लूका 14

एगोट पबितर दिन में ईसू चंगा करथे

1एगोट पबितर दिन में ईसू हर, फरीसी मन कर एक झन, मुखिया कर घरे खाए बर गईस, अऊ सब झे ओके धियान लगाए के देखत रहीन। 2सुना, उहां ओकर आगू में एक झन मईनसे रहीस, जेके ला हाथ-गोड़ फूले कर बेमारी रहीस। 3ईसू हर फरीसी मन, अऊ यहूदी कानहूंन कर सिखोईया मन जग पूछीस, “का पबितर दिन में बेमारी ले चंगाई हर, कानहूंन कर अनुसार ठीक हवे कि नहीं?” 4बकिन ओमन कले-कस रहीन, अऊ जबाब नई देहीन, तेकर ईसू हर ओके ला छुई के चंगा करीस, अऊ जाए देहीस। 5फेर ईसू हर ओमन ला पूछीस, “अगर तुमन कर गदहा, चाहे बईला हर, पबितर दिन में कुंआ में गिर जाही, त तुमन ओला झटेच के बाहरी नई निकालिहा का?” 6ओमन ए गोएठ कर कांहीच जबाब देहे नई सकीन।

ईसू नरम होए बर सीखाथे

7जे घनी ईसू हर देखीस, कि नेवताहारी मन बिहाओ में खाए घनी, कईसे मुख-मुख जघा में जाए के बईठे बर करथें, त एगोट अहना ओमन ला कहीस। 8जे घनी कोनो हर तोके बिहाओ में बलाही, त सबले मुख जघा में झईन बईठबे, काबरकि होए सकथे कि, कहों घरदार हर तोरो ले कोनो बड़खा, मईनसे ला नेवता देहीस होही। 9अऊ जे घरदार हर तुमन दुनो झन ला नेवता देहीसे, ओहर आए के तोके कही, एके ला बईठे बर तोर जघा ला दे दे, ते घनी तोके लजाए के, सबले पाछू जघा में बईठे बर परही। 10बकिन जे घनी तोके बलाहीं, त सबले पाछू जाए के बईठबे, तेमेकि जेहर तोके बलाईस हवे, ओहर आए के तोके ला कही, “ए भाई, तंए आगू जाए के मुख जघा में बईठ” ते घनी सब पहुना मन कर आगू में, तोर माएन-मरजाद होही। 11काबरकि जे कोनो हर अपन-आप ला बड़खा समझही, ओके परमेस्वर छोटे करही, अऊ जे कोनो हर अपन-आप ला छोटे समझही, ओके परमेस्वर बड़खा करही।

12तेकर ईसू हर अपन नेवता देवईया ला कहीस, “जे घनी तंए कोनो ला, मझेनी चाहे बियारी खाए बर नेवता देबे, त तंए अपन संगता, चाहे भाई मन ला, चाहे नात कुटुंब, चाहे धनी परोसी मन ला झईन बलाबे, कहों एकस झईन होए कि, ओहू मन तोके नेवता देहीं, अऊ तोर पलटा होए जाही। 13बकिन जे घनी तंए बड़खा भोज करबे, त गरीब, लूलहा, खोरा अऊ अंधा मन ला बलाबे। 14त परमेस्वर तोके आसीस देही, काबरकि ओमन जग तोके पलटा देहे बर कांही नईए। बकिन एकर परतिफल तोके ओ घनी मिलही, जे घनी परमेस्वर कर देख में, बढ़िहां जिनगी जीवोईया मन जी उठहीं।”

एगोट बड़खा भोज कर अहना

(मत्ती 22:1-10)

