Jesusan Unicaman Ñu ꞌA 8

Jesucristomi catamëcë unicama Saulonën bëtsi bëtsio

1-2Usa ꞌain ca Saulonën Esteban bamacëbëtan —usoquin ꞌati ca asábi ꞌicë —quixun sináncëxa.

Usoquian Esteban ꞌacáncë ca an Nucën Papa Diosan bana cuacë uni raírinën masá nuituti inquin Esteban bibianquin buánxun maíancëxa. Esteban usoquin rëtancëx atumi nishi tsuáquiruquin ca Jerusalénuaxa ax Jesucristomi catamëcë unicama bëtsi bëtsi ocancëxa. Usaira ocancëx ca tsuáqui Judea me ꞌimainun Samaria mecamanuribi cuanan bëtsi bëtsi ëmanu tsoti cuancëxa. Usai ꞌicëbëbi ca Jesusan aín bana ñuixunun caíscë unicamaishi Jerusalénu bërúacëxa. 3Usa ꞌain ca Saulonën Jesucristomi catamëcë unicama cëñutisa tanquin xubucama oi atsínquin bëbu ꞌimainun xanuribi nirínbianquin sipuanuxun buáncëxa.

II. ËMA RAIRINU ꞌICË UNICAMAN NUCËN PAPA DIOSAN BANA CUA (8.4-12.25)

Samaria menuxun Jesucristomi catamëti bana unin ñuia

4Usa ꞌain ca Jerusalénuaxa tsuáquicë unicama an me itsi, me itsinu cuanquin Cristo ñuiquin unicama Nucën Papa Diosan bana ñuixuancëxa. 5Usocëbëtan ca Felipenënribi Samaria menu ꞌicë ëma achúshi anu cuanxun Cristo ñuiquin unicama bana ñuixuancëxa. 6Ñuixuncëbë timë́quin ca camabi unin —asérabi ca usa ꞌicë —quixun sinánquin aín bana cuacëxa. Cuanan ca Felipenëan uni itsin ꞌacëma ñu ꞌaiaribi isacëxa. 7Ñunshin ꞌatima cuëncëni anuax chiquícë uni isanan ca uni raíri aín xon nicëma ꞌimainun raíri aín niti bëtsicë acamaribi pëxcutia iscancëxa. 8Usaía ꞌicëbë ca a ëmanu ꞌicë unicama chuáma tani cuëëinra cuëëancëxa.

9A ëmanu ca ñubë́ ꞌia uni achúshi, Simón cacë, ax ꞌiacëxa. Usa ꞌixun ca a unin —ꞌëx cana bëtsi unicamasamaira ꞌai —quixun Samarianu ꞌicë unicama paráncëxa. 10Usoquian paráncëx ca camabi uni tuáratsubëbi —ënë unix ca Nucën Papa Diosan cushiñu ꞌicë —quiax ami sináncëxa.

11Usoquian ꞌitsa baritian an paráncë ꞌixun ca camabi unin aín bana cuacëxa. 12Usa ꞌaínbi ca Felipenën —Jesucristomi catamëti ca uni Nucën Papa Diosnan ꞌiti ꞌicë —quixun ñuixuncëxun cuati —a banax ca asérabi ꞌicë —quixun sinani ꞌitsa uni ꞌimainun ꞌitsa xanuribi nashimicë ꞌiacëxa. 13Usaía ꞌicëbë ca Simónribi a bana cuaxun, asérabi ca ax ꞌicë quixun sinani nashimicë ꞌaish Felipebë niacëxa. Abë nitsi ca Felipenëan uni itsin ꞌacëma ñu ꞌaia isi ratuti sináncasmacëxa.

