Juan 16

1Nucën Papa Diosmi manuaxmami ꞌicánun cana ënë bana mitsu ñuixunin. 2Mitsúxmi ꞌënan cupí ca anua judíos unicama timë́ti xubunu atsíntëcëanxmami ꞌinun mitsu chiquíncanuxun ꞌaia. Nucën Papa Dios cuëëncësabi oquin isa ꞌaia quixun sinánquin ca unin mitsu bëtsi bëtsi oquin ꞌati ꞌicën. Usai ꞌia camina isti ꞌain. 3Uisa nëtë́nbi Nucën Papa Dios ꞌimainun ꞌëribi ꞌunáncëma ꞌixun ca usoquin mitsu ꞌati ꞌicën. 4Usoquian unin ꞌatimocëxunmi a sinánun cana usai ca ꞌiti ꞌicë quixun mitsu cain.

Aín Bëru Ñunshin Upitan Nucën Papa Diosan unicama ꞌunánmiti bana

Ësaquinribi ca Jesusan aín ꞌunánmicë unicama cacëxa:

—Camabi nëtën mitsubë ꞌixun ñuixunxunmabi cana cuanuxun bërí, unían bëtsi bëtsi ocëxunmi a sináncanun, ënë banacama mitsu ñuixunin. 5Bërí cana an ꞌën xuá anu cuanin, abë ꞌi. Ësaquin ꞌën cacëxunbi camina mitsu achúshinënbi uinuira carana cuanin quixun ꞌë ñucatiman. 6ꞌË ñucatímabi camina ꞌën cacëx masá nuitucanin. 7Usai ꞌiabi cana asérabi mitsu cain, upitaxmi ꞌë cupí ꞌicanun cana ꞌëx cuanin. ꞌËx cuancëbëma ca an uni ꞌaquinti, Nucën Papa Diosan Bëru Ñunshin Upí, ax mitsubë ꞌi utima ꞌicën. Usa ꞌaínbi cana ꞌëx cuanquin a xuti ꞌain. 8An ca Nucën Papa Diosan bana cuacëma unicama atux ca ꞌuchañu ꞌicë quixun ꞌunánmianan, usai ca ꞌëmi catamëti, uni upí nuituñu ꞌiti ꞌicë quixun ꞌunánmianan, Nucën Papa Diosan ca ꞌëmi sináncëma unicama atun ꞌucha cupí castícanti ꞌicë quixun ꞌunánmiti ꞌicën. 9ꞌËmi catamëti sináncëma cupí ca atux ꞌuchañuira ꞌicën. 10ꞌËn Papanu cuancëmi mitsun ꞌë istëcëncëbëtanma ca atun uisai cara ꞌëmi catamëcë ꞌaish uni upí ꞌiti ꞌicë quixun ꞌunánti ꞌicën. 11An ënë nëtënu ꞌicë unicama ꞌibuacë ñunshin ꞌatimanën ꞌapu ca castícanuxun ꞌuchocë ꞌicën. Usa ꞌain ca axa ꞌëmi catamëcëma unicamanribi, usaribiti ca atux castícancë ꞌiti ꞌicë quixun ꞌunánti ꞌicën.

12ꞌËn a mitsu ñuixunti bëtsi banacamaribi ënu ꞌaínbi camina ꞌën bërí ñuixuncëxunbi uisai quicë cara quixun cuacantima ꞌain. 13ꞌAínbi ca Nucën Papa Diosan Bëru Ñunshin Upí, an Nucën Papa Diosan sináncë ñucama ꞌunáncë, an mitsubë ꞌixun, ꞌën mitsu ñuixuncë banacama ax cara uisaira quicë ꞌicë quixun mitsu ꞌunánmianan uisa ñucamax cara upí ꞌicë mitsu ꞌunánmiti ꞌicën. An ca anbi sináncësa oquinma, Nucën Papa Diosan cacëxuan cuacë ñucamaishi mitsu ꞌunánmiti ꞌicën. ꞌUnánmianan ca uisai cara ꞌën unicama ënë nëtënuax ꞌianan Nucën Papa Diosan nëtënuaxribi ꞌiti ꞌicë quixun mitsu ꞌunánmiti ꞌicën. 14An ca ꞌën sináncë ñucama ꞌunánquin usaribi oquin mitsu ꞌunánmiti ꞌicën. An mitsu ꞌunánmicë cupí camina ꞌë rabiti ꞌain. 15ꞌËn Papan ñu ax ca ꞌënanribi ꞌicën. Aín sinánsaribi ca ꞌën sinan ꞌicën, ꞌën cushix ca aín cushisaribi ꞌicën. Usa ꞌain cana mitsu can, aín Bëru Ñunshin Upí an ca ꞌën sináncë ñucama ꞌunánquin usaribi oquin mitsu ꞌunánmiti ꞌicën.

Masá nuitutancëxbi ca aín unicama chuámarua tani cuëënti ꞌicë quiáxa Jesús quia

16Ënu mitsubë ꞌitancëxbi nëtëtia camina ꞌë istima ꞌain. ꞌIxunbi camina ꞌitsama nëtë́inshi ꞌë istëcëncanti ꞌain. Anu Nucën Papa Dios ꞌicë anu cana cuanin.

