मर्कूस 14

येशूके मारैके षडयन्त्र

(मत्ती २६:१-५; लूक २२:१-२; यूह ११:४५-५३)

1एकर दी दिनके बाद निस्तार पावन आर अखमिरी रोटीके पावन रहै। प्रमुख पुजारीसब आर यहूदी धरमशास्त्रके पण्डितसब येशूके केरंके छल करिके पक्डीके जान मारियै कहिके दावमे रहै। 2मगर ऊसब कहैल्कै रहे, “निस्तार पावनके समयमे एरं नैकरना चाही, कहिनेकी एरं नैहै कि आदमीसब हुलदंगा करे लागै।”

3यी समयमे येशू बेथानियाँ गाँवमे सिमोनके घरमे रहै, जकरा पहेला कुष्ठरोग रहै, जब येशू ओत्ते खैले बैठ्ल रहै। एकटा जनानी संगमरमर पत्थलसे बन्ल एकटा बोतल ल्याके ऐलै, जकरामे गमकौव्वा तेल भर्ल रहै। तेल बहुते महँगा रहै, कहिनेकी यी शुद्ध जटामसीके रहै। ऊ बोतलके ठेपी खोलल्कै, ताकी ऊ ओकरा सम्मान दियैके लिए येशूके मथामे सभेटा तेल ढारल्कै। 4मगर कोय-कोय गोस्सा करिके आपनहैं-आपनहैं कहे लाग्लै, “ऊ एरंको महँगा गमकौव्वा तेलके कथिले बर्बाद कैल्कै? 5यी गमकौव्वा तेल तीन स चानीके सिक्कामे बेचे सक्तियै आर गरिबसिके देतियै ते हैतियै, तब ऊसब उटा जनानीके बहुते खराबसे धोपल्कै। 6मगर येशू कहैल्कै, ‘ओकरा धोपैले बन्द कर, ओकरा परेशान नैकर। हमरापर ओकर तेल ढारना एकटा बढियाँ बात छै। 7कहिनेकी गरिबसब ते तोरसिकेलगत सभे दिन रहतौ, आर तोरसिके इच्छा लाग्ल कोनो समयमे तुहेंसब ओकरसिके भलाइ करे सकैछैं। मगर हमे ते सभे दिन तोरसिके संगे नैरहबौ। 8यी जनानी हमर मरैसे पहेला हमर मथामे तेल ढारल्कै छे, ताकी हमर शरीरके दफ्नाबैके लिए तैय्यार कैल ज्या सकै। खाली इहे ओकर लिए सक्षम रहै। 9हमे तोरासिके सच कहैछियौ, सारा संसारमे जते-जते यी खुश-खबरी प्रचार कैल जैतै, ऊसब यी भी बतैतै कि यी जनानी कि कैल्कै छे, आर आदमीसब एकरा याद कर्तै।’ ”

यहूदा स्करियोतके येशूके संगे विश्वासघात

(मत्ती २६:१४-१६; लूक २२:३-६)

10तब यहूदा स्करियोत जे बारह चेलामेसिसे एकटा रहै, प्रमुख पुजारीसिके लगत गेलै आर बतैल्कै कि ऊ ओकरासिके येशूके गिरफ्तार करैमे सहायता कर्तै। 11ऊसब यी बात सुनिके खुश भेलै, आर ओकरा यी कामके लिए पैसा दियैके वचन देल्कै। तब यहूदा स्करियोत सही मौकाके इन्तजार करे लाग्लै ताकी येशूके यहूदी अगुवासिके द्वारा गिरफ्तार करैल ज्या सकै।

अन्तिम भोज

(मत्ती २६:१७-३०; लूक २२:७-२३; यूह १३:२१-३०; १ कोर ११:२३-२५)

