓠ ꓙꓥ ꓟꓬꓳ ꓟꓬꓥ ꓡꓪꓲ꓾ ꓘꓬꓳ ꓟ ꓬꓥ ꓕꓥ ꓛꓥ ꓠꓲ ꓐꓰ꓿
Currently Selected:
ꓟ˗ꓗꓴ ꓟꓮꓴ ꓢꓮꓴ 10: ATB1938
Highlight
Share
Copy
Want to have your highlights saved across all your devices? Sign up or sign in
First published in Fraser script in 1938.
