यूहन्ना 1

बचन हर मईनसे बनीस

1सब जाएत ला सिरजे ले आगू बचन रहीस, अऊ बचन परमेस्वर कर संगे रहीस, अऊ बचन हर परमेस्वर रहीस। 2एही बचन हर सब जाएत ला सिरजे ले आगू, परमेस्वर कर संगे रहीस। 3ए बचन कर जरिए, परमेस्वर हर सब जाएत ला सिरजीस हवे, जे जाएत हर सिरजल हवे, ओ सब जाएत हर ओकरे द्वारा सिरजीस हवे। 4ओमे जीवन रहीस, अऊ ओ जीवन हर मईनसे मन ला इंजोर देहत रहीस। 5इंजोर हर अंधार में चमकथे, अऊ अंधार हर ओला बितुवाए नई सके।

6परमेस्वर हर एक झन ला भेजीस अऊ ओहर आईस, जेकर नांव यूहन्ना#1:6 एहर बतिस्मा देवईया यूहन्ना रहीस। रहीस। 7एहर एकरले आईस कि ओ इंजोर कर गवाही देहे, तेमेकि ओकर जरिए सब कोनो बिस्वास करें। 8यूहन्ना हर तो खुद इंजोर नई रहीस। बकिन एकर बर आए रहीस, कि ओ इंजोर कर गवाही दे। 9सबेच मईनसे मन ला सही डगर देखोईया, सचा इंजोर हर संसार में अवईया रहीस।

10ओहर संसार में रहीस, अऊ संसार हर ओकरे द्वारा सिरजल रहीस, तबो ले संसार कर मईनसे मन तो ओके नई चिन्हीन। 11ओहर अपन लोग मन जग आईस अऊ ओकर अपनेच लोग मन ओके नई अपनाईन। 12बकिन जेतना झेमन ओके अपनाईन अऊ ओकर नांव ऊपरे बिस्वास करीन, ओमन ला परमेस्वर कर लईका-छऊवा होए कर हक देहीस हवे। 13ओमन तो सिरीप लहू ले अऊ देंह ले #1:13 घरदार, घरदारिन कर सबंध ले नई होईसे। अऊ मईनसे मन कर इछा ले परमेस्वर कर लईका छउवा नई बनीन हवें, बलकि परमेस्वर हर खुद अपन इछा ले, ओमन ला अपन लईका-छऊवा बनाईस हवे।

14ओ बचन हर मईनसे बईन के हमर मझारे डेरा करीस। ओहर दाऊ परमेस्वर कर एकेच ठन बेटा लागे। अऊ ओकर महिमा ला देखे ले हमके पता चलीस कि परमेस्वर केतना किरपालू अऊ केतना सचा हवे। 15बतिस्मा देवईया यूहन्ना हर ओकर बारे में गवाही देहीस अऊ चिकेर के कहीस, “एहर ओही लागे, जेकर बारे में मंए कहे रहें कि जे मोर पाछू अवईया हवे, ओहर मोर ले महान हवे, काबरकि ओहर मोर जनम कर आगुवे ले रहीस।” 16काबरकि ओकर दया अऊ सचाई कर भरपूरी ले, हमरे सब झन आसीस कर ऊपरे आसीस पाए हन। 17काबरकि परमेस्वर कर कानहूंन तो अगमजानी मूसा कर द्वारा देहल गए रहीस, बकिन परमेस्वर कर किरपा अऊ सचाई ईसू मसीह कर द्वारा मिलीसे। 18परमेस्वर ला कभोंच कोनो हर नई देखीसे। बकिन ओकर एकेच ठन बेटा जेकर बढ़िहां नाता ओकर जग हवे, ओही हर परमेस्वर ला परगट करीस हवे।

यूहन्ना हर ईसू कर बारे में गवाही देथे

19जे घनी यरूसलेम सहर कर तनिक यहूदी नेता मन, मंदिर कर याजक मन ला अऊ ओजग सेवा करोईया दूसर लेवी मन ला, यूहन्ना बतिस्मा देवईया जग ए पूछे बर भेजीन, “तंए कोन लागस?” 20त ओहर गवाही देहे बर बिगर आना कानी करे माएन लेहीस, “मंए परमेस्वर कर भेजल मसीह ना लागों।”

