Málikɔ 11
11
Yéso angí ka Yɛusalɛ́ma
(Ɔna phɔtɔ Mat 21.1-11; Lók 19.28-40; Yoá 12.12-19)
1Ɓî Yéso na ɓagoigi nɛkɛ ɓábîmisi Yɛusalɛ́ma, ande gea te, nci á na Bɛtɛphágɛ na Bɛtanía bíbí á mamba á Mijɛitúni, Yéso áǒteka ka ɓagoigi nɛkɛ ɓaɓɛ mosá, 2áǒngoɗea: «Gǎni ka nji nde a mosá anu. Ɓo ye okiɗia kó, ɓondondande mponjo á mponda na ɓámɓɔi, na kánkúmbimbɛ mɔnɔ nkpa. Nkóɗani ɓómbikɛ ně. 3Aoɓá nkpa n'anoúsi gea: ‹Ɓogi ndɔ ka ɓo?› Ɓônsikisia gea: ‹Mɔkɔta aámbé ammɛmi, ansikisande wani kɛ̌kɛnde.›»
4Ɓáoga, ɓáondonda mponjo á mponda ka ntanga, na ɓámɓɔi bíbí á kǐo, ɓáonkoɗa. 5Ka ɓakpa nde ɗáɓátú wa, ɓáǒúsia te: «Ɓoonkoɗa miki á mponda nde ka nyɔngɔ eke?» 6Ɓáǒsikisia ɓíndɔ Yéso ɗɛ́tɔ̌mi. Mpɔ, ɓakpa ndɔ ɓáoɓeekea, ɓángɛ ně. 7Ɓáombikia Yéso na miki á mponda ndɔ, ɓáobisa ngɔ́mbɛ nɛɓɔ gǔ akɛ, mpɔ Yéso áoikiɗia ú#Ɔna Jak 9.9. 8Ɓakpa ɓásii, ɓáɔɔyia ngɔ́mbɛ nɛɓɔ k'aphe, ɓunɛngbo gǎkɛ kasa nde ɗáɓáteni na ciko#11.8 Ɔna 2 Ɓkt 9.13. Dátú ngɔ́mbɛ á ɓokutú.. 9Ɓakpa ɓunde ɗáɓátú otamba mosá á Yéso, na ɓunde ɗáɓátú mbusa akɛ, ɓáokoga gea,
Obebɔ oo!
Ɓosegi ka mmbé abiki k'ína á Mɔkɔta.
10Ɓosegi ka kiɗia á koɓoamɛ ndea tatasu Daúdi.
Obebɔ átáiɛ na koba! #Ɔna Jab 118.25-26
11Yéso áokiɗia ka Yɛusalɛ́ma. Akiɗi ye, áongia suɓi éndu á Mokonga. Áɔɛnjia kema bui ko. Ɓî esa agɔgɔmani gǎkɛ, áojuana, áoja na Bɛtanía, kimoci na ɓagoigi nɛkɛ nkama na ɓaɓɛ (12).
Yéso asɛmɛigi me
(Ɔna phɔtɔ Mat 21.18-19)
12Aɓi ye mama í, ɓî Yéso na ɓagoigi ɗáɓátú otóka na Bɛtanía, nja áɔmbɛɗa. 13Aɔɔna ɗanga, kasa á me nde ɓáɔɔphana mtini#11.13 Mtini ɗátú me nde ɗáɓáoea mbuka akɛ.. Áoga kɔɔnjia bíbí nga, ɗátúoúba te agɔmbi. Akiɗi ye, â tɔ ɔɔna kasa kángá á mbuka nga, ɗákátú matú á gɔmba í. 14Mpɔ, Yéso áɔnsɛmɛaga me ndɔ te: «Nkpa káɛeka ye tanda mbuka akɔ.» Ɓagoigi ɓáɔɔ́ka sɛmɛaga ndɔɔ.
Yéso ěɓǐgi ɓasombisigi nkumba suɓi éndu ndea Mokonga
(Ɔna phɔtɔ Mat 21.12-17; Lók 19.45-48; Yoá 2.13-22)
15Mbusa, Yéso na ɓagoigi nɛkɛ, ɓáokiɗia ka Yɛusalɛ́ma. Yéso áongia k'éndu ndea Mokonga, áǒɓeaga ɓasombisigi na ɓasombigi-nkumba. Áokpúngbumisaga mɛja ndea ɓaánganisigi-imɔna#11.15 Ka matú ndɔ, endu ndea Mokonga ɗátú n'etéte á imɔna nɛkɛ. Ɓakpa ɗáɓátú na siki á anganisa imɔna nɛɓɔ ka imɔna ndea ɓatoɓeigi-phɛ́a, aoɓá na ɓákondi bisa á ɔphɛ́ɔ., na kankaanga ndea ɓasombisigi-ɓamboe. 16Ɗáoimisia gea ka ɓakpa ɓákakumbɛ nkumba na nyɛ́nya ně ka ntanga á endu ndea Mokonga. 17Mpɔ, áɔ̌phɛa ɓe: «Ɓáɗundu suɓi á Ɓuku ndea Mokonga ɓe: ‹Ɓáɔphanande endu nɛmɔ, endu ɛ́mɛmi á Mokonga ka ɓato á ka nji bui.› Cɔ, ɓenu ɓô ndiu obisa ú ɔma á dondanaga á ɓakukuɓa#Ɔna Isa 56.7; Yɛɛ 7.11 ?» 18Ɓî ɓagbɛga á ɓatoɓeigi-phɛ́a na ɓaɗundu-ɛɔphi ɓáɔ́ki ye ɓó, ɓáokaɓa kusa á Yéso. Ɗáɓátú omɓánga Yéso ka nyɔngɔ nde, goisaga nɛkɛ ɗɛ́ɓɔngɛi usɛsɛ á ɓakpa ɓásii phɛɛ. 19Aɓi ye ɔgɔgɔ, Yéso na ɓagoigi nɛkɛ ɓáotóka ka ntanga-nji ndɔɔ.
