Málikɔ 15
15
Yéso mosá á Pilátɔ
(Ɔna phɔtɔ Mat 27.1-2,11-14; Lók 23.1-5; Yoá 18.28-38)
1Aɓí ye ka mɔkɛsuɛ, ɓagbɛga á ɓatobeigi-phɛ́a, ɓagbɛga á ka nji, ɓaɗundu-ɛɔphi na ɓato á ka ntua á tena nyɔngɔ ɗáɓádondanigi ɓɔbu, ɓáɔɓɔngisia moangɔ. Mpɔ, ɓáososea gea ɓámɓoɛgɛ Yéso, ɓáonga ně mosá á Pilátɔ. 2Pilátɔ áomúsia Yéso: «Onde moamɛ ndea Ɓayúda?» Yéso áonsikisia: «Oɓɛ ámbé ɔyɔngi.» 3Mpɔ, ɓagbɛga á ɓatobeigi-phɛ́a ɓáɔntɔnga ásii phɛɛ. 4Pilátɔ â goto omúsia: «Cɔ, kósikisɛku ka ɓoabi? Kɔ́ɔɔna nyɔngɔ nde ɓáɔkɔtɔnga kau nde?» 5Yéso ɗákásikisi gǎkɛ ka nyɔngɔ. Pilátɔ aɔni ye ɓó, áoyayama.
6Ka maseye bui, moamɛ Pilátɔ ɗáɛmbani na júanisa á nto á mekakɔ moci, mmbé ɓakpa ɗáɓátú ɔmmɛma. 7Mbenɔ ndɔ gǎkɛ, nkpa moci ɗátú ka mekakɔ, ina akɛ n'ande Balába. Ɗáɓándungi kimoci na ɓadakɛ ka mbenɔ á ɓato á nsengo na ɓato á kaiso. 8Cɔ, usɛsɛ á ɓakpa ɓáokiɗia mɔtɛ á Pilátɔ. Ɓáongea: «Gea tɔ ɓíndɔ omôgeaga mosá.»
9Pilátɔ áǒsikisia: «Ɓokondi nénkoɗɛ kanu moamɛ ndea Ɓayúda?» 10Pilátɔ ɗáúsi ɓo nga, ɗáúbi gea, ɓagbɛga á ɓatoɓeigi-phɛ́a ɗáɓántɔgi Yéso ka nyɔngɔ á nsengo. 11Kɛ̌kɛndɔ, ɓagbɛga á ɓatoɓeigi-phɛ́a ɓáǒyombokisa usɛsɛ á ɓakpa te, ɓánkoɗisɛ ndiu k'aɓɔ Balába. 12Pilátɔ â goto ǒúsia: «Negeande ɓo na nkpa nde ɓogi te, ande moamɛ ndea Ɓayúda?» 13Ɓakpa ɓɔbu ɓâ goto ɔyɔnga akpɛ: «Nkɔkɛagani gǔ á moyangɔ!» 14Pilátɔ áǒɓúsia: «Ómoúbisani phɔ́ ɓojeɗe sina nde atógi?» Ɓâ tɔ ɔyɔnga akpɛ phɛɛ: «Nkɔkɛagani gǔ á moyangɔ!» 15Pilátɔ gǎkɛ, ɓî ɗáokonda ékondisɛgɛ na usɛsɛ á ɓakpa, áonkóɗisa kaɓɔ Balába. Áǒɗeketea ɓato émani gea te ɓámɓindɛ Yéso mpɔ, ɓánkɔkɛɛgɛ gǔ á moyangɔ.
Ɓato émani ɓáontondea Yéso
(Ɔna phɔtɔ Mat 27.27-31; Yoá 19.2-3)
16Ɓato émani ɓáonga na Yéso ka ntanga á endu ndea mɔkɔta Pilátɔ. Ɓáɔ̌ɓɔphana ɓadaɓɔ ɓato émani ɓɔbu ɓádondanɛgɛ. 17Ɓáɔmɔ́lisa Yéso ngɔ́mbɛ ánjɛ#15.17 Ngɔ́mbɛ ánjɛ ndɔ ɗátú gǎkɛ ngɔ́mbɛ á koɓoamɛ na kɔkɔta., ɓáomakea ka mɔ̌ akɛ kuku ɓínde á ɓakɔta, na ɓáoki na ngenge. 18Mpɔ, ɓáonsesea ɓe: «Moamɛ ndea Ɓayúda, samba!» 19Ɓáɔmɓɛta na gbútu ka mɔ̌, ɓáonsúia soki, ɓáogbúka muanku aɓɔ, ɓáotúmia mɔ̌ aɓɔ ka oɗo mosá akɛ. 20Ɓî ɓágɔɓi ye tɛɓa akɛ ɓó, ɓáomphúia ngɔ́mbɛ nde ɓátɔ́mɔ́lisi, mpɔ, ɓáɔmɔ́lisa goto ngɔ́mbɛ nɛkɛ sasakɛ. Ɓáonjuanisa ka nsɛngɛ ka gea, ɓánkɔkɛɛgɛ gǔ á moyangɔ.
