Juan 9

Usabia bacë́an bëxuñu unia Jesusan bëpëxcüa

1Usocëx cuaínquin ca Jesusan usabia bacë́an bëxuñu uni achúshi isacëxa. 2Isia ca aín unánmicë unicaman Jesús ñucácëxa:

—¿Ënë uníxa bëxuñu bacë́nun cara uin ñu ꞌatima ꞌacëx, aín papa, aín titan cara ꞌacëx, ënë unínbi cara ꞌacëx?

3Quixuan cacëxun ca Jesusan cacëxa:

—Bëxuñu ca ax ꞌicën. ꞌAíshbi ca aín ꞌucha cupía ꞌicëma ꞌicën, ꞌimainun ca aín tita, aín papan ꞌucha cupíribia ꞌicëma ꞌicën. Nucën Papa Diosan ñu ꞌaia unin isnun ca ax bëxuñu ꞌicën. 4Bëánquicëbëtan ca unin ñu mëëtima ꞌicën. Usa ꞌain ca nëtën ñu mëëia. Usaribi oquin cana bamacëma pain ꞌixun ꞌën an ꞌë xuá axa quicësabi oquin ñu ꞌati ꞌain. 5Ënë nëtënu ꞌaish cana ꞌëx upí oquin sinánuan, an unicama ꞌimicë a ꞌain, bëánquibucënu ꞌicësa ꞌima xabánu ꞌicësa ꞌinun.

6Usaquin aín ꞌunánmicë unicama catancëx, anu tushuquicëxuan chabóia me chamara bitancëxun ca anun uni bëshíacëxa, 7bëshíquin ca cacëxa:

—ꞌIan cha, Siloé cacë, anu cuanx ca anuax bëchucatan. Siloé quicë bana ax ca cuanun xucë qui quicë bana ꞌicën.

Cacëxëshi cuanx bëchucacuatsini ca bëpë́xcüax uacëxa. 8Usaía ꞌian ca axa a rapasu ꞌicë unicama ꞌimainun an a uni bëxuñu ꞌicë iscë unicamaxribi quiacëxa:

—¿An tsóxun uni curíqui ñucácë uni ama cara ënëx ꞌic?

9—A ca ënëx ꞌicë —quiáxa bëtsix quicëbëbi ca raírinëxribi —Ama ca, a iscësaribi ca ënëx ꞌicë —quiax quiacëxa. Quiabi ca bëpë́xcucë unin cacëxa:

—A cana ꞌëx ꞌain.

10Cacëxun ca ñucáquin cacëxa:

—¿Mix a ꞌaish caramina uisax bëpë́xcüan?

11Cacëxun ca cacëxa:

—Jesús cacë uni, an ca anu tushuquicëxuan chabóia me chamara bitancëxun ꞌë bëshíaxa, bëshíquin ca ꞌian, Siloé cacë, anuax ca bëchucatan caxun ꞌë xuaxa. Xucëx cuanx bëchucacuatsínquin cana upí oquin isan.

12Cacëxun ca atun ñucácëxa:

—¿Uinu cara a uni ꞌic?

Cacëx ca —uinu cara, cana ꞌunanima —quiacëxa.

Fariseo unicaman bëpë́xcucë uni asérabi cara Jesusan usaquin ꞌaxa quixun ñucá

13Usa ꞌain ca an ꞌunáncë unicaman bëpë́xcucë uni fariseo unicamanu buáncëxa. 14Anun ñu mëëtima nëtë́an anu tushuquicëxuan chabóia me chamara bitancëxun anun bëshíxun Jesusan bëxuñu uni a bëpëxcucë cupí, 15ca fariseo unicaman a uni ñucátëcëancëxa, uisax caraisa bëpë́xcüaxa quixun. Ñucácëxun ca cacëxa:

—Me chabatan ꞌë bëshícëx bëchucaxun cana upí oquin isan.

16Quixuan cacëx ca fariseo uni raírinëx quiacëxa:

—A unin ca anun ñu mëëtima nëtën ñu ꞌaia. Usa ꞌaish ca Nucën Papa Diosnuaxa ucë uni ꞌitima ꞌicën.

Quiáxa quicëbë ca raíri quiacëxa:

—¿An ñu ꞌatima ꞌacë unin cara ësaquin uni itsían ꞌacëma ñu ꞌati ꞌic?

Usari ca bëtsi bëtsi oquin sinani atúxbi quiacëxa. 17Usai Jesús ñui quiquin ca bëpë́xcucë uni amiribishi ñucátëcëancëxa:

—¿Min sináncëx cara an mi bëpë́xcucë uni ax uisa uni ꞌic?

Cacëxun ca cacëxa:

—ꞌËn sináncëx ca ax an Nucën Papa Dios quicë bana uni ñuixuncë uni a ꞌicën.

18Usaquian cacëxunbi ca judíos unicaman, ënë unix ca bëxuñu ꞌiá ꞌaíshbi bëpë́xcucë ꞌicë quixun sinántisama tancëxa. Sinántisama tanquin cuënxun ñucácëxuan aín papabëtan aín tita cacëxun pain ca ꞌunáncëxa. 19Cuënxun ca aín papa ñucácëxa:

—¿Ënëx cara min bëchicë ꞌic, mitsúnmi bëxuñua bacë́an ñuicë, a cara ënëx ꞌic? ¿Usa ꞌixúnbi cara uisaxun bërí upí oquin isin?

20Usaquian ñucácëxun ca cacëxa:

—Asérabi ca ënëx ꞌën bëchicë bëxuñua bacë́an a ꞌicën. 21Uisa ꞌixun cara bërí upí oquin isia, uin cara usabia bacë́an ꞌicëbi bëpë́xcüaxa cananuna ꞌunaniman. Ax ca mëcócë ꞌicën, ca ñucát, an ca mitsu ñuixunti ꞌicën.

