Mateo 6

Ësaquin ñu upí ꞌati Jesús quia bana

1ꞌËx upí ꞌicëa camabi unin isnun cana ñuñuma uni ñu ꞌinánti ꞌai quixun camina sinántima ꞌain. An usaquin sinánquin uni itsi ñu ꞌináncë uni a ca Nucën Papa Dios naínu ꞌicë, an upí isima. 2Usa ꞌain camina ñuñuma uni ñu ꞌinánquin an uni paráncë unicaman ꞌacësaribi oquin ꞌatima ꞌain. Unin atu rabiti cuëënquin ca anu judíos unicama timë́ti xubunuxun ñu ꞌinánan bainuxunribi camabi unin isnun ñuñuma uni ñu ꞌinania. Usoquian ꞌinania isquin ca an a iscë unicaman a rabiquin, ax ca upí uni ꞌicë quixun caia. Unicaman usa uni rabiabi ca Nucën Papa Diosan a upí isima. 3A unicamax usai ꞌicëbëbi camina mitsux usai ꞌitima ꞌain. Min ñuñuma uni ñu ꞌinánquin camina bëtsi uni catima ꞌain, min abë nuibanancë uni abi camina catima ꞌain. 4Raíri unin isnunma camina uni ñu ꞌinánti ꞌain. Usaquinmi ꞌaia isi ca Nucën Papa Dios, an camabi unin ñu ꞌaia iscë, ax cuëënti ꞌicën. Cuëënquin ca mi upí oquin sinánxunti ꞌicën.

Ësai ca aín uni Nucën Papa Diosbë banati ꞌicë Jesús quia bana

(Lc 11.2-4)

5Mitsux Nucën Papa Diosbë banai camina an uni paráncë unicama ꞌicësa oi ꞌitima ꞌain. Atux ca unían a isnun quiax anua judíos unicama timë́ti xubunuax ꞌianan anun niti bai cuëbí anuaxribi Nucën Papa Diosbë banaia. Asérabi cana mitsu cain, a unicamaxa usai Nucën Papa Diosbë banaia iscë unicaman —ax ca upí uni ꞌicë —quixun sinánquin rabia. Usaquin rabiabi ca Nucën Papa Diosan a upí isima. 6A unicamaxa usai ꞌicëbëbi camina mitsux usai ꞌitima ꞌain. Mitsux min Papa Diosbë bananux min ꞌitinu atsínquin camina min xëcuë xëputi ꞌain. Xëputancëx camina, min Papa Diosribi ca anu ꞌicë quixun ꞌunani, abë banati ꞌain. Mitsua unin isiamabi ca min Papa Dios, an camabi ñu isanan camabi sinan ꞌunáncë, ax mixmi abë banaia cuati cuëënti ꞌicën. Cuëënquin ca mitsu upí oquin sinánxunti ꞌicën.

7Mitsux Nucën Papa Diosbë banai camina an Nucën Papa Dios ꞌunáncëma unicamaxa ꞌicësaribiti banatima ꞌain. Atux ca —nux usai banaia ca Nucën Papa Diosan nun bana cuati ꞌicë —quixun sinani ꞌaisamairai banaia, uisai quiti cara quixun sinanimabi. 8Usa uníxa ꞌicësai camina ꞌitima ꞌain. Mitsun Papa Dios an ca mitsun cacëma pan ꞌixunbi uisa ñucama caramina a ñucáti ꞌai quixun ꞌunania. 9Usa ꞌain camina ësaquin cai Nucën Papa Diosbë banati ꞌain:

Nucën Papa Dios, naínu ꞌicë, mix camina asérabi min sinan upíira ꞌain. Usa camina mix ꞌai quixun ca camabi uni mi ñui upí banáinshi banati ꞌicën. 10Aín ꞌApu ꞌicëa camabi unin mi rabiti cana cuëënin. Usaquian mi ꞌanun camina ꞌimiti ꞌain. Min nëtënuxuan ángelcaman ꞌacësaribi oquian ënë nëtënuxun unicaman mix cuëëncësabi oquin ꞌati cana cuëënin. 11Camabi nëtë́nmi ꞌacësaribi oquin camina ënë nëtë́nribi nun piti anun nux tsóti a nu ꞌinánti ꞌain. 12Unían nu ꞌatimocëxunbinu aribi ꞌatimoquinma a ñucama sinánquinma manucësaribi oquin camina nun ꞌacë ꞌatima ñucama nu tërë́nxunquin manuti ꞌain. 13Ñunshin ꞌatimanën ꞌapúan nu ñu ꞌatima ꞌamixunma ꞌanun camina nu bërúanti ꞌain. Nun ñu ꞌatima ꞌati ꞌicëbi camina nu usa ñu ꞌaxunma ꞌanun nu ië́miti ꞌain. Mix cushiira ꞌaish xënibua ꞌaínbi ꞌApu ꞌicë ca camabi unin mi rabiti ꞌicën. Usai ꞌinun min ꞌimiti cana cuëënin.

