Juan 7

Aín xucë́ncaman —Jesús ca Nucën Papa Diosan Bëchicë ꞌicë —quixun sinánma bana

1Usaquin bana ñuixuntancëx ca judíos unicamaxa a ꞌacatsi quiax ꞌësë́nania ꞌunanx, Judea nëtënu ꞌicë ëmacamanu cuainsama tani Galilea nëtënu ꞌicë ëmacamanushi nitsi anubi Jesús ꞌiacëxa. 2Usa ꞌain ca Nucën Papa Dios rabinuxa, judíos unicamax anun Jerusalénu timëti ꞌutanu ꞌiti nëtë, a ꞌurama ꞌain, 3aín xucë́antun Jesús cacëxa:

—Ënuax ca Judea nëtënu cuantan, anuxunmi ñu ꞌaia an min bana cuacë unicaman isnun. 4Camabi unían a ꞌunánti cuëënquin ca unin unë́xun ñu ꞌaima. Usa ꞌain camina ami ꞌacë ñucamaribi Jerusalénu timë́cë unicaman isnun ꞌai cuanti ꞌain.

5Aín xucën ꞌibu ꞌixunbi aín bana cuaisama tanquin ca usaquin cacëxa. 6Cacëxun ca Jesusan cacëxa:

—ꞌËn anun usaquin ñu ꞌati nëtë ca ucëma pain ꞌicën. Usa ꞌain ca mitsux cuainsa tani cuantan, camabi nëtëx ca mitsúnmi anun ñu ꞌati asábi ꞌicën. 7Axa Nucën Papa Diosmi sináncëma unix ca mitsumi nishima, ꞌëmi cuni ca nishia. ꞌËn —ñu ꞌatima camina ꞌai —quixun cacë cupí ca atux ꞌëmi nishia. 8ꞌËx anun anu ꞌiti nëtë ca ꞌicëma pain ꞌicën. Usa ꞌain cana cuaniman. Mitsux ca cuantan.

9Quixun aín xucë́antu catancëx ca Jesús Galileanu tiquiacëxa.

Anun anu timëti ꞌutanu ꞌiti nëtëan Jesús Jerusalénu ꞌiá

10Usaquin cacëxa aín xucë́antu cuanbi ca Jesús atu caxu cuancëxa, unían —ax ca Jesús ꞌicë —quixun ꞌunánunmaishi. 11Cuanx bëbacë ca Jerusalénu timë́cë judíos unicaman —¿uinu cara a uni ꞌic? —cananquin Jesús bariacëxa. 12Bari ñucacanania unicama raírinëx —ax ca upí uni ꞌicë —quicëbëbi ca uni raírinëx, —usama ca. An ca camabi uni parania —quiacëxa. 13Quibi ca judíos unicaman ꞌapucamami racuëti, atúan cuati rabanan unë́axëshi canancëxa.

14Usaía quimainun ca anun Nucën Papa Dios rabinux timë́cë nëtëa sënë́ncëma pain ꞌain, Jesusan anuxun Nucën Papa Dios rabiti xubunu atsínxun bana ñuixuancëxa. 15Ñuixunia cuati ca judíosnën ꞌapucamax ratuti quiacëxa:

—¿Uisa ꞌixun cara ënë unin nun cushicaman ꞌacësaribi oquin quirica ꞌacë ꞌixúnmabi uisai cara cuënëo banacama quia quixun ꞌunanx?

16Quia ca Jesusan cacëxa:

—ꞌËn uni ñuixuncë bana ënëx ca ꞌënbi sináncëma ꞌicën. An ꞌë xuá, an ꞌë sinánmicë ca ënëx ꞌicën. 17Uinu ꞌicë unin cara Nucën Papa Dios cuëënun ñu ꞌaisa tania, an ca ꞌën carana Nucën Papa Diosan ꞌë sinánmicë bana ñuin, carana ꞌënbi sináncë bana ñui quixun ꞌunánti ꞌicën. 18Axa anbi sinanx banacë uni ax ca unían a rabinun quixun sinanishi banaia. ꞌAínbi ca an ñuiquin uni canun quixuan a xuá ashia unin rabiti cuëëncë uni an cuni cëmëquin uni paranima.

19Moisésnën ca uisai cara Nucën Papa Diosan uni ꞌiti ꞌicë quixuan unin ꞌunánun aín bana cuënëocëxa. ¿Usa cat? Usa ꞌaínbi camina achúshi unínbi a bana quicësa oquin ꞌaiman. ¿ꞌËx Nucën Papa Diosan bana quicësabi oi uá ꞌicëbëbi caramina uisa cupí ꞌë ꞌacatsi quin?

20Cacëxun ca judíos unicaman cacëxa:

—Mix camina ñunshin ꞌatimañu ꞌain. ¿Uix cara mi ꞌacatsi quin?