22Judíos unicamaxa bëráma ꞌësënani —uinu ꞌicë unin cara, Jesús ax ca Cristo, ax utia judíos unicaman caíncë, a ꞌicë quixun ñuia, ax ca anua judíos unicama timë́ti xubunua atsíntëcëntima oquin chiquíncë ꞌiti ꞌicë —quia ꞌunánxun ca usoquin cacëxa. 23Usai quia ꞌunánx atumi racuë́quin ca a unin papabëtan aín titan —ax ca mëcócë ꞌicën, a ca ñucát —quixun judíos ꞌapucama cacëxa.

24Usaquian cacëxun ca a judíos unicaman amiribishi cuëntëcënxun bëpë́xcucë uni ñucátëcëancëxa:

—Nucën Papa Diosan ismainun ca nu asérabi ñuixun, ¿uisaxira caramina bëpë́quian? A uni, Jesús, ax ca ꞌatima ꞌicë quixun cananuna ꞌunan.

25Cacëxun ca bëpë́xcucë unin cacëxa:

—Ax cara ꞌatima uni ꞌicë quixun cana ꞌën ꞌunaniman. ꞌËx bëxuñu ꞌixunbi ꞌën bërí iscë, ënëishi cana ꞌunan.

26Cacëxun ca cacëxa:

—¿Mi cara uisox? ¿Uisoquin cara mi bëpë́xcüax?

27Cacëxun ca cacëxa:

—Ashiquin cana mitsu can, cacëxunbi camina cuaisama tan. ¿Uisati caramina ꞌë mitsun ñucatëcënin? Mitsúxribi sapi camina aín ꞌunánmicë uni ꞌiisa tanin.

28Quia ca fariseo unicaman bëpë́xcucë uni ꞌusánquin cacëxa:

—Mixmi aín ꞌunánmicë uni ꞌaínbi cananuna nun Moisésnëan usai nux ꞌinun quixun cuënëo bana ꞌunan. 29Nun cananuna ꞌunan, Moisésbë ca Nucën Papa Dios banacëxa. Usa ꞌixunbi cananuna uinuax cara a uni uaxa quixun ꞌunaniman.

30Cacëxun ca bëpë́xcucë unin cacëxa:

—¿An ꞌë bëpë́xcucëbi caramina a uinuax cara uaxa quixun mitsun ꞌunaniman? 31Cananuna ꞌunanin, an ñu ꞌatima ꞌacë unin bana ca Nucën Papa Diosan cuatima. An a ami sinánquin a rabianan axa cuëëncësa oquinshi ꞌacë uni, aín bana cuni ca Nucën Papa Diosan cuatia. 32Uínsaran nëtë́nbi ca unin, usabi bacë́an uni bëxuñu ca unin bëpë́xcüaxa quixun ñuia cuama ꞌicën. 33Nucën Papa Diosan xuáma ꞌixun ca an usaquin ꞌatsianma.

34Cacëxun ca fariseo unicaman cacëxa:

—Mix camina ꞌuchañubia min tita bacë́an ꞌaish usabi ꞌain. ¿Usa ꞌixunbi caramina min nu bana ñuixuinsa tanin?

Usaquin caquin ca bëpë́xcucë uni anuaxa cuantánun quixun chiquíancëxa.

Jesúsmi sináncëma unicama bëxuñusa

35Fariseo unicaman ca bëpë́xcucë uni chiquíanxa quixuan unin ñuia cuaquin ca Jesusan bariquin mëraxun a bëpë́xcucë uni cacëxa:

—¿Axa uni ꞌinux Nucën Papa Diosnuax uá, ami caramina sinanin?

36Quixuan ñucácëxun ca cacëxa:

—ꞌËx ami sinánun camina ui cara ax ꞌicë quixun ꞌë cati ꞌain.

37Cacëxun ca Jesusan cacëxa:

—Camina isin, an mi cacë, ꞌëx cana a ꞌain.

38Quixuan cacëxun ca cacëxa:

—Asérabi camina mix a ꞌai quixun cana bërí ꞌunanin.

Usaquin caquin ca ami sinánquin aín bëmánon rantin purúnquin a rabiacëxa. 39Rabicëxun isquin ca Jesusan cacëxa:

—ꞌËn a uni ꞌunánmiti ñu ꞌunáncëma pain ꞌaish bëxuñusa ꞌixunbi ca ꞌëmi catamëquin bëxuñumasa ꞌixun unin ꞌunánti ꞌicën. Usa ꞌaínbi ca an —ꞌën cana ñu ꞌunani —quixun sináncë uni ax ꞌëmi catamëtiama ꞌën ꞌunánmicëma ꞌaish usabi bëxuñusa ꞌiti ꞌicën. Usaía ꞌinun cana uacën.

40Usaquian caia cuaquin ca anua ꞌicë fariseo unicaman Jesús cacëxa:

—¿Núxribi caranuna bëxuñu ꞌain?

41Cacëxun ca Jesusan cacëxa:

—Mitsun asérabi ꞌë ñui quicë bana ꞌunáncëma ꞌaish bëxuñusa ꞌaish camina ꞌuchocëma ꞌitsían. Usa ꞌaínbi mitsun —cana a bana cuati —quicë ꞌixúnbi —asérabi ca a bana ꞌicë —quixun sinántisama tancë cupí camina ꞌuchacë ꞌiti ꞌain.

Currently Selected:

Juan 9: cbrPB

Highlight

Copy