15ए गोएठ ला सुईन के, ईसू कर संगे खवईया मन में ले, एक झन हर कहीस, “धन्य हवे ओहर, जेहर परमेस्वर कर राएज कर बड़खा भोज में खाही।” 16ईसू हर, ओके ला एगोट कहनी कएह के जबाब देहीस, “कोनो मईनसे हर एगोट बड़खा भोज कर तियारी करीस, अऊ ढेरेच झन ला नेवता देहीस। 17जे घनी खाना-पीना हर तियार होए गईस, त ओहर अपन दास ला, अपन नेवताहारी मन ला कहे बर भेजीस, कि आवा, सब जाएत हर तियार होए गईसे। 18बकिन सबेच झेमन बहाना करे लागीन, एक झन हर ओके ला कहीस, ‘मंए अझेर एगोट खेत बेसाए हों, मोके ओला देखे जाए बर जरूरी हवे, मंए तोर जग बिनती करत हों, कि मोके छमा कएर दे।’ 19दूसर झन हर कहीस, ‘मंए पांच जोड़ा बईला बेसाए हों, अऊ ओमन ला तजबीजे बर जाथों, मंए तोर जग बिनती करत हों, कि मोके छमा कएर दे।’ 20एक झन हर अऊ कहीस, ‘मंए अझेर बिहाओ करे हों, एकरले मंए नई आए सकों।’ 21ओ दास हर वापिस आए के अपन मालीक जग, ए सब गोएठ ला बताईस, तेकर घर कर मालीक हर जंगाए के, अपन दास ला कहीस, सहर कर बजार अऊ गली मन में, झटेच के जा अऊ गरीब, लूलहा, खोरा, अऊ अंधा मन ला एजग ले लान। 22फेर दास हर कहीस, ‘ए मालीक जेकस तंए कहे रहे, ओही कस मंए करें, तबो ले अऊ जघा खाली हवे।’ 23मालीक हर कहीस, ‘सड़क अऊ गांव कती कर, गली मन में जा, अऊ मईनसे मन ला केलोली कएर के ले लान, तेमेकि मोर घर हर भएर जाए। 24काबरकि मंए तुमन ला कहथों, कि जेमन ला आगू नेवता मिले रहीस, ओमन में ले कोनोच मन, मोर भोज ला चिखे नई पाहीं।’”

ईसू कर चेला बने कर कीमत

(मत्ती 10:37-38)

25जे घनी बड़खा भीड़ हर, ईसू कर संगे जात रहीस, त ईसू हर पिछूवाए के ओमन ला कहीस, 26“अगर कोनो हर मोर चेला बने बर चाही, अऊ अपन दाई-दाऊ अऊ अपन भाई-बहिन, अऊ अपन परानी, अऊ अपन लईका मन ला हां, अपन परानोच ला, मोर ले ढेरेच मया करही, त ओहर मोर चेला नई होए सके। 27अऊ जे कोनो हर अपन कुरूस उठाए के मनेकी दुख सएह के मोर पाछू नई आही, त ओहूच हर मोर चेला नई होए सके।”

28“माएन लेआ कि अगर तुमन में ले कोनो हर, एगोट बड़खा घर बनाए बर करथे, त बनाए कर आगू बईठ के खरचा ला जरूर जोड़ही, कि ओकर जग घर ला बनाए बर, पईसा हवे कि नईए। 29कहों एकस झईन होए, कि ओहर नेंव कोएड़ के घर ला पूरा करे नई सकही, त जेमन ओके देखहीं, ओमन हंसे लागहीं। 30अऊ ओमन कहीं कि ‘ए मईनसे हर घर बनाए बर तो सुरू करीस, बकिन बनाए नई सकीस?’ 31माएन लेआ कि कोनो राजा हर, दूसर राजा जग लड़ाई लड़े बर जवईया हवे, त ओहर आगू अपन मंतरी मन कर संगे बईठ के, बिचार नई करही कि हमर दस हजार सैनीक मन, ओकर बीस हजार सैनीक मन जग लड़े बर सकहीं कि नहीं। 32अगर ओकर जग लड़े बर नई सकहीं, त दूसर राजा कर दुरीहां रहते भेर में, ओहर अपन खभरीहा मन ला भेज के, सूला-नामा करे बर चाही। 33एहीच कस तुमन में ले, जे कोनो हर अपन सब जाएत ला छोंएड़ नई देही, त ओहर मोर चेला नई बएन सके।#14:33 अगर कोनो हर परभू कर चेला बने बर चाही, त ओके एगोट कीमत चुकाए बर परही। मनेकि अपन सब जाएत ला परभू के देहे बर परही। अपन परान ला भी परभू के देहे बर परही। ”

बिगर सवाद कर नोन कस झईन बना

(मत्ती 5:13; मरकुस 9:50)

34नोन हर तो बढ़िहां हवे, बकिन अगर नोन कर सवाद हर खतम होए जाही, त ओला फेर कईसे नोनछीर बनाल जाही? 35एहर तो भुईंया कर काम अऊ खातू बनाए कर काम में नई आवे, ओला तो बाहरी फेंक देथें, जेमन सुने बर तियार हवा, ओमन सुईन लेआ अऊ समेझ लेआ।

Currently Selected:

लूका 14: SGJ

Highlight

Copy