14Usa ꞌain ca Samarianu ꞌicë unínribi ca Nucën Papa Diosan bana cuaxa quixuan ñuicania Jesusan aín bana uni ñuixunun caíscë unicaman Jerusalénuxun cuacëxa. Cuaxun ca Pedrocëñun Juan anua cuantánun xuacëxa. 15-16Xucancëx cuanxuan a rabëtan iscë́xbi ca anu ꞌicë unicama Nucën ꞌIbu Jesúsmi catamëti ꞌunpaxan nashimicë ꞌaíshbi Nucën Papa Diosan Bëru Ñumshin Upíñuma pain ꞌiacëxa. Usa ꞌicë ca atúxribia aín Bëru Ñumshin Upíñu ꞌinun quixun Nucën Papa Dios ñucáxuancëxa. 17Ñucáxunquian Pedrobëtan Juanën aín mëcënan ramëcëx ca atux Nucën Papa Diosan Bëru Ñunshin Upíñu ꞌicancëxa.

18Usa ꞌain ca Jesusan aín bana uni ñuixunun caíscë unicaman aín mëcënan ramëcëxëshi ca uni Nucën Papa Diosan Bëru Ñumshin Upíñu ꞌicë quixun isquin curíqui ꞌinántisa tanquin Simonan Pedrocëñun Juan cacëxa: 19—ꞌËn mëcënan ramëcëx uni aín Bëru Ñumshin Upíñu ꞌinun camina Nucën Papa Diosan cushi ꞌëribi ꞌinánti ꞌai —quixun.

20Cacëxunbi ca Pedronën cacëxa:

—Nucën Papa Diosan cushi ax ca cupíoquin bitima ꞌicën. Min usoquin sináncë cupí camina min curíquibëbi cëñúti ꞌain. 21Nucën Papa Diosan iscëx ca min nuitu upíma ꞌicën. Usa ꞌain camina min añu ñubi nubëtan ësoquin ꞌatima ꞌain. 22-23ꞌËn iscëx camina mix ꞌatimaira nuituñu ꞌain. Usaquin sinani camina ꞌën iscëx nuituñuma ꞌaish sinanatimoi ꞌicësa ꞌain. Usa ꞌaíshbi camina sinanaquin usaquin sinánti ënquin min nuitu mëúmi ꞌatimaquin sináncë a cara mi tërë́nxunti ꞌicë mi tanun Nucën Papa Dios ñucáti ꞌain.

24Cacëxun ca Simonan Pedro cacëxa:

—Min ꞌë cacë bana usai ꞌëx ꞌiaxma ꞌinun camina mitsun Nucën ꞌIbu Dios ꞌë ñucáxunti ꞌain.

25Usa ꞌain ca Pedrobëtan Juanën usai ca Jesús ꞌiaxa quixun caquin an cacë banacama ꞌitsa uni ñuixuancëxa. Usotancëxun, Samaria menu ꞌicë ëmacamanuxun —Jesucristomi catamëti ca uni Nucën ꞌIbu Diosnan ꞌiti ꞌicë —quixun ñuixuntancëx ca Jerusalénu cuantëcëancëxa.

Etiopía nëtënu ꞌicë uni Felipënën bana ñuixuan

26Usaía ꞌian ca Nucën ꞌIbu Diosan xucëxun ángelnën Felipe cacëxa:

—Jerusalénuax anun Gaza cacë ëmanu cuanti bai anu camina cuanti ꞌain.

Usoquian ángelnën anu cuantánun quixun cacë bai ax ca anun anu uni ꞌicëma menu cuanti bai ꞌiacëxa. 27Angelnën cacësabi oi ca Felipe cuancëxa. Cuaníbi ca bainuax Etiopía menu ꞌicë uni achúshibë mëranancëxa. A unix ca Etiopía menu ꞌicë ꞌapu, Candaces cacë xanu, a ñu ꞌaxuanan aín ñucamaribi bërúanxuncë ꞌiacëxa. Usa ꞌaish ca Nucën Papa Dios rabi Jerusalénu cuancë a uni ꞌiacëxa. 28Usa ꞌixun ca Jerusalénuax aín carro, caballonën buáncë, anun aín nëtënu cuantëcëni tsóxun an Nucën Papa Dios quicë bana uni ñuixuncë uni Isaíasnën cuënëo bana isacëxa. 29Isia mëraia ca Felipe Nucën Papa Diosan Bëru Ñumshin Upitan cacëxa:

—A carronu ca cuantan.