14Mitsun axa mitsumi ꞌuchacë uni usaribi oquin cupiquinma a manumi abë upí ꞌia ca mitsun Papa Dios naínu ꞌicë an mitsux ami ꞌuchacëcama tërë́nquin manuti ꞌicën. 15Usa ꞌaínbi ca mitsumi ꞌuchacë uni a usaribi oquin cupimi abë upí ꞌiama oquin mitsun Papa Dios naínu ꞌicë an mitsun ami ꞌuchacëcama tërë́nquin manutima ꞌicën.

Uníxa Nucën Papa Diosmi sinani samáti Jesús quia bana

16Mitsux Nucën Papa Diosbë upiti bananuxun piima camina an uni paráncë uníxa ꞌicësaribiti ꞌitima ꞌain. A unicamax ca —Nucën Papa Diosmi sinánquin picëma ꞌaish ca upí uni ꞌicë —quixuan raíri unin sinánun quiax picëma ꞌianan masá nuitucësa ꞌia. Usai ꞌia uni raírinën a rabiabi ca Nucën Papa Diosan a upí isima. 17A unicama usai ꞌicëbëbi camina mitsux Nucën Papa Diosmi sinani samatibi mëníocati min bu mëníonan bëchucati ꞌain. 18Unían ꞌunántisama ꞌinun usai mëníocaxmi samatia ca mitsun Papa Dios, an camabi unin sinan ꞌunáncë, ainshi mitsu isti ꞌicën. Isi cuëënquin ca upí oquin mitsu sinánxunti ꞌicën.

ꞌItsa ñuñu ꞌiti sinánquinma, Nucën Papa Diosan nëtënu upí ꞌiti sinánti Jesús quia bana

(Lc 12.33-34)

19Ënë nëtënuax ñuñuira ꞌiti cuëënquian unin ꞌaisamaira ñu bitsiabi ca bëtsi bëtsi ñu nacuaxan cëñumainun bëtsi bëtsi ñuxa puibuax chëquimainun bëtsi bëtsi ñu an ñu mëcamacë unin unë́xun xubunu atsínxun mëcamatia. Usa ꞌain camina axa ñuñuira ꞌiti cuëëncë uni asaribi ꞌitima ꞌain. 20Ënë nëtënuaxa ꞌicësai ca Nucën Papa Diosan nëtë naínu ꞌicë ñucama ꞌatimati cëñutíma, an ñu cëñuti nacuáxbi ca ꞌaíma ꞌicën, anuax ca ñu puibutiribi ꞌaíma ꞌicën, ꞌimainun ca an xubunu atsínxun ñu mëcamacë uni anu ꞌaíma ꞌicën. Usa ꞌain camina mitsux ënë menu ꞌicë ñuñuishi ꞌiti sinánquinma Nucën Papa Dios cuëëncësabi oquin ꞌati ꞌain. Usaquin ꞌatancëxmi aín nëtënu abë ꞌicë ca an mitsúnmi a cuëënminuxun ꞌacë ñucama cupí, mitsu cupíira oquin chuámarua cuëënun ꞌimiti ꞌicën. 21Uisa ñun cara cuëënia, a ñuishi ca unin sinania. Axa ënë nëtënu ꞌicë ñuñu ꞌiti cuëëncë unin ca a ñuñu ꞌitishi sinania. Usa ꞌaínbi ca an Nucën Papa Diosan a cupíoquin aín nëtënuxun chuámarua ꞌimiti cuëëncë uni an Nucën Papa Dios cuëënun ax cuëëncësabi oquin ꞌatishi sinania.

Aín unicama xabánu nicësa ꞌiti Jesús quia bana

(Lc 11.34-36)

22-23Lamparínën pëcacëbëtan ca unin bëruñu cupíshi an pëcacë ñucama ꞌimainun xabá isia. Min bëru upí ꞌain camina upí oquin isquin min ñu mëëti ꞌati ꞌain. Min bëru ꞌaisama ꞌain camina xabá isquinma min ñu mëëti upí oquin ꞌatima ꞌain, bëánquibucënuxun ꞌacësoquinshi camina ꞌati ꞌain. Usaribiti camina Nucën Papa Diosan ꞌimicëx min sinan upí ꞌianan an sinánmicë ꞌaish min sinan an pëcacësa ꞌain. Usai ꞌibi camina an sináncësaribi oquin sináncëma ꞌaish bëánquibucënu nicësa ꞌain. Ami sinánquinma bëtsi bëtsi ñu sináncë ꞌaish ca uni bëánquibucënuira nicësa ꞌicën.

