Matáyɔ 7
7
Kotenɛmbɛ nyɔngɔ ndea ɓakpa ɓuangbo
(Ɔna phɔtɔ Lók 6.37-38,41-42)
1Kotenɛmbɛ nyɔngɔ ndea ɓakpa ɓuangbo ka gea te, Mokonga katenɛmbɛ phɔtɔ nyɔngɔ ínɛkɔ. 2Nga ɓíndɔ ɓootena nyɔngɔ ndea ɓakpa ɓuangbo, a tɔ unge Mokonga atenande nyɔngɔ ínɛnu. Mokonga akogeande phɔtɔ ɓíndɔ oógea ɓakpa ɓunɛngbo. 3Ekende ɔɔna gbɛɛkɛsɛ á k'íso á dakɔ, n'ɔkɔ́ɔna gbútuka á me nde á k'íso akɔ? 4Oongoɗea muna-amakɔ: ‹Nékophúiɛ phɔ́ gbɛɛkɛsɛ k'iso›, n'ona gbútuka á me k'íso akɔ ka ɓo? 5Ntoa-maibe nde ca! Tókisa phɔ́ gbútuka á me nde a k'íso akɔ, mpɔ ɔ́ɔnaphɛ ánjá ka phuia á gbɛɛkɛsɛ á k'íso á dakɔ.
6Ɓókǒɓophɛmbɛ ɓambwa kema ndea Mokonga ka ɓanga gea, ɓákanójǐɛmbɛ na nyɔága á kesuku anu. Phɔtɔ, ɓókomakɛmbɛ nsanga á esombi akpɛ mosá á ɓangɛa, ka ɓanga gea, ɓáɗɛtɛagande.
Ɛmɛmi, kaɓa á kema na gbondoaga á kǐo
(Ɔna phɔtɔ Lók 11.9-13)
7Mɛmani na ɓánophande, káɓáni kema na ɓɔɔnande, gbondoagani kǐo na ɓánoúkuiande. 8Nga, nkpa buakɛ mmbé aɔmɛma atɔande, nkpa buakɛ mmbé aokaɓa, aɔnande na nkpa buakɛ mmbé aogbondoaga kǐo, ɓámukuiande. 9Cɔ, ana ka ɓenu nde aoɓá miki nɛkɛ n'amɛmi mokati, amophande ɛtɛ? 10Kaɓɛ miki nɛkɛ n'amɛmi sú, amophande nkoto? 11Ɓenu, nanga ɓóɓa ɓakpa ɓájeɗe, ɓoúba opha á ɓ'ananu kema ánjánja. Abanu mmbé á na koba, aéɓophande ɓunde ɓáɔmmɛma kema ánjá phɛɛ.
12Ógeeani phɔtɔ ɓakpa ɓonjánjá bui ɓíndɔ ɓokondi ɓánogeeɛ. Nndɔ ungɔ ande cina ɛ́ɔphi ndea Mósa na cina á ɓuku ndea ɓaɔtu-nyɔngɔ ndea Mokonga#Ɔna Ɓlm 13.8-10.
Kǐo á kɔtɔkana
(Ɔna phɔtɔ Lók 13.24)
13Gǎni ɓóngiɛ ka kǐo nde akɔtɔkani. Nga, kǐo ágbae aunge ande aphe nde aoɓúngisaga. Ɓakpa ɓásii ɓáunge ɓáongia k'aphe ndɔɔ. 14Kǐo nde akɔtɔkani, ande aphe ábɔa nde agě ka enda á mɛyɔ, ɓakpa ɓábɔa ɓáunge ɓáɔɔna ú.
Ɓaɔtu-nyɔngɔ á mbɛa
(Ɔna phɔtɔ Lók 6.43-44)
15Ɛ́ngɛphani na ɓaɔtu-nyɔngɔ á mbɛa. Ɓáobika mɔtɛ-anu na ɓáɔ́ligi nkeke á ɓamɔgɔgɔ. Suɓi aɓɔ na ɓá gǎkɛ ɓamabianga ɓakae 16Ɓáúbikanande k'ékuma nɛɓɔ. Ɓákáɔkɔɗa mbuka á Mujabíbu ka tomba, ɓáká phɔtɔ ɔkɔɗa tíni ka cía. 17Cɔ, me anjánjá buakɛ, a tɔ ɔgɔmbisa mbuka ánjánja, me ajeɗe buakɛ a tɔ ɔgɔmbisa mbuka ájeɗe-jeɗe. 18Me anjánjá nnaɔtɔka n'agɔmbisi mbuka ájeɗe. Me ájeɗe nna gǎkɛ ɔtɔka n'agɔmbisi mbuka ánjá. 19Ɓáombia me buakɛ mmbé nnaɔgɔmbisa mbuka ánjánja, ɓáomaka ka nsa. 20Kaɓondɔ, ɓoóɓúbande ɓaɔtu-nyɔngɔ á mbɛa k'ékuma nɛɓɔ.
Ɓagoigi á ɗoni ndea Yéso
(Ɔna phɔtɔ Lók 13.25-27)
21Nna ɓakpa ɓɔbu ɓunde ɓáɔmɔɔphana ‹Mɔkɔta! Mɔkɔta!› ɓáunge ɓángiande ka koɓoamɛ ndea na koba. A tɔndɔ gǎkɛ ɓunde ɓáɔtɔtɔkisa mɔphɛ ndea Abɛ, mmbé á na koba. 22Nga, esa á tena á nyɔngɔ, ɓakpa ɓásii ɓámongoɗeaeka ‹Mɔkɔta! Mɔkɔta! Ɓékéɔtu phɔ́ nyɔngɔ ndea Mokonga k'ína akɔ? Ɓéképhumbi phɔ́ ɓansombo k'ína akɔ? Ɓékégi phɔ́ ketangaɔ ásii k'ína akɔ?› 23Eme něngoɗeaeka gǎkɛ base gea: ‹Ɗéké tanda onoúba. Tókani bíbí ani, ɓenu íɓunde ɓoogea ɓojeɗe#Ɔna Jab 6.9.›
Mɔphɛkɔ a iɓɛ
(Ɔna phɔtɔ Lók 6.47-49)
24Nkpa buakɛ mmbé aɔɔ́ka nyɔngɔ nɛmɔ, na tɔtɔkisa í, akengeani na múbaphi, mmbé aphɛ̌ki endu nɛkɛ gǔ á ɛtɛ. 25Mbua áɔɔka, iɓo áotúma, sumbu áɔɓɛta endu ndɔ, káuɗúkanɛ gǎkɛ, ka nyɔngɔ nde ɗáɓáphɛ̌ki endu ndɔ gǔ á ɛtɛ. 26Nkpa buakɛ mmbé aɔɔka nyɔngɔ nɛmɔ, na nna gǎkɛ ɔtɔtɔkisa ú, akengeanande na mbóbó, mmbé aphɛ̌ki endu nɛkɛ gǔ á mbume. 27Mbua áɔɔka, iɓo áotúma, sumbu áɔɓɛta endu ndɔ, áouɗukana, áogua gbu!»
Kɔkɔta ndea Yéso
28Mbusa á Yéso gɔɓa á yɔnga nyɔngɔ ndɔ, usɛsɛ á ɓakpa ɓáotangaaga phɛɛ ka nkókó á ɓɔphɛi nɛkɛ. 29Nga, yɛ, ɗákáogoisaga ɓea ɓaɗundu-ɛɔphi nɛɓɔ, ɗá ndiu ǒgoisaga na kɔkɔta.
Currently Selected:
Matáyɔ 7: KMW
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2021, Wycliffe Bible Translators, Inc.