मत्ती 25

दस कुंवारी मन कर अहना

1सरग कर राएज हर ओ दस कुंवारी मन कस हवे, जेमन अपन मसाल ला धएर के दुलहा जग भेंट करे बर गईन। 2ओमन में ले पांच झेमन बोया अऊ पांच झेमन होसियार रहीन 3बोया कुंवारी मन मसाल मन ला तो लेहीन बकिन अपन संगे अगराहा तेल नई ले गईन। 4बकिन होसियार कुंवारी मन अपन-अपन मसाल कर संगे एगोट भांड़ा में अऊ तेल ले गईन। 5दुलहा कर आए में अबेर होईस, त ओमन के झपकी आए लागीस अऊ ओमन सूईत गईन।

6आधा राती एगोट किरलाए कर अवाज आईस कि “देखा, दुलहा हर आवत हवे, ओकर जग भेंट करे बर बाहरी चला।” 7तब सब कुंवारी मन जाएग गईन अऊ अपन-अपन मसाल ला ठीक करे लागीन। 8त बोया कुंवारी मन होसियार कुंवारी मन ला कहीन, “अपन तेल में ले दम भेर हमू मन के देआ, काबरकि हमर मसाल मन बितावथें।” 9बकिन होसियार कुंवारी मन जबाब देहीन, नहीं, हमके लागथे कि हमर बर अऊ तुमन बर तेल नई पुरही, एकरे ले तुमन तेल बेंचोईया मन ठे जावा अऊ अपन बर तेल बेसाए के ले आना। 10बकिन जब ओमन तेल बेसाए बर गईन, त दुलहा हर आए गईस, जे कुंवारी मन तियार रहीन, ओमन ओकर संगे बिहाओ कर भोज में भीतरी गईन अऊ दुरा हर ढकाए गईस। 11पाछू ओ आने कुंवारी मन आईन अऊ कहीन, “ए मालीक, ए मालीक, हमर बर दुरा ला उघाएर दे।” 12बकिन ओहर जबाब देहीस, मंए तुमन ला फूरोंच कहथों, मंए तुमन ला नई जानों। 13तेकर ले, सचेत रहा, काबरकि तुमन तो ओ दिन ला नई जानत हवा अऊ ओ घरियो ला नई जानत हवा।

सिक्का मन कर अहना

(लूका 19:11-27)

14तेकर ईसू हर कहीस “सरग कर राएज हर ओ मईनसे कस हवे, जेहर परदेस जात घनी अपन हरवाह मन ला बलाईस अऊ अपन संपती मन ला ओमन के सोंएप देहीस। 15सबेच झन ला ओहर ओमन कर अवसान कर अनुसार देहीस, एक झन हरवाह ला ओहर पांच हजार सिक्का अऊ दूसर झन ला दुई हजार सिक्का अऊ तीसर झन ला एक हजार सिक्का देहीस, तेकर ओहर परदेस चएल देहीस। 16जे हरवाह ला पांच हजार सिक्का मिले रहीस, ओहर तुरतेंच गईस अऊ ओ सिक्का ले लेन-देन कएर के पांच हजार सिक्का अऊ कमाए लेहीस। 17वईसनेच जे हरवाह ला दुई हजार सिक्का मिले रहीस, ओहू हर दुई हजार सिक्का अऊ कमाईस। 18बकिन जे हरवाह ला एक हजार सिक्का मिले रहीस, ओहर गईस अऊ भुईयां ला कोएड़ के उहां मालीक कर सिक्का ला तोएप देहीस।

19ढेरेच दिन कर पाछू, ओ हरवाह मन कर मालीक हर फिर के आईस अऊ ओमन जग हिसाब मांगीस। 20जे हरवाह ला पांच हजार सिक्का मिले रहीस, ओहर पांच हजार सिक्का अऊ लेके आईस अऊ कहीस, ‘मालीक, तंए मोके पांच हजार सिक्का देहे रहे। देख मंए पांच हजार सिक्का अऊ कमाए हवों।’ 21ओकर मालीक हर कहीस, ‘साबास, ए बढ़िहां अऊ ईमानदार हरवाह, तंए थोरहें अकन में भरोसा करे लाएक रहे, मंए तोके ढेरेच चीज मन कर ऊपरे अधिकार देहूं। आओ अऊ अपन मालीक कर खुसी में सामिल होए जा।’

22जे हरवाह ला दुई हजार सिक्का मिले रहीस, ओहर आईस अऊ कहीस, ‘मालीक तंए मोके दुई हजार सिक्का देहे रहे, देख मंए दुई हजार सिक्का अऊ कमाए हवों।’ 23ओकर मालीक हर कहीस, ‘सबास, ए बढ़िहां अऊ ईमानदार हरवाह, तंए थोरहें अकन में भरोसा करे लाएक रहे, मंए तोके ढेरेच चीज मन कर ऊपरे अधिकार देहूं। आओ, अऊ अपन मालीक कर खुसी में सामिल होए जा।’