Ɓáɔnkɔkɛaga Yéso na sungisiaga akɛ gǔ á moyangɔ
(Ɔna phɔtɔ Mat 27.32-44; Lók 23.26-43; Yoá 19.17-27)
21Nkpa moci ina akɛ Simɔ́ni nto á na Kuɛ́nɛ, abakɛ na Alɛsandúɔ na Lúphu#Ɔna Ɓlm 16.13, ɗátú ɔnyɛ́nya ka toka akɛ na ciko. Ɓato émani ɓâ gǎkɛ ɔmbɛɗa, ɓáonkumbisa moyangɔ ndea Yéso. 22Mpɔ, ɓáonkiɗisa Yéso ɔma nde ɗáɓátú ɔɔphana Gɔlgɔ́ta, ande gea: «Ɔma á gangata.» 23Wandɔ, ɓáokengisa opha akɛ divai na ɓádaɗu na manga nde ɓáɔɔphana manɛmanɛ#15.23 Manɛmanɛ ande mandima á me moci. Ɓáokanisia te ɗáɓádaɗu na makana ka gea áɓɛ manga ka dendemisa kaeanaga á nyama.. Yɛ ɗákánu gǎkɛ.
24Mbusa, ɓáɔnkɔkɛaga gǔ á moyangɔ, ɓáɔɓɛta ɓana-mɛlɔɛ ka úba á nkpa sina mmbé abɛɗande ngɔ́mbɛ kau. 25Ɗátú ka nji-asasi unge ɗáɓánkɔkɛigi Yéso gǔ á moyangɔ. 26Ɗáɓáɗundu kitɔngi akɛ gǔ á gáo ɓe: «Moamɛ ndea Ɓayúda.» 27Ɗáɓɛ̌kɔkɛigi phɔtɔ ka moyangɔ kimoci na yɛ, ɓakukuɓa ɓaɓɛ, moci njaga á mǔku, moci njaga á nkei. [28Kaɓondɔ unge, nyɔngɔ á Ɓuku á Mokonga ɗátɔtɔkɛani. Nga, ɗáɓáɗundu gea: «Ɗáɓámbisi kimoci na ɓato á ɓojeɗe#Ɔna phɔtɔ Lók 22.37; Isa 53.12.»] 29Cɔ, ɓakpa nde ɗáɓátú ɔnyɛ́nyaga wa, ɓáɔmphɔ́ta Yéso, ɓáɔnkɔngɔmɛaga na mɔ̌, ɓáogea: «Cɔ, oɓɛ nto á ngbɔa endu á Mokonga na phɛ̌ka í mbusa á esa isaɔ, 30óamisa phɔ́ sasakɔ, ókiɛ ka moyangɔ!»
31Ɓagbɛga á ɓatoɓeigi-phɛ́a na ɓaɗundu-ɛɔphi ɓâ phɔtɔ onsungisiaga na ɓáɔyɔngaga ngǔngu aɓɔ te: «Ɗéamisi ɓakpa ɓuangbo, cɔ, nnaɔtɔka n'ěamisi sasakɛ. 32Aoɓá n'ande Kiísito ɗoni, moamɛ ndea Ɓaisilaɛ́li, ákiɛ phɔ́ kɛ̌kɛnde ka moyangɔ, ɓɛ́ɔnɛ mpɔ ɓéɓeekeɛ.» Ɓakukuɓa ndɔ ɗáɓɛ̌kɔkɛigi na Yéso kimoci, ɓâ phɔtɔ onsungisiaga.
