Málikɔ 3
3
Yéso anamisi nkpa njaga akɛ n'aphɛphi
(Ɔna phɔtɔ Mat 12.9-14; Lók 6.6-11)
1Mbusa í, Yéso â goto ongia suɓi éndu á madondanɔ ndea Ɓayúda ka nyɔngɔ á Mokonga. Kó, nkpa moci ɗátú na njaga akɛ n'aphɛphi. 2Ɓaphaisáyɔ nde ɗáɓátú wa ɓâ gǎkɛ ɔmɔɔnjia bîbíbí ka gea te, ɓáɔnɛ phɔ́ aoɓá n'anamisande nɗɔti ndɔ esa á saɓáto mpɔ, ɓáɓɛ ye tɔ na nyɔngɔ á tɔnga akɛ ně. 3Yéso â gǎkɛ ongoɗea nɗɔti te: «Má mosá á ɓakpa!» 4Mpɔ áǒɓúsia te: «Cɔ, kema sina ɛɔphi nɛsu asosi gea í k'ésa á saɓáto? Kaɓɛ gea kema ánjá, kaɓɛ gea kema ájeɗe? Kaɓɛ amisa á nkpa, kaɓɛ kusa akɛ?» Ɓakpa ɓɔbu ɓâ gǎkɛ ɔkɔɓa phio! 5Yéso áǒtimba n'íso áǒenga n'esúia, áoɓá na ɓɔmbɛ ka nyɔngɔ á měma aɓɔ akpɛ. Áongoɗea nɗɔti te: «Cɔ, nanoa njaga akɔ.» Áonanoa njaga akɛ, áoama. 6Kɛ̌kɛndɔ, Ɓaphaisáyɔ ɓáojuana, ɓáoga odondana na ɓakpa ndea Moamɛ Ɛlɔ́dɛ ka maca. Ɓáokaɓa moangɔ á kusisa á Yéso.
Usɛsɛ á ɓakpa ɓáomɓea Yéso
7Yéso na ɓagoigi nɛkɛ ɓâ gǎkɛ otóka sɔsɔɓɛ á ɓakpa ndɔɔ. Ɓáoga ka mpɛphɛ á etǔ á ka Galiláya. Ɓakpa ɓásii phɛɛ ɓáomɓea na ɓátóki na Galiláya, Yudɛ́a, 8Yɛusalɛ́ma, phaeka á ntanga-nji á Idumɛ́a, ntanga-nji á kubi á iɓo Yɔɔdáni na ɓunde á ka mpɛphɛ á ntanga-nji á Tílɔ n'índe á ka Sidɔ́na. Ɓɔbu ɓáombikia Yéso nga, ɗáɓáɔ́ki ekuma bui nde ɗátúogea. 9Cɔ, Yéso áǒngoɗea ɓagoigi nɛkɛ, ɓábisɛ kakɛ koko ka gea, ɓakpa ɓákámɓɔkanisɛmbɛ. 10Ɓáɔni ye ɓî Yéso aéamisi ɓakpa ɓásii, ɓasambi ɓɔbu ɓáokamisaga sɛkɛɗa ka mpɛphɛ akɛ ka gea, ɓɔbu ɓámbooɛ ka yɛ. 11Ɓuangbo ɗáɓátú na kukuwa á ɓansombo. Ɓansombo ndɔ, ɓî ɓámɔni ye Yéso, ɓáogua k'écinji akɛ, ɓáokoga, ɓáogea: «Oɓɛ onde Muna-Mokonga.» 12Yéso â gǎkɛ ǒimisia akpɛ gea, ɓákaúbisɛmbɛ gea, ande Muna-Mokonga.
Yéso aɛsɔmbu ɓateki nɛkɛ
(Ɔna phɔtɔ Mat 10.1-4; Lók 6.12-16)
13Mpɔ Yéso áotáia gǔ á mamba, áɔ̌ɓɔphana ɓunde ɗékondi sɔmbɔa ka ɓɔ ka usɛsɛ á ɓakpa ndɔ, ɓáoga kuɓî yɛ aɔ. 14Aɔ̌sɔmbɔa sɔsɔɓɛ aɓɔ ɓakpa nkama na ɓaɓɛ (12), áǒsua ɓateki nɛkɛ ka gea ɓátambɛ kimoci na yɛ na teka aɓɔ ka gǎ á phɛá ɓakpa. 15Â phɔtɔ ǒɓopha kɔkɔta á ɓeaga á ɓansombo suɓi á ɓakpa. 16Ɓateki nɛkɛ nkama na ɓaɓɛ (12) ɓunde ɗɛ́sɔmbu ina aɓɔ aungee: Simɔ́ni mmbɔ Yéso ɗánsu Pɛ́tɛɛ#Ɔna Mat 16.16-18; Yoá 1.42, 17Yakɔ́ɓɔ muna Jɛbɛdáyɔ, na muna-amakɛ Yoáni (ɓundɔ ɓaɓɛ ndɔ, Yéso ɗáesǔ ina Bɔanɛ́gɛ, ande gea te: «ɓáoka á mbua#3.17 Ka ɛyɔngi ndea Ɓayúda, ina ndɔ ande gea te ɓato á esúia. Ɔna Lók 9.54»), 18Andeé, Philípɔ, Batɔlɔmáyɔ, Matáyɔ, Tɔmá, Yakɔ́ɓɔ muna Alpháyɔ, Tadɛ́yɔ, Simɔ́ni, manei ekuna nɛkɛ, 19na Yúda-Isikaliɔ́ta#3.19 Wani ande Yúda nto á ka Kaliɔ́tɛ., mmbé ɗántɔngi Yéso.