24तब जे हरवाह ला एक हजार सिक्का मिले रहीस, ओहूच हर आईस अऊ कहीस, ‘मालीक मंए जानत रहे कि तंए कठोर मईनसे हवस, जेला तंए नई बूनस, ओला तंए लूथस। अऊ जिहां तंए कोनो बिहन नई डालस, उहां ले तंए फसल सकेलथस, 25एकरे ले मंए डराए गएं अऊ बाहरी जाए के मंए तोर सिक्का मन ला भुईयां में गड़ियाए देहें, एजग हवे तोर सिक्का हर ले ले।’ 26ओकर मालीक हर कहीस, ‘ए दुस्ट अऊ आलसी हरवाह! जब तंए जानत रहे कि जेला मंए नई बूनों, ओला मंए लुथों अऊ जिहां मंए बिहन नई डालों, उहां ले सकेलथों।’ 27‘त तंए मोर सीका ला, बियाज में काबर नई लगाए, तेमेकि मंए वापिस आए के बियाज सहीत ले लेतें?’ 28एकरले ए सिक्का मन ला एकर ठन ले ले लेवा, अऊ ओके दे देआ जेकर जग दस हजार सिक्का हवे। 29काबरकि जेकर जग हवे ओके ला अऊ देहल जाही, अऊ ओकर जग ढेरेच होए जाही, बकिन जेकर जग नईए ओकर जग ले ओहू ला ले लेहल जाही, जेहर ओकर जग हवे। 30ए बेकार हरवाह ला बाहरी अंधार में फेंक देआ, जिहां ओहर रोही अऊ अपन दांत चाबही।”

नियाओ कर दिन

31जब मईनसे कर बेटा हर अपन महिमा में आही अऊ सबेच सरगदूत मन ओकर संगे आहीं, त ओहर अपन महिमा कर सिहासन में बईठही। 32ओकर आगू में संसार कर सबेच मईनसे मन ला लानहीं, जेकस चरवाहा हर अपन भेंड़ी मन ला अऊ छेरी मन ला अलगे करथे, ओही कस ओहर मईनसे मन ला एक दूसर ले अलगे करही। 33ओ भेंड़ी मन ला अपन जवनी कती अऊ छेरी मन ला अपन डेरी कती करही। 34तब राजा हर अपन जवनी कती कर मईनसे मन ला कही, तुमन मोर दाऊ कर आसीस पावल मईनसे हवा। आवा अऊ ओ राएज कर हकदार बएन जावा, जेहर तुमन बरीक संसार कर सिरजे कर समय ले तियार करल गईस हवे। 35काबरकि मंए भूखे रहें अऊ तुमन मोके खाना खवाया, मंए पियासा रहें अऊ तुमन मोके पानी पियाया, मंए परदेसी रहें अऊ तुमन मोके घर में राखा। 36मंए उघरा रहें अऊ तुमन मोके ओढ़ना पहीनाया, मंए बेमार रहें अऊ तुमन मोर देखभाल करा, मंए जेहल में रहें अऊ तुमन मोर जग भेंट करे बर आया।

37तब धरमी मन ओके कहीं, “ए परभू, हमरे कब तोके भूखा देखेन अऊ तोके खाना खवाएन आखिर कब तोके पीयासे देखेन अऊ तोके पानी पीयाएन? 38हमरे कब तोके परदेसी कर रूप में देखेन अऊ अपन घर में राखेन आखिर कब तोके उघरा पाएन। अऊ हमरे तोके ओढ़ना पहिराएन? 39हमरे कब तोके बेमरिहा आखिर जेहल में देखे गएन अऊ तोर जग भेंट करे बर आएन।”

40तब राजा हर ओमन ला ए जबाब देही, “मंए तुमन ला फूरोंच कहथों कि जे जाएत तुमन मोर ए छोटे ले छोटे भाई मन ले कोनो एक झन बर करे हवा, त तुमन ओला मोर बर करे हवा।”

41तब राजा हर अपन डेरी कती कर मईनसे मन ला कही, तुमन सरापित मईनसे हवा, मोर जग ले दुरीहां हटा अऊ तुमन हमेसा बर आगी में चएल देआ, जेला सैतान अऊ ओकर दूत मन बर तियार करल गईस हवे। 42काबरकि मंए भूखा रहें अऊ तुमन मोके खाना नई खवाया, मंए पियासा रहें अऊ तुमन मोके पानी नई पियाया। 43मंए परदेसी रहें अऊ तुमन मोके अपन घर में नई राखा, मंए उघरा रहें अऊ तुमन मोके ओढ़ना नई पहिराया, मंए बेमरिहा अऊ जेहल में रहें अऊ तुमन मोर जग भेंट करे बर नई आया।

44तब ओमन कहीं, “ए परभू, हमरे कब तोके भूखा चाहे पियासा, चाहे परदेसी, चाहे उघरा, चाहे बेमार, चाहे जेहल में देखेन अऊ तोर सेवा नई करेन?” 45तब राजा हर ओमन ला ए जबाब देही, “मंए तुमन ला फूरोंच कहथों कि जे जाएत तुमन मोर ए छोटे ले छोटे भाई मन ले, कोनो एक झन कर सेवा नई करे हवा, त तुमन मोरोच सेवा नई करे हवा। 46तब एमन हमेसा कर दंड भोगहीं, बकिन परमेस्वर ला फुरमा करोईया मन अमर जिनगी पाहीं।”

Currently Selected:

मत्ती 25: SGJ

Highlight

Copy