21Cacëxun ca Jesusan cacëxa:

—Anun ñu mëëtima nëtën ꞌën uni pëxcucë a camina sinanin. 22Moisésnën ca —judíos unicamax ca chamaratsu ꞌicëishi judío ꞌicë ꞌunántiocë ꞌiti ꞌicë —quixun cuënëocëxa. Cuënëoíbi ca ax pain usai ca uni ꞌiti icë quiax quiáma ꞌicën, aín rarax pain ca usai ca uni ꞌiti ꞌicë quiax quiacëxa. Anun aín bëchicë bacënxancë ꞌunántioti nëtë axa anun ñu mëëtima nëtë ꞌaínbi ca a nëtën unin aín bëchicë ꞌunántioia. 23¿Mitsun bëtsi nëtën ꞌacësaribi oquin anun ñu mëëtima nëtë́nribi Moisés quicësabi oquin ꞌati cupí, tuá judío ꞌicë ꞌunánti ocë ꞌaíshbi caramina uisa cupí anun ñu mëëtima nëtën ꞌën uni pëxcucëbë ꞌëmi nishin? 24Bëtsi unían ñu ꞌaia isi camina bënëtishi —an ca ñu ꞌatima ꞌaia —quiax quitima ꞌain. Usai ꞌiquinma camina munu upí oquin sinánquin ꞌunánti ꞌain, usoquin ꞌati cara asábi ꞌicë, cara asábima ꞌicë quixun.

—ꞌËx cana Nucën Papa Diosnuax uacën —quiáxa Jesús quia bana

25Usa ꞌain ca Jerusalénu ꞌicë uni raírinëx quiacëxa:

—¿A ꞌacatsi quiáxa ami ꞌësë́nancë uni, ama cara ënëx ꞌic? 26Ca is, camabi unin ismainuan cacëxunbi ca ꞌapucaman uisaquinbi caima. ¿Ënëx ca asérabi Cristo, ax utinu nun caíncë a ꞌicë quixun cara atun ꞌunánx? 27Cristo aia ca unin ꞌunántima ꞌicën, uinuax cara aia quixun. Usa ꞌaínbi cananuna nun uinuax cara Jesús ënëx uaxa quixun ꞌunanin.

28Ësaía canania cuaquin ca Jesusan anuxun Nucën Papa Dios rabiti xubunuxun bana ñuixuni munuma banaquin cacëxa:

—Mitsun camina ꞌë ꞌunan, uinuax carana uan quixun camina ꞌunanin. Usa ꞌaínbi cana ꞌëx, ꞌëxbi ucëma ꞌain. Aín banaxa nëtë́timoi asérabi, an xucëx cana uacën. An ꞌë xuá a camina mitsun ꞌunaniman. 29Anuax uá ꞌixun cana ꞌën a ꞌunan. An ca ënu unun ꞌë xuacëxa.

30Usaquian cacëxun sipuanuxun biisa tanquinbi ca anúan a unin biti nëtëa sënë́ncëma pain ꞌain achúshira unínbi biáma ꞌicën. 31Judíos unin ꞌapucaman ami nishquin Jesús biisa tancëbëbi ca ꞌaisamaira unix ami sinani quiacëxa:

—¿Ënë unían unin ꞌacëma ñu ꞌacësamaira oquin cara axa utinu nun caíncë, Cristo, ax uquin ꞌati ꞌic?

Fariseo unicaman Jesús binun quixun policía xua

32Ësaía ꞌaisamaira uni Jesús ñui quia ca fariseo unicaman cuacëxa. Cuan ca acamabëtan judíos sacerdotenën cushicaman sipuanuinsa bitánun quixun aín suntárucama xuacëxa. 33Xucëxa cuancëbë ca anu ꞌicë unicama cai Jesús quiacëxa:

—ꞌËora pain ënu mitsubë ꞌitancëx cana an ꞌë xuá anu cuanti ꞌain. 34Uinu carana ꞌëx cuani, anu camina mitsux cuantima ꞌain. Usa ꞌain camina bariquinbi cuania ꞌë mëratima ꞌain.

35Quicëbë ca judíos ꞌapucamax ñucacanani quiacëxa:

—¿Uinu cara ënë uni nun mëratimoi cuanti ꞌic? Bëtsi bëtsi ëma, anua griego banan banacë unicama ꞌicë, anua nun aintsi raíri cuancë, anu sapi ca Jesús anu ꞌicë judíosma unicama bana ꞌunánmi cuanti ꞌicën. 36¿Uisai quicë cara an ësaquin nu cacë bana ënëx ꞌic: “Uinu carana ꞌëx cuani, anu camina mitsux cuantima ꞌain. Usa ꞌixun camina bariquinbi cuania ꞌë mëratima ꞌain”?

