परेरीत 22

पौलुस हर भीड़ कर आगू में परचार करथे

1“ए भाई अऊ दाऊ मन, अब मोर जबाब सुना, जेला मंए अब तुमन कर आगू में बताहूं।”

2जब ओमन ओके इबरानी भासा में गोठियावत सुनीन, त चुप होए गईन, तब पौलुस हर कहीस;

3“मंए तो यहूदी मईनसे लागों अऊ किलिकिया इलाका कर तरसुस सहर में जनमे हों, बकिन ए सहर में गमलीएल जग बईठ के, बढ़िहां ले पढ़ाल गए हों अऊ पूरखा मन कर कानहूंन ला सही ढंग ले सिखावल गए हों अऊ परमेस्वर बर एकस धुन लगाए रहें, जेकस तुमन आएज लगाए हवा। 4मंए सवांग अऊ सवांगीन दुनो झेमन ला बांएध-बांएध के, अऊ जेहल में डाएल के मसीह कर डगर में चलोईया मन ला, एतना सताएं कि ओमन ला मरुवाए भी दारें। 5महायाजक अऊ यहूदी अगुवा मन, ए बात कर गवाह हवें कि ओमन जग ले मंए यहूदी भाई मन कर नांव ले चिट्ठी मन ला लेके, दमिसक में जात रहें कि उहां ले ओहू मन ला दंड देवाए बर, बाएंध के यरूसलेम लानों।”

पौलुस हर ईसू ला अपनाए कर बात करथे

(परेरीत 9:1-19; 26:12-18)

6“जे घनी मंए दमिसक कती रेंगत-रेंगत मझेनी जुआर जात रहें, ओही घनी अचाकन एगोट बड़खा इंजोर हर, अगास ले मोर चाएरो कती चमकीस। 7मंए भुईं में गिर परें, त ए गोएठ ला सुने, ए साऊल, ए साऊल तंए मोके काबर सताथस?” 8मंए कहें, “ए परभू तंए कोन लागस?” ओहर कहीस, “मंए नासरत कर ईसू लागों, जेके ला तंए सताथस।” 9मोर संगता मन तो इंजोर ला देखीन, बकिन जेहर मोर जग गोठियावत रहीस, ओकर गोएठ ला नई समझीन। 10तब मंए कहें, “ए परभू मंए का करों?” परभू हर मोके ला कहीस, “उईठ के दमिसक सहर में जा, अऊ जे जाएत तोके करे बर हवे, उहां तोके सब ला बताल जाही।” 11जब ओ इंजोर कर तेज कर चलते, मोके ला कांही नई दिखीस, त मंए अपन संगता मन कर हाथ ला धएर के दमिसक सहर में आएं।

12तब हनन्याह नांव कर मईनसे हर मोर जग आईस, ओहर यहूदी कानहूंन कर अनुसार, एगोट भगत मईनसे रहीस, जेला ओजग कर रहोईया सब यहूदी मन बढ़िहां मईनसे जानत रहीन, 13हनन्याह हर मोर जग कहीस, “ए भाई साऊल, फेर देखे लाग” ओही घनी मोर आंएख हर खुईल गईस अऊ मंए ओके ला देखें। 14तब ओहर कहीस, “हमर पूरखा मन कर परमेस्वर हर एकर बर तोके चुनीस हवे कि तंए ओकर इछा ला जान अऊ ओ धरमी जन ला देख, जेहर ईसू मसीह हवे अऊ ओकर मूंह कर गोएठ ला सुन। 15काबरकि तंए ओकर कती ले, सबेच मईनसे मन कर आगू में ओ गोएठ कर गवाह होबे, जेला तंए देखे अऊ सुने हस। 16अब तंए काबर अबेर करत हस? उठ, बतिस्मा ले अऊ ओकर नांव लेके अपन पाप मन ला धोए दार।”

17फेर मंए यरूसलेम सहर में गएं अऊ मंदिर में पराथना करत रहें, ओही घनी बेहोस होए गएं। 18अऊ मंए देखें कि परभू मोके ला कहथे, यरूसलेम ले हालू के निकेल जा, काबरकि एजग कर मईनसे मन, मोर बारे में तोर गवाही ला नई मानहीं। 19मंए कहें “ए परभू ओमन तो खुदेच जानथें कि तोर उपरे बिस्वास करोईया मन ला, मंए जेहल में हुरुकुवात अऊ धरम सभा कर घरे पीटवात रहें। 20जे घनी तोर गवाह इस्तिफनुस ला माएर मरूवात रहीन, ओ घनी मंहू ओही जग ठड़होए रहें अऊ ए बात में सहमत रहें अऊ ओकर माएर मरोईया मन कर ओढ़ना कर पहरा करत रहें। 21बकिन परभू हर मोर जग कहीस, तंए चले जा, काबरकि मंए तोके ला गैर यहूदी मन जग दुरीहां-दुरीहां भेजहूं।”

22ओजग कर भीड़ हर ए गोएठ ला सुनत रहीन, त ढेरेच रोसे कीरलाईन, “एकस मईनसे ला मरुवाए देआ, ओकर जीयत रहाई ठीक नईए।” 23ओमन किरलावत अऊ ओढ़ना ला फेंकत रहीन अऊ अगासे धुररा उड़ावत रहीन। 24त सिपाही मन कर मुखिया हर कहीस, “एके ला गढ़ में ले जावा अऊ कोड़ा माएर के ओके ला तजबीज लेआ कि मंए जाएन सकों कि मईनसे मन काबर एकर बारे में एकस किरलावथें।” 25जे घनी ओके चाम कर डोरा में बांधीन, ओही घरी पौलुस हर ठांवें में ठड़होवल सुबेदार ला कहीस, “का एहर कानहूंन कर अनुसार ठीक हवे कि तुमन एक झन रोमी नागरिक ला बिगर बयान लेहे कोड़ा मारीहा?” 26सुबेदार हर एला सुईन के, सिपाही मन कर मुखिया कर ठांवें जाए के कहीस, “तंए ए का करथस? एहर तो रोमी नागरिक लागे।” 27तब सिपाही मन कर मुखिया हर, पौलुस ठे आए के पूछीस, “मोके बताओ कि तंए रोमी लागस?” ओहर कहीस, “हओ।” 28एला सुईन के सिपाही कर मुखिया हर कहीस, “मंए रोमी होए कर पद ला, ढेरे बगरा पईसा देके पाए हों,” पौलुस हर कहीस, “मंए तो जनम ले रोमी लागों।” 29तब जेमन ओके ला तजबीजे बर करत रहीन, एला सुईन के तुरतेंच ओकर जग ले हएट गईन अऊ सिपाही मन कर मुखियोच हर ए जाएन कि एहर रोमी नागरिक लागे अऊ मंए ओके ला बांधे हों, तेकर ले ओहर ढेरे डराए गईस।

महा सभा कर आगू में पौलुस

30ओकर बिहान दिन सही-सही जाने बर कि यहूदी मन पौलुस कर उपरे काबर दोस लगात हवें, सिपाही मन कर मुखिया हर ओकर बांधल डोरा ला छोएर देहीस अऊ मुख याजक अऊ जमो महा सभा ला जूटे बर अगियां देहीस अऊ पौलुस ला खालहे ले जाए के, ओमन कर आगू में ठड़हुवाए देहीस।

Currently Selected:

परेरीत 22: SGJ

Highlight

Copy