Matáyɔ 10
10
Sɔmbɔa á ɓateki nkama na ɓaɓɛ (12) ndea Yéso
(Ɔna phɔtɔ Mkɔ 3.13-19; Lók 6.12-16)
1Yéso áɔ̌ɓɔphana ɓagoigi nɛkɛ nkama na ɓaɓɛ (12), áǒɓopha ɓukpɛkpɛ á ɓeaga ɓansombo na amisa etéte á ngobo na kiɗɔti bui. 2Cɔ, ina á ɓateki ndɔ aunge: Simɔ́ni, mmbɔ ɗáɓánsǔ Pɛ́tɛɛ na muna-amakɛ Andeé, Yakɔ́ɓɔ na muna-amakɛ Yoáni ɓana Jɛbɛdáyɔ. 3Philípɔ na Batɔlɔmáyɔ, Tɔmá na Matáyɔ mmbɔ mphendisigi-manjanja, Yakɔ́ɓɔ muna Alpháyɔ na Tadɛ́yɔ, 4Simɔ́ni manei-nji na Yúda-Isikaliɔ́ta, mmbɔ ɗántɔngi Yéso.
Yéso aeteki ɓateki nɛkɛ
(Ɔna phɔtɔ Mkɔ 6.7-13; Lók 9.1-6)
5Yéso áǒteka ɓateki ndɔ nkama na ɓaɓɛ (12). Âkɔ̌ɔkusaga ɓe: «Ɓókóngiɛ mɔnɔ ka nji á ɓato á ɓojeɗe. Goto ɓókongiɛ mɔnɔ ka ntanga-nji moci ndea Ɓasamalía. 6Gǎni ndiu ka Ɓaisilaɛ́li ɓunde ɓá ɓea ɓamɔgɔgɔ na ɓáɓungigi. 7Ɔ́tɔ̌miagani ɓakpa k'aphe gea: ‹Koɓoamɛ á na koba a ye tɔ bíbí.› 8Óamisani ɓasambi, ójujúkisani ɓasí, ósokoseani ɓato á sǔ, óɓeagani ɓansombo. Ɓɔtɔi k'écici, gabani phɔtɔ k'écici. 9Ɓókobɛɗɛmbɛ ka kema ɓea láté na imɔna suɓi á njombi nɛnu. 10Ɓókobɛɗɛmbɛ maiɓɔta á tamba ně, ngɔ́mbɛ á k'égogo iɓɛ, ɓiato, motumbɔ nga, mbɛɗanigi akenanigi n'ea nɛkɛ#Ɔna 1 Ɓkt 9.14; 1 Tim 5.18.
11Aoɓá na ɓokiɗi ka ntanga-nji moci, kaɓɛ nji, nkaɓani nkpa nde anóseseande na ikani mɔtɛ-akɛ na ka ɓî ɓɔmɛande. 12Mbenɔ nde ɓoongia k'éndu, yɔngani gea: ‹Ikani ka ɓujɛjɛ.› 13Endu nde ɓáonósesea kau, ambe ɓujɛjɛ nɛnu áikɛ gǔ aɓɔ. A gǎkɛ oɓá na ɓákánosesi, ɓujɛjɛ nɛnu ánojííɛ. 14Aoɓá na ɓákánosesi, kaɓɛ ɔ́ka anu, júanani k'ɔ́ma ndɔ, ɓóciciɛ mpusu á oɗo bui nde a k'écinji anu#10.14 Cicia á nkáá á k'écinji ande mphangiɔ á katanaga mɔtɛ á Ɓayúda. Ɔna Mkɔ 6.11. 15Nenóngoɗi ɗoni te, tena á nyɔngɔ á nji ndɔ, anyɛ́nyande nnde á Sɔdɔ́ma na Gɔmɔ́la#Ɔna Nkp 18.1—19.38.»
Tambaga nde abikaeka ka ɓagoigi ndea Yéso
(Ɔna phɔtɔ Mkɔ 13.9-13; Lók 21.12-17)
16«Cɔ, ɔ́kani phɔ́! Nenóteki ɓea ɓamɔgɔgɔ ka ɔlɔ á ɓanyama ɓea ɓamabianga. Ɛ́ngɛphani ɓea njɔka, ɓóɓɛ ɓaphɔngɔ ɓea mboe. 17Ɔ́ɛnjiani ánjá nga, ɓakpa ɓánɔtɔngande ka ntua á tena á nyɔngɔ na ɓinda anu k'éndu á madondanɔ ndea Ɓayúda ka nyɔngɔ á Mokonga. 18Ɓánojúsande mosá á ɓakɔta na ɓaamɛ ka nyɔngɔ ani, ka gea ɓɔ́tɔ̌miɛgɛ nyɔngɔ ani mosá aɓɔ na mosá á ɓundɔ ɓáná Ɓayúda. 19Mbenɔ nde ɓánojúsande ka ntua á tena nyɔngɔ, ɓókoianɛgɛmbɛ gea: ‹Ɓɛyɔngande ɓo? Na ɓɛyɔngande kema sina?› Nga, ɓánoúbisande nnde ɓɔyɔngande ka mbenɔ ndɔ. 20Nnde ɓɔyɔngande kátókɛku ka ɓenu. Měma á Abanu unge ayɔngande suɓi anu.
21Nkpa antɔngande muna-amakɛ ka gea, ɓámmowɛ. Na ɓaniki ɓáɓande ɓaɓiɓia á ɓaɓɔkɔti aɓɔ, na kusisa aɓɔ. 22Ɓakpa ɓɔbu ɓánokangeande ka nyɔngɔ ani. Nkpa nde aphiphiande gǎkɛ tambaga ndɔ na ka sungiaga í, mmbɔ aámbé aamande.» 23Aoɓá na ɓáonótambisaga ka ntanga-nji moci, ɓôtea ka ntanga-nji nɛngbo. Nenóngoɗi ɗoni gea, ɓɔ́kɔ́gɔɓɛku tɔmba á ntanga-nji bui á ka Isilaɛ́li na Muna-Nkpa kábikimbɛ.
