Málikɔ 8
8
Yéso aǒisa ɓakpa ɛlɛphu gena (4.000)
(Ɔna phɔtɔ Mat 15.32-39)
1Ka matú ndɔ, usɛsɛ á ɓakpa ɗáɓádondanigi goto. Ɓâ gǎkɛ oúka eea. Mpɔ, Yéso áɔ̌ɓɔphana ɓagoigi nɛkɛ áǒgea te: 2«Neókuia usɛsɛ á ɓakpa ndɔ ngomi nga, ɓá ye iki n'eme wani esa isaɔ. Cɔ, ɓáná ye na ka kema á koea. 3Aoɓá na nějisi mɔtɛ-aɓɔ na nja, ámbé ɓáɛlande k'aphe nga, ɓunɛngbo sɔsɔɓɛ aɓɔ ɓátóki ɗanga.» 4Ɓagoigi nɛkɛ ɓâ gǎkɛ omúsia te: «Ɓɛtɔande mokati ásii ka nkanda nde suani ka kutisa usɛsɛ á ɓakpa nde ɓɔbu?» 5Yéso áǒɓúsia te: «Ɓona mokati ángaáni?» Ɓáonsikisia te: «Ngianjaga iɓɛ (7).»
6Mpɔ, Yéso áǒsosea ɓakpa ɓáikɛ ka oɗo. Áɔbɛɗa mokati ngianjaga iɓɛ (7) ndɔ, áonsega Mokonga k'ɛ́mɛmi, áoɓúnaga ú, áǒɓopha ɓagoigi nɛkɛ ka gea ɓégabeɛ ɓakpa. Ɓagoigi ɓáogaba. 7Ɗáɓátú phɔtɔ na ɓaniki á ɓasú ɓábɔa. Yéso áobisa njaga akɛ gǔ á ɓaniki á ɓasú ndɔ, áǒgea ɓagoigi nɛkɛ ɓágabɛ. 8Ɓakpa ɓáoeaga, ɓáokúta. Mbusa á eaga aɓɔ, due nde ɓagoigi ɗáɓákɔngu, ɗátúmi jɔ ngianjaga iɓɛ (7). 9Ɓakpa ndɔ ɗáɓátú ɓea ɛlɛphu gena (4.000). Mpɔ, Yéso áǒjisa mɔtɛ-aɓɔ. 10Kɛ̌kɛndɔ, yɛ na ɓagoigi nɛkɛ ɓáokambea ka koko, áoga ka ntanga-nji á Dalmanúta.
Ɓaphaisáyɔ ɓáokaɓa ketangaɔ
(Ɔna phɔtɔ Mat 16.1-4)
11Yéso na ɓagoigi nɛkɛ ɓákiɗi ye kó, Ɓaphaisáyɔ ɓáombikia Yéso. Ɓáokpanga anganisaga á ɓoabi na yɛ, ɓáɔmɛma ka maibe gea, átɔtɔkisɛ ketangaɔ nde aubisande gea, Mokonga aámbé anteki. 12Mpɔ, Yéso áosúa ɛphɛu phɛɛ, áogea te: «Cɔ, nyɔngɔ sina nde ɓato á kesande ɓáokaɓa mphangiɔ? Nenóngoɗi ɗoni gea, ɓákáɔnɛku.» 13Mbusa í, Yéso â goto ǒsaga, áokambea ka koko, áojaba kubi á etǔ.
Cacu ndea Ɓaphaisáyɔ n'índe á Ɛlɔ́dɛ
(Ɔna phɔtɔ Mat 16.5-12)
14Ka jaba aɓɔ, ɓagoigi ɓáoɓosea bɛɗa á mokati. Ɗáɓátú tɔ ně moci suɓi á koko. 15Yéso â gǎkɛ ɔ̌phɛá te: «Ɛ́ngɛphani! Óɓangisani na cacu ndea Ɓaphaisáyɔ n'índe á Ɛlɔ́dɛ.» 16Ɓagoigi ɓáɔyɔngaga ngǔngu aɓɔ gea: «Ayɔngi ɓó ka nyɔngɔ nde ɓéké na mokati.»
17Yéso â gǎkɛ oengekisa yɔngaga ndɔ, áǒɓúsia te: «Cɔ, nyɔngɔ sina nde ɓɔɔyɔngaga te, ɓéké na mokati? Ɓókóengekisimbɛ? Ɓókóoúbapha? Ande gea te, ɓona mɔ̌ áɗokǒ? 18Ɓona iso, ɓókóɔɔnapha? Ɓona kecue, ɓókóɔɔ́kapha? Ɓókó gǎkɛ okanisia 19mbenɔ nde ɗéɓunigi ɓamokati ɓɔku ka ɓakpa ɛlɛphu ɓɔku (5.000) ndɔ? Cɔ, ɓî ɗɔ́ɓɔbɔnyi due á mokati ndɔ, ɗóɓotúmisi jɔ ángaáni?» Ɓáonsikisia gea: «Nkama na iɓɛ (12).» 20Cɔ, mbenɔ nde ɗéɓúnigi gǎkɛ mokati ngianjaga iɓɛ (7) ka ɓakpa ɛlɛphu gena (4.000), ɗóɓotúmisi jɔ ángaáni na due á mokati ndɔ? Ɓáonsikisia: «Ngianjaga iɓɛ (7).» 21Mpɔ, Yéso áǒgea: «Ɓókóengekisimbɛ?»
