यूहन्ना 13

ईसू हर अपन चेला मन कर गोड़ धोथे

1फसह तिहार कर ठीक आगू दिन, ईसू हर जाएन गईस, कि ए संसार ला छोंएड़ के, मोर दाऊ जग जाए कर घरी हर आए गईस हवे। ओकर ऊपरे बिस्वास करोईया मन ला ओहर जेकस मया करत रहीस, ओही कस ओमन ला आखरी घरी तक मया करतेच रहीस।

2ईसू अऊ ओकर चेला मन बियारी खात रहीन। ओकर ले आगू, सैतान हर समोन कर बेटा यहूदा इसकरोती कर मन में, ए बात ला डाएल दारे रहीस कि ईसू ला ओहर धोखा देके धरुवाए। 3ईसू हर एला जानत रहीस कि दाऊ हर, सब जाएत ला मोर हाथ में सोंएप देहीस हवे, अऊ मंए परमेस्वर जग ले आए हों, अऊ ओकरेच जग फेर जाहूं। 4तेकर ओहर खात रहीस तेला छोंएड़ के उठीस, अऊ अपन ऊपर कर ओढ़ना ला निकालीस अऊ एगोट सांफी ला लेके, अपन कनिहां में लपेट लेहीस। 5तेकर ओहर एगोट छिपा में पानी भएर के, अपन चेला मन कर गोड़ ला धोए लागीस, अऊ जे सांफी ला अपन कनिहां में लपेटे रहीस, ओही में ओमन कर गोड़ ला पोंछे लागीस। 6जब ईसू हर समोन पतरस कर लिघे गईस, त पतरस हर ओके कहीस, “ए परभू, का तंए मोर गोड़ ला धोए बर जाथस?”

7ईसू हर जबाब देहीस, “जेला मंए करत हों, ओला तंए अझेर नई समझस, बकिन पाछू तंए समेझ जाबे।” 8पतरस हर ईसू ला कहीस, “तंए मोर गोड़ ला कभों नई धोए पाबे” एला सुईन के ईसू हर पतरस ला कहीस, “अगर मंए तोर गोड़ ला नई धोहूं, त मोर संगे तोर कोनोच नाता नई रही।” 9समोन पतरस हर ओके कहीस, “ए परभू, तंए मोर गोड़ेच ला नहीं, बकिन मोर हाथ अऊ मूड़ोच ला धोए दे।”

10तेकर ईसू हर ओके ला कहीस, “जेहर असनान कएर दारीस हवे, सिरीप ओकर गोड़ ला धोए कर जरूरत हवे, काबरकि ओहर पूरा तरह ले सफा हवे। तुमन में ले एक झन कर छोंएड़, तुमन सब कोनो सफा हवा।” 11[काबरकि ओहर तो जानत रहीस कि ओके कोन धरुवाही, तेकर ले ओहर कहीस, “तुमन में ले एक झन हर सफा नईए।”]

12जब ईसू हर, अपन चेला मन कर गोड़ ला धोए दारीस, त अपन ऊपर कर ओढ़ना ला पहिर के फेर खाए बर बईठ गईस, त ओमन ला पूछीस “का तुमन समझा कि मंए तुमन कर संगे का करें? 13तुमन मोके गुरू अऊ परभू कथा, अऊ ठीकेच कहथा, काबरकि मंए ओही लागों। 14अगर मंए परभू अऊ गुरू होइयोच के तुमन कर गोड़ धोएं, त तुंहू मन ला एक दूसर कर गोड़ धोए बर चाही। 15काबरकि मंए तुमन के नमूना देखाए देहे हों, कि जेकस मंए तुमन कर संगे करे हों, तुंहू मन ओही कस करीहा। 16मंए तुमन ला फूरोंच कहथों, सेवक हर अपन मालीक ले बड़े नई होए, अऊ भेजल मईनसे मन अपन भेजोईया ले बड़े नई होएं। 17जे बात मन ला मंए तुमन जग गोठियाएं, अगर ओला तुमन समेझ जईहा अऊ ओला मानिहा, त आसीस पईहा। 18मंए तुमन सबेच झन कर बारे में नई कहथों। मंए ओमन ला जानथों, जेमन ला मंए चुईन लेहे हों। बकिन पबितर किताब कर बचन में जेकस लिखल हवे, ओला पूरा होए बर जरूरी हवे, ‘जेहर मोर रोटी खाईस ओहीच हर मोर बिरोध में होए गईस।’ 19ए सब जाएत ला होए कर पहिले, अब मंए तुमन ला ए बताए देहथों कि जब एहर पूरा होए जाही, त तुमन बिस्वास करीहा कि मंए ओही लागों। 20मंए तुमन के फूरोंच कहथों, जेहर मोर भेजोईया ला अपनाथे, ओहर मोके अपनाथे अऊ जेहर मोके अपनाथे, ओहर मोर भेजोईया ला अपनाथे।”