12अखमिरी रोटीके पावनके पहेला दिनमे, जखनी निस्तार पावनके भेंडा बलिदान चढैल जैछै, ओकर चेलासब ओकरा पुछल्कै, “तुहें हमरासिके कते भेजे चाहैछ कि हमेसब निस्तार पावनके भोजके लिए भोजन तैय्यार करियै ताकी अपनासब ख्या सकियै?” 13तब येशू आपन चेलामेसिसे दी झनके एरं कहिके भेजल्कै, “यरूशलेम सहरमे जो, आर घैलमे पानी ल्याके ज्यावाला आदमी तोरासिके मिल्तौ। ओकर पाछु जो। 14ऊ आदमी जे घरमे ढुक्तौ उटा घरके मालिकके कहिहैं, ‘गुरुजी पुछैछौं, हमर चेलासिके संगे निस्तार पावनके भोज ख्यावाला हमर मैजमान कोठा कते छै?’ 15तब ऊ तोरासिके सज्याके तैय्यार कैल उप्पर तल्लाके एकटा बडका कोठा देखैतौ, आर ओथै तुहेंसब हमर लिए भोज तैय्यार कर।” 16तब ऊ दीटा चेलासब गेलै आर सहरमे ढुक्लै, तब ओकरासिके येशू जेरं कहैल्कै रहे ओहिने भेलै, आर ऊसब निस्तार पावनके भोजके लिए भोजन तैय्यार कैल्कै। 17सझौवा भेलके बाद येशू बारहोटा चेलासिके संगे उटा घरमे ऐलै। 18ऊसब सभेको खैबेरियाँ येशू कहैल्कै, “हमे तोरासिके सच कहैछियौ, तोरसिमेसे हमरसंगे ख्यावाला एकझन हमरा गिरफ्तार करैके लिए हमर दुश्मनसिके सहायता कर्तै।” 19जब ऊसब यी शब्द सुनल्कै, तब ओकरासिके दुःख भेलै, तब एक-एक करिके, “कि ऊ हमे छियै?” कहिके ओकरा पुछे लाग्लै। 20ऊ ओकरासिके कहैल्कै, “ऊ तुहेंसब बारह चेलासिमेसे एकझन छैं, जे एखन हमरसंगे थारीमे रोटी खैछै। 21हमे, आदमीके बेटा धरमशास्त्रमे लिख्ल बमोजिम मर्बै, मगर हमरा गिरफ्तार करवाबैले हमर दुश्मनसिके सहायता करेवालाके बहुते खतरनाक सजाय मिल्तै। ऊ आदमीके ते जनमे नैहैतियै ते बढियाँ हैतियै।”

22तब खैबेरियाँ येशू रोटी ल्याके परमेश्वरके धन्यवाद देल्कै आर टुकरा कैल्कै आर चेलासिके द्याके कहैल्कै, “ले आर खो, यी हमर शरीर छै।” 23तब ऊ अंगुरके मद्दके बाटी लेल्कै आर परमेश्वरके धन्यवाद द्याके आपन चेलासिके देल्कै, तब ऊसब सभेको ओकरासे पिल्कै। 24तब ऊ ओकरासिके कहैल्कै, “यी अंगुरके मद्द हमर खून छै। हमर खून सभे आदमीके लिए बलिदानके रुपमे बहैल जैतै। यी बलिदान करारके पक्का कर्तै जे परमेश्वर आपन आदमीसिसे बान्हेवाला छै। 25सच्चे, हमे तोरासिके कहैछियौ, एकरबाद हमे अंगुरके मद्दसे उटा दिनतक नैपिबै, जबतक परमेश्वरके राज्यमे नया अंगुरके मद्द नैपिबै।” 26तब येशू आर ओकर चेलासब निस्तारके एकटा भजन गाबिके यरूशलेम सहरमहर गेलै आर लग्हैके जैतुन पहाडमे गेलै।

27जब ऊसब पहाड महर जैते रहै येशू ओकरासिके कहैल्कै, “तुहेंसब सभेको हमरा छोडिके भाग्भैं, कहिनेकी धरमशास्त्रमे लिख्ल बात सच हुएवाला छै, ओत्ते लिख्ल छै,

‘हमे हमर आदमीसिके भेंडाके जुगुर देखभाल करेवालाके जान मार्बै,

आर ऊसब भेंडाके जुगुर तितर बितर हैतै।’