Kukuwa á Yéso
(Ɔna phɔtɔ Mat 27.45-56; Lók 23.44-49; Yoá 19.28-30)
33Ajú ye ka kantende, keiphe ɗágbukumi mokonda bui ka mbenɔ isaɔ. 34Ka akpaala, Yéso áotoɓea: «Ɛlɔ́i, Ɛlɔ́i, lama sabakatáni?» Ande gea: «Mokonga nɛmɔ, Mokonga nɛmɔ, omokambi ka ɓo#Ɔna Jab 22.2?» 35Ka ɓakpa ɓunde ɗáɓátú wa, ɓî ɗáɓáɔ́ki nyɔngɔ ndɔ, ɓáogea: «Ɓɔɔ́ki, amɔphani Elía.» 36Ka ɓɔ moci áoga mbangɔ, áɔbɛɗa siphɔngɔ#15.36 Siphɔngɔ ande kema ɓea pámba nnde aomúma iɓo., áoubia suɓi á divai nde aángai-ngai. Áoɓoá ka gbútuka á me, áonɗaphisia Yéso gea, ámumɛ#Ɔna Jab 69.22. Nkpa ndɔ áogea: «Ɔkaneani! Ɓɛ́ɔnɛ phɔ́ kaɓɛ Elía abikande onkisa.» 37Yéso â gǎkɛ okoga, áɔɗɔɛa.
38Ka mbenɔ ndɔ, ngɔ́mbɛ á suɓi éndu á Mokonga áɔnyɔka ka phaeka iɓɛ, k'égo áobika osungia kusi#15.38 Ɔna Jua 26.31-33. Ande gea te, Mokonga ɗáuku ɔma ótaɔ nde ɗátú suɓi éndu nɛkɛ gea te, ɓakpa ɓɔbu ɓáɓɛ na ɓukpɛkpɛ á ngia suɓi.. 39Cɔ, Mɔlɔ́ma moci, mɔkɔta á ɓato émani á Ɓalɔ́ma, ɗátú mosá á Yéso. Ɓî aɔni ye ɗɔɛa akɛ, áogea: «Ɗoni, nkpa nde ɗátú Muna-Mokonga.»
40Ɓake ɓuangbo ɗáɓá phɔtɔ wa. Ɗáɓáoenga na ɓámame ɗanga. Ina á ka ɓɔ aungee: Salɔ́mɛ, Malía ɓa Magadála na Malía ama-moganda Yakɔ́ɓɔ na Yɔ́sɛ. 41Ɓake ndɔ ɓáunge ɗáɓátú omɓea Yéso na bɛɗaneaga akɛ mbenɔ nde ɗátú ka Galiláya. Ɓake ɓásii ɓunɛngbo ɓunde ɗáɓáge na Yɛusalɛ́ma kimoci na yɛ, ɗáɓá phɔtɔ wa.
Úmbá á Yéso
(Ɔna phɔtɔ Mat 27.57-61; Lók 23.50-56; Yoá 19.38-42)
42Cɔ, ɗátú ye ɔgɔgɔ. Ka nyɔngɔ nde ɗáɓátú ɔɓɔngisiaga esa á saɓáto, 43nkpa moci, ina akɛ Yɔsɛ́phu, nto á ka Aimatɛ́a#15.43 Aimatɛ́a ɗátú miki á nji nde ɗátú bíbí á Yɛusalɛ́ma ɓea kilɔmɛtɛɛ nkama isaɔ na ɓɔku (35)., ɗátú ka ɓakɔta á ɓateni-nyɔngɔ ndea Ɓayúda áokiɗia. Ɗátú phɔtɔ oɓondea kiɗia á koɓoamɛ ndea Mokonga. Cɔ, yɛ ɗáge ondonda Pilátɔ, kángá á ɓanga, ka mɛma mǒnda á Yéso. 44Pilátɔ â gǎkɛ oyayama ka ɔ́ka gea te, Yéso a ye ku. Cɔ, áɔmɔphana mɔkɔta á ɓato émani, áomúsia ámbé Yéso aɗɔima kala. 45Mɔkɔta á ɓato émani áoɓeekea: «Eya.» Mpɔ, Pilátɔ áoɓeekea gea te, Yosɛ́phu ábɛɗɛ mǒnda á Yéso. 46Wandɔ, Yosɛ́phu áosomba sanda, áokisa mǒnda á Yéso gǔ á moyangɔ, áoɓóaga ú na sanda ndɔ, áoga oúmba ka kubu ókanga. Áoɗaka bóta ndɔ n'ɛtɛ ángbó. 47Malía nseka á ka Magadála na Malía ama-Yɔ́sɛ, ɗáɓátú ɔɔnjia ɔma nde ɗáɓámúmbi Yéso.
Currently Selected:
Málikɔ 15: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