ईसू ला धोखा देथें तेकर बारे में अगमबानी करथे

(मत्ती 26:20-25; मरकुस 14:17-21; लूका 22:21-23)

21ए बात मन ला कहिके, ईसू हर अपन आत्मा में ढेरेच बेयाकुल होईस अऊ गवाही देहीस, “मंए तुमन ला फूरोंच कहथों कि तुमन में ले एक झन हर मोके धरुवाही।” 22त चेला मन दुबिधा में पड़ गईन, अऊ एक दूसर के देखे लागीन, काबरकि ओमन समेझ नई पाईन कि ओहर काकर बारे में कहत हवे। 23ओकर चेला में ले एक झन, जेके ला ईसू हर ढेर मया करत रहीस, ओहर ईसू कर छाती कती झुईक के बईठे रहीस। 24तब समोन पतरस हर, ओ चेला कती इसारा कएर के कहीस, “ईसू जग पूछ कि ओ काकर बारे में कहथे?” 25तेकर ओ चेला हर ईसू कर छाती कती, ओहीच कस झुईक के ओके ला पूछीस, “ए परभू, बता, ओहर कोन लागे?”

26त ईसू हर कहीस, “जेके ला मंए ए रोटी कर टुटका ला कटोरा में बोएथ के देहूं, ओहीच हर ओ मईनसे लागे।” अऊ ईसू हर रोटी कर टुटका ला बोएथ के, समोन कर बेटा यहूदा इसकरोती ला देहीस। 27यहूदा हर ओ रोटी कर टुटका ला लेहीस, त ईसू हर ओकर जग कहीस “तंए जे जाएत करे बर जाथस, ओला हालू कर।” अऊ सैतान हर ओकर ऊपरे समाए गईस। 28(बकिन ओ जग बईठल में ले कोनो नई जानीन, कि ईसू हर यहूदा जग ओकस काबर कहीस। 29यहूदा जग पईसा कर थईला रहत रहीस। ओकरे ले कोनो मन समझीन कि ईसू हर ओके कहथे, हमके तिहार में जे जाएत चाही ओला बेसाए लान, आखिर गरीब मन ला कांही दे दे।) 30यहूदा हर ओ रोटी कर टुटका ला लेहे कर पाछू, तुरतेंच बाहरी निकेल गईस, (अऊ ओ घरी राएत रहीस।)

नांवा अगियां

31जब यहूदा हर चएल देहीस, त ईसू हर कहीस, “अब मंए मईनसे कर बेटा, मोर महिमा होईस, अऊ मोर द्वारा परमेस्वर कर महिमा होईसे। 32अगर मंए मईनसे कर बेटा, मोर जरिए परमेस्वर कर महिमा होईस हवे, त परमेस्वर हर भी अपन जरिए मोर महिमा करही अऊ हालुच करही। 33ए मोर दुलरुवा मन, मंए अऊ तनिक जुआर बर तुमन जग रहूं। तुमन मोके खोजिहा, अऊ जेकस मंए यहूदी नेता मन ला कहे रहें, ओही कस तुहूंच मन ला कहथों कि जिहां मंए जाथों, उहां तुमन जाए नई सखीहा। 34मंए तुमन ला एगोट नांवा अगियां देहथों, कि एक दूसर ठन मया करा। जेकस मंए तुमन जग मया करे हों, ओही कस तुंहूच मन एक दूसर ले मया करा। 35अगर तुमन एक दूसर ले मया करीहा, त सब मईनसे मन जानहीं कि तुमन मोर चेला लागा।”

पतरस कर इनकार कर बारे में ईसू हर बताथे

(मत्ती 26:31-35; मरकुस 14:27-31; लूका 22:31-34)

36समोन पतरस हर ईसू जग कहीस, “ए परभू, तंए कहां जाथस?” त ईसू हर कहीस, “जिहां मंए जाथों, तंए उहां अझेर मोर पाछू आए नई सकस, बकिन एकर पाछू तंए आबे।” 37तेकर पतरस हर ओके कहीस, “ए परभू, अझेर मंए तोर पाछू काबर नई आए सकों? मंए तो तोर बर, अपन परानोच ला दे देहूं।”

38ईसू हर पतरस जग कहीस, “का सहीच में तंए मोर बर अपन परान ला देबे? मंए तोर जग फूरोंच में कहत हों कि मुरगा बासे ले आगू, तंए तीन दाएर मोर इनकार करबे।”

Currently Selected:

यूहन्ना 13: SGJ

Highlight

Copy