24«Nna tanda na ngoigi nde aɔtɔka n'anyɛ́nyi ngoisigi nɛkɛ. Nna tanda na mbɛɗanigi mmbé aɔtɔka n'anyɛ́nyi mɔkɔta ékuma nɛkɛ. 25Ambe ngoigi áɓɛ ɓea ngoisigi nɛkɛ, mbɛɗanigi áɓɛ ɓea mɔkɔta ékuma nɛkɛ. Aoɓá na ɓámɔphani mɔkɔta á ekombo k'ína Bɛljɛbúli#10.25 Beljɛbúli ande ina nde ɗáɓánsǔ nketi mmbé ande mɔkɔta á ɓansombo., ɓáɛɓɔphanande ɓato á k'ékombo nɛkɛ k'ína ájeɗe phɛɛ.»
Akeni ɓánga á Mokonga tɔndɔ
(Ɔna phɔtɔ Lók 12.2-7)
26«Ɓókǒɓángɛmbɛ ɓakpa ndɔɔ. Kema bui nde ɓáobuniaga, angoɗokanande na nnde ɓáogea ka ɓɔsɔmɛa, aubukanande. 27Ambe ɓóyɔngɛ sɔmani, nyɔngɔ nde neonongoɗea ka kaiphiɔ. Nnde neonongoɗea ka kɔsɔ-kɔsɔ, yɔngani ú ka ntanga. 28Ɓókǒɓángɛmbɛ ɓundɔ ɓáomowa nyama, ɓákátɔkɛ gǎkɛ mowa měma. Mɓángani ndiu Mokonga mmbé aɔtɔka n'akusisi#Ɔna Yak 4.12 nyama na měma ka ɛɛmbɛ á nsa nde nnaoímika. 29Esombi á ɓaciɔɗɔ ɓaɓɛ a kusi phɛɛ nna ɓo? Nanga ɓó, ka ɓɔ moci nnaɔtɔka n'agu ka oɗo Abanu Mokonga na káubi. 30Cɔ, ɓenu gǎkɛ nanga sɛkamɔ̌ anu ɓá phɔtɔ otanga bui. 31Ɓî aɓó, ɓókoɓángɛmbɛ nga, ɓɔ̌nyɛ́nyi ɓaciɔɗɔ ndɔ ɓɔbu.»
Ɓeekea á Yéso kaɓɛ yá akɛ mosá á ɓakpa
(Ɔna phɔtɔ Lók 12.8-9)
32«Nkpa buakɛ mmbé amoɓeekeande mosá á ɓakpa gea ande ngoigi nɛmɔ, aámbé eme nemɓeekeande phɔtɔ mosá á Abɛ á na koba ka gea, mmbɔ ande ɓ'ámɔ. 33Mmbé gǎkɛ amoyande#Ɔna 2 Tim 2.12 mosá á ɓakpa, aámbé eme phɔtɔ nen'yande mosá á Abɛ mmbɔ á na koba.»
Ɓakpa ɓákatanagande ka nyɔngɔ á Yéso
(Ɔna phɔtɔ Lók 12.51-53; 14.26-27)
34«Ɓókokanisiɛ mɔnɔ gea, nebiki ka mokonda k'aphe á bisa ɓujɛjɛ. Kébiki ka aphe á bisa ɓujɛjɛ. Nebiki ndiu ka aphe émani. 35Nebiki onkatanisa moganda n'abakɛ, nseka n'amakɛ, nke-ambasa na nyamɔtɔ akɛ nke. 36Ɓaɓiɓia ndea nkpa, ɓá tɔ ɓato á k'ékombo #Ɔna Mik 7.6 nɛkɛ sasakɛ.
37Nkpa nde ankondi abakɛ kaɓɛ amakɛ kɔmɔnyɛ́nya, kámokeni ně. Mmbé ankondi moganda kaɓɛ nsɛka nɛkɛ kɔmɔnyɛ́nya, kámokeni ně. 38Nkpa nde kákondi kumba á moyangɔ nɛkɛ ka ɓeá ani, kámokeni ně. 39Mmbé aokonda amba á enda akɛ, aɓúngisande ú. Mmbé aɓungisande gǎkɛ enda akɛ ka nyɔngɔ ani, atɔande ú.»
Ophendɔ ka ɓato á osasɔ
(Ɔna phɔtɔ Mkɔ 9.41)
40«Nkpa nde anósesi, amosesi. Nkpa nde amosesi, ansesi mmbé amoteki. 41Nkpa nde ansesi mɔtu-nyɔngɔ ndea Mokonga ka nyɔngɔ nde ande mɔtu-nyɔngɔ ndea Mokonga, atɔande ophendɔ nde akenani ka mɔtu-nyɔngɔ ndea Mokonga. Nkpa nde ansesi nto á koɗoni ka nyɔngɔ nde ande nto á koɗoni, atɔande ophendɔ nnde akenani ka nto á koɗoni.
42Nenóngoɗi ɗoni gea, mmbé aomopha cǎ moci á iɓo ádɛdɛ̌ ka ɓakpa ɓábɔbɔbɔa nde moci sɔsɔɓɛ á ɓagoigi nɛmɔ, ka nyɔngɔ nde yɛ ande ngoigi nɛmɔ, atɔande ophendɔ nɛkɛ.»
Currently Selected:
Matáyɔ 10: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