Yéso aogoisaga nyɔngɔ á ɛmɛmi
(Ɔna phɔtɔ Mat 21.20-22)
20Mama í kamɓimba, ɓî Yéso na ɓagoigi ɗáɓátú ɔnyɛ́nya k'aphe, ɓáɔɔna me ndɔ Yéso ɗásɛmɛigi n'aɔmi na mǐgi akɛ bui. 21Mpɔ, Pɛ́tɛɛ áokanisia ɓî Yéso ɗánsɛmɛigi me ndɔɔ. Áongoɗea te: «Ngoisigi, énga phɔ́ me ndɔ ɔnsɛmɛigima, aɔmi buakɛ pɔ!» 22Yéso áǒngoɗea: «Mɓeekeani Mokonga. 23Nenóngoɗi ɗoni gea, aoɓá nkpa n'angoɗi mamba nde, áogea: ‹Phúikana súa, ógɛ guiɛ k'óɓenge.› Aoɓá na nna na ngǎka ka měma akɛ n'aɓeeki gǎkɛ te, ɓoabi nɛkɛ atɔtɔkɛanande, aɓande tɔ ɓó. 24Kaɓondɔ unge nenóngoɗi te, kema bui nde ɓɔɔmɛma, ɓeekeani gea te, ɓo ye tɔ ně nga, Mokonga anophande. 25A phɔtɔ oɓá na ɓomame ka mɛma á Mokonga, na ɓona nyɔngɔ na nkpa, ímani ɓojeɗe nde ɓánogǐí ka gea te, Abanu mmbé á na koba áímɛ phɔtɔ ɓojeɗe nɛnu. [26Cɔ, a gǎkɛ oɓá na ɓókóoíma ɓojeɗe nde ɓakpa ɓánogǐí, Abanu mmbé á na koba káímɛku tanda ɓojeɗe ínɛnu.]»
Ianaga ka nyɔngɔ á cina á kɔkɔta ndea Yéso
(Ɔna phɔtɔ Mat 21.23-27; Lók 20.1-8)
27Mbusa, Yéso na ɓagoigi nɛkɛ, ɓâ goto oga na Yɛusalɛ́ma. Ɓî Yéso ɗátúotamba ka ntanga á endu á Mokonga, ɓagbɛga á ɓatobeigi-phɛ́a, ɓaɗundu-ɛɔphi na ɓagbɛga, ɓáombikia Yéso, 28ɓáomúsia te: «Ka kɔkɔta sina nde ɔɔtɔtɔkisa kema nde? Ani mmbé akophi kɔkɔta ndɔ?» 29Yéso áǒsikisia: «Nenoúsiande tɔ músiɔ moci. Ɓo ye omosikisia, mpɔ néonóngoɗea kɔkɔta sina nde nɛɔtɔtɔkisa ně. 30Ani mmbé ɗámophi Yoáni kɔkɔta á ɓatisa. Ande Mokonga, kaɓɛ n'ande ɓakpa? Cɔ, ómosikisiani!»
31Mpɔ, ɓáoianaga ngǔngu aɓɔ, ɓáogea: «Aoɓá na ɓegi te: ‹Mokonga aámbé ɗánteki›, ámbé asoúsiande gea: ‹Ka nyɔngɔ éke nde ɗóɓókómɓeeki gǎkɛ Yoáni?› 32Aoɓá na ɓegi gǎkɛ atóki ka ɓakpa, kaɓɛ ánjá.» Nga, usɛsɛ á ɓakpa ɓɔbu ɗáɓátúoúba gea te, Yoáni ande mɔtu-nyɔngɔ ndea Mokonga ɗoni. 33Kaɓondɔ, ɓáonsikisia Yéso: «Ɓékéoúba.» Mpɔ, Yéso áǒngoɗea: «Eme gǎkɛ, kénongoɗeɛku cina á kɔkɔta nde nɛɔtɔtɔkisa ně.»
Currently Selected:
Málikɔ 11: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