Yéso anamisi keíme-íme moci na Bɛtɛsaída
22Yéso na ɓagoigi nɛkɛ ɓáoga na Bɛtɛsaída. Kó, ɓáombikia Yéso na keíme-íme moci, ɓáonɗengemisaga gea te, ándungɛ ka yɛ. 23Yéso áɔmbɛɗa keíme-íme ka njaga, áonga ně bǎ á ngba-nji. Mpɔ, áosia soki k'íso á keíme-íme, áobisa njaga gǔ akɛ, áomúsia: «Cɔ, ɔɔna ka kema?» 24Keíme-íme áokoɗa iso, áɔyɔnga gea: «Nɛɔ̌ɓɔna ɓakpa ɓea ɓame, ɓá ndiu otamba.» 25Yéso â goto obisa njaga gǔ á iso akɛ, mpɔ yɛ áɔbɛta iso, áɔama k'iso, â ye tɔ ɔɔna kema bui base. 26Mpɔ, Yéso áonjisa mɔtɛ-akɛ, áongea te: «Kóketɛmbɛ ye na nji.»
Pɛ́tɛɛ aɔtu gea Yéso ande Masíya
(Ɔna phɔtɔ Mat 16.13-20; Lók 9.18-21)
27Yéso na ɓagoigi nɛkɛ ɓâ gǎkɛ oga ka nji ɗanga-ɗanga á Kaisaíya-Philípi#8.27 Kaisaíya-Philípi ande ntanga-nji nde Philípi-Ɛlɔ́dɛ ɗácɔnji bíbí á sese á iɓo Yɔɔdáni. Nnde ɓáɔɔphana kesande Baniási.. Na ɓá phɔ́tɔ k'aphe, Yéso áǒɓúsia ɓagoigi nɛkɛ te: «Ɓakpa ɓáogea te, nende ani?» 28Ɓáonsikisia te: «Ɓakpa moci-moci ɓáogea te, onde Yoáni-Mɓatisi. Ɓunɛngbo gea te, onde Elía, na ɓuangbo goto, onde ka ɓaɔtu-nyɔngɔ ndea Mokonga.» 29Yéso â goto ǒɓúsia: «Cɔ, ɓenu gǎkɛ ɓogi te, nende ani?» Pɛ́tɛɛ áonsikisia te: «Oɓɛ, onde Kiísito.» 30Mpɔ Yéso áǒimisia akpɛ gea te, ɓákantɔmiɛmbɛ ka ɓakpa mbino akɛ.
Yéso aúbisi moangɔ á kukuwa na jujúka akɛ ka kukuwa
(Ɔna phɔtɔ Mat 16.21-28; Lók 9.22-27)
31Mbusa, Yéso áokpanga goisaga á ɓagoigi nɛkɛ gea: «Akeni eme Muna-Nkpa nétambɛgɛ ásii, ɓagbɛga, ɓagbɛga á ɓatoɓeigi-phɛ́a, na ɓaɗundu-ɛɔphi, ɓámoyɛgɛ na kusisa ani. K'ésa á ko isaɔ mbusa á kukuwa, nejujúkande ka kukuwa.» 32Ɗáyɔngi nyɔngɔ ndɔ base. Pɛ́tɛɛ â gǎkɛ ɔmɔphana ka mpɛphɛ, áokpanga phekeaga akɛ. 33Yéso áǒpháia, áɔ̌ɓɔna ɓagoigi nɛkɛ, mpɔ áonkeea Pɛ́tɛɛ, áongea: «Já mbusa ani Sɛtáni nde ca! Nga, kanisia akɔ nna ɓea kanisia ndea Mokonga. A ndiu kanisia á kokpa.»
Moangɔ á ɓeá á Yéso
34Mbusa, Yéso áɔɔphana usɛsɛ á ɓakpa phɔtɔ na ɓagoigi nɛkɛ áǒgea te: «Aoɓá nkpa n'akondi ɓeá ani, akeni ěyɛ sisakɛ. Ákumbɛ moyangɔ nɛkɛ, ámoɓeɛ. 35Nga, nkpa nde akondi amisa á enda akɛ, aɓúngisande ú. Mmbé a ndiu oɓúngisa enda akɛ ka phɔani na ka phɔa á Mbino-Ánjá, aamisande ú. 36Nga, ana kantíti sina aoɓá nkpa n'atɔi nkumba bui á ka mokonda, â ndiu oɓúngisa enda akɛ? 37Kema sina nde nkpa aánganisande na enda akɛ? 38Aoɓá nkpa n'aku na soni ka phɔani na ka phɔa ɓɔphɛi nɛmɔ mosá á ɓakpa á k'ɛ́ɓɔkɔti nde, nga ɓánde ɓato á ɓojeɗe na ɓakpa nde ɓán'ye Mokonga, eme Muna-Nkpa nenkuiande phɔtɔ soni esa nde nebikaeka ka ɓoombia ndea Abɛ Mokonga kimoci na ɓamalaéka á kanga ɓojeɗe.»
Currently Selected:
Málikɔ 8: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