28मगर हमे मुर्दासे जिन्दा भ्याके उठिके तोरसिसे पहेला हमे गालील जिलामे जैबौ आर तोरसिसे भेट कर्बौ।” 29पत्रुस ओकरा कहैल्कै, “सभेको छोडिके भाग्तै मगर हमे तोरा छोडिके कहियो नैभाग्भौं।” 30तब येशू ओकरा कहैल्कै, “सच्चे, हमे तोरासिके कहैछियौ, ऐजे राती मुर्गा दी बेर ऐजान दियैसे पहेला तुहें हमरा तीनबेर कहभैं कि हमे तोरा नैचिन्हैछिहौं।” 31मगर आरहौ ऊ कहैल्कै, “अगर हमरा तोरसंगे मरे भी पड्तै, तैय्योपर हमे कहियो नैकहभौं कि हमे तोरा नैचिन्हैछियौं।” अहिने करिके दोसर चेलासब भी इहे बात बोल्लै।

गेतसमनीके बगिच्चामे येशूके प्रार्थना

(मत्ती २६:३६-४६; लूक २२:३९-४६)

32तकरबाद येशू आर ओकर चेलासब गेतसमनी बगिच्चामे गेलै, आर ऊ आपन चेलासिके कहैल्कै, “हमे जबतक परमेश्वरसे प्रार्थना करैछियै तुहेंसब एथै बैठ।” 33तब ऊ पत्रुस, याकूब आर यूहन्नाके संगमे ल्यागेलै, आर ऊ बहुते दुःखित आर व्याकुल हुए लाग्लै रहे। 34ऊ ओकरासिके कहैल्कै, “हमर जान एतनें व्याकुल छै कि लागैछै हमर मौत हैछै। तुहेंसब एथै बैठ, आर जग्गा र।” 35-36तब येशू कने दूर जैके भुइयाँमे गिरिके परमेश्वरसे प्रार्थना कैल्कै। ऊ एरं कहिके प्रार्थना कैल्कै, “हमर पिता, अगर तोर योजनामे यी सम्भव छै ते, यी पिडा जे हमरापर आबेवाला छै हट्या द्या, सभे चीज तोर लिए सम्भव छौं, यी पिडाके हमरापर नैआबैले दह, तैय्योपर हमर इच्छा कैल जुगुर नै, तोर इच्छा कैल जुगुर कर।” 37जब येशू वापस ऐलै तीनटा चेलासिके सुत्ल देखल्कै। ऊ पत्रुसके कहैल्कै, “सिमोन, कि तुहें सुत्ल छैं? कि एक्को घण्टा जग्गा नैरहे सक्लहैं? 38जग्गा र, प्रार्थना कर ताकी तुहेंसब परीक्षामे नैपड। तोर ह्रदय, हमे जे कहैछियौ से करैले ते सच्चे तैय्यार छौ, मगर तोर शरीर कमजोर छौ।” 39ऊ फेर एकबेर जैके उहे शब्दमे प्रार्थना कैल्कै। 40जब येशू फेर ओकरसिके लगत ऐलै ओकरासिके सुत्ल देखल्कै, कहिनेकी ओकरसिके आँख निनबास्ल रहै, जब ऊ ओकरासिके उठैल्कै तब ऊसब ओकरा कोनो जबाब दिए नैसकल्कै। 41ऊ तेसर बेर ऐलै, आर ओकरासिके कहैल्कै, “कि तुहेंसब आरहौ सुतैछैं आर आराम करैछैं? तुहेंसब बहुते सूती गेल्हैं, देख! हमर लिए समय ऐल छै, हमे, आदमीके बेटा पापीसिके हातमे पक्डा पडेवाला छियै। 42उठ्, चल। देख, हमरा पकडवाबैले सहायता करेवाला लग्हैमे छै।”

येशूके गिरफ्तारी

(मत्ती २६:४७-५६; लूक २२:४७-५३; यूह १८:३-१२)