—Ñuñu unix ca Nucën Papa Diosmi sinanima —Jesús quia bana

(Lc 16.13)

24Ësa ca: Achúshi unin ca rabë́ uni ñu mëëxuntima ꞌicën. Rabë́ uni ñu mëëxuncë ꞌixun ca bëtsishi nuibaquin upí oquin ñu ꞌaxuanan bëtsi nuibatima ꞌicën. Usa ꞌixun achúshinën bana cuaquin bëtsían cacëxun aín bana parë́ti ꞌicën. Usaribiti ca uni curíqui ꞌimainun bëtsi bëtsi ñumishi sináncë ꞌaish Nucën Papa Diosmi upiti sinanima.

Nucën Papa Diosan ca aín unicama bërúanquin ꞌaquinia Jesús quia bana

(Lc 12.22-31)

25Usa ꞌain cana mitsu cain, añu caramina piti ꞌain, añu chupa caramina pañuti ꞌai quixun acama sinani camina masá nuitutima ꞌain. Mitsun pitisamaira camina mitsux ꞌain, mitsun chupasamaira camina mitsux ꞌain, ¿usa cat? An mitsúxmi ënë nëtënu tsoti oquin unio Nucën Papa Dios, ainshi ca a mi piti ñu mitsu ꞌinánan a mi pañuti chuparibi mitsu ꞌinánti ꞌicën. 26Mitsun camina axa nuáncë ñu pëchiucama ꞌunanin. Atun ca ñu ꞌapánan bimi bucunuxun bitsima. Usa ꞌicëbi ca mitsun Papa Dios, ax naínu ꞌicë, an atun piti ꞌinania. An ñu pëchiu ꞌacësamaira oquin ca mitsumi sinánquin mitsu piti ꞌinánti ꞌicën. 27Nucën Papa Diosainshi canimicë ꞌaish camina mitsúxbi masá nuituti canitisa tani masá nuitutibi canitima ꞌain.

28Usaribi oquin camina añu chupa caramina pañuti ꞌai quixun sinani masá nuitutima ꞌain. Camina isti ꞌain, ro uacama ax ca ñu mëëanan chupa onuxun risi oímabi upíira upí ꞌicën. 29A ro uacama sinánquin cana mitsu cain, ꞌapu Salomón ax ca ꞌitsaira ñuñu ꞌianan chupa upíira upí pañucë ꞌaíshbi aín chupa ax ro uasaribi upíira upí ꞌiáma ꞌicën. 30Upíira upí ꞌitancëxbia xanania unin tsin nëëncëx ca a ro ua cëñutia. Usai ꞌinunbi ca Nucën Papa Diosan aín ua upíira upí ꞌimia. Usoquin ꞌacë ꞌain camina ꞌunánti ꞌain, ro ua ꞌacësamaira oquin ca an mitsúnmi pañuti chupa mitsu ꞌinánti ꞌicën. Mitsux usaquin sináncëma ꞌaish camina upiti Nucën Papa Diosmi catamëcëma ꞌain. 31Usai ꞌima camina masá nuituti —¿añu ñu caranuna xëanan piti ꞌain? —quianan —¿añu chupa caranuna pañuti ꞌain? —quiquin usa ñuishi sinántima ꞌain. 32An Nucën Papa Dios ꞌunáncëma unicaman ca ñuñu ꞌitishi sinánan aín piti bitishi sinánan aín chupa bitishi sinania. A unicaman usaquin sináncë ꞌaínbi ca mitsun Papa Dios naínu ꞌicë an ꞌunania, mitsux chupañu ꞌianan pitiñu ꞌaish cuni camina upitax bucuti ꞌai quixun. 33Usa ꞌain camina ainan ꞌianan ax cuëëncësabi oquin pain ꞌati ꞌain. Usaquin ꞌacëbëtan ca an anúnmi mitsux upitax bucuti ñucama aribi mitsu ꞌinánti ꞌicën. 34Usa ꞌain camina —imë́ishi carana uisai ꞌiti ꞌain, bëtsi nëtë́nribi carana uisai ꞌiti ꞌai —quixun sinani masá nuitutima ꞌain. A nëtë ucëbëtainshi camina isti ꞌain.

Currently Selected:

Mateo 6: cbrPB

Highlight

Copy