Málikɔ 16
16
Yéso ajujúki ka kukuwa
(Ɔna phɔtɔ Mat 28.1-8; Lók 24.1-12; Yoá 20.1-10)
1Saɓáto asi ye, Salɔ́mɛ, Malía Magadála, na Malía ama-Yakɔ́ɓɔ, ɗáɓásombi nkoki ka gǎ á saɓisa na mǒnda á Yéso. 2Aɓi ye esa á yenga kamɓimba, ka juana á maní, ɓáoga ka bóta. 3Ɓáoúsianaga te: «Cɔ, ani mmbé atingisiande k'asu etae k'aphe á iso á bóta?» 4Ɓî ɓákiɗi ye, ɓáoenga, ɓáɔɔna gea te, ɛtɛ angbóngbó ndɔ ɗáɓátiɓi ú ka mpɛphɛ.
5Mpɔ, ɓáongia suɓi á bóta, ɓáɔmɔna moganda moci n'aiki ka njaga á mǔku, n'aɔ́li ngɔ́mbɛ ábu. Ɓáoyayama. 6Mpɔ, moganda ndɔ áǒngoɗea te: «Ɓókóɓɛmbɛ na kɔɓɔɓɔkɔ. Yéso ɓa Najalɛ́ti, mmbɔ ɗáɓánkɔkɛigi gǔ á moyangɔ, aámbé ɓoonkaɓa. Ajujúki gǎkɛ ka kukuwa. Ɔma nde ɗáɓábisi mǒnda akɛ aungee. Nna ye wa. 7Gǎni ndiu ɓóóngoɗeɛ ɓagoigi nɛkɛ, phɔtɔ Pɛ́tɛɛ gea te, agě mosá aɓɔ na Galiláya. Kó unge ɓɔmɔnande ɓíndɔ Yéso ɗánongoɗi.» 8Ɓake ndɔ ɓáojuana ka bóta, ɓáoga mbangɔ. Ɗáɓáɔkpɔkpɔmaga, ɓáoyayama. Ɗáɓákámúbisi nkpa nyɔngɔ ndɔ nga, ɗáɓá na kɔɓɔɓɔkɔ.
Yéso ěphangisi ka Malía Magadala
(Ɔna phɔtɔ Mat 28.9-10; Yoá 20.11-18)
[9Yéso ɗájujúki ye ka kukuwa, kamɓimba esa á yenga, â phɔ́ ǒphangisia ka Malía Magadala, mmbɔ ɗámphúi ɓansombo. 10Yɛ áoga ɔ̌tɔmia ɓunde ɗáɓátú na Yéso, kuɓî ɗáɓátú ogáma ka kekusa. 11Ɓî ɓáɔ́ki ye Malía n'ěngoɗi gea, amɔni Yéso n'aoenda, ɓɔ ɗáɓákáɓeeki yɔnga nɛkɛ.
Yéso ěphangisi ka ɓagoigi ɓaɓɛ
(Ɔna phɔtɔ Lók 24.13-35)
12Mbusa á wa, ɓagoigi ɓaɓɛ ɗáɓátú otoka ka ntanga-nji, Yéso áǒkiɗianea ka keongi nɛngbo. 13Ɓáoja, ɓáɔ̌tɔmia ɓadaɓɔ. Ɓákěɓeekeɛ phɔtɔ ɓundɔ.
Yéso ěphangisi ka ɓagoigi nkama na moci (11)
(Ɔna phɔtɔ Mat 28.16-20; Lók 24.36-49; Yoá 20.19-23; Eku 1.6-8)
14Ka sungiaga, Yéso áǒphangisia ka ɓagoigi nɛkɛ nkama na moci (11) na ɓáoeaga. Yéso áǒkeea ka nyɔngɔ á kanga ɓeekea nɛɓɔ. Měma aɓɔ ɗágbagi phɔtɔ nga, ɗáɓákáɓeeki ɓî ɓadaɓɔ ɗáɓěngoɗi gea, ɓámɔni Yéso mbusa á jujúka akɛ ka kukuwa. 15Mpɔ, Yéso áǒngoɗea: «Gǎni ka mokonda bui, ɓɔ́tɔ̌miɛ ɓakpa ɓɔbu Mbino-Ánjá ndea Mokonga#Ɔna Eku 1.8. 16Nkpa nde aɓeekeande, ɓáomɓatisa, yɛ aámbé Mokonga anamisande. Cɔ, mmbé káɓeekeɛku, Mokonga atenande nyɔngɔ nɛkɛ akpɛ. 17Ɓágeande ketangaɔ ndee: Ka ina ani, ɓáphúiande ɓansombo suɓi á ɓakpa, ɓáyɔngande k'ɛ́yɔngi á kɛ̌kɛ. 18Ɓáedungande ɓanjɔka. Aoɓá na ɓánu kema nde nkpa aokuwa ně, kéegeɛku kema. Ɓábisande njaga aɓɔ gǔ á ɓasambi, ɓundɔ ɓáoama.»
Yéso atái na koba
(Ɔna phɔtɔ Lók 24.50-53; Eku 1.9-11)
19Ɓî Mɔkɔta Yéso agɔɓi ye ngoɗea aɓɔ ɓó, Mokonga áontáisa na koba. Yɛ, áoika ka njaga á mǔku á Mokonga#Ɔna Eku 1.9-11. 20Ɓagoigi gǎkɛ, ɓáoga ɔtɔmiaga Mbino-Ánjá k'ɔ́ma bui. Mɔkɔta Yéso áoɓá na ɓɔ k'ékuma bui. Áoɗokomisa ɓɔphɛi nɛɓɔ ka ketangaɔ nde ɗáɓátú ɔtɔtɔkisa.]
Currently Selected:
Málikɔ 16: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