17Ësoquian cacëx ca aín ꞌunánmicë unicama raírinëx canancëxa:

—¿Uisai quicë bana cara, “ënu mitsubë ꞌitancëx nëtëtia camina ꞌë istima ꞌain. ꞌIxunbi camina ꞌitsama nëtë́inshi ꞌë ꞌistëcënti ꞌai”, quianan, “anu Nucën Papa Dios ꞌicë anu cana cuanin” quicë ënëx ꞌic? 18Quianan ¿uisa cupi cara “ꞌitsama nëtë́inshi” quiax quin? Cananuna cuatima —quiax canancëxa.

19A ñucácatsi quiáxa canania ꞌunánquin ca Jesusan atu cacëxa:

—Ënu mitsubë ꞌitancëx nëtëtia camina ꞌë istima ꞌain. ꞌIxunbi camina ꞌitsama nëtë́inshi ꞌë istëcënti ꞌai quixun ꞌën mitsu cacë bana ñui caramina cananin? 20Asérabi cana ꞌën mitsu cain, ꞌë cupí camina masá nuituti bëunan mëscúcanti ꞌain. Mitsúxmi usai ꞌimainun ca an Nucën Papa Diosan bana cuacëma unicama cuëënti ꞌicën. Masá nuitutáncëxbi camina mitsux ꞌë cupí chuámarua tani cuëënti ꞌain. 21Anúan bacë́nti nëtën ca xanu paë tani bënëtia. Usa ꞌaínbi ca nanipacëtancëxun aín tuáratsu isi —cana bacë́an —quixun sinani cuëëni, chuámashi tanquin, bëráma paë tancë a manuia. 22Usaribiti camina mitsux bërí masá nuitutin, ꞌaíshbi camina ꞌë istëcëni cuëënquin chuámashirua tanti ꞌain, uinu ꞌicë unínbi sinanamitisama oi.

23A nëtën camina uisai quicë cara ꞌën mitsu cacë bana ënëx ꞌicë quixun ꞌë ñucánuxunma ꞌain. Asérabi cana mitsu cain, ꞌëx quicësabi oquinmi a ñucácëxun ca Nucën Papa Diosan mitsu ꞌaxunti ꞌicën. 24ꞌËnan ꞌixunbi camina ꞌëx quicësabi oquin añu ñubi Nucën Papa Dios ñucácancëma pain ꞌain. Ca ñucát. Ñucácëxun ca cuëëinra cuëënun an mitsu ꞌaxunti ꞌicën.

Axa aín unicamami nishcë unicamasama cushiira ca Jesucristo ꞌicë quicë bana

25Canan ca ësaquinribi Jesusan cacëxa:

—Bëtsi ñu ñuicësoquin cana ꞌën ꞌunánmisa tancë banacama mitsu ñuixuan. Usa ꞌaínbi cana ꞌitsama nëtë ꞌicëbëtan bëtsi ñu ꞌacësoquin ñuiquinma upí oquin cuaquinmi ꞌunánun Nucën Papa Dios ñuiquin mitsu ñuixunti ꞌain. 26Usacëbëtan camina ꞌënan cupí Nucën Papa Diosan mitsu ꞌaquinun ñucáti ꞌain. ꞌËinshi mitsu a ñucáxunti caínquinma camina mitsúnbi abë banaquin a ñucáti ꞌain. 27An ca asérabi mitsu nuibatia. Mitsúxmi ꞌëmi sinánan ꞌëx cana Nucën Papa Diosnuax uá ꞌai quixun sináncë cupí ca an mitsu nuibatia. 28Nucën Papanuax cana ënë nëtënu uacën. Uá ꞌaíshbi cana ënë nëtënuax amiribishi Nucën Papabë ꞌi cuantëcënin.

29Cacëxun ca aín ꞌunánmicë unicaman cacëxa:

—Asábi ca, bërí camina bëtsi ñu ñuicësoquin ñuiquinma —usa ca —quixúnu upí oquin ꞌunánun nu bana ñuixunin. 30Bërí cananuna ꞌunanin, upí oquin camabi ñu ꞌunánquin camina bana ñuixuanan bëtsi ñuribi ꞌan. A cupí cananuna mi ñucátëcënquinma, asérabi ca usa ꞌicë quixun ꞌunánan mix camina asérabi Nucën Papa Diosnuax uá ꞌai quixun ꞌunanin.

31Ësoquian cacëxun ca Jesusan aín ꞌunánmicë unicama cacëxa:

—¿Usa ꞌain caramina bërí pain ꞌëx cana asérabi Nucën Papa Diosnuax uá ꞌai quixun ꞌunanin? 32ꞌUnanibi camina bëríbi camáxbi ꞌë ëbiani tsuáquiquiani amami amamitan cuanti ꞌain. Usai camina bëríbi ꞌë ëbiani cuancanin. Mistúxmi ꞌë ëbiani cuancëbëbi cana ꞌëshi ꞌima, Nucën Papa Dios ax ca ꞌëbë ꞌicën. 33ꞌËmi catamëtími chuámashirua ꞌaish upitax ꞌicánun cana ënë banacama mitsu ñuixuan. Ënë nëtënuax camina mitsux ꞌënan cupía mitsumi nishquin unin ꞌatimocë ꞌinuxun ꞌain. Usai ꞌibi camina bënëtima ꞌëmi cushicanti ꞌain. An ënë menu ꞌicë unicama ꞌibuacë ꞌicëbi cana ꞌën ñunshin ꞌatimanën ꞌapu ñusmon.

Currently Selected:

Juan 16: cbrPB

Highlight

Copy