21तेकर ओमन यूहन्ना जग पूछीन, “त फेर तंए कोन लागस? का तंए एलियाह अगमजानी लागस?” यूहन्ना हर कहीस “मंए तो ओ ना लागों।” त फेर ओमन पूछीन, “का तंए ओ अगमजानी लागस, जेके ला हमरे अगुरत ही?”#व्यवस्थाविवरन 18:15,18 त यूहन्ना हर जबाब देहीस “नहीं।”

22तेकर ओमन यूहन्ना जग पूछीन, “त फेर तंए कोन लागस? तंए अपन बारे में हमके ला कांही बताओ, तेमेकि हमरे अपन भेजोईया ला, कांही जबाब दे सकी। तंए अपन बारे में का कथस।” 23तेकर यूहन्ना हर जवाब देहीस, जेकस यासायाह अगमजानी हर कहीस हवे “मंए सुनसान जघा में एगोट चिकरेदार कर अवाज लागों, कि तुमन परभू ला आए बरीक डगर ला सोज बनावा।” 24जेमन ला फरीसी दल कर नेता मन, यूहन्ना जग पूछे बर भेजे रहीन, 25ओमन बतिस्मा देवईया यूहन्ना जग एकस पूछीन, “अगर तंए परमेस्वर कर भेजल मसीह ना लागस अऊ ना एलियाह, अऊ न ओ अगमजानी लागस, जेके ला हमरे अगुरत ही? त फेर बतिस्मा काबर देथस?”

26यूहन्ना हर ओमन के जबाब देहीस, “मंए तो सिरीप पानी में बतिस्मा देथों, बकिन तुमन कर मझारे एक झन मईनसे ठड़होईस हवे, जेके ला तुमन नई चिन्हा। 27मतलब जे मोर पाछू अवईया हवे, ओकर पनही कर बांधल डोर ला छोरोवईया, एगोट गुलाम बने कर लाएक तो मंए नई हों।” 28ए सब गोएठ हर यरदन नदी कर ओ पार बैतनिय्याह गांव में होईस, जिहां यूहन्ना बतिस्मा देहत रहीस।

29दूसर दिन यूहन्ना हर ईसू ला अपन कती आवत देख के कहीस, “सुना, एहर परमेस्वर कर भेजल भेंड़ी छउवा#1:29 यहूदी धरम कर अनुसार निरदोस भेंड़ी छउवा ला, अपन पाप कर छमा पाए बर बलिदान करत रहीन। लागे, जेहर संसार कर सब मईनसे मन ला, ओमन कर पाप ले मुकती देवाही#यसायाह 53:7। 30एहर ओही लागे, जेकर बारे में मंए तुमन के कहे रहें, एगोट मोर पाछू अवईया हवे, जे मोर ले महान हवे, काबरकि ओहर मोर जनम कर आगू ले रहीस। 31मंए तो ओके नई चिन्हत रहें, कि ओहर परमेस्वर कर भेजल मसीह लागे, तबो ले मंए पानी में बतिस्मा देहत आएं, एकर बर कि ओके इसराएल देस कर सब मईनसे मन चिन जाएं।”

32यूहन्ना हर ईसू कर बारे में एकस गवाही देके कहीस, “मंए पबितर आत्मा ला परेंवा कस सरग ले आवत देखें, अऊ ओहर ईसू कर ऊपरे बईठ गईस। 33मंए तो ओके नई चिन्हत रहें, बकिन जे परमेस्वर हर मोके पानी में बतिस्मा देहे बर भेजीस, ओही हर मोके कहीस, जेकर ऊपरे तंए पबितर आत्मा ला उतरत अऊ बईठत देखबे, ओही हर पबितर आत्मा ले बतिस्मा देवईया हवे। 34अऊ मंए ए सब ला होवत देखें अऊ गवाही देहत हों, कि एहीच हर परमेस्वर कर बेटा लागे।”

यूहन्ना कर चेला मन ईसू कर पाछू होए लेहीन

35ओकर दूसर दिन यूहन्ना अपन दुई ठन चेला मन कर संगे, फेर ओजग ठड़होए रहीस। 36अऊ यूहन्ना हर ईसू ला जात देखीस अऊ कहीस, “देखा, एहर परमेस्वर कर भेजल मेम्ना लागे।” 37तेकर ओ दुनो चेला मन यूहन्ना कर ए गोएठ ला सुईन के ईसू कर पाछू होए लेहीन। 38ईसू मूईड़ के पाछू कती ले ओमन के आवत देखीस अऊ ओमन जग पूछीस, “तुमन ला का चाही?” ओमन ईसू ला कहीन, “ए रबी, मतलब ए गुरुजी, तंए कहां जग रहथस?”