43जब येशू बोल्तहैं रहै, बारह चेलासिमेसे एकटा यहूदा स्करियोत अचानक ओत्ते ऐलै। प्रमुख पुजारीसब, यहूदी धरमशास्त्रके पण्डितसब आर यहूदी आदमीसिके अगुवासिके द्वारा भेज्ल एकटा बडका दल तलवार आर लाठी ल्याके ओकरसंगे ओत्ते ऐलै। 44यहूदा स्करियोत, जे येशूके पकडवाबैले सहायता कर्ते रहै, भीडके एरंको एकटा इशारा देल्कै रहे, “जकरा हमे प्रणाम गुरुजी कहिके अभिवादन कर्बौ ऊ आदमी उहे छौ, ओकरा पकड आर पहरा द्याके ल्याजो।” 45तब सिधे येशूके लगत जैके यहूदा स्करियोत कहैल्कै, “हे गुरुजी आर ओकरा चुम्मा लेल्कै।” 46तब ऊसब येशूके पक्डल्कै आर गिरफ्तार कैल्कै। 47येशूके लगतमे खडा भेलमे से एकझन तलवार निकालीके प्रधान पुजारीके नोकरके हमला कैल्कै, जकरासे ओकर कान कटी गेलै। 48येशू ओकरासिके कहैल्कै, “कि तुहेंसब एकटा डकेतके पक्डैके जुगुर हमरा गिरफ्तार करैले तलवार आर लाठी ल्याके ऐल्हैं छे? 49सभे दिन हमे तोरासिके परमेश्वरके मन्दिरमे सिखैते रहियै, मगर तुहेंसब हमरा गिरफ्तार नैकैल्हैं। मगर यीसब सेल्याके भेलै कि धरमशास्त्रमे लिख्ल बात पुरा है।” 50तब सभे चेलासब ओकरा छोडिके भाग्लै। 51आपन शरीरके खाली एकटा चद्दर ल्याके लपेटल एकटा जवान ओकर पाछु लाग्लै। ऊसब ऊ जवान आदमीके पक्डल्कै, 52मगर ऊ आपन चद्दर छोडिके नंगे भाग्लै।

येशू यहूदी महासभाके समनामे

(मत्ती २६:५७-६८; लूक २२:५४-५५,६३-७१; यूह १८:१३-१४,१९-२४)