Ɓato á k'ékombo ndea Yéso ɓágeombɛɗa
20Mpɔ, Yéso na ɓagoigi nɛkɛ, ɓáosikianaga mɔtɛ-aɓɔ. Ɓakpa ɓásii ɓâ goto odondana kó na ka ɓî Yéso na ɓagoigi nɛkɛ ɓákáɓɛ ye na ɔma á eaga. 21Mbenɔ nde ɓato á k'ékombo nɛkɛ ɓáɔ́ki ye nyɔngɔ ndɔ, ɓáoga k'aphe á bɛɗa akɛ nga, ɗáɓáogea: «Mɔ̌ akɛ nna ye ánjá.»
Ɓánsǔ Yéso Bɛljɛbúli
(Ɔna phɔtɔ Mat 12.22-32; Lók 11.14-23; 12.10)
22Mpɔ, ɓaɗundu-ɛɔphi ɓunde ɓátóki na Yɛusalɛ́ma ɓáogea: «Bɛljɛbúli,#Ɔna Mat 10.25 mɔkɔta á ɓansombo, a suɓi á Yéso. Yɛ aǒjuanisa ɓansombo ka ɓukpɛkpɛ á Bɛljɛbúli.» 23Yéso â gǎkɛ ɔ̌ɓɔphana, áǒngoɗea mɛní ndee: Cɔ, Sɛtáni aɔtɔka n'ěɓigi sasakɛ ɓo? 24Nga aoɓá ɓakpa á ka koɓoamɛ moci na ɓákatanigi ngǔngu aɓɔ, koɓoamɛ ndɔ kámɛku. 25A phɔtɔ oɓá ɓato á ekombo moci na ɓákatanigi ngǔngu aɓɔ, ekombo ndɔ kámamɛku. 26Aoɓá Sɛtáni n'aǒmanisa sasakɛ, ɓukpɛkpɛ nɛkɛ n'akatanigi, koɓoamɛ nɛkɛ kámɛku. A ye tɔ sungiaga akɛ.
27«Cɔ, nkpa nnaɔtɔka n'angí suɓi éndu ndea nto á ɓukpɛkpɛ ka uta nkumba nɛkɛ na kámɓóegembɛ phɔ́. A ye omɓóaga, mpɔ amutande nkumba nɛkɛ. 28Nyɔngɔ nde nɛɔnɔtɔmia, ande ɗoni. Mokonga aímande ɓojeɗe bui ndea ɓakpa, na mbóma bui nde ɗáɓámbómi ně. 29Nkpa nde a gǎkɛ ombóma Měma á kanga ɓojeɗe, Mokonga káímɛeka tanda ɓojeɗe ndɔ. Ɓojeɗe nɛkɛ aikande mɛyɔ.» 30Yéso ɗéngoɗi ɓo nga, ɗáɓági te: «Ɓansombo ɓáiki suɓi akɛ.#3.30 Nga, ɗáɓákengeanisi Měma á kanga ɓojeɗe, mmbé ɗátú suɓi á Yéso, na měma á Nketi.»
Ɓana-amakɛ na Yéso ɓánde ɓa ani?
(Ɔna phɔtɔ Mat 12.46-50; Lók 8.19-21)
31Mpɔ, ama-Yéso na ɓana-amakɛ, ɓáobika omama ka nsɛngɛ. Ɓáonteka nkpa ka ɔphana akɛ. 32Usɛsɛ á ɓakpa ɗáɓántimbi Yéso, ɓâ gǎkɛ ongoɗea te: «Cɔ, amakɔ, na ɓana-amakɔ, ɓá na nsɛngɛ, ɓáokokaɓa.» 33Aǒsikisia te: «Ayi na ɓana-ayi ɓánde ɓa ani?» 34Mpɔ, áǒtimba n'íso ɓakpa ndɔ ɗáɓántimbi, áǒngoɗea te: «Ayi na ɓana-ayi ɓáungee. 35Nga, nkpa nde aotambea ɓíndɔ Mokonga akondi, mmbɔ aámbé ande muna-ayi, áwáni na ayi.»
Currently Selected:
Málikɔ 3: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