Anúan unix Nucën Papa Diosbë ꞌiti bana

37Anúan judíos unicama Nucën Papa Dios rabinux Jerusalénu timë́cë nëtëcama sënë́nuxa pëcaracë nëtë ax ca a nëtëcamasamaira ꞌiacëxa. A nëtën ca nirui munuma banaquin Jesusan ësaquin unicama cacëxa:

—Ui unix cara uníxa shiman bamai ꞌunpax ꞌaisa tani bënë́cësaribi oi ꞌënan ꞌiisa tani bënëtia a unix ca ꞌë cai ꞌëmi catamëti ꞌicën. 38Axa asérabi ꞌëmi catamëcë uni, an ca aín nuitunën ꞌë ꞌunánan ꞌën cushiñu ꞌixun uni itsiribi ꞌëmia catamënun ꞌaquinti ꞌicën, Nucën Papa Diosan bana cuënëo quicësabi oquin.

39Nucën Papa Diosan Bëru Ñunshin Upí ca axa ami catamëcë unicamanu uti ꞌicë quixuan ꞌunánun ca Jesusan usaquin unicama cacëxa. Ax bamatancëx baísquitancëx naínu cuancëma pain ꞌaían Nucën Papa Diosan aín Bëru Ñunshin Upí aín unicamabë ꞌinun xucëma pain ꞌain ca Jesusan usaquin unicama cacëxa.

Unían Jesús ñuiquin bëtsi bëtsi oquin sinan

40Ësaquian Jesusan cacëxun cuati ca axa timëcamëꞌëocë uni raírinëx:

—Ënëx ca an Nucën Papa Dios quicë bana unicama ñuixuni utinu nun caíncë a ꞌicë —quiacëxa.

41Quimainuan raíri —ënëx ca Cristo, axa utinu nun caíncë a ꞌicë —quicëbëbi ca raírinëx quiacëxa:

—Cristo ca Galilea menuax utima ꞌicën. 42Nucën Papa Diosan bana cuënëo ca quia, ax ca Davidnën rëbúnqui ꞌiti ꞌicën. Usa ꞌaish ca anuaxa David bacë́an, Belén, anu ꞌicë uni ax ꞌiti ꞌicën.

43Usa ꞌain ca unin Jesús ñui quiquin bëtsi bëtsi oquin sináncëxa. 44Usaquin sinánquin ca bëtsi bëtsi unin sipuanuxun biisa tanquinbi Jesús biáma ꞌicën.

Judíos unicaman cushicamaxa Jesúsmi catamëisama tan

45Usa ꞌain ca Jesús binun xucëx cuanxbia ñancáishi aia isquin sacerdotenën cushicamabëtan fariseocaman suntáru cacëxa:

—¿Uisa cupí caramina bëcëma ꞌain?

46Quixuan cacëxun ca suntárucaman cacëxa:

—Axa ënë uni banacësari banacë uni ca ꞌaíma ꞌicën.

47Cacëxun ca fariseo unicaman cacëxa:

—Mitsuribi sapi ca an paránxa. 48Achúshira nun ꞌapúnbi ca axa quicë aín banax ca asérabi ꞌicë quixun sináncëma ꞌicën. Usaribi oquin ca achúshira fariseo unínbi axa quicë banax ca asérabi ꞌicë quixun sináncëma ꞌicën. 49Usa nun ꞌapucama ꞌain ca ënë unicamax Moisésnëan cuënëo bana ꞌunáncëma cupí ꞌaisama ꞌaish ꞌuchocë ꞌianan uisa oquin cara Nucën Papa Diosan ꞌati ꞌicë usoquin ꞌacë ꞌiti ꞌicën.

50Usaquian fariseocaman caia cuaquin ca Nicodemo, ax paían bëráma Jesúsnu imë́ cuan, axribi fariseo uni ꞌixun cacëxa: 51—Nucën Papa Diosan bana Moisésnën cuënëo ca quia, unin ca añu cara ꞌaxa quixun upí oquin ñucáxunmashi bëtsi uni ꞌuchotima ꞌicën.

52Cacëxun ca sacerdotenën cushicamabëtan fariseo unicaman Nicodemo cacëxa:

—¿Mixribi caramina Galilea menu ꞌicë uni ꞌain? Nucën Papa Diosan bana cuënëo upí oquin isquin camina isti ꞌain, uisa ꞌaíshbi ca an Nucën Papa Dios quicë bana unicama ñuixuncë uni Galilea menu ꞌicë uni ꞌicëma ꞌicën. 53Usaquian ꞌapucaman Nicodemo cacëbë ca unicamax aín xubunu cuancëxa.

Currently Selected:

Juan 7: cbrPB

Highlight

Copy