30Quia cuatíshi ca amiqui abáquiani cuancëxa. Cuanquin iscëxuan Isaíasnën cuënëo bana ꞌaia cuaquin ca cacëxa:

—¿A mi iscë bana a caramina uisai cara quia quixun cuatin?

31Cacëxun ca cacëxa:

—Cana cuatiman. ¿Uni itsin ꞌë ꞌaquincëxunma carana uisaxun ꞌunánti ꞌain?

Ësoquin caquin ca Felipe abë tsotia ꞌirunun quixun cacëxa.

32Usaquian cacëx ꞌiruax abë tsóxun Felipenën iscëx ca a unían ꞌacë banax ësai quicë ꞌiacëxa:

Unían ꞌanuxun buáncëxbi ca carnero banaima. Carnero ꞌicësaribiti ca unin ꞌanuxun buáncëx ax banacëma ꞌicën. Aín rani unin tëacëxbi ca carnero banaima. Carnero ꞌicësaribiti ca ax banacëma ꞌicën. 33Ax upí sinánñu ꞌicëbia tëmëramicancëbëbi ca uinu ꞌicë uníxbi anun rabanan nëëti banacëma ꞌicën. Axa ënë menu utancëx bama ꞌain ca a unin ñuiti aín rëbúnqui ꞌaíma ꞌicën.

34Ësai quicë quiricanua istancëxun ca Etiopíanu ꞌicë unin Felipe cacëxa:

—Cana mi ñucatin, ¿ui ñui cara Isaías ësai quiacëx? ¿Axbi ñuiacati cara quiacëx? ¿Uni itsi ñui cara quiacëx?

35Cacëxun ca Felipenën quiricanua iscë bana a ñuixunquin, —Jesús ñui ca quia —quixun canan —carnero ꞌicësaribiti ca Jesús unin ꞌatimocëxbi banama ꞌicë —quixun canan —Jesúsmi catamëti ca uni Nucën Papa Diosnan ꞌiti ꞌicë —quixun upí oquin ñuixuancëxa. 36Ñuixunbiancëxun ca baca cuëbí ꞌurama cuanquin, a unin Felipe cacëxa:

—Ënu ca baca ꞌicën. ¿Anuxun caramina ꞌë nashimitima ꞌain?

37Cacëxun ca Felipenën cacëxa:

—Asérabi Jesucristo min nuitunënbi sinanimi ami catamëtia cana mi ꞌati ꞌain.

Quixuan cacëxun ca a unin Felipe cacëxa:

—Jesucristo ax ca asérabi Nucën Papa Diosan Bëchicë ꞌicë quixun cana ꞌunanin.

38Usaquin caxun, aín carro nitsinamitancëx ca a rabëtaxbi ꞌibúquiani bacanu cuancëxa. Cuanx bacanu nixun ca Felipenën Etiopíanu ꞌicë uni nashimiacëxa. 39A nashimitancëx caman ꞌiruiaishia Nucën Papa Diosan Bëru Ñumshin Upitan buáncëx nëtëtia ca a unin Felipe istëcëanma ꞌicën. Istëcënímabi cuëënquiani ca aín menu cuancëxa. 40Usobiania cuancë ca unin Azote cacë ëmanua Felipe mëracëxa. Anuax cuanxun, ëma itsi ëma itsinu cuanquin —Jesucristomi catamëti ca uni Nucën Papa Diosnan ꞌiti ꞌicë —quixun unicama ñuixunbianx ca Cesárea ëmanu bëbacëxa.

Currently Selected:

Jesusan Unicaman Ñu ꞌA 8: cbrPB

Highlight

Copy