39ईसू हर ओमन के कहीस, “चला, त देख लेईहा।” तेकर ओमन जाए के ईसू रहत रहीस, ओ जघा ला देखीन। अऊ ओ दिन ओमन ईसू कर संगे रहीन। ओ घनी सांझ जुआर करीबन चाएर बजत रहीस।

40जेमन यूहन्ना कर गोएठ ला सुईन के, ईसू कर पाछू होए लेहे रहीन, ओ दुनो चेला में ले एक झन हर, समोन पतरस कर भाई अंदरियास रहीस। 41ओहर सबले आगू अपन सगा भाई समोन पतरस जग भेंटाईस अऊ ओके कहीस, “हमके मसीह भेंटाए गईस हवे (मनेकि परमेस्वर कर अभिसिक्त)।” 42तेकर अंदरियास हर समोन ला ईसू जग लानीस। ईसू हर समोन ला देख के कहीस, “तंए यूहन्ना कर बेटा समोन लागस, तंए काइफा कहाबे (मतलब कि पतरस)।”

ईसू हर फिलीपुस अऊ नतनएल ला बलाथे

43दूसर दिन ईसू हर गलील परदेस में जाए बर करीस, त ओजग ईसू हर फिलीपुस जग भेंटाईस अऊ कहीस, “तंए चेला बएन के मोर पाछू होए ले।” 44फिलीपुस हर बेतसएदा सहर कर रहोईया रहीस, अंदरियास अऊ पतरस हर भी ओहीच सहर कर रहोईया रहीन। 45तेकर फिलीपुस हर नतनएल जग भेंटाईस अऊ ओकर जग कहीस, “जेकर बारे में मूसा हर कानहूंन कर किताब में लिखीस हवे, अऊ अगमजानीयो मन लिखीन हवें, ओहर हमके भेंटाए गईस हवे, ओहर यूसुफ कर बेटा, नासरत गांव कर ईसू लागे।”

46नतनएल हर युसूफ जग कहीस, “का नासरत ले कोनो बढ़िहां चीज निकेल सकथे?” फिलीपुस हर ओके कहीस, “तंए आए के खुद देख ले।” 47ईसू हर नतनएल ला अपन कती आवत देख के ओकर बारे में कहीस, “देखा एहर सहीच में इसराएली लागे, एकर में छल-कपट नईए।” 48नतनएल हर ईसू ला पूछीस, “तंए मोके कईसे जानथस?” ईसू हर ओके जबाब देहीस, “फिलीपुस हर तोके बलाईस, ओकर आगूच ले मंए तोके देखे रहें, जब तंए अंजीर कर रूख कर खालहे रहे।” 49नतनएल हर ईसू ला जबाब देहीस, “ए गुरुजी, तंए परमेस्वर कर बेटा लागस, तंए इसराएल कर राजा लागस।”

50ईसू हर ओके ला कहीस, “मंए तोके ए कहें कि, अंजीर कर रूख कर खालहे तोके देखे रहें, का तंए सिरीप एकरले बिस्वास करथस? तंए एकरो ले बड़खा-बड़खा काम ला देखबे।” 51फेर ईसू हर नतनएल ला कहीस, “मंए तोर जग फूरोंच कहथों कि, तुमन सरग ला उघरल अऊ परमेस्वर कर सरगदूत मन ला, मंए मईनसे कर बेटा, मोर ऊपरे उतरत अऊ चढ़त देखीहा, जेहर सरग अऊ भूईहां कर मझारे एगोट सिढ़ी कस हवों।” #उत्पत्ति 28:12

Currently Selected:

यूहन्ना 1: SGJ

Highlight

Copy