Marcos 2

Usabi ꞌaish nicëma uni Jesusan pëxcüa

(Mt 9.1-8; Lc 5.17-26)

1Anu uni ꞌicëma menu ꞌitancëx ca Jesús Capernaúm ëmanu cuantëcëancëxa. Cuanxa anu ꞌain ca unicaman —Jesús ca uax xubunu ꞌicë —quixun chaniocëxa. 2Chaniocëbë ca anua Jesús ꞌicë xubu tsitsirui, ꞌitsa uni timëcamëꞌëocëxa. Usari ꞌiquian anu uni niti ꞌaíma ꞌinun xubu xëcuëbi tsitsirucë, ca Jesusan anuxun atu bana ñuixuancëxa. 3Ñuixuncëbëtanbi ca rabë́ ꞌimainun rabë́ unin uni achúshi ñucë, nirucuaínquinbi tancëma, bacë́tinu racácë bëacëxa. 4Bëxun ca ꞌitsa unia tsitsíruan anun atsínmiti ꞌaíma ꞌain, tapitinën buánrutancëxun, xubu manan tapuacë anua Jesús ꞌicë puntë́bi cha oquin bërúaratancëxun, aín bacë́tinuabi nanpácëxa. 5Nanpáquin ca —Jesusan ca ënë uni pëxcuti ꞌicë —quixun aín nuitu mëu sináncëxa. Sinania atun sinan ꞌunánquin ca Jesusan ñucë uni cacëxa:

—Min ꞌuchacama ca tërë́ncë ꞌicë —quixun.

6Usoquin Jesusan caia cuaquin ca anu tsócë an Moisésnën cuënëo bana ꞌunáncë unicaman ësaquin sináncëxa: 7—¿Uisa ꞌaish cara ënë unix usai banain? Ënëx ca anúan Nucën Papa Diosaxëshi quiti banan banaia, ax ca ꞌaisama ꞌicën. Uinu ꞌicë unínbi ca ꞌucha tërë́ntima ꞌicën. Nucën Papa Diosan cuni ca ꞌucha tërë́nti ꞌicën.

8Usaquian sinania atun sinan ꞌunánquin ca Jesusan atu cacëxa:

—¿Uisacasquin caramina mitsun usaquin sinanin? 9ꞌËn cana ñucë uni ënë —min ꞌuchacama ca tërë́ncë ꞌicë —quixun cananbi —niruquiani ca min bacë́ti bibiani cuantan —quixunribi cati ꞌain. 10Nucën Papa Diosan cushínshi ꞌën ënë uni pëxcuia isquin camina asérabi ꞌunánti ꞌain, uni ꞌinux Nucën Papa Diosnuax uá, ꞌën cana unin ꞌucharibi tërë́nti ꞌai quixun.

Caquin ca racábucë uni cacëxa: 11—ꞌËn cana mi cain, niruquiani ca min bacë́ti bibiani min xubunu cuantan.

12Cacëxëshi niruquin aín bacë́ti bibiani ca a uni, anu ꞌicë unicaman ismainunbi cuancëxa. Usaría cuania isi ratuti ca Nucën Papa Dios rabi quicancëxa:

—Ësa ñu cananuna isáma ꞌain.

Jesusan Leví aín uni ꞌinun ca

(Mt 9.9-13; Lc 5.27-32)

13Parúmpapa cuëbía Jesús cuantëcëncëbë ca ꞌaisamaira uni anu timëcamëꞌëocëxa. Timëcamëꞌëoia ca Jesusan atu ꞌunánmiacëxa. 14ꞌUnánmitancëx cuanquínbi ca Jesusan Alfeonën bëchicë, Leví cacë, a anuxuan ꞌapu buánmiti curíqui bicë anua tsócë mëracëxa. Mëraquin ca Jesusan cacëxa:

—ꞌËn mi ꞌunánminun ca ꞌëbë cuani ut.

Cacëxëshi ca Leví niruquiani Jesúsbë cuancëxa. 15Cuanquin ca Jesúscëñun aín ꞌunánmicë unicama aín xubunuxun pi cuanun Levitan buáncëxa. Buania ca ꞌaisamaira unin atu nuibiancëxa. Nuibiancëbë atúxribi atubë cuanx ca an ꞌapu buánmiti curíqui bicë unicamabë an fariseocaman bana tancëma uni raírinëxribi anu cuanx Jesús ꞌimainun aín ꞌunánmicë unicamabëtan pi bucüacëxa. 16Usoquian atubëtan piia isquin ca an Moisésnën cuënëo bana ꞌunáncë unicamabëtan fariseo unicaman Jesusan ꞌunánmicë unicama ñucáquin cacëxa:

—¿Uisa cupí cara an mitsu ꞌunánmicë unin ꞌuchañu unicamabëtan pianan an ꞌapu buánmiti curíqui bicë unicamabëtanribi pin?

17Usai quia cuaquin ca Jesusan cacëxa:

—Paë tancëma uni, ax ca rucuturúan a ronti cuëënima. Paë tancë uni, ax cuni ca rucuturúan a ronti cuëënia. Usaribiti cana ꞌëx an —ꞌëx cana asábi ꞌai —quixun sináncë unicama a ꞌëmia catamënun cai uáma ꞌain. Ama, an —ꞌën nuitu ꞌaisama ꞌaish cana ꞌëxbi upí ꞌitima ꞌai —quixun sináncë unicama a cuni upí ꞌinuxa ꞌëmi catamënun cai cana ꞌëx uacën.