53तब ऊसब येशूके प्रधान पुजारीके घरमे ल्यागेलै, आर ओत्ते सभे प्रमुख पुजारीसब, यहूदी आदमीसिके अगुवासब, आर यहूदी धरमशास्त्रके पण्डितसब ओत्ते जमा भेलै रहे। 54पत्रुस दुर्हैसे प्रधान पुजारीके घरमे ऐगनके भितरमे ओकर पाछु-पाछु गेलै, आर ओत्ते ऊ मन्दिरके सिपाहीसिके संगे बैठिके आगिन तापे लाग्लै। 55तब प्रमुख पुजारी आर सभे महासभाके आदमीसब येशूके मारैले ओकर विरुद्धमे गवाही खोजे लाग्लै, मगर कुछु नैपैल्कै। 56बहुते आदमीसब ओकर विरुद्धमे झुट्ठा गवाही देल्कै। मगर ओकरसिके देल गवाही दोसर आदमीसिके देल गवाहीसे मेल नैखैल्कै। 57कोय-कोय खडा भ्याके एरं कहिके ओकर विरुद्धमे गवाही देल्कै, 58यी आदमीके एरं कहेल हमेसब सुन्लियै, “आदमीके हातसे बनैल यी परमेश्वरके मन्दिर हमे तोड्बै, आर तीन दिनमे दोसर मन्दिर हमे बनैबै जे आदमीके हातसे नैबन्ल हैतै।” 59मगर एक्रहौमे ओकरसिके देल गवाही दोसर आदमीसिके देल गवाहीसे मेल नैखैल्कै। 60तब प्रधान पुजारी सभाके सामने खडा भ्याके येशूके पुछल्कै, “कि तोरलगत कोनो जबाब नैछौ? यी आदमीसब तोर विरुद्धमे देल गवाही कोन्ची छौ?” 61मगर येशू चुपचाप रहलै, आर कुछु जबाब नैदेल्कै। फेर प्रधान पुजारी ओकरा पुछल्कै, “कि तुहें परमधन्य परमेश्वरके बेटा ख्रीष्ट छैं?” 62येशू कहैल्कै, “हमे छियै, आब तुहेंसब हमे, आदमीके बेटाके परमेश्वरके दहिना हातके बगल शक्तिके स्थानमे बैठ्ल आर तुहेंसब हमरा बादलसे घेर्ल स्वर्गसे ऐते देख्भैं।” 63जब प्रधान पुजारी येशूके बात सुनल्कै तब ऊ आपन कपडा गोस्सासे चिरिके कहैल्कै, “हमरासिके दोसर साक्षीके कोनो जरुरी नैछै। 64तुहेंसब ईश्वर निन्दा ते सुन्बे कैल्हैं। तोरसिके कि विचार छौं?” तब सभाके सभे सदस्यसब सहमत भेलै कि येशू दोषी छै आर मृत्युदण्डके योग्य छै कहिके ठहरैल्कै। 65तब कोय-कोय ओकरा थुके लाग्लै, आर ओकर मुख झाँपीके थप्पड ठोकिके कहैल्कै, “अगर तुहें परमेश्वरके वक्ता छैं ते हमरासिके बता के तोरा थप्पड मैल्कौ।” तकरबाद परमेश्वरके मन्दिरके सिपाहीसब ओकरा आपन जिम्मा लेल्कै आर ओकरा मुक्का मैल्कै।

पत्रुस येशूके इन्कार कैल्कै

(मत्ती २६:६९-७५; लूक २२:५६-६२; यूह १८:१५-१८,२५-२७)

66जब पत्रुस ऐगनमे घुर ताप्ते रहै प्रधान पुजारीके नोकरनीमेसे एकझन ओत्ते ऐलै, 67आर पत्रुसके आगिन ताप्ते देखिके ओकरा कहैल्कै, “तहुँ ते नासरत गाँव निवासी येशूके संगे रहैं।” 68मगर ऊ एरं कहिके इन्कार कैल्कै, “तुहें कि कहैछैं, उटा बात हमे नैते जानैछियै नैते बुझैछियै।” तब ऊ ओत्तेसे ऐगनके मूल केबाड महर गेलै। तब मुर्गा ऐजान देल्कै। 69ऊ नोकरनी ओकरा ओत्ते खडा भेल देखल्कै तब ओत्ते खडा भेल आदमीसिके फेर कहे लाग्लै, “यी आदमी ते येशूके चेला छै।” 70मगर पत्रुस फेर इन्कार कैल्कै। मगर कनेबेरके बाद ओत्ते अगल-बगलके आदमीसब फेर पत्रुसके कहे लाग्लै, “तोर बोलीसे लागैछौ कि तुहें भी गालील जिलाके रहेवाला छैं। सेल्याके यी निश्चित छै कि तुहें ओकर चेलासिमेसे एकटा छैं।” 71मगर पत्रुस अपने आपके सराप देल्कै आर कहे लाग्लै, “हमे कसम खैके सच बोलैछियै कि जकर विषयमे तुहेंसब कहैछैं ऊ आदमीके हमे नैचिन्हैछियै।” 72तब तुरन्ते मुर्गा ऐजान देल्कै, आर पत्रुसके येशूके कहेल बात याद ऐलै, “मुर्गा दी बेर ऐजान दियैसे पहेला तुहें हमरा तीनबेर इन्कार कर्भैं।” तब पत्रुस उटा बात सम्झिके जोर-जोरसे कान्लै कहिनेकी ऊ दुखित भेलै रहे कि ऊ येशूके नैचिन्हैछियै कहिके कहैल्कै रहे।

Currently Selected:

मर्कूस 14: KYVNT

Highlight

Copy