Unían Jesús pima samáti ñucá

(Mt 9.14-17; Lc 5.33-39)

18Usa ꞌain ca Juan, an uni nashimicë, aín ꞌunánmicë unicama ꞌimainun fariseo unicaman, Nucën Papa Dios sinani samáquin picëbëtanma, uni raírinën anu cuanxun Jesús cacëxa:

—Juanën ꞌunánmicë unicamax ca Nucën Papa Diosmi sinani bëtsi bëtsi nëtën pima samatia. Usaribiti ca fariseonëan ꞌunánmicë unicamaxribi ꞌia. ¿Usa ꞌaínbi cara uisacasquin min ꞌunánmicë unicaman samáquinma pin?

19Cacëxun ca Jesusan cacëxa:

—¿Anun xanu biti nëtën cara pi unun quixuan xanu biti unin camicë unicaman, an xanu biti uni axa atubë ꞌain, masá nuituquin pima ꞌiti ꞌic? Axa atubë ꞌain ca pima ꞌitima ꞌicën. 20Ca ësa ꞌicën: An xanu biti unin xanu biquin abëtan pi unun camicëx ca axa abë nuibanancë unicama masá nuitutima abë cuëënia. Xanu bibiani cuanquian a unin ëbiancëxun cuni ca axa abë nuibanancë unicaman masá nuituquin pitima ꞌicën. Usaribiquin ca ꞌën ꞌunánmicë unicama ꞌëbë ꞌixun masá nuituti samáquinma piia. Unían ꞌë bicëxun ꞌën ëbiancëxun cuni ca masá nuituquin pitima ꞌicën.

21Catancëxun ca aín banaxa fariseo unicaman uni ꞌunánmicë banasama ꞌain, aín banabë fariseonëan ꞌunánmicë bana mëscúti rabanan Jesusan ësaquinribi a unicama cacëxa:

—Ësaribi ca. Nun aintsi uinu ꞌicë xanúnbi ca chupa xëni, chupa sani iotan aín tuquicë a ꞌunuima. Usocëxbi ca chupa xëni ax chëqui anun ꞌunucë ió ax nipacëtia. Usai ꞌi ca aín tuquicë ax chaia. 22Ësaribi ca. Ui unínbi ca ñuina xacá, anu ꞌumpax ꞌaruti chumusa oquin ꞌacë, axa xëni ꞌain, anu ñu chëcacë ꞌaruima. Anu ꞌarucëxunbi ca ñu chëcacë ax cubini uruquin ñuina xacá xëni a tucaia. Axa tuquicëbë ca chëcaxun anu ꞌarucëxa cubíncë ñu ax tutuqui nëtëtia. Usa ꞌain ca ñu chëcacë ñuina xacá chumusa oquin ꞌacë iónushi ꞌaruti ꞌicën.

Ësaquin ca an ñucácë unicama Jesusan cacëxa.

Anun ñu mëëtima nëtëan Jesusan ꞌunánmicë unicama trigo bëru sirícaquin bia

(Mt 12.1-8; Lc 6.1-5)

23Anun ñu mëëtima nëtën ca Jesús anu trigo ꞌapácë naënu ꞌicë bain cuancëxa. Cuancëbë abë cuanquinbi ca aín ꞌunánmicë unicaman trigo bëru pëcë́cë sirícaquin biacëxa. 24Bitsia isquin ca fariseo unicaman Jesús cacëxa:

—Ca is, ¿uisacasquin cara min ꞌunánmicë unicaman anun ñu mëëtima nëtën usaquin ꞌatima ñu ꞌain?

25Cacëxun ca Jesusan cacëxa:

—¿Mitsun caramina Davidnën ca ꞌacëñuma ꞌixun axa abë cuancë unicamabëtan ësoquin ñu ꞌacëxa quixun cuënëo bana a iscëma ꞌain? 26Abiatar cacë unia judíos sacerdotenën cushicaman ꞌapu ꞌain ca Davidnën ꞌacëñuma ꞌixun piisa tanquin, anuxun Nucën Papa Dios rabiti xubu anu atsínxun anu ꞌicë pán, Nucën Papa Diosan isti oquin nancë, a bixun piacëxa. A panëxa judíos sacerdotenëinshi piti ꞌaían uni itsin piti ꞌicëmabi ca sacerdotenën ꞌináncëxun bixun Davidnën piacëxa. Piquin ca axa abë ꞌicë unicama anribia pinun ꞌináncëxa.

27Ësaquinribi ca Jesusan cacëxa:

—Unia ñu mëëtancëx tanti cushitëcënti cupí ca Nucën Papa Diosan a nëtë tantiti mëníocëxa. A nëtën ca tantiti ꞌicë quixuinshi sinánun ca Nucën Papa Diosan uni unioma ꞌicën. 28Uni ꞌinux Nucën Papa Diosnuax uá ꞌixun cana ꞌën anun ñu mëëtima nëtën cara añu ꞌati ꞌicë quixun uni cati ꞌain.

Currently Selected:

Marcos 2: cbrPB

Highlight

Copy